དགེ་བཤེས་བློ་བཟང་སྨོན་ལམ་ལགས་ཀྱིས་ཨ་རིའི་གཞུང་དང་ནུབ་ཕྱོགས་རྒྱལ་ཁབ་སོ་སོར་གནས་ཡོད་པའི་བོད་མི་རྣམས་ལ་བོད་ཀྱི་སྐད་ཡིག་དང་རིག་གཞུང་སྦྱོང་རྒྱུར་དམིགས་བསལ་གྱིས་མཐུན་འགྱུར་རོགས་རམ་གནང་རྒྱུའི་འབོད་སྐུལ་ཞུས་ཡོད་འདུག
ཁ་སང་ཕྱི་ཚེས་ ༥ ཉིན་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་གོ་སྒྲིག་འོག རྒྱ་ནག་གིས་ལོ་རྒྱུས་རྫུན་བཟོ་དང་རིག་གཞུང་རྩ་གཏོར་གྱི་སྲིད་ཇུས་ལག་བསྟར་བྱེད་བཞིན་པར་གདོང་ལེན་བྱེད་ཐབས་ཀྱི་ཉན་ཞིབ་ཅིག་འཚོགས་ཡོད་འདུག སྐབས་དེར་ཚོགས་ཆུང་དེའི་ཚོགས་གཙོ་སྐུ་ཞབས་ཁི་རི་སི་ཊོ་ཧྥར་ (Christopher Smith) ལགས་དང་། སྐུ་ཞབས་ཇེ་ཧྥི་མར་ཀེ་ལི་ (Jeff Merkley) ལགས་ཀྱིས་གཙོ་སྐྱོང་གནང་ཞིང་། ཨ་རིའི་གྲོས་ཚོགས་འོག་མའི་འཐུས་མི་ཇིམ་མེག་གྷོ་ཝན་ལགས་དང་། ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨུ་ཛི་ར་ཛེ་ཡ་ (Uzra Zeya) མཆོག ཨ་རིའི་གྲོས་ཚོགས་འོག་མའི་འཐུས་མི་ (Ryan Zinke) ལགས། ཨ་རིའི་གྲོས་ཚོགས་འོག་མའི་འཐུས་མི་ (Zach Nunn) ལགས་སོགས་ལྷན་བཞུགས་གནང་ཡོད་འདུག་ལ། ཉན་ཞིབ་དེའི་ནང་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁག་གསར་འཛུགས་གནང་མཁན་དགེ་བཤེས་བློ་བཟང་སྨོན་ལམ་ལགས་དང་། རྒྱ་ནག་ཆེད་མཁས་པ་རོ་ཝི་ན་ (Rowena He)། ཨ་རིའི་གྲོང་ཁྱེར་ནེའུ་ཡོག་ཏུ་རྟེན་གཞི་བྱས་པའི་ཧོཌ་སི་ཊ་ར་གཙུག་ལག་སློབ་གཉེར་ཁང་ (Hofstra University) གི་ཁྲིམས་ལུགས་སློབ་དཔོན་ཇུ་ལི་ཡན་ (Julian Ku)། དེ་བཞིན་རྒྱལ་སྤྱིའི་ཡུ་གུར་སློབ་གཉེར་ཁང་གི་ཚོགས་གཙོ་རི་ཤ་ཊི་ (Rishat Abbas) དང་། ཨ་རིར་སྐྱེས་པའི་ལྷོ་སོག་འགྲོ་བ་མིའི་ཐོབ་ཐང་ལས་འགུལ་བ་ (Temulun Togochog) བཅས་ཀྱིས་ཉན་ཞིབ་ཀྱི་དཔང་པོ་བྱས་ཡོད་པ་རེད་འདུག
ཉན་ཞིབ་ཀྱི་དཔང་མི་རྣམས་ཀྱིས་འགོ་འབྱེད་གཏམ་བཤད་སྤེལ་བ་དང་སྦྲགས། རྒྱ་ནག་ལས་དོན་ཚོགས་ཆུང་གི་ཚོགས་མི་རྣམས་ཀྱིས་དོགས་འདྲི་ཁག་ལ་ལན་འདེབས་བྱས་སོང་། དེ་ཡང་ཉན་ཞིབ་སྐབས་ལྕམ་ཨུ་ཛི་ར་ཛེ་ཡ་མཆོག་གིས། ང་ཚོའི་ངོས་ནས་རྒྱ་ནག་གིས་བོད་ཀྱི་ལོ་རྒྱུས་རྫུན་བཟོ་དང་བོད་དོན་གནས་ཚུལ་འཁྱོག་བཤད་བྱས་དང་བྱེད་མུས་ཡིན་པ་དེ་འགོག་ཐབས་སུ་ཐབས་ལམ་ག་རེ་བེད་སྤྱོད་བྱེད་དགོས་ཀྱི་འདུག་ཅེས་དྲིས་པར། དགེ་བཤེས་བློ་བཟང་སྨོན་ལམ་ལགས་ཀྱིས། རྒྱ་ནག་གིས་གནས་ཚུལ་འཁྱོག་བརྗོད་དང་བསླུ་བྲིད་ཀྱི་ཚོང་ལས་ལ་བརྟེན་ནས་འཛམ་གླིང་སྟེང་དབང་ཡོད་བཏང་བའི་གནས་སྟངས་ཆགས་པའི་གནས་ཚུལ་རྣམས་གསལ་པོ་རེད། རྒྱ་ནག་གིས་བོད་ནང་དུ་གནས་ཚུལ་རྫུན་བསྒྲགས་བྱེད་ཀྱི་ཡོད་པ་ལྟར་རྒྱལ་སྤྱིའི་སྟེང་དུ་གནས་ཚུལ་རྫུན་གཏམ་བསྒྲགས་ཀྱི་ཡོད་པ་རེད། དེར་བརྟེན་ཨ་རིའི་གཞུང་གི་ངོས་ནས་རྒྱ་ནག་གིས་བོད་ནང་དུ་གནས་ཚུལ་རྫུན་བསྒྲགས་བྱེད་བཞིན་པ་དེ་ཐད་ཀར་བཀག་སྡོམ་བྱེད་མི་ཐུབ་ཀྱང་། ཕྱི་ལ་ཡོད་པའི་བོད་མི་དང་རྒྱལ་སྤྱིའི་སྟེང་གནས་ཚུལ་འཁྱོག་བརྗོད་ཁྱབ་སྤེལ་ཕྱིན་གྱི་ཡོད་པ་དེ་དག་བཀག་སྡོམ་ཡོང་རྒྱུར་རོགས་སྐྱོར་བྱ་དགོས་འདུག དཔེར་ན། ང་ཚོའི་མཉེན་ཆས་ལྟ་བུར་ཆ་བཞག་ན། རྒྱ་ནག་གཞུང་གིས་བསླུ་བྲིད་ཀྱི་ཚོང་ལས་ལ་བརྟེན་ནས་ཀུ་ཤུ་རྟགས་ཅན་གྱི་ཚོང་གཉེར་ཁང་གིས་ང་ཚོའི་མཉེན་ཆས་ཡོངས་རྫོགས་ (App Store) ནས་བཀག་སྡོམ་བྱས་པའི་དཀའ་ངལ་བྱུང་། དེར་བརྟེན་ཨ་རིའི་གཞུང་ནས་མཉེན་ཆས་དེ་ལ་ཚོད་འཛིན་མེད་པར་བཟོ་ཐབས་སུ་རོགས་སྐྱོར་བྱ་དགོས་ཀྱི་འདུག ཅེས་ལན་འདེབས་གནང་ཡོད་འདུག
དགེ་བཤེས་བློ་བཟང་སྨོན་ལམ་ལགས་ཀྱིས། ང་ཚོའི་ཆོས་དང་རིག་གཞུང་རྒྱུན་གནས་བྱེད་པར་བོད་ནང་དུ་གནས་སྐབས་སྲུང་སྐྱོབ་བྱ་རྒྱུ་དཀའ་ལས་ཁག་པོ་རེད། དེར་བརྟེན་ང་ཚོས་ཕྱི་ལོགས་ནས་སྲུང་སྐྱོབ་ཆ་ཚང་བྱེད་ཐུབ་ཀྱི་འདུག དེར་བརྟེན་ཨ་རིའི་གཞུང་དང་འབྲེལ་ཡོད་ཀྱི་རྒྱལ་ཁབ། དེ་བཞིན་ནུབ་ཕྱོགས་རྒྱལ་ཁབ་སོ་སོར་ཡོད་པའི་བོད་མི་རྣམས་ལ་བོད་ཀྱི་སྐད་ཡིག་དང་རིག་གཞུང་སྦྱོང་རྒྱུར་དམིགས་བསལ་གྱིས་མཐུན་འགྱུར་རོགས་རམ་དང་། འཕྲུལ་ལས་དང་འབྲེལ་བའི་ཐོག་ལ་རོགས་སྐྱོར་གནང་རྒྱུའི་འབོད་སྐུལ་ཞུ་རྒྱུ་དང་། དེས་བོད་ཀྱི་རིག་གཞུང་དང་སྐད་ཡིག་སོགས་ཉམས་པ་མེད་པར་སྲུང་སྐྱོབ་བྱེད་ཐུབ་པར་ཕན་ཐོགས་ཆེན་པོ་ཡོང་གི་རེད། ཅེས་གསུངས་འདུག
དགེ་བཤེས་བློ་བཟང་སྨོན་ལམ་ལགས་ཀྱིས་ཉན་ཞིབ་སྟེང་འགོ་འབྱེད་གཏམ་གཤད་སྤེལ་བའི་ནང་། ང་རང་བོད་མི་ཞིག་ཡིན་པའི་ཆ་ནས་ཨ་རིའི་གཞུང་དང་གྲོས་ཚོགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་དང་བོད་མིའི་མགོ་ཁྲིད་རྣམ་པར་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་དང་། ཁྱེད་རྣམ་པའི་རོགས་རམ་གྱིས་ང་ཚོའི་སྤྱི་ཚོགས་ལ་ཕན་ཐོགས་ཆེན་པོ་བྱུང་ཡོད་པ་དེ་ངས་མིག་མཐོང་ལག་ཟིན་བྱུང་། བོད་ཀྱི་སྐད་ཡིག་དང་རིག་གཞུང་ནི་བོད་ནང་དང་བཙན་བྱོལ་སྤྱི་ཚོགས་ནང་དུ་དཀའ་ངལ་ཆེན་པོ་ཞིག་འཕྲད་བཞིན་ཡོད། རྒྱ་ནག་གཞུང་གིས་བོད་ནང་དུ་བོད་མིའི་ངོ་བོ་རྩ་མེད་གཏོང་ཐབས་ཀྱི་སྲིད་ཇུས་ལག་བསྟར་འོག བོད་ཀྱི་སྐད་ཡིག་དང་མི་རིགས་ཀྱི་ངོ་བོ་རྩ་མེད་གཏོང་བཞིན་ཡོད་པ་མ་ཟད། བོད་པའི་ཕྲུ་གུ་བརྒྱ་ཆ་ ༨༠ ཙམ་རྒྱ་གཞུང་གིས་བཙུགས་པའི་བཅའ་སྡོད་སློབ་གྲྭར་བཏང་སྟེ་རྒྱ་སྐད་རྒྱ་ཡིག་གཙོ་བོ་བྱས་ཏེ་སློབ་ཁྲིད་བྱས་ཏེ་རྒྱ་སྒྱུར་སློབ་གསོ་སྤྲོད་མུས་ཡིན་པས། དེས་བོད་མིའི་ངོ་བོ་དང་རིག་གཞུང་རྩ་བརླག་ཏུ་འགྲོ་ཉེན་ཡོད་ལ། བོད་ཀྱི་སྐད་ཡིག་གི་གནས་སྟངས་ཞན་དུ་གཏོང་ཐབས་བྱེད་བཞིན་ཡོད། ད་དུང་རྒྱ་ནག་གིས་བོད་ནང་དུ་དམ་དྲག་ཤུགས་ཆེན་བྱས་དང་བྱེད་མུས་ཡིན་པའི་རྐྱེན་གྱིས་བོད་དོན་ལས་འགུལ་བ་དང་། བོད་སྐད་ཀྱི་ཐོབ་ཐང་ཆེད་དུ་ཞུ་གཏུགས་བྱེད་མཁན་གྱི་མི་སྒེར་ལ་དྲང་བདེན་མིན་པའི་ཉེས་ཆད་གཅོད་པ་དང་། བཙོན་དུ་བཅུག་པ་སོགས་བོད་ནང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་པའི་གནས་སྟངས་སོགས་ཐེར་འདོན་གནང་འདུག
གསར་འགོད་པ། བསྟན་འཛིན་ཕུར་བུ།
