རྩོམ་ཁུངས། བོད་ཀྱི་དུས་བབ།
རྩོམ་པ་པོ། གངས་དཀར་ལྷ་མོ།
རེ་བའི་རྗེས་ཀྱི་དགོད་སྒྲ།
བཏབ་པའི་ལོ་ཏོག་སྐྱེ་བ་དང་། བསྙལ་བའི་ཆང་ལང་བ་ཆོས་ཉིད་ཡིན་པ་ལྟར། ཁ་བ་ལྷབ་ལྷུབ་ཏུ་བབ་པའི་དགུན་ཟླ་ཐ་ཆུང་གི་ཚེས་དྲུག་གི་ཉིན། ནེའུ་ཡོག་ཁུན་སི་ཡི་ཆེས་མཐོའི་ཁྲིམས་ཁང་གིས་ཐག་གཅོད་གནང་བ་ནི། མར་ཤལ་གྱིས་མི་ངན་ཁྲམ་ཇག་དེ་ཐད་ཀར་ཕྱིར་འབུད་བྱ་ཆོག་པའི་བཀའ་ཤོག་གནང་། ཡིན་ནའང་ནེའུ་ཡོག་ལ་ང་ལྟ་བུའི་དཀའ་རྙོག་ཅན་མང་བས། ཕྱིར་འབུད་ཀྱི་དུས་བཀག་བཟོ་རྒྱུར་ཁྱོན་ཉིན་བཅོ་ལྔ་ཏག་ཏག་འགོར། ཚེས་ཉེར་གསུམ་ཉིན་མར་ཤལ་གྱིས་ཁོ་པ་ཕྱིར་དབྱུང་རྒྱུ་གཏན་ཁེལ་བྱུང་བའི་ཡི་གེ་འབྱོར། སེམས་དགའ་ཡང་དགའ། ཡང་མི་དེས་གཡོ་ཇུས་གསར་པ་གང་འདྲ་ཞིག་བཤམས་མི་ཡོང་ངམ། སང་ཉིན་འགྲོ་ཐུབ་བམ། སོགས་བསམ་བློར་མི་འཁོར་རྒུ་འཁོར་ཅི་ཡང་འཁོར་ཏེ་ཉིན་གང་སྙིང་ཚ་ལོང་ལོང་བ་ཞིག་བྱུང། འབྲོང་བསད་པས་མི་ཚད་རྔ་མ་དར་ལྕོག་ཏུ་བཙུགས་པའི་དཔེ’ལྟར་སྔར་གྱི་སྣ་བསུན་དེ་དག་ལ་སེམས་སྐབས། དེ་རིང་གི་ཡི་ཆད་ལ་ཚོད་འཛིན་གང་ནས་བྱེད་ཐུབ། སྐབས་དེའི་ངའི་སེམས་ངལ་ནི་རྐང་པར་ཚེར་མ་ཟུག་མ་མྱོང་མཁན་ཞིག་གིས་བསམ་ཤེས་བྱེད་ཐབས་མེད་པ་ཞིག་ཡིན། ངས་རང་སེམས་རང་གིས་གཅུན་ནས་དག་འབུད་ཡོང་རྒྱུར་རེ་སྒུག་གི་མིག་ཟུང་རྒྱང་ནས་རྒྱང་དུ་ཅེར།
དེ་ཉིན་བཙན་འཛུལ་བ་དེ་ཡང་བྱ་དཀའ་བྱེད་གཏད་ཀྱི་གནས་སུ་གྱར་བའམ་ཡང་ན་མགོ་བདེ་དྲན་འཕྲུལ་ངན་གཡོའི་མཐའ་ལ་ལྷུང་པ་འདྲ། གཏམ་མི་སྙན་པ་གང་ཡང་གོ་ཐོས་མ་བྱུང་། ཡིན་མོད་འདོད་པ་བཙལ་ཡང་མ་རྙེད། མི་འདོད་ཐོག་ཏུ་བབ་ཅེས་པ་ལྟར་རང་བྱུང་ཁམས་ཀྱིས་ཁོ་ལ་སྙིང་རྗེ་བྱས་པ་བཞིན། ཚེས་ཉེར་གཉིས་དང་ཉེར་གསུམ་པར་ནེའུ་ཡོག་དང་ཉེ་འཁོར་གྱི་ས་གནས་ལ་གནམ་གཤིས་ཀླད་ཀོར་འོག་གི་གྲངས་ཆུང་བརྒྱད་བར་དུ་ཟགས་པས་ན་གྲོང་ཁྱེར་ཡོངས་ཀྱི་ཁྲིམས་འབྲེལ་ལས་འགུལ་ཡོད་ཚད་ཕྱིར་འཐེན་བྱས་པས། ཁོ་ལ་ཉིན་གཅིག་ཁེ་བཟང་རག
ཁ་བ་རྒྱུན་དུ་བབས། གནམ་གཤིས་ནི་སྔར་བཞིན་གྲང་ངར་ཆེ་བས་ཁོ་པའི་སེམས་ལ་མུ་འཐུད་དེ་ཉིན་ཤས་འདུག་རྒྱུའི་རེ་སྒུག་བཅངས་པར་ཐེ་ཚོམ་ག་ལ་དགོས། དེ་སྔ་ལན་མང་སྣ་སུན་ཁེལ་བས་དུས་ཚོད་ཐ་མ་བར་སྒུག་ནས་གྱོང་གུན་མ་རག་པའི་ཆེད་དུ་ཚེས་ཉེར་བཞིའི་ཞོགས་པ་བར་དུ་འགྲིམ་འགྲུལ་འཛིན་བྱང་མ་ཉོས། མཐར་ནེའུ་ཡོག་ཏུ་འགྲོ་ཁར་འགྲིམ་འགྲུལ་འཛིན་བྱང་བསམ་པ་བཞིན་དུས་ཐོག་ཏུ་མ་རག འཛིན་བྱང་འགའ་རེ་འདུག་ཀྱང་གོང་ཚད་ལྡབ་འགྱུར་གྱིས་ཆེ། དེས་ན་རང་ཉིད་རྒྱུན་པར་གཞུང་ལམ་ཆེན་མོའི་ཐོག་སྒེར་འཁོར་བཏང་ནས་ཐག་རིང་དུ་འགྲུལ་བཞུད་བྱ་རྒྱུར་ཧ་ཅང་འཚེར་སྣང་ཆེ་ཡང་། ཨ་ནེས་བཙུགས་པའི་ཟམ་པར་ཨ་ནེ་ཐར་བ་བྱེད་དགོས་པའི་དཔེ་ལྟར་དེ་ཉིན་ང་རང་མ་འགྲོ་ཐབས’མེད་རེད། སེམས་ཤུགས་བསྐྱེད་ནས་ཁ་གཡེང་མིག་གཡེང་མེད་པར་ནེའུ་ཡོག་ཕྱོགས་སུ་རེ་བའི་དམིགས་འདུན་དྲག་པོ་དང་བཅས་བཤར་བས་སྟབས་ལེགས་ནས་བར་ཆད་རྐྱེན་ངན་གང་ཡང་མ་ཕྲད།
ཡངས་པའི་ནམ་མཁའ་ནི་རབ་དཀར་ཁ་བའི་གོས་ཀྱིས་བསྒྲིབས་ཤིང་། ཁ་བའི་འདབ་མ་བལ་འདབ་ལྟར་ལྷུང་ལྷུང་དུ་འཛིན་མའི་པང་དུ་ཕང་ཕུང་དུ་འབབ་པ་དང་། འདབ་མ་རེ་རེ་མིག་གི་དབང་པོར་སིམ་པའི་ཚུལ་ནི་དྲིན་ཅན་ཕ་མ་འདས་པོས་རང་ལ་སེམས་གསོའི་མེ་ཏོག་འཐོར་བའི་ཚོར་བ་ལྟར་ཟབ། ས་གཞི་ཡོངས་རྫོགས་ཁ་བཏགས་དཀར་པོ་ཡུགས་གཅིག་གིས་བཀླུབས་པ་ལྟ་བུར་མཐོང་ཚེ། རང་ཡུལ་བོད་ལ་སླར་ཐེངས་གཅིག་སླེབས་པ་དང་ཅི་འདྲའི་མཚུངས་པ་ཨང་། གྲང་ངར་གྱི་ཁྲོད་ནས་དྲོ་སྐྱིད་རྙེད། རྟེན་འབྲེལ་བཟང་བའི་ཚོར་སྣང་བྱུང་། ཁྲིམས་ལུགས་ཀྱི་བཀའ་རྒྱའི་འོག་དུས་ཡུན་ལོ་གཉིས་རིང་ལ་རང་ཉིད་ཀྱི་ཁང་པའི་སྒོ་འགྲམ་དུ་ཡང་འགྲོ་ཆོག་གི་མེད་པས་ད་ལན་རང་རྒྱུ་རང་བདག་བྱུང་བར་སྤྲོ་བས་བརྟས།
གང་ལྟར་སྔོན་གྱི་སྐྱེས་བུ་དམ་པ་རྣམས་ཀྱིས་ཞལ་གདམས་བཞིན། རང་ལ་རྟ་ཞིག་ཡོད་ན་སྡུག་བསྔལ་རྟ་ཙམ་དང་ལུག་གཅིག་ཡོད་ན་སྡུག་བསྔལ་ལུག་ཙམ་ཡོད་གསུངས་པ་ཅིས་མི་བདེན་ཨང་སྙམ། རང་ལ་ཕྲད་པའི་དཀའ་ངལ་དེ་ཡོད་པའི་སྡུག་བསྔལ་ཡིན་རུང་། དེ་ནི་མེད་པའི་སྡུག་བསྔལ་ལས་དཀའ་ཚེགས་ཆེ། ནོར་ནི་འཕུང་འཁྲོལ་དང་སྙིང་པོ་མེད་པ་ལའང་ངེས་ཤེས་ཅུང་ཟད་རྙེད། འཁོར་བའི་ཕུན་ཚོགས་དང་། དེ་ལས་བྱུང་བའི་ཉེས་དམིགས་བསམ་ཚེ། དམ་པའི་ཆོས་ལ་ཆས་ན་ཆས་ན་བསམ་པའི་བསམ་བློ་བཏང་བ་ཡང་ལན་གཅིག་མིན།
ལམ་བར་དུ་ཆུ་ཚོད་གསུམ་དང་ཕྱེད་ཀ་འགོར། ནེའུ་ཡོག་དབུ་རང་ཐང་དུ་སླེབས་དུས་ཉིན་གུང་གི་དུས་ཚིགས་ཏག་ཏག་ཁེལ། ནེའུ་ཡོག་ནི་སྦོ་སེ་ཊོན་དང་མི་འདྲ་བར་ཁ་བ་བབ་ཤུལ་ཙམ་ལས་མི་སྣང་། (ཞར་འཕྲོས་འདིར་དབུ་རང་ཐང་གི་སྐོར་ཅུང་ཟད་གླེང་ན་) དབུ་རང་ཐང་ནི་ནེའུ་ཡོག་ཏུ་བོད་པ་དང་། འབྲུག་པ། ཧི་མ་ལ་ཡའི་རི་རྒྱུད། རྒྱ་གར། བལ་པོ། མེག་སེ་ཁོའོ། ཁ་ཆེ་སོགས་མི་རིགས་སྣེ་མང་འདུ་བའི་ས་ཞིག་དང། སྐད་རིགས་མི་འདྲ་བ་ཉིས་བརྒྱ་བཞི་བཅུ་ཙམ་ཡོད་སྐད། ཁུལ་དེའི་ཁྲོམ་གཞུང་དུ་ཡོད་པའི་ཐང་ཆུང་ཆུང་དེར་ཐོག་མར་བོད་པ་རྣམས་གཏན་སྡོད་ཡིག་ཆ་འགྲིག་ལ་མ་འགྲིག་པའི་སྐབས་ཕན་ཚུན་སྐྱིད་སྡུག་གླེང་རེས་བྱེད་ས་ཡིན་པས་སེམས་གསོ་ཐང་ཞེས་ཐོགས། རིམ་པར་ཚང་མ་ཡིག་ཆའི་དཀའ་ངལ་ལས་ཐར། མང་ཆེ་བ་བཟའ་ཚང་ཡ་གཅིག་དང་དེ་བཞིན་ཕོ་གཞོན་མོ་གཞོན་རྣམས་ཆེར་ལོན་ནས་འཚོ་བ་མཉམ་སྐྱེལ་གྱི་རིགས་མཐུན་དགའ་རོགས་ཤིག་བྱུང་ན་བསམ་པའི་རེ་བས་ཐང་དེར་དུས་ཁོམ་ཡོད་ཚད་ལ་འཛོམས་ཀྱི་ཡོད་པས་རེ་བ་ཐང་ཞེས་ཐོགས། ལོ་ཤས་རྗེས་མང་ཆེ་བ་གནས་མལ་ལྟོ་གོས་སོགས་སྒེར་གྱི་དཀལ་ངལ་གྱི་རྒྱ་ལས་གྲོལ་བས་ན་ད་གཟོད་གཞི་ནས་སྤྱི་དོན་ལ་དོ་ཁུར་སླེབས། འགའ་རེས་དབུ་མ་དང་། ལ་ལས་རང་བཙན་ཡིན་ཞེས་པ་སོགས་སྲིད་དོན་གྱི་བགྲོ་གླེང་རྒྱུན་དུ་འཚོགས་པས་དུས་དེ་ནས་བཟུང་ད་བར་དབུ་རང་ཐང་ཞེས་ཐོགས།
དེ་སྔ་རྒྱ་གར་གྱི་སྨན་སྣའི་དྲི་མས་ཐང་དེ་ཁྱབ་ཡོད་ཀྱང་། ད་ཆ་མོག་མོག་དང་བོད་ཟས་ཀྱི་དྲི་མས་ཁེངས། བོད་པའི་ཟ་ཁང་ཉི་ཤུ་ཡས་མས་ཡོད་ཚོད། ཁོ་མོ་ནམ་རྒྱུན་འཆར་ཅན་ལྟར་དབུ་རང་ཐང་གི་ཉེ་འགྲམ་དུ་ལྷ་སའི་ཟ་ཁང་དུ་བོད་ཟས་གྱ་ནོམ་པ་ཞིག་བཟས། བྲོ་བ་དེས་ངས་བརྗེད་ཟིན་པའི་ཨ་མ་ལགས་ཀྱི་ཕྱག་བཅུད་ལྡན་པའི་ཞལ་ལག་སྙིང་ནས་དྲན་གསོ་བྱས། དབུ་རང་ཐང་ནས་ངའི་ཁང་པའི་བར་དུ་ལམ་ཐག་མེ་འཁོར་བབ་ཚུགས་གསུམ་ཙམ་ཡིན་པས་ཧ་ཅང་ཐག་ཉེ།
ང་རང་ཉིད་ཀྱི་ཁང་པར་མ་འབྱོར་སྔོན་ཙམ་ལ། མར་ཤལ་གྱི་ཁ་པར་སླེབས་ནས་དུས་བཀག་སྔོན་ལ་ཡོང་གི་ཡིན་ཟེར། ཕྱེད་རྒྱུག་པ་དང་ཕྱེད་གོམ་པ་དང་སྦྲགས་ཏེ་རྒྱུག་མ་འདུར་གྱིས་སོང་བས་མར་ཤལ་མ་སླེབས་པའི་སྔོན་ཚུད་དུ་ངའི་ནང་གི་སྒོ་འགྲམ་དུ་འབྱོར། ཁང་བརྩེགས་ཀྱི་ཚོམས་ཆེན་ནང་འཛུལ་སྐབས་བཙན་འཛུལ་བ་དེ་ཕྱིར་ཐོན་ཡོང་བ་དང་གདོང་ཐུག་ཁེལ།
ཁོ་བོས་ང་ལ་སྡང་མིག་དང་བཅས་ལྡིར་བཞིན་འདུག་ཀྱང་། ད་ལན་ང་ལ་བདེན་པའི་མཐའ་གསལ་བའི་ཁྲིམས་ཀྱི་རྒྱབ་རྩ་ཡོད་པས། ཆུ་མོའི་གཏིང་ཚོད་ལོངས་ན་ཉ་མོ་སྦར་འཛིན་རྒྱག་ཟེར་བའི་དཔེ་ལྟར་ངས་འཁོན་འཁོན་ཐོགས་ཐོགས་མེད་པར། ཀྭ་ཡེ། ཁང་པའི་ལྡེ་མིག་ག་པར་ཡོད་ཞེས་སྤོབས་པ་དང་བཅས་དྲིས། ཁོ་པས་གདོང་གཉེར་བཞིན་དུ། ངའི་ཁྲིམས་རྩོད་པའི་ངག་ལྟར་ན། ད་དུང་ཉིན་ཤས་སྡོད་ཆོག་པའི་དུས་ཚོད་ཡོད་པ་ཐོས་སོང་ཞེས་ཡ་མེད་སྒལ་རལ་བཙོངས་རྩིས་བྱས། ཁ་རྒྱུན་དུ། ཕོ་ཐ་ཞིག་ལ་གཏམ་བཤད་ན། གོ་ཤེས་ཉན་ཤེས་གཉིས་ཀ་མེད། ཉ་ཉུང་བསྲེས་པའི་གཏམ་ལན་འདེབས། རང་གཞན་གཉིས་ཀའི་འགྲོ་སྡོད་བརླག་ཟེར་བ་ལྟར་ད་དུང་ཧམ་པ་རི་ཙམ་བཤད་ནས་བདེན་པ་གཡག་ཙམ་ཐོབ་རེས་ངན་ལང་རྐང་བརྐྱངས་ལག་བརྐྱང་གིས་ཉིན་འགྱངས་ཞག་འགྱངས་བྱ་རྩིས་བྱས། ངས་ཞིབ་པར་ཁོ་པའི་ངོ་ལ་བལྟ་དུས། ཐེངས་འདིར་ཁོ་པའི་གདོང་གཤིས་ལོག་ཅིང་སྐད་ཤུགས་ཀྱང་དམའ། མར་ཤལ་འདིར་སླེབས་ཡོད་ཅེས་ངས་ལན་བཏབ་པ་ལས་ཁ་ངན་ཚིག་ངན་གང་ཡང་མ་བཤད། ཁོ་པས་ཡིད་ཆེས་ལ་མ་ཆེས་ངང་མར་ཤལ་ག་པར་འདུག། མ་གཞི་ནས་ང་ལ་ཁང་པ་གཙང་མ་བཟོ་ལོང་རག་མ་སོང་། ངས་སང་གནངས་ཤིག་གཙང་མ་བཟོས་ཆོག་སོགས་ལྡབ་ལྡིབ་ཀྱི་སྨྲ་བ་མི་ཉུང་བ་ཞིག་སྨྲ་བཞིན་པའི་སྐབས། དེ་མུར་དམག་ཆས་སྤྲས་པའི་གཞོན་ནུ་གྲུང་ཤ་དོད་པོ་ཞིག་དང་། དཀྱུས་ཆས་གྱོན་པའི་མི་ནག་སྟོབས་ཆེན་གཉིས་རྫིག་ཉམས་དང་བཅས་སླེབས། མར་ཤལ་ཕོ་གསར་དེས་ངའི་མིང་ནས་འབོད་ཅིང་། ཁྲིམས་ཨང་XXX ཡིན་པས་ཟེར་དྲིས། ལགས་ང་ཡིན། མི་འདི་བཙན་འཛུལ་བ་དེ་རེད་ཅེས་ཁོ་ལ་མཛུབ་མོ་བཙུགས། མར་ཤལ་གྱིས་ཁོ་པར་ལྟ་ཙམ་བྱས་པ་ཙམ་ལས་ཁ་ཡ་བྱས་མ་སོང་། ཁོ་པ་ནི་དེ་སྔའི་ཇག་པ་གཡག་ཆེན་དེ་དང་མི་འདྲ་བར་ཧ་ཅང་གི་མི་ཉམ་ཆུང་ཞིག་ཏུ་གྱུར་སོང་། ངའི་སྣང་བར་ཁ་སང་གི་མི་གཟུགས་པོ་རིང་པོ་དེ་རིམ་གྱིས་ཐུང་རུ་ཕྱིན་པའི་ཚོར་སྣང་བྱུང་། དེ་ནས་ཁོ་པ་སྒོ་ཐེམ་བར་དུ་ཡང་ཡོང་མ་ནུས། ང་ནི་སྙིང་ཚིམས་པའི་ཡ་ལན་སྤྲོད་ཐུབ་སོང་བསམས་ནས་དགའ་སྣང་སྐྱེས། དེ་ནས་མར་ཤལ་གྱིས་ཁོ་མོར་ལྟ་ཙམ་བྱས་ནས་སྒོ་ལྕགས་གསར་པ་ཁྱེར་ཡོད་མེད་དྲིས། ངས་ཁྱེར་ཡོད་ལགས་ཞེས་བཤད་མ་ཐག་སྒོ་ཕྱེ་ནས་ལམ་སེང་སྒོ་ལྕགས་གསར་རྙིང་བརྗེ་རུ་བཅུག། །དེ་ནས་ཁོ་པའི་ཅ་དངོས་རྣམས་ལ་ཞིབ་བཤེར་དང་ཐོ་འགོད་བྱས། ཅ་དངོས་ངོ་དྲགས་པ་རྐང་གཅིག་ཀྱང་མི་འདུག་མོད། གང་ཡོད་པ་ནི་གད་སྙིགས་འགྱིག་ཤོག་ནག་པོ་བརྒྱ་ཟིན་ལ་ཁད་འདུག་པས། མི་ངན་རྫབ་ཆེན་དེས་ངའི་ཁང་པ་རྫབ་ཁང་ལྟ་བུ་བཟོས་འདུག མར་ཤལ་ཕོ་གསར་དེས་ང་ཚོས་མི་ངན་མང་པོ་ཕུད་མྱོང་ཡང་འདི་ལྟ་བུའི་མི་འཛོར་པོ་ཞིག་མཐོང་མ་མྱོང་ཟེར་ཧང་སང་སང་བྱས། ནག་རིལ་གཉིས་པོ་དེས་ནི། མི་འདི་འདྲ་ཡང་འདུག་པ་དཔེ་ལ་ཟེར་བཞིན་ཧ་ལས་པའི་ཚུལ་དུ་མགོ་བོ་གཡུགས་གཡུགས་བྱེད་ཀྱིན་འདུག དེ་མུར་ཁང་བརྩེགས་ཀྱི་ཁང་གཉེར་བའང་དེར་ཡོང་ནས། གད་སྙིགས་འདིས་ག་ལ་ཚད། སྤྱི་པའི་གད་སྙིགས་སྣོད་ཆས་ཚང་མ་མི་དེས་རྒྱངས་སོང་། ཁོ་ཕྱིར་འབུད་ཐུབ་པ་དེ་ནི་ང་ཁང་གཉེར་བ་ཞིག་ལ་མཚོན་ན་གཡུལ་སར་རྒྱལ་ཁ་ཐོབ་པ་དང་གཉིས་སུ་མེད་ཟེར། ཁོས་རྒྱུན་པར་མི་མང་པོ་ཁྲིད་ཡོང་ནས་དཀའ་ངལ་ཆེན་པོ་བཟོ་གི་འདུག་ཟེར་བཤད་སྐྱོར་བྱས། མར་ཤལ་གྱིས་ཞིབ་བཤེར་ཚང་མ་གྲུབ་རྗེས། ཁོ་པའི་ཅ་དངོས་རྣམས་རྩིས་ལེན་རྒྱུར་ཉིན་སུམ་ཅུའི་ནང་ཚུན་དུ་ཆུ་ཚོད་གཅིག་གི་ཆོག་མཆན་སྤྲོད་དགོས་ཅེས་བསྒྲགས། ཁང་པའི་སྒོ་སྟེང་དུ་ཆེས་མཐོའི་ཁྲིམས་ཁང་གི་བཀའ་རྩ་གཞིར་བཟུང་མར་ཤལ་གྱིས་མི་འདི་ཟླ་ཚེས་ལ་ཕྱིར་ཕུད་པ་ཡིན་ཞེས་རྩ་ཚིག་ཆེན་པོ་ཞིག་སྦྱར་སོང་། ཁྲིམས་ལུགས་ལྟར་ན་རྩ་ཚིག་འདིར་ཉེས་ཅན་པས་རྐུ་འཁྱེར་བྱས་ནའང་འགྲོ་ས་བཙོན་ཁང་ཡིན་འདུག
ཡང་ཉི་མ་སུམ་ཅུ་ཐམ་པ་སྒུག་དགོས་པ་འདུག ཡིན་ནའང་ད་ཐེངས་ཀྱི་ཉིན་སུམ་ཅུ་ནི་སྔོན་མ་དང་མི་འདྲ་བས་བློ་བདེ། རྩ་ཚིག་གི་འདྲ་བཤུས་ཤིག་ཁོ་མོར་གནང་ནས་ཕྱིན་ཆད་ཁོ་པས་སླར་བཙན་འཛུལ་བྱས་ན་འདི་ཉེན་རྟོག་པར་སྟོན་དང་། ད་སུས་ཀྱང་བཙན་འཕྲོག་མི་བྱེད་ཅེས་ཚིག་ཐག་ཆོད་པོས་ནན་བཤད་བྱས། མར་ཤལ་ཐོན་ཁར་ངས་ཁྱེད་རྣམ་པ་སྐུ་ཐང་བསྙེལ་སོང་། ཀོའོ་ཕིའི་ལྗགས་གང་མཆོད་རོགས་གནང་ཞེས་སེམས་མཚོན་ལག་སྣེ་ཅུང་ཕུལ་བས། ཁོང་ཚོ་གསུམ་གྱི་བཞིན་ནས་དགའ་བའི་རྣམ་པ་སྟོན་བཞིན་དེ་རིང་ང་ཚོས་ཁང་པ་གསུམ་སྟོང་པ་བཟོས་པ་ཡིན་ཟེར། ཉིན་ལྟར་དེ་འདྲ་གསུམ་ནས་ལྔ་བར་ཡོད་ཅེས་སོགས་གསུང་ལུགས་ལ་གཞིགས་ན། ཁོང་ཚོར་ཆ་མཚོན་ན་ང་ཚོའི་གནས་སྟངས་དེ་ཆེས་རྒྱུན་ལྡན་ཞིག་རེད་ཨང་བསམ་སོང་།
ངའི་མི་ཚེའི་ཉམས་མྱོང་མིག་མཐོང་ལག་ཟིན་འདི་གླེང་རིན་མེད་པ་ཞིག་མིན་ཏེ་དེས་ང་འདྲ་བ་གཞན་ལ་ཕན་ན་བསམ་པ་དང་། བརྗེད་བྱང་ཟིན་ཐོ་འདི་ནི། དགའ་བའི་དུས་ཀྱི་དགོད་སྒྲ། སྐྱོ་བའི་དུས་ཀྱི་མིག་ཆུ། ཁྲོས་པའི་དུས་ཀྱི་སྡང་མིག གདུང་པའི་དུས་ཀྱི་སྙན་ཚིག དགའ་སྐྱོ་འདྲེས་མའི་འཇིག་རྟེན་འདི་ནི་གདོད་མ་ནས་གྲུབ་པས་ན་དཀའ་ངལ་ལ་གདོང་ལེན་བྱ་རྒྱུ་དེ་འགྲོ་བ་མིའི་འཚོ་གནས་ཀྱི་དཔྱང་ཟམ་གཅིག་པུ་དེ་ལེགས་པར་མཁྱེན་ཅིག་ཞུ་རྒྱུ་དེ་ཡིན། །
རེ་ཞིག་རྫོགས་སོ། །
