བོད་མི་མང་སྤྱི་འཐུས་རྣམས་ཀྱིས་རྒྱལ་ས་ལྡི་ལི་རུ་བོད་དོན་ཞུ་སྐུལ་གནང་མུས་ཡིན་འདུག

རྒྱ་གར་གྱི་རྒྱལ་ས་ལྡི་ལིར་ཐབས་ཇུས་ཀྱི་ཚོགས་འདུར་ཕེབས་པའི་བོད་མི་མང་སྤྱི་འཐུས་རྣམས་ཚོགས་ཆུང་དྲུག་ཏུ་དབྱེ་ནས་བོད་དོན་ཞུ་སྐུལ་གནང་མུས་ཡིན་འདུག

ཉེ་ལམ་ནས་རྒྱ་གར་གྲོས་ཚོགས་ཀྱི་དགུན་དུས་གྲོས་ཚོགས་འཚོག་མུས་ཡིན་པ་དང་བསྟུན། ཟླ་འདིའི་ཕྱི་ཚེས ༡༦ ཉིན་ནས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཚོགས་གཞོན་སྒྲོལ་མ་ཚེ་རིང་རྣམ་གཉིས་ཀྱིས་དབུས། རྒྱལ་ས་ལྡི་ལིར་ཐབས་ཇུས་ཀྱི་ཚོགས་འདུར་ཕེབས་པའི་སྤྱི་འཐུས་རྣམས་ཚོགས་ཆུང་དྲུག་ཏུ་དབྱེ་ནས། རྒྱ་གར་དབུས་གཞུང་དང་མངའ་སྡེ་ཁག་གི་སྲིད་དོན་ཚོགས་པའི་གནད་ཡོད་མི་སྣ་ཁག་ལ་ཐུག་འཕྲད་བྱས་ཏེ། བོད་མི་མང་སྤྱི་འཐུས་ལྷན་ཚོགས་ཀྱི་སྙན་ཞུ་དོན་ཚན་ ༨ ཅན་ཞིག་དང་། ཞྭ་སྒབ་པའི་ཕྱི་བསྐྱོད་ལམ་ཡིག སྤྱི་ལྷན་ངོ་སྤྲོད་ལྟེབ་ཤོག བོད་ནང་རང་ལུས་མེ་བསྲེགས་བཏང་བའི་སྐོར་གྱི་ལོ་རྒྱུས་སོགས་ཡིག་ཆ་ཁག་ཕུལ་ནས། བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་དང་། ཧིན་བོད་ས་མཚམས་སྐོར་གྱི་གལ་གནད་སོགས་ཀྱི་ཐད་ལ་གླེང་སློང་གནང་ཡོད་པ་མ་ཟད། བོད་དོན་ཞུ་སྐུལ་གྱི་ལས་རིམ་མུ་མཐུད་སྤེལ་མུས་ཡིན་འདུག

ཁ་སང་ཕྱི་ཚེས་ ༡༧ ཉིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སྣེ་འཁྲིད་པའི་སྤྱི་འཐུས་ལྷན་ཚོགས་ཀྱི་ཚོགས་ཆུང་གིས། རྒྱ་གར་རྒྱལ་ས་ལྡི་ལི་རཱོ་ཡལ་གསོལ་མགྲོན་ཁང་དུ་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་བྷར་ཏུར་ཧ་རི་མཱེ་ཏཱབ་ (Shri Bhartruhari Mahtab) ལགས་དང་། ཚོགས་གཞོན་སྐུ་ཞབས་ཏ་པིར་ གྷའོ་ (Tapir Gao) ལགས། རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་རཱ་བྷིན་དྷ་ར་ནཱ་རཱ་ཡན་བྷེ་ཧེ་རཱ་ (Dr. Rabindra Narayan Behera) ལགས་དང་། སྐུ་ཞབས་པར་དིབ་པུ་རོ་ཧི་ཊི་ (Shri Pradeep Purohit) ལགས། སྐུ་ཞབས་སུ་ཀན་ཊ་ཀུ་མར་པ་ནི་གྷ་རཱ་ཧི་ (Shri Sukanta Kumar Panigrahi) ལགས་དང་། སྐུ་ཞབས་ཝི་ཇེ་བྷ་གྷལ། (Shri Vijay Baghel) ལགས་སོགས་དང་ཐུག་འཕྲད་ཀྱིས། བོད་ནང་གི་ཛ་དྲག་གི་གནས་བབ་དང་། རྒྱ་གར་གྲོས་ཚོགས་འཐུས་མི་རྣམས་ཀྱིས་མུ་མཐུད་དུ་བོད་དོན་ལ་རྒྱབ་སྐྱོར་གནང་སྐྱོང་ཡོང་བ་དང་། གྲོས་ཚོགས་སུ་ཡོངས་གྲགས་ཀྱི་ཐོག་ནས་ཧིན་བོད་མཐའ་མཚམས་ཞེས་པའི་ཐ་སྙད་བཀོལ་སྤྱོད་སོགས་གནང་དགོས་པའི་རེ་སྐུལ་ཞུས་ཡོད་པའི་ཁར། ཉེ་ལམ་རྒྱ་ནག་གཞུང་གིས་ཚོང་འབྲེལ་ལ་ཁ་གཡར་ནས་འཛམ་གླིང་གི་རྒྱལ་ཁབ་མང་པོར་བསླུ་བྲིད་དང་གཡོ་ཚོང་བྱེད་མུས་ཡིན་པའི་གནད་དོན་སོགས་ཀྱི་ཐད་ལ་གླེང་སློང་གནང་འདུག

བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་ལགས་ཀྱིས་སྣེ་འཁྲིད་པའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གིས། རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་བྷར་ཏུར་ཧ་རི་མཱེ་ཏཱབ་ (Shri Bhartruhari Mahtab) ལགས་དང་། རྒྱ་གར་གྲོས་ཚོགས་འོག་མའི་འཐུས་མི་ལྕམ་སྐུ་ཀིརི་ཏི་དྷེ་ཝི་ཌེ་བྷར་མན་ (Kriti Devi Debbarman) ལགས། སྐུ་ཞབས་རཱ་ཇཱ་ཀུ་མར་རོ་ཊི་ (Rajkumar Roat) ལགས། སྐུ་ཞབས་སུ་ཌ་མ་པར་སཌ་ (MP Sudama Prasad) ལགས་གཙོས། རྒྱ་གར་གྱི་མངའ་སྡེའི་ཆབ་སྲིད་ཚོགས་པ་ཁག་གི་རྒྱ་གར་གྲོས་ཚོགས་འཐུས་མི་བཅུ་གཉིས་དང་ཐུག་འཕྲད་གནང་སྟེ་བོད་དོན་ཞུ་སྐུལ་གནང་འདུག

ཡང་སྤྱི་འཐུས་ཁག་ཅིག་གིས་རྒྱ་གར་གྲོས་ཚོགས་འོག་མའི་འཐུས་མི་པིར་མ་ཆན་ཌན་ ( Premachandran) ལགས་དང་། སྐུ་ཞབས་པར་ཤོ་ཊམ་རུ་པཱ་ལཱ་ ( Parshottam Rupala) ལགས། སྐུ་ཞབས་ཌིག་ཝི་ཇཱ་ཡཱ་སིངྒ་ (Digvijaya Singh) ལགས་དང་། རྒྱ་གར་དབུས་གཞུང་གི་གྲོས་ཚོགས་ལས་དོན་དང་འབྲེལ་བའི་བློན་ཆེན་སྐུ་ཞབས་ཀི་རེན་རི་ཇི་ཇུ་ (Kiren Rijiju) ལགས་སོགས་སུ་ཐུག་འཕྲད་བྱས་ཏེ། བོད་མི་མང་སྤྱི་འཐུས་ལྷན་ཚོགས་ཀྱི་སྙན་ཞུ་དོན་ཚན་ ༨ འཁོད་ཅན་དང་། ཞྭ་སྒབ་པའི་ཕྱི་བསྐྱོད་ལམ་ཡིག སྤྱི་ལྷན་ངོ་སྤྲོད་ལྟེབ་ཤོག བོད་ནང་རང་ལུས་མེ་བསྲེགས་བཏང་བའི་སྐོར་གྱི་ལོ་རྒྱུས་སོགས་ཡིག་ཆ་ཁག་ཕུལ་ཏེ། བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་དང་། ཧིན་བོད་ས་མཚམས་སྐོར་གྱི་གལ་གནད་སོགས་ཀྱི་ཐད་ལ་གླེང་སློང་གནང་མུས་ཡིན་འདུག

བོད་མི་མང་སྤྱི་འཐུས་ལྷན་ཚོགས་ཀྱིས་སྤེལ་བའི་བོད་དོན་ཞུ་སྙན་དོན་ཚན་བརྒྱད་ནི། ༡) བོད་དེ་ལོ་རྒྱུས་ཐོག་རང་བཙན་གཙང་མའི་རྒྱལ་ཁབ་ཅིག་ཡིན་པ་དང་། ད་ལྟའི་ཆར་རྒྱ་ནག་དམར་གཞུང་གིས་དབང་བསྒྱུར་བཙན་བཟུང་འོག་ཡོད་པར་ངོས་འཛིན་བྱ་རྒྱུ་དང་། ༢) བོད་རྒྱའི་དཀའ་རྙོག་གཉིས་སྨན་དབུ་མའི་ལམ་གྱི་སྲིད་ཇུས་ཐོག་ནས་སེལ་ཐབས་དང་། བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་སུ། སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་དང་། ཡང་ན་མང་གཙོའི་ལམ་ནས་འོས་འདེམས་བྱུང་བའི་བོད་མིའི་དབུ་ཁྲིད་རྣམས་དང་ལྷན་གྲོས་མོལ་ཡོང་རྒྱུར་རྒྱ་ནག་གཞུང་ལ་སྐུལ་འདེད་བྱ་རྒྱུ། ༣) རྒྱ་གཞུང་གིས་བོད་ནང་གི་རང་བྱུང་ཁོར་ཡུག་གཏོར་བཤིག་དང་། དེས་འཛམ་གླིང་སྤྱིའི་གནམ་གཤིས་འགྱུར་ལྡོག་ལ་ཤུགས་རྐྱེན་འགྲོ་བཞིན་པའི་ཐོག་མཉམ་འབྲེལ་རྒྱལ་ཚོགས་ཀྱི་ཁོར་ཡུག་ཚན་པའི་ངོས་ནས་ཚན་རིག་དང་མཐུན་པའི་ཞིབ་འཇུག་གནང་རྒྱུར་འབོད་སྐུལ་ཞུ་རྒྱུ། ༤) བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་རང་དབང་ཅན་གྱི་འགྲོ་བ་མིའི་ཐོབ་ཐང་ཚོགས་པའི་ཐོག་ནས་ཞིབ་འཇུག་བྱ་རྒྱུར་རྒྱ་ནག་གཞུང་ལ་གནོན་ཤུགས་སྤྲད་རྒྱུ་དང་། བསམ་བློ་དང་། སྨྲ་བརྗོད། ཞི་བདེའི་འདུ་འཛོམས་རང་དབང་དང་། འགྲོ་བ་མིའི་ཐོབ་ཐང་སྲུང་སྐྱོབ་དང་འབྲེལ་བའི་མཉམ་འབྲེལ་རྒྱལ་ཚོགས་ཀྱི་དམིགས་བསལ་ཞིབ་འཇུག་གནང་མཁན་རྣམས་བོད་ནང་གཟིགས་སྐོར་ཕེབས་རྒྱུར་གདན་ཞུ་གནང་རྒྱུ། ༥) ཕྱི་ལོ་ ༡༩༩༥ ཟླ་ ༥ པའི་ཚེས་ ༡༧ ནས་ད་བར་གར་སོང་ཆ་མེད་དུ་གྱུར་བའི་༸པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་གིས་གཙོས་པའི་བོད་ནང་གི་ཆབ་སྲིད་བཙོན་པ་རྣམས་འཕྲལ་མར་ཀློད་གྲོལ་དགོས་པ། ༦) བོད་ཀྱི་ཆོས་དང་། སྐད་ཡིག རིག་གཞུང་དང་བཅས་པ་རྩ་མེད་བཟོ་རྒྱུའི་རྒྱ་ནག་དམར་གཞུང་གི་གདུག་རྩུབ་ཅན་གྱི་སྲིད་བྱུས་ལག་བསྟར་བྱེད་བཞིན་པ་རྣམས་འཕྲལ་དུ་མཚམས་འཇོག་ཡོང་རྒྱུར་རྒྱ་གཞུང་ལ་སྐུལ་མ་བྱ་རྒྱུ། ༧) རྒྱ་ནག་དམར་གཞུང་གཅིག་སྡུད་དབང་བསྒྱུར་དང་། དངོས་ཡོད་གནས་ཚུལ་རྫུན་སྒྲིག་ལོག་འགྲེལ་བྱེད་བཞིན་པར་ཁྲིམས་སྒྲིག་དང་སྲིད་བྱུས་གཏན་འབེབས་ཀྱི་ཐོག་ནས་གདོང་ལེན་བྱ་རྒྱུ། ༨) གྲོས་ཚོགས་འཐུས་མི་རྣམ་པས་སྡིངས་ཆ་ཇི་ཡོད་ཐོག་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་གླེང་སློང་ཡོང་ཐབས་བཅས་ཡིན་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།