གར་སོང་ཆ་མེད་དུ་གྱུར་བའི་བོད་མི་དགུའི་གནས་ཚུལ་མཁོ་སྤྲོད་དགོས་པའི་དགོས་འདུན་བཏོན་འདུག

རྒྱལ་ཚོགས་ཀྱི་ཆེད་མཁས་པ་ཚོས་རྒྱ་ནག་གཞུང་གིས་བོད་ནང་ནས་འཛིན་བཟུང་བྱས་ཏེ་གར་སོང་ཆ་མེད་དུ་གྱུར་བའི་བོད་མི་དགུའི་གནས་ཚུལ་མཁོ་སྤྲོད་བྱེད་དགོས་པའི་དགོས་འདུན་བཏོན་འདུག

མཉམ་འབྲེལ་རྒྱལ་ཚོགས་ཀྱི་དམིགས་བསལ་རྟོག་དཔྱོད་པ་དྲུག་དང་དམིགས་བསལ་འགྲོ་བ་མིའི་ཐོབ་ཐང་རྡོག་རོལ་གྱི་ལས་དོན་ཞིབ་འཇུག་ཚོགས་ཆུང་གསུམ་གྱི་སྐུ་ཚབ་བཅས་ཀྱིས། རྒྱ་ནག་གཞུང་གིས་བོད་དང་ཡུ་གུར་སོགས་རྒྱ་ནག་གི་དབང་སྒྱུར་དང་བཙན་གནོན་འོག་གནས་པའི་གྲང་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་བཞིན་པའི་གནས་སྟངས་གླེང་སློང་དང་སྦྲགས། བོད་ནང་ནས་གར་སོང་ཆ་མེད་དུ་གྱུར་བའི་བོད་མི་དགུའི་གནས་སྟངས་དང་གར་ཡོད་སོགས་ཀྱི་ཞིབ་ཕྲའི་གནས་ཚུལ་མཁོ་སྤྲོད་བྱེད་དགོས་པའི་དགོས་འདུན་བཏོན་འདུག

གནད་དོན་དེའི་ཐད་རྒྱལ་སྤྱིའི་བོད་དོན་ལས་འགུལ་ཁང་གིས། རྒྱལ་ཚོགས་ཀྱི་དམིགས་བསལ་འགྲོ་བ་མིའི་ཐོབ་ཐང་གི་ལས་དོན་ཚོགས་ཆུང་གིས་རྒྱ་ནག་གཞུང་གི་དྲག་གནོན་འོག་བོད་མི་དང་། ཡུ་གུར། རྒྱ་རིགས་འགྲོ་བ་མིའི་ཐོབ་ཐང་སྲུང་སྐྱོབ་པ་སོགས་ཀྱི་གནས་སྟངས་གླེང་སློང་གནང་བར་དགའ་བསུ་ཞུ་བཞིན་ཡོད། འགྲོ་བ་མིའི་ཐོབ་ཐང་གི་གནས་སྟངས་འདྲ་མིན་ཡོད་པའི་ས་ཁུལ་མང་པོའི་གནས་སྟངས་ཐོག་གྲོས་བསྡུར་བྱས་ནས་ཡོང་དུས།  ང་ཚོས་རྒྱ་ནག་གི་འགྲོ་བ་མིའི་ཐོབ་ཐང་གི་དཀའ་ངལ་ཐད་གདོང་ལེན་བྱེད་དགོས་ས་ཇེ་མང་དུ་འགྲོ་བཞིན་ཡོད། རྒྱལ་སྤྱིའི་སྤྱི་ཚོགས་ཀྱིས་ཀྱང་རྒྱལ་ཚོགས་ཀྱི་སྙན་ཐོ་འདི་སྣང་མེད་དུ་མི་འཇོག་པར། རྒྱ་ནག་གི་དབང་འཛིན་པ་ཚོ་དང་འབྲེལ་བ་འཛིན་རྒྱུར་མཇུག་སྡོམ་རྒྱག་དགོས། མཉམ་འབྲེལ་རྒྱལ་ཚོགས་ཀྱི་ཆེད་མཁས་པ་ཚོའི་སྙན་ཐོ་དེས་རྒྱ་ནག་གཞུང་ནི་ཁྲིམས་ལུགས་དང་དམངས་གཙོ། འགྲོ་བ་མིའི་ཐོབ་ཐང་བཅས་ལ་བརྩི་འཇོག་གང་ཡང་མེད་པར་སྲིད་དབང་སྒེར་གཅོད་པ་ཡིན་པ་སོགས་གསལ་སྟོན་བྱས་འདུག

རྒྱལ་ཚོགས་ཀྱི་ཆེད་མཁས་པ་ཚོས་ད་ལྟ་གར་ཡོད་དང་བདེ་འཇགས་སོགས་ཀྱི་གནས་ཚུལ་མཁོ་སྤྲོད་བྱེད་པའི་དགོས་འདུན་བཏོན་པའི་ཁྲོད།  ཕྱི་ལོ་ ༢༠༢༢ ཟླ་ ༨ ཚེས་ ༢༤ ཉིན་རྒྱ་ནག་གཞུང་གིས་འཛིན་བཟུང་བྱས་པའི་བོད་མི་ཕྱུར་དར། དགེ་ལོ། ཚེ་རྡོ། འབའ་མོ། ཀོ་རིས་བཅས་དང་། ཕྱི་ལོ་ ༢༠༢༤ ཟླ་ ༩ ནང་ཀིརྟི་དགོན་པའི་གྲྭ་བློ་བཟང་བསམ་གཏན་ལགས་དང་བློ་བཟང་འཕྲིན་ལས་ལགས། དེ་བཞིན་ཚེ་རིང་བཀྲི་ཤིས་ལགས་དང་དབང་སྐྱིད་ལགས་བཅས་ཁྱོན་བོད་མི་དགུ་འདུག་ལ། ཕྱི་ལོ་ ༢༠༢༢ ཟླ་ ༨ ཚེས་ ༢༤ ཉིན་བོད་མི་ཕྱུར་དར། དགེ་ལོ། ཚེ་རྡོ། འབའ་མོ། ཀོ་རིས་བཅས་ལ་བསང་གསོལ་དང་ལབ་རྩེ་བསྟད་པ། ཞབས་རིམ་བསྒྲུབས་པ་སོགས་ཆོས་ཕྱོགས་ཀྱི་བྱེད་སྒོ་སྤེལ་བའི་ཉེས་མིང་གི་འོག་རྒྱ་གཞུང་གིས་འཛིན་བཟུང་བཙན་ཁྲིད་བྱས་ཡོད་པ་མ་ཟད།  ཁོང་ཚོ་གསེར་རྟ་རྫོང་གི་བཙོན་ཁང་དུ་ཁྲིད་རྗེས་བོད་མི་ཕྱུག་དར་ལགས་སུ་རྒྱ་གཞུང་ཉེན་རྟོག་པས་གཅར་རྡུང་དང་རྡུང་རྡེག་བྱས་ཏེ་དམར་གསོད་བཏང་ཡོད་ཅིང་། རྒྱ་བོད་མི་ཕྱུག་དར་ལགས་ཀྱི་ནང་མི་གཉེན་ཉེ་ཚོས་ཕྱུག་དར་ལགས་རྒྱ་གཞུང་ཉེན་རྟོག་པས་ཉེས་རྡུང་བཏང་ནས་བསད་པ་མིན་པའི་ཡིག་ཆར་མཛུབ་རྟགས་མ་བརྒྱབ་ཚེ། འདས་པོའི་སྐུ་ཕུང་རྩིས་སྤྲོད་བྱ་རྒྱུ་མིན་པའི་འཇིགས་སྐུལ་སོགས་བྱས་མྱོང་ལ། ཁོང་ཚོ་ནི་བོད་གསེར་རྟ་རྫོང་གི་ཁེས་སྐོར་ཡུལ་ཚོའི་ཨ་བོས་དཀྱིལ་རི་མགོ་སྡེ་བའི་མི་ཡིན་ལ། ད་སྔ་བར་གང་ཡོད་དང་བདེ་འཇགས་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད། དེ་བཞིན། ཕྱི་ལོ་ ༢༠༢༤ ཟླ་ ༩ ནང་རྔ་བ་ཀིརྟི་དགོན་པའི་གྲྭ་བློ་བཟང་བསམ་གཏན་ལགས་དང་བློ་བཟང་འཕྲིན་ལས་ལགས། དེ་བཞིན་ཚེ་རིང་བཀྲི་ཤིས་ལགས་དང་དབང་སྐྱིད་ལགས་རྒྱུ་རྐྱེན་གང་ཡིན་གསལ་ཁ་མེད་པར་གང་བྱུང་འཛིན་བཟུང་བཙན་ཁྲིད་བྱས་པ་ནས་ད་བར་ཁོང་ཚོ་བདེ་འཇགས་ཡིན་མིན་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།

ཡང་རྒྱལ་ཚོགས་ཀྱི་ཆེད་མཁས་པ་ཚོས། རྒྱ་ནག་གིས་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ་གནོད་འཚེ་ཕོག་མཁན་གྱི་ཁྲོད་དུ། ཡུ་གུར་བའི་དཔལ་འབྱོར་རིག་པ་བ་གྲགས་ཅན་དང་ལས་འགུལ་བ་(Ilham Tohti) ལགས་དང་། རྒྱ་ནག་གི་གསར་འགོད་པ་དང་ཁྲིམས་རྩོད་པ་ཟུར་བ་ཀྲང་ཁྲན  (Zhang Zhan)། རྒྱ་ནག་གི་ངལ་རྩོལ་དང་འགྲོ་བ་མིའི་ཐོབ་ཐང་སྲུང་སྐྱོབ་པ་ཝང་ཇིན་བྷིན་ (Wang Jianbing)། འགྲོ་བ་མིའི་ཐོབ་ཐང་གི་ཁྲིམས་རྩོད་པ་ཞའེ་ཡཱང་ (Xie Yang) སོགས་ཀྱི་གནས་སྟངས་ཁ་གསལ་བཟོ་དགོས་པའི་དགོས་འདུན་ཀྱང་བཏོན་འདུག

ད་ལན་མཉམ་འབྲེལ་རྒྱལ་ཚོགས་ཀྱི་དམིགས་བསལ་རྟོག་དཔྱོད་པ་དྲུག་དང་དམིགས་བསལ་འགྲོ་བ་མིའི་ཐོབ་ཐང་གི་ལས་དོན་ཚོགས་ཆུང་གི་སྐུ་ཚབ་གསུམ་བཅས་ཀྱིས། རྒྱ་ནག་གཞུང་ནས་འབྱུང་འགྱུར་ཉིན་གྲངས་ ༦༠ ནང་ཚུད་དུ་གོང་བརྗོད་མི་སྣ་དག་གི་གནས་སྟངས་ཐད་གསལ་འདེབས་བྱ་དགོས་པ་ནན་བརྗོད་བྱས་འདུག་ལ། དམིགས་བསལ་བོད་མི་དགུའི་གནས་སྟངས་ནི་རྒྱ་ནག་གིས་འདོད་མོས་མེད་བཞིན་དུ་བཙན་ཤེད་ཀྱིས་འཛིན་བཟུང་བྱས་རྗེས་གར་སོང་ཆ་མེད་དུ་གྱུར་བ་དང་། གང་འདོད་དུ་བཀག་ཉར་བྱས་པས་ཡིན་འདུག་ལ། རྒྱལ་ཚོགས་ཀྱི་དམིགས་བསལ་ཆེད་མཁས་པ་ཚོས་བསམ་བློའི་རང་དབང་དང་ཞི་བའི་འདུ་འཛོམས། འགྲོ་བ་མིའི་ཐོབ་ཐང་རྩོད་ལེན་བྱེད་མཁན་གྱི་གནས་སྟངས་དང་། ཆོས་ལུགས་དང་དད་མོས་རང་དབང་བཅས་ཀྱི་ལས་དོན་ཐད་གཞུང་དང་ཚོགས་སྒེར་སོགས་ཀྱི་ཁ་གཏད་དུ་ལངས་ནས་ལས་དོན་གཉེར་མུས་ཡིན་འདུག

གསར་འགོད་པ། སྐལ་བཟང་སྦྱིན་པ།