བོད་ཀྱི་གློག་བརྙན་འཁྲབ་ཁྲིད་པ་ཁྱིམ་གསར་གཞན་ཕན་ལགས་ཀྱི་ཆུ་བཞི་སྒང་དྲུག་ཅེས་པའི་གློག་བརྙན་རྒྱལ་སྤྱིའི་རོ་ཌིར་ཌམ་གློག་བརྙན་དུས་སྟོན་སྟེང་བསྟན་རྒྱུ་ཡིན་འདུག
ཟླ་འདིའི་ཕྱི་ཚེས་ ༣༠ ནས་ཕྱི་ཟླ་ ༢ ཚེས་ ༩ བར་ཡུ་རོབ་རྒྱལ་ཁབ་ནེ་ཐི་ལན་ཌིའི་རོ་ཌིར་ཌམ་གྲོང་ཁྱེར་དུ། རོ་ཌིར་ཌམ་རྒྱལ་སྤྱིིའི་གློག་བརྙན་དུས་སྟོན་ཐེངས་ ༥༤ བ་འཚོགས་གཏན་ཁེལ་ཡོད་ཅིང་། ཐེངས་འདིའི་གློག་བརྙན་དུས་སྟོན་ཐོག་འཛམ་གླིང་གི་རྒྱལ་ཁབ་འདྲ་མིན་གྱི་གློག་བརྙན་ ༥༠༠ ཙམ་མཉམ་ཞུགས་བྱས་ཏེ་གཟིགས་འབུལ་ཞུ་འཆར་ཡོད་པའི་ཁྲོད། བོད་ཀྱི་གློག་བརྙན་ཆུ་བཞི་སྒང་དྲུག་ཅེས་པ་བདམས་ཐོན་བྱུང་སྟེ་གཟིགས་འབུལ་ཞུ་རྒྱུ་ཡིན་འདུག
དེའི་སྐོར་ལ་གློག་བརྙན་འཁྲབ་ཁྲིད་པ་ཁྱིམ་གསར་གཞན་ཕན་ལགས་ཀྱིས་རང་ཉིད་ཀྱི་ངོ་དེབ་སྟེང་། ༧གོང་ས་རྒྱལ་བ་རིན་པོ་ཆེ་མཆོག་དང་བོད་ཀྱི་འཐབ་མོ་བ་རྣམས་རྒྱ་གར་དུ་བཙན་བྱོལ་ལ་ཕེབས་པའི་ལོ་རྒྱུས་གལ་ཆེན་འདི། བོད་མི་རྣམས་ཀྱིས་གློག་བརྙན་བརྒྱུད་ནས་ཐེངས་དང་པོར་གླེང་སློང་བྱེད་བཞིན་ཡོད་པས། གལ་གནད་ཆེ་བའི་ལོ་རྒྱུས་འདི་གསལ་སྟོན་བྱེད་རྒྱུ་ནི་ང་ཚོའི་འོས་འགན་ཡིན། བོད་ནི་རྒྱ་གཞུང་གིས་ཁྲིམས་འགལ་གྱི་ཐོག་ནས་བཙན་བཟུང་བྱས་ཏེ། བཙན་གྱིས་རྒྱ་ནག་གི་ཆ་ཤས་སུ་བསྒྱུར་བཞིན་ཡོད་ཀྱང་། བོད་པའི་བཟང་སྤྱོད་དང་། ཆོས་ཕྱོགས། སེམས་ཚོར་སོགས་ཀྱི་ཐོག་ནས་བོད་ནི་རྒྱ་ནག་གི་ཆ་ཤས་ཤིག་ཏུ་གྱུར་མེད་ལ་མ་འོངས་བའང་འགྱུར་མི་སྲིད། ང་ཚོས་རོ་ཌིར་ཌམ་རྒྱལ་སྤྱིའི་གློག་བརྙན་དུས་སྟོན་གྱི་སྙིང་སྟོབས་དང་དྲང་བདེན། རང་དབང་གི་གློག་བརྙན་བཟོ་སྐྲུན་པ་བཅས་སུ་ཐུགས་རྗེ་ཆེ་ཞུ་རྒྱུ་ཡིན། ཞེས་བརྗོད་འདུག
རོ་ཌིར་ཌམ་རྒྱལ་སྤྱིིའི་གློག་བརྙན་དུས་སྟོན་གྱི་ངོ་སྤྲོད་ནང་། ཨ་འབྲུག་མགོན་པོ་བཀྲ་ཤིས་ཀྱིས། ང་ཚོའི་ས་ཆ་དང་། ང་ཚོའི་ཆོས་ལུགས། ང་ཚོའི་རིག་གཞུང་། ༸གོང་ས་རྒྱལ་བ་རིན་པོ་ཆེ་བཅས་ལ་ཉེན་ཁ་ཆེན་པོ་འདུག ཅེས་བོད་ཀྱི་མི་མང་འཐབ་མོ་བའི་ཚོགས་འདུའི་ཐོག་ཉེན་བརྡ་བཏང་ཡོད་པ་རེད། དེ་ནི་ཕྱི་ལོ་ ༡༩༥༨ ལོར་རྒྱ་ནག་བཅིངས་གྲོལ་དམག་དཔོན་ཐན་ཟེར་བས་བཀོད་འདོམས་འོག་བོད་མི་ངོ་རྒོལ་བ་རྣམས་སྙིང་རྗེ་མེད་པར་དམར་གསོད་བྱས་པ་མ་ཟད། དགོན་སྡེ་ཁག་གཏོར་བཤིག་བཏང་སྟེ་བོད་ཀྱི་ས་ཆར་བཙན་བཟུང་དམ་དྲག་བྱས། མགོན་པོ་བཀྲ་ཤིས་དང་འཐབ་མོ་བ་རྣམས་ཀྱིས་རང་ཉིད་ཀྱི་རྒྱལ་ཁབ་སྲུང་སྐྱོབ་དང་རང་དབང་ཆེད་དུ་མེ་མདའི་ཁ་གཏད་བཅག་ཡོད་པ་རེད།
ཁྱིམ་གསར་གཞན་ཕན་གྱི་ལོ་རྒྱུས་འཐབ་འཛིང་གི་གློག་བརྙན་ཆུ་བཞི་སྒང་དྲུག་ཅེས་པའི་ནང་བོད་མིའི་དཔའ་ངར་ལྡན་པའི་དམག་དོན་གྱི་རྣམ་པ་གསལ་སྟོན་བྱས་ཡོད། འདི་ནི་དགེ་འདུན་པ་ཚོས་ན་བཟའ་ཕུད་དེ་མེ་མདའ་བཟུང་བའི་གློག་བརྙན་ཞིག་ཡིན་པ་མ་ཟད། གཡུལ་ས་རུ་རྒྱལ་གཅེས་པ་ཚོའི་དཔའ་རྟུལ་དང་། སྙིང་སྟོབས། མཐུན་སྒྲིལ། དམིགས་ཡུལ། བློས་གཏོང་བཅས་མངོན་པར་གསལ་བའི་གློག་བརྙན་ཞིག་ཡིན། ཁོད་ཡངས་སར་བླངས་པའི་བརྙན་ཆས་ཀྱི་ཉམས་དང་། མཐོ་སྒང་གི་དཔའ་བོའི་བརྗིད་ཉམས། འཕར་ལྡིང་དྲག་པོའི་རོལ་དབྱངས། འགྱུར་ལྡོག་མང་པོའི་གློག་བརྙན་གྱི་བྱུང་རིམ་བཅས་ཀྱིས་ཁྱིམ་གསར་གཞན་ཕན་གྱིས་ཨ་རིའི་ཧོ་ལི་ཝུ་ཌིའི་གློག་བརྙན་གྱི་ཁྱད་ཆོས་དང་རྣམ་པ་མངོན་པར་བྱས་ཡོད། འོན་ཀྱང་འདི་ནི་མཐའ་མཚམས་ཀྱི་བཙན་འཛུལ་ལ་བསྟོད་གླུ་ལེན་པ་ཞིག་མིན་པར། འགོག་རྒོལ་དང་རང་བཙན་གྱི་གླུ་དབྱངས་ཤིག་ཡིན། ཞེས་གསལ་འདུག
གློག་བརྙན་ཆུ་བཞི་སྒང་དྲུག་ནི་ཁྱིམ་གསར་གཞན་ཕན་ལགས་ཀྱིས་རྩོམ་འབྲི་དང་འཁྲབ་ཁྲིད་བྱས་ཡོད་པ་དང་། བདེ་བ་ཚང་རྡོ་རྗེ་དབང་འདུས་ལགས་ཀྱིས་བཟོ་སྐྲུན་བྱས་ཡོད་ཅིང་། གློག་བརྙན་དེའི་ནང་ཨ་རིའི་ཧོ་ལི་ཝོ་ཌིའི་གློག་བརྙན་བཟོ་སྐྲུན་པ་གྲགས་ཆེ་ཅན་བྷི་རཱན་ཌོན་(Brandon Cox) ལགས་དང་། རྒྱ་གར་དང་བལ་ཡུལ་གྱི་བརྙན་ལེན་པ་གྲགས་ཅན་པ་ཁག་ཅིག་གིས་བརྙན་ལེན་བྱས་ཡོད་འདུག གློག་བརྙན་དེའི་ཕབ་སྐྲུན་ས་གཙོ་བོ་ནི་བལ་བོད་གཉིས་ཀྱི་ས་མཚམས་གློ་སྨོན་ཐང་ཁུལ་དུ་ཡིན་པ་དང་། གློག་བརྙན་འཁྲབ་སྟོན་བྱེད་མཁན་གྱི་མི་སྣ་གཙོ་བོ་བོད་པ་ཡིན་འདུག གློག་བརྙན་དེར་ཁྱོན་ལེའུ་བཞི་ཡོད་པའི་ཁྲོད་ལེའུ་དང་པོ་འདས་ལོའི་ཕྱི་ཟླ་ ༥ པའི་ནང་འགྲེམས་སྤེལ་བྱས་ཡོད་འདུག
རོ་ཌིར་ཌམ་རྒྱལ་སྤྱིའི་གློག་བརྙན་དུས་སྟོན་ནི་ཕྱི་ལོ་ ༡༩༧༢ ལོའི་ཟླ་བདུན་པར་གློག་བརྙན་འཁྲབ་ཁྲིད་པ་ཧུའུ་བྷི་བྷལ་སི་( Huub Bals) ལགས་མགོ་བཙུགས་བྱས་ཡོད་ཅིང་། དེ་ནི་གློག་བརྙན་གྱི་ཐུན་མོང་མ་ཡིན་པའི་ཁྱད་ཆོས་དང་། གསར་གཏོད། ཚོང་གཉེར་མིན་པའི་གློག་བརྙན་འཕེལ་རྒྱལ་འགྲོ་ཆེད་དམིགས་པ་ཞིག་ཡིན་འདུག ཕྱི་ལོ་ ༡༩༨༣ ལོའི་ནང་གློག་བརྙན་གྱི་ལས་འཆར་ལ་མ་དངུལ་གཏོང་བའི་རོགས་རམ་བྱས་པ་དང་། རྗེས་སུ་གློག་བརྙན་དུས་སྟོན་གྱི་ཁྲོམ་རྭའི་སྒྲིག་གཞི་ཅན་བསྒྱུར་ཞིག་ཡིན་འདུག ཕྱི་ལོ་༡༩༨༨ ལོར་འཁྲབ་ཁྲིད་པ་ཧུའུ་བྷི་བྷལ་སི་ལགས་འདས་གྲོངས་བྱུང་སྟེ་དྲན་གསོ་ཞུ་ཆེད། འཕེལ་རྒྱས་འགྲོ་བཞིན་པའི་རྒྱལ་ཁབ་མང་པོ་མང་ཁོང་གི་མིང་ཐོག་ནས་ཐེབས་རྩ་ཁང་ཞིག་བཙུགས་ཏེ་གློག་བརྙན་བཟོ་སྐྲུན་ཐོག་རྒྱབ་སྐྱོར་བྱས། ཕྱི་ལོ་ ༡༩༩༥ ལོ་ནས་ལོ་གསུམ་རེ་མཚམས་སུ་གཞོན་སྐྱེས་གློག་བརྙན་བཟོ་སྐྲུན་པར་གཟེངས་རྟགས་ཕུལ་ཡོད་པ་རེད། ཕྱི་ལོ་ ༢༠༢༡ བོད་ནང་གི་གློག་བརྙན་བཟོ་སྐྲུན་པ་གདུགས་དཀར་ཆེ་རིང་གིས་ཁྱེད་ཆེད་དུ་གླུ་ཞིག་ལེན་ཞེས་པའི་གློག་བརྙན་གཟིགས་འབུལ་ཞུས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
![Hungary's Laszlo Krasznahorkai poses for photographers in London [File: Matt Dunham/AP]](https://tibettimes.net/wp-content/uploads/2025/10/Screenshot-2025-10-10-at-2.23.17-PM-360x180.png)
