དེ་རིང་ཕྱི་ཚེས་ ༢༧ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་བོད་སྐྱིད་གྲོང་དང་བལ་ཡུལ་དུ་ཆུ་ལོག་བྱུང་ནས་མི་རྒྱུ་གཉིས་ལ་གོད་ཆག་བྱུང་བར་ཐུགས་སྨོན་སྐྱབས་འཇུག་དང་། འདས་པོ་རྣམས་ཀྱི་ཤུལ་ལུས་ནང་མི་རྣམས་ལ་གདུང་སེམས་མཉམ་བསྐྱེད་ཞུས་འདུག

༧གོང་ས་རྒྱལ་བ་རིན་པོ་ཆེ་མཆོག དགའ་ལྡན་ཕོ་བྲང་གི་སྐུ་པར།

༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་གསོའི་གསུང་འཕྲིན་ནང་། ངོས་རང་གིས་བོད་ཀྱི་སྐྱིད་གྲོང་དང་ར་སུ་ཝ་ཁུལ་དུ་ཆུ་ལོག་གི་གནོད་འཚེ་ཚབས་ཆེན་ཐེབས་ནས། རྐྱེན་འདས་དང་ཁང་ཁྱིམ་སོགས་ལ་གྱོང་གུད་ཆེན་པོ་ཕོག་པའི་གནས་ཚུལ་ཐོས་འཕྲལ་སེམས་པ་ཤིན་ཏུ་སྐྱོ་བྱུང་ལ། རྐྱེན་འདས་སུ་གྱུར་བ་དང་། ཁང་ཁྱིམ་ལ་གྱོང་གུད་ཚབས་ཆེན་ཕོག་མཁན་རྣམས་ལ་སྐྱབས་འཇུག་ཞུ་ཡི་ཡོད། ངོས་ནས་ཤུལ་ལུས་ནང་མི་དང་གོད་ཆག་འདིའི་ཁྲོད་གནོད་འཚེ་ཐེབས་མཁན་ཡོངས་ལ་སྙིང་ནས་གདུང་སེམས་མཉམ་བསྐྱེད་ཞུ་བཞིན་ཡོད། ས་ཁུལ་འདིར་སྔོན་ཆད་ཀྱང་གོད་ཆག་འདི་ལྟ་བུ་བྱུང་མྱོང་ཡོད་པས། འདི་དག་ནི་གནམ་གཤིས་འགྱུར་ལྡོག་གམ་ཡང་ན་རྒྱུ་རྐྱེན་གཞན་ཞིག་གི་དབང་གིས་བྱུང་བ་ཞིག་ཡིན་ངེས་པས། གནོད་འཚེ་འདི་ལྟ་བུ་སླར་ཡང་མི་འབྱུང་སླད་ཐབས་ལམ་འོས་འཚམ་ཞིག་འཚོལ་བའི་རེ་བ་ཞུ་རྒྱུ་ཡིན། ཞེས་གསུངས་འདུག

དེ་རིང་སྲིད་སྐྱོང་སྤེན་པ་ཚེ་རིང་མཆོག་གིས་ཀྱང་བལ་ཡུལ་དུ་ཆུ་ལོག་དང་ས་རུད་ཀྱི་གོད་ཆག་བྱུང་བར་ཐུགས་གསོའི་བརྙན་ཐུང་ཞིག་སྤེལ་བའི་ནང་། བལ་བོད་ས་མཚམས་སྐྱིད་གྲོང་ལ་ཆུ་ལོག་ཆེན་པོ་ཞེ་དྲགས་ཤིག་བྱུང་འདུག ཆུ་ལོག་དེ་ཡང་ཆར་ཆུའི་རྐྱེན་གྱིས་བྱུང་བ་ཞིག་མིན་པ་ཤེས་ཐུབ་པ་ཞིག་རེད། བོད་ནང་དུ་གངས་ཆུ་བསྐྱིལ་ནས་བརྡོལ་ཏེ་བྱུང་བ་རེད། སྔོན་མ་ཉིས་སྟོང་བདུན་བརྒྱད་ཅིག་ལ་རྒྱ་གར་དུ་ཆུ་ལོག་ཅིག་བྱུང་བ་རེད། དེ་འདྲ་ཞིག་མིན་འགྲོ་བསམ་བསམ་ཞིག་འདུག ཡིན་ནའང་། འདིའི་སྒང་ལ་ཉམས་ཞིབ་དང་དཔྱད་པ་བྱེད་མཁན་མང་པོ་ཞིག་རྗེས་ལ་ཡོང་མདོག་ཁ་བོ་རེད། དེ་ཡིན་དུས། ཁ་སང་ང་ཚོས་བརྒྱུད་ལམ་ཁག་ལ་གཟིགས་པ་བཞིན། མི་མང་པོ་དང་སྐྱིད་གྲོང་གི་འགག་སྒོ་དེའང་ཆུས་ཁུར་བ་རེད། དེར་རྒྱ་རིགས་ཡོད་རྒྱུ་རེད། བོད་པའང་ཏན་ཏན་ཡོད་རེད། ས་མཚམས་ཀྱི་ལས་ཀ་བྱེད་མཁན་དང་། ཉེན་རྟོག་པ་སོགས་ཡོད་ཀྱི་རེད། དེ་བཞིན་ཕྱི་རྒྱལ་བ་དང་། བོད་པ། རྒྱ་གར་བ་སོགས་ཡུལ་སྐོར་སྤྲོ་འཆམ་པ་མང་པོ་འདས་གྲོངས་ཕྱིན་པ་རེད། ད་ལྟ་གྲངས་ཀ་སྣ་ཚོགས་ཤིག་ཡོང་གི་འདུག དེ་རིང་ང་ཚོས་གནས་ཚུལ་ཐོན་པ་དེའི་ཐོག་ལ་དཔྱད་ཞིབ་བྱས་ནས། ཉིན་རྒྱབ་སྨོན་ལམ་གསུང་འདོན་ཞུ་ཡི་ཡོད། ཅེས་གསུངས་འདུག

གསར་འགོད་པ། རྟ་མགྲིན་མཚོ། རྩོམ་སྒྲིག་བྱེད་མཁན། ཆོས་རྒྱལ་སྐྱབས།