བོད་ཀྱི་ཆབ་སྲིད་བཙོན་པ་རྣམས་ཀློད་གྲོལ་དགོས་པའི་རེ་སྐུལ་ཞུས་འདུག

འདི་ལོའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་ཡུ་རོབ་མཐུན་ཚོགས་ཀྱི་སྐུ་ཚབ་ནས་བོད་ནང་གི་ཆབ་སྲིད་བཙོན་པ་ཁག་ཆ་རྐྱེན་གང་ཡང་མེད་པའི་ཐོག་ནས་ཀློད་གྲོལ་དགོས་པའི་ཁར། རྒྱ་ནག་གཞུང་གིས་བཙན་བཟུང་བྱས་པའི་གྲངས་ཉུང་མི་རིགས་ཁག་གི་གཞི་རྩའི་ཐོབ་ཐང་ལ་བརྩི་འཇོག་དགོས་པའི་རེ་སྐུལ་ཞུས་འདུག

Tibetan protestors in Austria in front of Chinese Embassy on the Human Rights Day to protest against Human Rights Violations in Tibet. Photo: TibetTV.

ཁ་སང་ཕྱི་ཚེས་ ༡༠ སྟེ་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན། ཡུ་རོབ་མཐུན་ཚོགས་ཀྱིས་འགྲོ་བ་མིའི་ཐོབ་ཐང་གི་གནས་བབ་དང་འབྲེལ་བའི་བསྒྲགས་གཏམ་ཞིག་སྤེལ་བའི་ཁྲོད། ཕྱི་ལོ་ ༢༠༡༣ ཙམ་ནས་རྒྱ་ནག་གཞུང་གིས་བོད་མདོ་དབུས་ཁམས་གསུམ་ནང་སྔར་མེད་ཀྱི་དམ་དྲག་དང་བཙན་གནོན་བྱེད་མགོ་བཙུགས་ཡོད་ཅིང་། རྒྱ་ནག་གཞུང་གིས་དོན་མེད་ནག་ཉེས་གཡོགས་ནས་འཛིན་བཟུང་བཀག་ཉར་དང་བཙོན་འཇུག་ཁྲིམས་ཐག་བཅད་པའི་རྩོམ་པ་པོ་སྒོ་ཤེས་རབ་རྒྱ་མཚོ་དང་། བོད་ཀྱི་ཚོང་དཔོན་ཆེན་པོ་རྡོ་རྗེ་བཀྲ་ཤིས། ཨ་ཉག་སེང་སྒྲ་སོགས་གང་མགྱོགས་ཀློད་གྲོལ་གྱིས་འགྲོ་བ་མིའི་གཞི་རྩའི་ཐོབ་ཐང་ལ་བརྩི་འཇོག་བྱེད་དགོས་པའི་རེ་སྐུལ་ཞུས་འདུག

ཁ་སང་སྤེལ་བའི་བསྒྲགས་གཏམ་ཁྲོད། ཕྱི་ལོ་ ༢༠༡༣ ཙམ་ནས་རྒྱ་ནག་གིས་དབྱེ་བགོས་བྱས་པའི་ཞིང་ཆེན་ལྔའི་ནང་གི་བོད་མིའི་གཞི་རྩའི་འགྲོ་བ་མིའི་ཐོབ་ཐང་གི་གནས་བབ་ཉམས་རྒུད་དུ་འགྲོ་མུས་ཡིན་པ་མ་ཟད། བོད་ནང་གི་བོད་མི་རྣམས་ལ་སྨྲ་བརྗོད་དང་། འགྲོ་སྐྱོད། འདུ་འཛོམས་ཀྱི་རང་དབང་མེད་པའི་ཁར། བོད་མི་རྣམས་ལ་ཕྱིའི་རྒྱལ་ཁབ་ཁག་ཏུ་ཕྱོགས་སྐྱོད་ཀྱི་ཐོབ་ཐང་ཀྱང་མེད་ལ། བོད་ནང་གི་བླ་ཆེན་ཁག་བོད་ནང་གི་ས་གནས་ཁག་ཏུ་ཕེབས་རྒྱུའང་དམ་དྲག་ཤུགས་ཆེན་བྱས་ཏེ། རྒྱ་ནག་དམར་ཤོག་ཚོགས་པའི་ལྟ་གྲུབ་ཀྱི་དགོངས་པ་དང་མཐུན་དགོས་ཟེར་བཞིན་བོད་བརྒྱུད་ནང་བསྟན་དང་འབྲེལ་བའི་ཆོས་ཕྱོགས་ཀྱི་བྱེད་སྒོ་ཁག་ལ་སྔར་ལས་ལྷག་པའི་དམ་དྲག་བྱེད་ཀྱི་ཡོད། ཅེས་གསལ་འདུག

ཡང་ང་ཚོས་མུ་མཐུད་དུ་ཆ་རྐྱེན་གང་ཡང་མེད་པའི་ཐོག་རྒྱ་ནག་གཞུང་གིས་བཙོན་འཇུག་ཁྲིམས་ཐག་བཅད་པའི་བྱ་བྲལ་རིན་པོ་ཆེ་མཆོག་དང་། བོད་ཀྱི་ཁོར་ཡུག་སྲུང་སྐྱོབ་བ་དང་ལས་འགུལ་བ་ཨ་ཉག་སེང་སྒྲ། བོད་ཀྱི་རྩོམ་པ་པོ་གྲགས་ཅན་སྒོ་ཤེས་རབ་རྒྱ་མཚོ། བསམ་སྐྱིད་སྒྲོལ་མ། བོད་ཀྱི་ཚོང་དཔོན་རྡོ་རྗེ་བཀྲ་ཤིས་སོགས་གང་མགྱོགས་ཀློད་གྲོལ་དང་ཁོང་ཅག་གི་གཞི་རྩའི་ཐོབ་ཐང་ལ་བརྩི་འཇོག་དགོས་པའི་རེ་སྐུལ་ཞུ་ཡི་ཡོད། ཅེས་གསལ་འདུག་ལ། རྒྱ་ནག་གཞུང་གིས་འདི་ལོར་བཙན་གྱིས་རྭ་རྒྱ་ཤེས་རིག་ནོར་གླིང་སྒོ་རྒྱག་ཏུ་བཅུག་པ་དང་། རྒྱ་སྒྱུར་གྱི་སྲིད་ཇུས་བཏིང་ནས་བོད་ནང་གི་བཅའ་སྡོད་སློབ་གྲྭ་མང་དག་ཅིག་ཏུ་བོད་ཕྲུག་རྣམས་ཆེད་གཏོང་བྱེད་མུས་ཡིན་པའི་སེམས་འཚབ་དང་། རྒྱ་ནག་གཞུང་གིས་བཙན་འཛུལ་བྱས་པའི་གྲངས་ཉུང་མི་རིགས་ཁག་གི་ཐོབ་ཐང་ལ་སྲུང་སྐྱོབ་དང་། ཆོས་རིག་སོགས་སྦྱང་སྤྱོད་བྱ་འཇུག་དགོས་པའི་རེ་སྐུལ་ཞུས་ཡོད་སྐོར་སོགས་གསལ་འདུག

རྒྱ་ནག་གཞུང་གིས་ཕྱི་ལོ་ ༢༠༢༠ ཟླ་ ༡༠ ཚེས་ ༢༦ ཉིན་རྒྱ་ནག་གཞུང་གིས་བོད་ནང་གི་རྩོམ་པ་པོ་གྲགས་ཅན་སྒོ་ཤེས་རབ་རྒྱ་མཚོ་ལགས་གློ་བུར་དུ་འཛིན་བཟུང་བཙན་ཁྲིད་ནས་ལོ་གཅིག་དང་ཟླ་གཅིག་ལྷག་གི་རྗེས་སུ་བཙོན་འཇུག་ཁྲིམས་ཐག་བཅད་དེ། ད་ལྟ་ཉུང་མཐར་ཡང་ཁོང་ཉིད་བཙོན་འཇུག་བྱས་ནས་མི་ལོ་གསུམ་ལྷག་འགྲོ་མུས་ཡིན་ཞིང་། འདི་གའི་གསར་ཁང་གིས་ཕྱི་ལོ་ ༢༠༢༢ ལོར་ཁོང་ཉིད་ལ་གློ་ནད་ཕོགས་ནས་གཟུགས་གཞིའི་གནས་སྟངས་ཇེ་ཞན་དུ་འགྲོ་མུས་ཡིན་པ་ཤེས་རྟོགས་བྱུང་ནའང་། ད་ལྟ་ཁོང་གི་གཟུགས་གཞིའི་གནས་སྟངས་སོགས་ཀྱི་ཐད་གསལ་ཁ་གང་ཡང་མི་འདུག དེ་བཞིན་རྒྱ་ནག་གཞུང་གིས་བོད་འདམ་གཞུང་རྫོང་ནས་ཡིན་པའི་བོད་རིགས་བུད་མེད་སེམས་སྐྱིད་སྒྲོལ་མས་རྒྱལ་ཁབ་ཀྱི་གསང་བ་ཕྱིར་བསྒྲགས་བྱས་པའི་ཉེས་མིང་འོག་ལོ་གཅིག་དང་ཕྱེད་ཀའི་ཁྲིམས་ཐག་བཅད་ནས། ད་ལྟ་ཉུང་མཐར་མི་ལོ་གཅིག་དང་ཟླ་གཅིག་ལྷག་འགྲོ་མུས་ཡིན་ཡང་། ཁོང་མོའི་ཞིབ་ཕྲའི་གནས་ཚུལ་ཐད་ལའང་གསལ་ཁ་གང་ཡང་མེད་པ་རེད།

དེ་བཞིན་ཕྱི་ལོ་ ༢༠༢༣ ཟླ་ ༥ ཚེས་ ༡༠ དང་༡༦། ཟླ་ ༧ ཚེས་ ༥ དང་ ༡༣། ཕྱི་ཟླ ༨ ཚེས་ ༢། ཕྱི་ཟླ་ ༨ ཚེས་ ༢༥ ། ཕྱི་ཟླ་ ༡༢ ཚེས་ ༡༣ བཅས་སུ་ལྷ་ས་འབྲིང་རིམ་མི་མང་ཁྲིམས་ཁང་གི་མདུན་སོགས་སུ་བོད་ཀྱི་ཕྱུག་བདག་ཆེན་མོ་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་ལགས་ཀྱིས་རྡོ་རྗེ་བཀྲ་ཤིས་ལགས་ལ་དྲང་བདེན་མིན་པའི་ཁྲིམས་ཐག་བཅད་པར་བསྐྱར་དུ་ཁྲིམས་ཞིབ་དགོས་པའི་ཞི་བའི་འབོད་སྐུལ་ལས་འགུལ་སྤེལ་སྤེལ་ནས། འདས་པའི་ལོ་ཤས་རིང་ཉུང་མཐར་ཡང་ཨ་ཅེ་མགོན་པོ་སྐྱིད་ལགས་ཐེངས་བཅུ་ཙམ་ལ་བཙན་འཛིན་བཀག་ཉར་དང་གཅར་རྡུང་བྱས་ཡོད་ཅིང་། འདི་ལོའི་ཕྱི་ཟླ ༡༠ ནང་ལྷ་སའི་ཁྲན་ཀཱན་སྤྱི་བདེ་ཉེན་རྟོག་ཁང་ཁྲིམས་ཁང་གིས་མགོན་པོ་སྐྱིད་ཀྱི་ཞུ་གཏུག་དོན་ཚན་ལྔ་ལ་ངོས་ལེན་མ་བྱས་པར་ཁོང་མོར་གང་བྱུང་གཅར་རྡུང་བཏང་བའི་གནས་ཚུལ་སོགས་ཀྱང་རིམ་གྱིས་ཐོན་ཡོད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།