ཨ་རིའི་མཁའ་ལམ་རྟགས་ཅན་དང་དམག་དོན་ཐད་འཕུར་གནམ་གྲུ་གཉིས་གདོང་ཐུག་བྱུང་སྟེ། མི་གྲངས་དྲུག་ཅུ་ལྷག་གི་ཁྲོད་མི་གྲངས་ ༡༩ ཡི་ཕུང་པོ་ལས་རྙེད་སོན་བྱུང་མེད་པས་མུ་མཐུད་འཚོལ་ཞིབ་བྱེད་མུས་ཡིན་འདུག
Emergency response units assess wreckage in the Potomac River early Thursday morning. Andrew Harnik/Getty Images
དེ་རིང་ཨ་རིའི་རྒྱལ་ས་ཝ་ཤིང་ཊོན་རཱ་གྷན་རྒྱལ་ཡོངས་གནམ་ཐང་གི་ཁུལ་དུ་ཨ་རིའི་མཁའ་ལམ་(American Airlines) རྟགས་ཅན་དང་ཨ་རི་ H- 60 རྟགས་ཅན་ (Sikorsky H-60) གྱི་དམག་དོན་ཐད་འཕུར་གནམ་གྲུ་གཉིས་བར་གདོང་ཐུག་བྱུང་སྟེ། ད་བར་མི་གྲངས་བཅུ་དགུའི་ཕུང་པོ་རྙེད་སོན་བྱུང་ཡོད་ཅིང་། ད་ལྟ་ཁུལ་དེའི་མྱུར་སྐྱོབ་མི་སྣས་པོ་ཊོ་མེག (Potomac River) གཙང་པོའི་ཁུལ་དུ་གས་ཆག་བྱུང་བའི་དོན་རྐྱེན་ཁྲོད་རྐྱེན་འདས་སུ་འགྱུར་མཁན་རྣམས་ཀྱི་ཕུང་པོ་འཚོལ་ཞིབ་དང་མྱུར་སྐྱོབ་བྱེད་མུས་ཡིན་འདུག
མཁའ་གྲུའི་དོན་རྐྱེན་དེ་དང་འབྲེལ་ནས་ཨ་རིའི་སྲིད་འཛིན་སྐུ་ཞབས་ཊོམ་ཕུ་མཆོག་གིས། ངས་རཱ་གྷན་རྒྱལ་ཡོངས་གནམ་ཐང་དུ་བྱུང་བའི་གནམ་གྲུའི་དོན་རྐྱེན་ཐད་ཤེས་རྟོགས་ཞིབ་ཚགས་བྱུང་། དཀོན་མཆོག་གིས་ཁོང་ཅག་ལ་བྱིན་གྱིས་རླབས་པར་སྨོན། དོན་རྐྱེན་དེའི་ཁྲོད་ཆེས་ཐོག་མར་ཚད་མཐོའི་རོགས་འདེགས་གནང་མཁན་ཡོངས་ལ་ཐུགས་རྗེ་ཆེ་ཞུ། ངས་ད་ལྟ་གནས་སྟངས་ལ་རྒྱུས་ལོན་བྱེད་མུས་ཡིན། ཞེས་གསུངས་འདུག་ལ། དེ་བཞིན་ཨ་རིའི་མེ་དང་ཛ་དྲག་སྨན་སྦྱོར་རོགས་རམ་(DC Fire and EMS) ལས་ཁུངས་ཀྱི་འགན་འཛིན་ཇོན་(John A. Donnelly ) ལགས་ཀྱིས། ད་ལྟ་འཚོལ་ཞིབ་དང་མྱུར་སྐྱོབ་ཀྱི་ལས་དོན་དེ་ཆུའི་འོག་ཏུ་གཉེར་མུས་ཡིན་པས། ཆུ་ཧ་ཅང་རྙོག་མ་ཡིན་པ་མ་ཟད། ཆུའི་ནང་དུ་འཚོལ་ཞིབ་བྱ་རྒྱུར་ཉེན་ཁ་ཆེན་པོ་ཡོད་པས། ཞིབ་འཇུག་དང་འཚོལ་ཞིབ་ཀྱི་ཐད་ལ་དུས་ཚོད་ངེས་ཅན་ཞིག་འགོར་སྲིད། ཅེས་བརྗོད་འདུག
ད་ལྟ་མྱུར་སྐྱོབ་མི་སྣས་ཚད་རིམ་མཐོ་བོས་རྟོག་ཞིབ་བྱེད་མུས་ཡིན་ནའང་། ཨ་རིས་ས་ཁམས་ཞིབ་འཇུག་བྱས་པ་བརྒྱུད། གནམ་གྲུ་གཉིས་གདོང་ཐུག་བྱུང་ནས་ལྷུང་སའི་པོ་ཊོ་མེག་གཙང་པོ་ནི་ཆ་སྙོམས་ཀྱི་གཏིང་ཚད་ཕི་ཌི་ ༢༤ ཙམ་དང་བཞུར་རྒྱུན་གྱི་རིང་ཚད་ལ་སྤྱི་ལེ་ ༤༠༠ ལྷག་ཡོད་པས། ད་ལྟ་གར་སོང་ཆ་མེད་དང་ཤི་རྨས་བྱུང་བ་དག་འཚོལ་ཞིབ་བྱ་རྒྱུ་དཀའ་རྙོག་ཅན་དུ་འགྱུར་ཉེན་ཡོད་པའི་གནས་ཚུལ་འཐོན་མུས་ཡིན་པའི་ཁར། ཁུལ་དེར་མྱུར་སྐྱོབ་ཀྱི་ལས་དོན་བྲེལ་ཟིང་ཆེ་བ་སོགས་ཀྱི་རྐྱེན་དུ་བྱས་ཏེ། ཝ་ཤིང་ཊོན་གྱི་རྭ་གྷན་གནམ་ཐང་རེ་ཞིག་སྒོ་བརྒྱབ་ནས་གནམ་གྲུ་ཤར་གཏོང་མཚམས་འཇོག་བྱས་ཡོད་འདུག་ལ། ཨ་རིའི་དམག་དོན་ཆེས་མཐོ་མི་སྣས་(US Army official) དམག་མི་གསུམ་ལྡན་གྱི་ཨ་རིའི་དམག་དོན་ཐད་འཕུར་མཁའ་གྲུའི་ཁྲོད་ཀྱི་དམག་མི་ཚོས་མཚན་མོའི་མཁའ་ལམ་དམག་སྦྱོང་བྱེད་ཀྱིན་ཡོད་སྐོར་བསྒྲགས།
ཐེངས་འདིའི་ཨ་རིའི་གནམ་གྲུའི་གདོང་ཐུག་ནི་ཕྱི་ལོ ༢༠༠༡ རྗེས་ཀྱི་གནམ་གྲུའི་དོན་རྐྱེན་ཆེ་ཤོས་ཤིག་ཏུ་ངོས་འཛིན་བྱེད་ཀྱིན་འདུག་ལ། ཕྱི་ལོ་ ༢༠༠༡ ལོར་ཨ་རིའི་རྒྱལ་ས་ཝ་ཤིང་ཊོན་ནས་ཌུ་ལེ་སི་གནམ་ཐང་དུ་སྐྱོད་པའི་གནམ་གྲུ་ཞིག་ལ་དོན་རྐྱེན་བྱུང་ནས། ཕྱོགས་ཡོངས་ནས་མི་གྲངས་ ༩༠༠ ལྷག་གི་ཚེ་སྲོག་ཤོར་ཡོད་ཅིང་། ཕྱི་ལོ་ ༢༠༠༥ དང་། ༢༠༠༦། ༢༠༠༩ བཅས་སུའང་གནམ་གྲུའི་དོན་རྐྱེན་ཁག་ཅིག་བྱུང་འདུག ད་ལན་གྱི་དོན་རྐྱེན་དེ་བྱུང་སྐབས་ཉུང་མཐར་ཡང་གནམ་གྲུ་ ༡༩ ཙམ་མཁའ་དབྱིངས་སུ་ཤར་སྐྱོད་བྱེད་མུས་ཡིན་པས་མཁའ་ལམ་བསྒྱུར་ཏེ། སྤྱི་ལེ་ ༢༠ ཙམ་གྱི་མཚམས་སུ་ཡོད་པའི་ཌུ་ལེ་སི་གནམ་ཚིགས་སུ་ཁ་སྒྱུར་བྱས། དེ་བཞིན་ཉུང་མཐར་གནམ་གྲུ་གྲངས ༨༦༩ ཙམ་རྭ་གྷན་རྒྱལ་ཡོངས་གནམ་ཐང་ནས་འཕུར་སྐྱོད་བྱ་འཆར་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
