བལ་ཡུལ་ནང་བོད་དོན་ལས་འགུལ་ཐོག་དམ་དྲག་བྱ་རྒྱུ་ཡིན་ཟེར།

བལ་ཡུལ་གཞུང་གིས་རྒྱ་ནག་གཅིག་གི་སྲིད་ཇུས་ལ་རྒྱབ་སྐྱོར་བྱས་ཏེ། བལ་ཡུལ་ནང་རྒྱ་ནག་ཁ་བྲལ་གྱི་ལས་འགུལ་ཐོག་དམ་དྲག་དང་ཐའེ་ཝན་རང་བཙན་ལ་ངོ་རྒོལ་ཡོད་སྐོར་བརྗོད་འདུག

ཟླ་འདིའི་ཕྱི་ཚེས་ ༢ ནས་ ༥ བར་ཉིན་གྲངས་བཞིའི་རིང་བལ་ཡུལ་གྱི་སྲིད་བློན་ཤར་མཱ་ཨོ་ལི་(K P Sharma Oli ) རྒྱ་ནག་ཏུ་གཞུང་འབྲེལ་སྐོར་སྐྱོད་འགྲོ་བཞིན་ཡོད་པ་ལྟར། ཁ་སང་ཕྱི་ཚེས་ ༣ ཉིན་རྒྱ་ནག་གི་རྒྱལ་ས་པེ་ཅིན་དུ་བལ་ཡུལ་གྱི་སྲིད་བློན་ཤར་མཱ་ཨོ་ལི་ཡིས་རྒྱ་ནག་གི་མགོ་ཁྲིད་ཞི་ཅིན་ཕིན་དང་སྲིད་བློན་ལི་ཆང་གཉིས་ལ་ཐུག་འཕྲད་བྱས་ཡོད་ཅིང་། རྒྱ་ནག་གཞུང་གིས་བལ་ཡུལ་ནང་འཛུགས་སྐྲུན་ཡར་རྒྱས་ཆེད་རྒྱ་སྒོར་ས་ཡ་ ༥༠༠ ཡི་རོགས་སྐྱོར་གནང་རྒྱུ་ཡིན་ཞིང་། བལ་ཡུལ་གཞུང་གིས་བལ་ཡུལ་ནང་བོད་དོན་ལས་འགུལ་སྤེལ་རྒྱུ་བཀག་སྡོམ་བྱ་རྒྱུ་བསྐྱར་དུ་ཁས་ལེན་བྱས་འདུག

སྐབས་དེར་བལ་ཡུལ་དང་རྒྱ་ནག་ཟུང་འབྲེལ་གྱིས་བསྒྲགས་གཏམ་ཞིག་སྤེལ་བའི་ནང་། བལ་ཡུལ་གཞུང་གིས་བོད་རང་སྐྱོང་ལྗོངས་སམ་བོད་ཀྱི་གནད་དོན་ནི་རྒྱ་ནག་གི་ནང་སྲིད་ཡིན་པས། བལ་ཡུལ་ནང་རྒྱ་ནག་དང་ཁ་བྲལ་གྱི་ལས་འགུལ་གཅིག་ཀྱང་སྤེལ་གྱི་མི་འཇུག་པའི་ཁས་ལེན་བསྐྱར་དུ་བྱས་འདུག་པ་མ་ཟད། རྒྱ་ནག་གཅིག་གི་སྲིད་ཇུས་ལ་ངོས་འཛིན་གྱིས་ཐའེ་ཝན་ནི་ཁ་བྲལ་ཐབས་མེད་པའི་རྒྱ་ནག་གི་ཆ་ཤས་ཡིན་ཞིང་། ཐའེ་ཝན་གྱི་རང་བཙན་ལ་ངོ་རྒོལ་དང་རྒྱ་ནག་གཅིག་གྱུར་ཡོང་བར་རྒྱབ་སྐྱོར་བྱ་རྒྱུ་ཡིན་སྐོར་སོགས་བརྗོད་འདུག

ད་དུང་སྐབས་དེར་རྒྱ་ནག་དང་བལ་ཡུལ་གྱི་འབྲེལ་ལམ་ཡར་རྒྱས་སླད་དོན་ཚན་དགུ་ཡོད་པའི་གྲོས་མཐུན་ཞིག་ལ་མིང་རྟགས་བརྒྱབ་ཡོད་ཅིང་། གྲོས་མཐུན་དེའི་ནང་དུ་དཔལ་འབྱོར་དང་འཕྲུལ་རིག་མཉམ་ལས་བྱེད་པའི་གན་རྒྱ་དང་། བལ་ཡུལ་གྱི་ཊོ་ཁ་ནས་ཅ་ཧཱ་རི་ (Tokha-Chhahare) བར་གྱི་ས་འོག་ཕུག་ལམ་གྱི་བརྗེ་ལེན་ཡི་གེ ཚོང་འབྲེལ་མཉམ་ལས་གོང་སྤེལ་གྱི་གན་རྒྱ། བལ་ཡུལ་ནས་རྒྱ་ནག་ཏུ་ནང་འདྲེན་བྱེད་པའི་མ་ཧ་ཤ་ཚོང་འབྲེལ། ཕྱི་ལོ་ ༢༠༢༤ ནས་ ༢༠༢༩ བར་གྱི་འཛུགས་སྐྲུན་ལས་གཞི། དཔལ་འབྱོར་དང་འཕྲུལ་རིག་རོགས་སྐྱོར། རྒྱལ་ཚོགས་ཀྱི་རིག་དངོས་ཤུལ་བཞག་ཁོངས་སུ་ཡོད་པའི་ཐོག་བརྩེགས་དགུ་ཅན་གྱི་བྷ་སན་ཌི་པུར་ (Basantpur) ཕོ་བྲང་བསྐྱར་སྐྲུན་གྲུབ་པའི་ལག་འཁྱེར་རྩིས་སྤྲོད། དང་བླངས་རྒྱ་ཡིག་དགེ་རྒན་གྱི་གན་རྒྱ། བལ་ཡུལ་གྱི་བརྙན་འཕྲིན་ཁང་དང་རྒྱ་ནག་གི་དྲ་བརྙན་ཚོགས་པའི་གན་རྒྱ་བཅས་ཡོད་འདུག

ཐུག་འཕྲད་སྐབས་ཞི་ཅིན་ཕིན་གྱིས། སང་ལོ་རྒྱ་ནག་དང་བལ་ཡུལ་རྒྱལ་ཁབ་གཉིས་ཀྱི་བར་འབྲེལ་ལམ་བཙུགས་ནས་ལོ་ངོ་ ༧༠ འཁོར་གྱི་ཡོད་པར་བརྟེན། རྒྱ་ནག་གིས་རྒྱལ་ཁབ་གཉིས་ཀྱི་མཐའ་མཚམས་ཀྱི་འབྲེལ་ལམ་གནས་བབ་སྲུང་སྐྱོབ་བྱ་རྒྱུ་ཡིན་པ་མ་ཟད། རྒྱ་གཞུང་གིས་བལ་ཡུལ་ནང་མཉམ་འབྲེལ་འཛུགས་སྐྲུན་དྲ་བ་བཙུགས་ཏེ། རྒྱུད་གཅིག་ལམ་གཅིག་དང་མཉམ་ལས་འཛུགས་སྐྲུན། མཐའ་མཚམས་ཀྱི་འགག་སྒོ།  འགྲིམ་འགྲུལ། གློག་དྲ། འཕྲིན་གཏོང་སོགས་ཀྱི་ཐོག་ཤུགས་རྒྱག་རྒྱུ་ཡིན་ལ།  བལ་ཡུལ་དེ་སྐམ་སའི་འབྲེལ་མཐུད་རྒྱལ་ཁབ་ཏུ་བསྒྱུར་རྒྱུ་ཡིན་པ་མ་ཟད། ཕྱི་ལོ་ ༢༠༢༥ ལོར་རྒྱ་ནག་ཏུ་བལ་ཡུལ་གྱི་ཡུལ་སྐོར་ལོ་རུ་སྲུང་གཙི་བྱེད་པར་རྒྱབ་སྐྱོར་བྱ་རྒྱུ་ཡིན་ལུགས་བརྗོད་ཡོད་འདུག

བལ་ཡུལ་གྱི་སྲིད་བློན་ཤར་མཱ་ཨོ་ལི་ཡིས། རྒྱ་གཞུང་གིས་བལ་ཡུལ་དེ་སྐམ་སའི་སྒོ་བཀག་རྒྱལ་ཁབ་ནས་སྐམ་སའི་འབྲེལ་མཐུད་རྒྱལ་ཁབ་ཏུ་བསྒྱུར་བར་རོགས་རམ་བྱས་པ་དང་། བལ་ཡུལ་གྱིས་རྒྱ་ནག་གི་རྒྱུད་གཅིག་ལམ་གཅིག་གི་རྩ་དོན་ལ་རྒྱབ་སྐྱོར་བྱ་རྒྱུ་ཡིན་སྐོར་དང་། ཕྱིའི་རྒྱལ་ཁབ་ཁག་གིས་བལ་ཡུལ་རྒྱལ་ཁབ་ཀྱི་མངའ་ཁོངས་སྤྱད་དེ་རྒྱ་ནག་ལ་ངོ་རྒོལ་བྱེད་པ་དང་། རྒྱ་ནག་གི་ཁེ་ཕན་ལ་གནོད་འཚེ་གཏོང་བ། རྒྱ་ནག་གི་ནང་སྲིད་ལ་ཐེ་གཏོགས་བྱེད་པར་ངོ་རྒོལ་བྱ་རྒྱུ། རྒྱ་ནག་དང་མཉམ་དུ་ཕྱོགས་མང་པོའི་མཉམ་ལས་ཐོག་ཤུགས་རྒྱག་རྒྱུ་ཡིན་སྐོར་བརྗོད་འདུག

ཉེ་སྔོན་ཕྱི་ཟླ་ ༡༠ པའི་ནང་ནེའུ་ཡོག་དུས་བབ་ཀྱིས། རྒྱ་ནག་གི་ལྕགས་རི་རིང་པོ་གསར་པས་བལ་ཡུལ་ཐོག་གྲིབ་ནག་འཁོར་དུ་བཅུག་ཅེས་པའི་སྙན་ཐོ་ཞིག་བཏོན་ཏེ། རྒྱ་ནག་གཞུང་གིས་བོད་བལ་ས་མཚམས་ཧེམ་ལ་(Himla)རྫོང་ཁོངས་སུ་རྒྱ་ནག་གཞུང་གིས་ལྕགས་རི་གསར་རྒྱག་བྱས་ཏེ། མཐའ་མཚམས་དམག་དཔུང་འགྲེམས་འཇོག་བྱས་ཡོད་པ་མ་ཟད། ས་གནས་མི་མང་གིས་རྒྱ་ནག་ཁོང་ཚོའི་ས་ཁོངས་སུ་བཙན་འཛུལ་བྱས་ཏེ་དཀའ་རྙོག་བཟོ་ཡི་འདུག་ཅེས་སྐྱོན་བརྗོད་བྱེད་ཀྱི་ཡོད་ཀྱང་། བལ་གཞུང་གིས་རྒྱ་ནག་གཞུང་ལ་བསྟུན་ཤེས་བྱས་ཏེ་དཀའ་ངལ་སེལ་ཐབས་བྱེད་ཀྱི་མེད་པའི་ངོས་འཛིན་ཡོང་གི་ཡོད་པ་རེད།

ཤར་མཱ་ཨོ་ལི་ཡིས་འདི་ལོའི་ཕྱི་ཟླ་ ༧ ཚེས་ ༡༥ ཉིན་ནས་བལ་ཡུལ་གྱི་སྲིད་བློན་གསར་པའི་ལས་ཁུར་དམ་འབུལ་བྱས་ཤིང་། དེ་ནི་ཁོ་པ་བལ་ཡུལ་གྱི་སྲིད་བློན་དུ་འདེམས་ཐེངས་བཞི་པར་གྱུར་ཡོད་པ་རེད། ཕྱི་ལོ་ ༢༠༡༥ ལོར་ཁོ་བལ་ཡུལ་གྱི་སྲིད་བློན་ཡིན་སྐབས། ཁོས་རྒྱ་ནག་དང་ལྷན་དུ་མཉམ་འབྲེལ་གྱི་འབྲེལ་བ་ཤུགས་ཆེན་བཟུང་ཡོད་པ་མ་ཟད། ཕྱི་ལོ་ ༢༠༡༧ ལོར་བལ་ཡུལ་རྒྱ་ནག་གི་རྒྱུད་གཅིག་ལམ་གཅིག་གི་ཚོང་འབྲེལ་ལས་གཞིའི་ནང་ཞུགས། ཕྱི་ལོ་ ༢༠༡༨ ལོའི་ཟླ་ ༦ པར་ཁོས་རྒྱ་ནག་དང་ལྷན་དུ་གཞིས་ཀ་རྩེ་ནས་བལ་ཡུལ་གྱི་རྒྱལ་སའི་བར་མེ་འཁོར་ལྕགས་ལམ་མཐུད་རྒྱུའི་གན་རྒྱ་བཞག  ཁོ་ནི་རྒྱ་གར་ཐོག་ཆབ་སྲིད་ཀྱི་ལངས་ཕྱོགས་མཁྲེགས་པོ་འཛིན་མཁན་ཞིག་ཏུ་ངོས་འཛིན་བྱེད་ཀྱི་ཡོད་སྟབས། ཟླ་འདིའི་ཕྱི་ཚེས་ ༢ ཉིན་རྒྱ་ནག་གོ་ལའི་དུས་བབ་ཀྱིས། ཁོའི་ད་ལན་གྱི་གཞུང་འབྲེལ་སྐོར་སྐྱོད་སྐབས་རྒྱ་གར་གཞུང་འབྲེལ་མི་སྣ་མང་པོས་དོ་སྣང་དང་མི་དགའ་བའི་རྣམ་འགྱུར་བསྟན་ཡོད་ལུགས་སོགས་བརྗོད་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།