རྩོམ་ཁུངས། བོད་ཀྱི་དུས་བབ།
རྩོམ་པ་པོ། རྒྱལ་མཚན་ཆོས་གྲགས། ཨ་རིའི་བོད་སྐད་རླུང་འཕྲིན་ཁང་གི་རྒྱ་གར་ལྷོ་ཕྱོགས་གསར་འགོད་པ།
ཕྱི་ལོ་ ༢༠༢༥ ཟླ་༡ ཚེས་༧ ཉིན་ཕ་ཡུལ་བོད་གངས་ལྗོངས་གཙང་ཕྱོགས་སྟོད་དིང་རི་ས་ཁུལ་དུ་རང་བཞིན་འབྱུང་བ་འཁྲུག་པའི་ཤུགས་ཚད་རིམ་པ་༧།༠༡ གི་འཇིག་སུ་རུང་བའི་ས་ཡོམ་གོད་ཆག་བྱུང་བ་འདིས་ས་གནས་དེའི་མི་རྒྱུ་ཟོག་གསུམ་ལ་གནོད་སྐྱོན་ཚབས་ཆེན་བཟོས་ཡོད། དྲོ་སྐྱིད་ལྡན་པའི་ཁྱིམ་ཚང་སྟོང་ཕྲག་བརྒལ་བ་དུས་གཅིག་ཏུ་གཞིག་རལ་དུ་བཏང་བ་དང་། སྤུན་ཟླ་ ༡༤༠ བརྒལ་བའི་རྩ་ཆེའི་ཚེ་སྲོག་འཕྲོག་པ་མ་ཟད་དེ་བས་མང་བ་ཞིག་ལ་ཚད་གཞི་མི་འདྲ་བའི་རྨས་སྐྱོན་ཕོག་ཏེ་མི་རྣམས་སྐྱོ་གདུང་དང་མིག་ཆུས་བརླན་ཏེ་ས་གཞི་ཡོངས་སྐྱོ་སྣང་གིས་ཁེངས།
དེ་རིང་ནི་ས་ཡོམ་གྱི་གོད་ཆག་འོག་ཚེ་སྲོག་ཤོར་བའི་མི་རྣམས་ཀྱི་བདུན་ཚིགས་གཉིས་པ་དེ་ཡིན་པས་ངས་འདས་པོ་རྣམས་ཀྱི་ཚེ་རབས་ནས་བསགས་པའི་བྱས་བསགས་སྡིག་གྲིབ་གང་ཡོད་པ་ཐམས་ཅད་བྱང་ཞིང་དག་ནས་ཚེ་རབས་ནས་ཚེ་རབས་ཏུ་འཕགས་མཆོག་སྤྱན་རས་གཟིགས་ཀྱིས་རྗེས་སུ་བཟུང་བ་མ་ཟད་ད་ལྟ་འཚོ་བཞིན་གནས་པ་རྣམས་ཀྱི་འཚོ་བ་དང་སེམས་ཁམས་སོགས་གང་མྱུང་སླར་གསོ་ཡོང་བའི་སྙིང་ནས་གསོལ་འདེབས་ཞུ་རྒྱུ་ཡིན།
སྙིང་རྗེ་བྲལ་བའི་ས་ཡོམ་གྱི་འབྱུང་བའི་གོད་ཆག་དེ་ཇི་ཙམ་གདུག་རྩུབ་ཆེ་ཡང་མཐའ་མེད་པའི་མི་ཡུལ་གྱི་བརྩེ་སེམས་ནི་དེ་ལས་ནུས་ཤུགས་ཆེ་བས་གོད་ཆག་བྱུང་མ་ཐག་ཏུ་བོད་ནང་གི་མདོ་དབུས་ཁམས་གསུམ་གྱི་བོད་མི་ཚོས་”ང་ཚོའི་ཤ་ཁྲག་གཅིག་པའི་སྤུན་ཟླ་ཚོར་དཀའ་ངལ་ཕྲད་དུས་ང་ཚོས་ངེས་པར་རོགས་པ་བྱེད་དགོས། སྤུན་ཟླ་ཚོ། སེམས་མ་ཕམ། ང་ཚོ་ནམ་ཡང་ཁྱེད་ཚོ་མཉམ་དུ་ཡོད”ཅེས་པའི་གཅིག་གྱུར་འབོད་ཚིག་འོག་ཞིང་པ་དང་འབྲོག་པ་ཚོང་པ་སློབ་ཕྲུག་སོགས་ཀྱིས་མ་བསྐུལ་དང་བླངས་ཐོག་ནས་ཕྱོགས་བཞི་མཚམས་བརྒྱད་ནས་རོགས་རམ་གང་ཐུབ་གནང་།
ལྷག་པར་དུ་ཁམས་དང་ཨ་མདོའི་ཕྱོགས་ནས་ཡིན་པའི་ཚོང་པ་དང་དྲ་བའི་ཚོང་པ་གཞོན་སྐྱེས་མང་པོས་ཀྱང་དངུལ་དང་དངོས་པོའི་རོགས་སྐྱོར་ཞལ་འདེབས་ཕོན་ཆེ་ཁྱེར་ནས་ས་གནས་སུ་དངོས་སུ་སྐྱོད་ནས་དང་བླངས་ཀྱི་ཞབས་ཞུ་སྒྲུབ་པ་དང་། དགོན་སྡེ་ཁག་ནས་དངུལ་གྱི་ཞལ་འདེབས་ཕོན་ཆེན་ཕུལ་བ་དང་སྦྲགས་ཐུགས་སྨོན་གསོལ་འདེབས་གནང་། མང་ཚོགས་མང་པོས་ས་ཡོམ་གོད་ཆག་འོག་རྐྱེན་འདས་སོང་བ་ཚོའི་ཆེད་དུ་དགོན་སྡེ་ཁག་ལ་སྐྱོད་ནས་གཤིན་པོའི་རྗེས་འཇུག་གི་མཆོད་འབུལ་སྨོན་ལམ་སྒྲུབ་བཞིན་ཡོད།
མདོ་དབུས་ཁམས་གསུམ་གྱི་གཞས་པ་གཞས་མ་མང་པོས་གདུང་སེམས་མཉམ་སྐྱེའི་གླུ་དབྱངས་གསར་རྩོམ་བྱས་པ་སོགས་རང་རང་གི་ནུས་པ་དང་མཐུན་རྐྱེན་ལ་གཞིགས་པའི་རོགས་སྐྱོར་གནང་ཡོད། རོགས་སྐྱོར་གྱི་རྣམ་པ་ནི་དངུལ་དང་མིའི་ཟས་གོས་གནས་མལ་གྱི་ཞལ་འདེབས་ཙམ་མ་ཟད། ཞིང་པའི་སྒོ་ཟོག་སེམས་ཅན་ལ་རྩ་ཆག་གི་ཞལ་འདེབས་ཀྱང་གནང་བ་སོགས་བོད་མི་རིགས་ཀྱི་གཅིག་གྱུར་གྱི་འདུ་ཤེས་མི་སེམས་འགུལ་བ་ཞིག་བྱུང་ཡོད།
བཙན་བྱོལ་ནང་གནས་སྡོད་བྱེད་བཞིན་པའི་བོད་མི་ཚོས་ཀྱང་བོད་ནང་གི་རྒྱ་ཆེའི་མི་མང་གི་དཀའ་སྡུག་ལ་གདུང་སེམས་མཉམ་སྐྱེ་དང་། བཙན་བྱོལ་ནང་གི་མང་ཚོགས་དང་། དགོན་སྡེ་གྲྭ་ཚང་ཁག་བཅས་ནས་སྨོན་ལམ་གསོལ་འདེབས་དང་མཆོད་འབུལ་རྒྱ་ཆེ་གནང་ཡོད། ལྷག་པར་དུ་༸གོང་ས་མཆོག་དབུ་བཞུགས་ཐོག་གདན་ས་བཀྲིས་ལྷུན་པོར་སེར་སྐྱ་མང་ཚོགས་སྟོང་ཕྲག་ཁ་ཤས་འདུ་འཛོམས་ཀྱིས་སྟོད་དིང་རིའི་ས་ཡོམ་གྱི་གོད་ཆག་ལ་དམིགས་ནས་གདུང་སེམས་མཉམ་སྐྱེའི་སྨོན་ལམ་གསོལ་འདེབས་རྒྱ་ཆེ་གནང་བ་རེད། ༸གོང་ས་མཆོག་གིས་ས་ཡོམ་གོད་ཆག་གི་རྐྱེན་ངན་ལ་ཐུགས་ཕམ་དང་འདས་གྲོངས་སུ་གྱུར་བ་རྣམས་ལ་ཐུགས་སྨོན་གནང་བ་དང་སྦྲགས། གོད་ཆག་ཕོག་པའི་བོད་མི་ཚོར་སེམས་ཤུགས་མ་ཆག་པར་རྐྱེན་ངན་གྲོགས་སུ་འགྱུར་བའི་བསམ་བློ་གཏོང་དགོས་པ་དང་། ཆོས་ཕྱོགས་ནས་རྐྱེན་ངན་བྱང་ཆུབ་ལམ་དུ་འགྱུར་བའི་ཐུགས་སྨོན་གནང་དགོས་པའི་བཀའ་སློབ་སྩལ་ཡོད། ཕྱོགས་མཚུངས་༸དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་དང་། ༸དཔལ་ས་སྐྱ་གོང་བ་བདག་ཁྲི་རིན་པོ་ཆེ་སོགས་ཆོས་བརྒྱུད་ཁག་གི་བླ་ཆེན་རྣམ་པས་ཀྱང་ཐུགས་གསོ་དང་ཐུགས་སྨོན་རྒྱ་ཆེ་གནང་ཡོད། ཕྱོགས་མཚུངས་ཤར་མོན་ནས་ནུབ་ལ་དྭགས་བར་གྱི་མི་རིགས་དང་རིག་གཞུང་གཅིག་པའི་ཧི་མ་ལ་ཡའི་ས་ཁུལ་མི་མང་ཚོས་ཀྱང་བོད་ནང་གི་ས་ཡོམ་གོད་ཆག་ལ་གདུང་སེམས་མཉམ་སྐྱེ་གནང་ཡོད་པ་རེད།
ས་ཡོམ་གྱིས་ཁང་ཁྱིམ་སྟོང་ཕྲག་མང་པོ་གཞིག་རལ་དུ་བཏང་ཡང་། དེ་ལས་ལྷག་པའི་གཞིས་ལུས་བོད་མིའི་སྔར་མེད་པའི་མཐུན་སྒྲིལ་གྱི་བ་གམ་མཐོན་པོ་ཞིག་བསླངས་ཏེ་འཛམ་གླིང་ཡོངས་དང་ལྷག་པར་དུ་བཙན་བྱོལ་བོད་མི་ཚོར་མིག་དཔེ་བཟང་པོ་ཞིགབསྟན་ཡོད། བོད་མི་རིགས་ཀྱི་མཐུན་སྒྲིལ་གྱི་ནུས་པ་འདི་ནི་ནང་ཆོས་ཀྱི་བྱམས་བརྩེའི་བསླབ་བྱ་དང་འབྲེལ་བ་དམ་ཟབ་ཡོད་པ་མ་ཟད། བོད་མི་རིགས་ཀྱི་རིག་གཞུང་དང་། གོམས་གཤིས། སྲོལ་རྒྱུན་བཟང་པོ་བཅས་ཀྱི་རྩ་བ་བརྟན་པོ་ཡོད་པའི་རྟགས་མཚན་ཡང་ཡིན་ལ་དོན་རྐྱེན་འདིའི་སྐབས་བོད་རིགས་ནང་ཁུལ་དུ་ས་ཁུལ་དང་ཆོས་ལུགས། དབུལ་ཕྱུག་གི་དབྱེ་བ་མེད་པར་ཕན་ཚུན་རོགས་རམ་བྱས་པ་འདིས་མ་འོངས་པར་ཡང་བོད་མི་རིགས་ཀྱི་གནས་སྟངས་ལ་རེ་བ་བྱེད་འོས་པའི་རྟགས་མཚན་བཟང་པོ་ཞིག་མཐོང་ཡོད།
འོན་ཀྱང་བོད་མིའི་ཆིག་སྒྲིལ་དང་རོགས་རམ་གྱི་བྱེད་སྒོའི་གནས་ཚུལ་དེ་དག་དྲ་ཐོག་ལ་ཁྱབ་སྟེ་བོད་ཕྱི་ནང་གི་བོད་མི་ཚོར་ཤུགས་རྐྱེན་བཟང་པོ་ཐེབས་བཞིན་པ་མཐོང་སྐབས། རྒྱ་ནག་གཞུང་ལ་འཇིགས་སྣང་སྐྱེས་ཏེ་གནས་ཚུལ་དེ་དག་དྲ་ཐོག་ལ་སྤེལ་མི་ཆོག་པའི་བཀག་སྡོམ་བྱས་པ་དང་། ས་ཡོམ་གྱི་སྐོར་དཀྲོག་གཏམ་སྤེལ་བའི་ཉེས་མིང་འོག་བོད་མི་ ༢༡ ཙམ་བཀག་ཉར་དང་ཉེས་ཆད་བཅད་པའི་གནས་ཚུལ་ཐོན་ཡོད།
མ་འོངས་པར་ཡང་བོད་མི་རིགས་ཀྱི་མཐུན་སྒྲིལ་གྱི་ནུས་པ་འདི་སྔར་ལས་ལྷག་པའི་སྲ་བརྟན་དུ་གཏོང་དགོས་པ་ནི་གལ་ཆེན་པོ་ཡིན། དེ་ཡང་༸གོང་ས་མཆོག་གིས་བོད་མི་རྣམས་ཆོལ་ཁའི་ཕྱོགས་ཞེན་དང་ས་ཁུལ་གྱི་དབྱེ་འབྱེད་སོགས་མེད་པར། བོད་མི་རིགས་གཅིག་གྱུར་གྱི་འདུ་ཤེས་འཛིན་དགོས་པའི་བཀའ་སློབ་ཡང་ཡང་གནང་བ་བཞིན་སྟོད་དིང་རིའི་ས་ཡོམ་གྱི་གོད་ཆག་གིས་བོད་མི་རིགས་ཀྱི་མཐུན་སྒྲིལ་གྱི་ནུས་པ་གསལ་པོར་མཚོན་པ་མ་ཟད། མ་འོངས་པར་ཡང་བོད་མི་རིགས་ཀྱི་རྩ་དོན་སྒྲུབ་པར་མཐུན་སྒྲིལ་གྱི་ནུས་པ་འདི་ཇི་ཙམ་གལ་ཆེན་པོ་ཡིན་པའི་བསླབ་བྱ་ཟབ་མོ་ཞིག་ཀྱང་སྤྲད་ཡོད་དོ།།
