རྒྱ་ནག་དམར་ཤོག་ཚོགས་པའི་དམག་སྲིད་ལས་ཁུངས་གལ་ཆེ་ཤོས་ཀྱི་མགོ་ཁྲིད་མེའོ་ཧྭ་ཡིས་སྒྲིག་འགལ་ཚབས་ཆེན་བྱས་པའི་ཉེས་མིང་འོག་ལས་གནས་ནས་ཕྱིར་ཕུད་བཏང་སྟེ་ཞིབ་བཤེར་བྱེད་བཞིན་འདུག
དེ་རིང་རྒྱ་ནག་གཞུང་འབྲེལ་གྱིས་བསྒྲགས་པའི་གནས་ཚུལ་ལྟར་ན། རྒྱ་ནག་དབུས་དམག་སྲིད་ལྷན་ཁང་གི་དམག་ཇུས་ཚན་པའི་འགན་འཛིན་མེའོ་ཧྭ་ཡིས་སྒྲིག་འགལ་ཚབས་ཆེན་བྱས་པའི་ཉེས་མིང་ལས་གནས་ནས་ཕྱིར་ཕུད་བཏང་སྟེ་ཞིབ་བཤེར་བྱེད་བཞིན་ཡོད་འདུག་ལ། རྒྱ་ནག་གིས་སྒྲིག་འགལ་ཚབས་ཆེན་བསགས་པ་ཞེས་པ་ནི་ལྐོག་ཟ་རུལ་སུངས་ཀྱི་གོ་དོན་དུ་བེད་སྤྱོད་བྱེད་ཀྱི་ཡོད་པ་རེད།
དེ་འབྲེལ་རྒྱ་ནག་རྒྱལ་སྲུང་ལྷན་ཁང་གི་མགྲིན་ཚབ་པ་ཝོ་ཆིན་ཟེར་བས་གསར་འགོད་ལྷན་ཚོགས་ཤིག་གི་སྟེང་། མེའོ་ཧྭ་ཡིས་སྒྲིག་འགལ་ཚབས་ཆེན་བྱས་ཡོད་པས་ལས་གནས་ནས་ཕྱིར་ཕུད་བཏང་སྟེ་ཞིབ་བཤེར་བྱ་རྒྱུ་ཡིན་པའི་ཐག་གཅོད་བླངས་ཡོད། ཅེས་བརྗོད་པ་ལས། མེའོ་ཧྭ་ཡི་ནག་ཉེས་ཀྱི་ཞིབ་ཕྲའི་གནས་ཚུལ་གང་ཡང་བརྗོད་མེད་པ་རེད།
མེའོ་ཧྭ་ཕྱི་ཟླ་ ༡༠ ཚེས་ ༧ ཉིན་ཡུ་གུར་རང་སྐྱོང་ཁུལ་ཟེར་བའི་དམག་སྟོན་དུས་ཆེན་ཞིག་གི་སྟེང་ཆེས་མཐའ་མ་མཐོང་ཞིང་། དེ་ནས་བཟུང་གོ་ཚོར་མེད་པར་གྱུར་ཡོད་འདུག་ལ། མེའོ་ཧྭ་འཛིན་བཟུང་ཞིབ་བཤེར་འོག་ཡོད་པའི་ཐོག་གཅོད་དེ་ནི། ཁ་སང་རྒྱ་ནག་གི་རྒྱལ་སྲུང་བློན་ཆེན་ཏུན་ཅིན་འཛིན་བཟུང་འོག་ཡོད་པའི་གནས་ཚུལ་ཕྱིར་གྱར་མ་ཐག་ཏུ་བྱུང་བ་ཞིག་ཆགས་ཡོད། འོན་ཀྱང་། དེ་རིང་གི་གསར་འགོད་ལྷན་ཚོགས་སྐབས། རྒྱལ་སྲུང་ལྷན་ཁང་གི་མགྲིན་ཚབ་པ་ཝོ་ཆིན་ཟེར་བས་རྒྱལ་སྲུང་བློན་ཆེན་ཏུན་ཅིན་ལ་ཞིབ་བཤེར་བྱེད་བཞིན་པའི་གནས་ཚུལ་དེ་ནི་གཞི་རྩ་མེད་པའི་དཀྲོག་གཏམ་ཞིག་སྐོར་གསལ་འདེབས་བྱས་ཡོད་འདུག
མེའོ་ཧྭས་རྒྱ་ནག་དམར་ཤོག་ཚོགས་པའི་དམག་ཁུལ་དམག་དོན་ཨུ་ཡོན་ལྷན་ཁང་གི་དམག་སྲིད་ལས་དོན་ཚོགས་པའི་སྣེ་ཁྲིད་ཅིང་། དེ་ནི་རྒྱ་ནག་གི་དམག་སྲིད་ཀྱི་དབུས་ལས་ཁུངས་གལ་ཆེ་ཤོས་དེ་ཡིན་པ་རེད།
མེའོ་ཧྭ་ནི་ད་ལྟ་རང་ལོ་ ༦༩ ཡིན་ཞིང་ལོ་ ༡༤ སྟེང་ནས་བཅིངས་གྲོལ་དམག་ཁོངས་སུ་ཞུགས། ཕྱི་ལོ་ ༢༠༡༠ ནས་ ༢༠༡༤ བར་བོད་དང་ཡུ་གུར་ཐོག་ལྟ་རྟོག་བྱེད་པའི་ནུབ་རྒྱུད་ལན་ཀྲོའུ་ (Lanzhou )དམག་ཁོངས་སུ་ཞུགས་ཏེ། དམག་ཁུལ་དེའི་དམར་ཤོག་མགོ་ཁྲིད་ཆགས། ཕྱི་ལོ་ ༢༠༡༤ ལོ་ནས་མི་དམངས་བཅིངས་གྲོལ་དམག་གི་མཚོ་དམག་གི་ཁོངས་སུ་ཞུགས་ཤིང་། ཕྱི་ལོ་ ༢༠༡༥ ལོར་བཅིངས་གྲོལ་དམག་གི་དམག་སྤྱི་གཞོན་ཤོས་སུ་གྱུར། ཕྱི་ལོ་ ༢༠༡༧ ལོ་ནས་རྒྱ་ནག་དམར་ཤོག་ཚོགས་པའི་དམག་ཁུལ་དམག་དོན་ཨུ་ཡོན་ལྷན་ཁང་གི་དམག་སྲིད་ལས་དོན་ཚོགས་པའི་མགོ་ཁྲིད་དུ་བསྐོས།
གསར་འགོད་པ། སྐལ་བཟང་སྦྱིན་པ།
