རྒྱ་བལ་འབྲུག་གསུམ་ནང་གི་བཙན་བྱོལ་བོད་མིའི་མི་འབོར་མང་ཤོས་སུ་ངོས་འཛིན་བྱེད་བཞིན་པའི་རྒྱ་གར་ལྷོ་ཕྱོགས་ཀྱི་གཞིས་ཆགས་ཁག་གི་ནང་སྲིད་སྐྱོང་སྤེན་པ་ཚེ་རིང་མཆོག་གིས་གཞུང་འབྲེལ་གཟིགས་སྐོར་ཐེངས་གཉིས་པ་གནང་བཞིན་འདུག
ཟླ་འདིའི་ཕྱི་ཚེས་ ༡༠ ནས་ཕྱི་ཟླ་ ༣ ཚེས་ ༤ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་ལྷོ་ཕྱོགས་བོད་མིའི་གཞིས་ཆགས་སྦེལ་ཀོབ་ལུགས་ཟུང་བསམ་གྲུབ་གླིང་དང་། བདེ་སྐྱིད་སླར་གསོ། ཧོན་སུར་གཞིས་ཆགས་བཅས་སུ་གཞུང་འབྲེལ་ཕྱོགས་ཕེབས་ཐེངས་གཉིས་པ་གནང་བཞིན་ཡོད་པ་ལྟར། དེ་རིང་ཕྱི་ཚེས་ ༡༨ ཉིན་ཧོན་སུར་གཞིས་ཆགས་སུ་སྐོར་སྐྱོད་གནང་མུས་ཡིན་འདུག ཁ་སང་ཕྱི་ཚེས་ ༡༧ ཉིན་སྲིད་སྐྱོང་མཆོག་གིས་སཾ་བྷོ་ཊ་བོད་སློབ་ཏུ་གཟིགས་སྐོར་ཕེབས་ཏེ། བོད་ཀྱི་ལོ་རྒྱུས་དང་། འཕགས་བོད་འབྲེལ་ལམ་སྐོར་འགྲེལ་བརྗོད་གནང་བ་དང་། རྒྱ་གར་གྱི་ཡུལ་ཁྲིམས་འཁུར་དགོས་གལ་དང་། ཡུལ་མི་དང་མཐུན་པོ་དགོས་གལ་ཆེ་སྐོར་སོགས་གསུངས་འདུག
སྲིད་སྐྱོང་མཆོག་གིས། རྒྱ་ནག་གིས་བོད་ནང་གཏེར་ཁ་སྔོག་འདོན་བྱས་དང་བྱེད་མུས་ཡིན་པ་དང་། བོད་ནང་ཆུ་རགས་གསར་རྒྱག་གི་ལས་གཞི་སོགས་སྤེལ་ཏེ་བོད་ཀྱི་ཁོར་ཡུག་ལ་གནོད་སྐྱོན་ཚབས་ཆེན་བཟོ་བཞིན་པའི་སྐོར་དང་། ཉེ་ལམ་བོད་ནང་ས་ཡོམ་སོགས་བྱུང་བ་ནི་རྒྱ་ནག་གཞུང་གིས་རང་བྱུང་ཁོར་ཡུག་ལ་གཏོར་བཤིག་བཏང་བའི་རྐྱེན་གྱིས་བྱུང་བ་ཡིན་སྐོར་འགྲེལ་བརྗོད་གནང་བ་མ་ཟད། བཙན་བྱོལ་བོད་མིའི་དབར་མཐུན་སྒྲིལ་དང་། ཐུན་མོང་གི་འགན་འཁུར་གལ་ཆེན་པོ་ཡིན་པའི་འབོད་སྐུལ་དང་། བོད་མི་ཚོས་བོད་ཀྱི་ངོ་བོ་དང་སྐད་ཡིག རིག་གཞུང་སོགས་སྲུང་སྐྱོབ་བྱེད་དགོས་པ་དང་། མི་རབས་གཞོན་པ་རྣམས་ཀྱིས་རང་གི་རིག་གཞུང་ལ་སྤོབས་པ་བྱེད་དགོས་པ། དེ་བཞིན་བོད་དོན་འཐབ་རྩོད་ཐད་འབད་བརྩོན་བྱེད་དགོས་པའི་སྐུལ་མ་གནང་ཡོད་འདུག
ཟླ་འདིའི་ཕྱི་ཚེས་ ༡༥ ཉིན་སྲིད་སྐྱོང་མཆོག་གིས་སྦེལ་ཀོབ་ལུགས་བསམ་མི་མང་མཉམ་འབྲེལ་ཚོགས་ཁང་དུ་སྦེལ་ཀོབ་སཾ་བྷི་ཊ་བོད་སློབ་དང་། སཾ་བྷོ་ཊ་སི་ཝི་པི་ཉིན་སློབ། བོད་ཁྱིམ་སློབ་གྲྭ་བཅས་ཀྱི་སློབ་ཕྲུག་རྣམས་ལ་གསུང་བཤད་གནང་སྐབས། བོད་ནི་གནའ་སྔ་མོ་ནས་རང་བཙན་གཙང་མའི་རྒྱལ་ཁབ་ཅིག་ཡིན་པ་ར་སྤྲོད་གསལ་པོ་ཐུབ་སྐོར་གསུངས་ཡོད་པ་དང་འབྲེལ། ཨེ་ཤ་ཡའི་ཁོར་ཡུག་བདེ་འཇགས་དང་འཐུང་ཆུའི་ཐོན་ཁུངས་ཐད་བོད་མཐོ་སྒང་གི་གནད་འགག་ཆེ་བའི་བྱེད་སྒོའི་སྐོར་ནན་བརྗོད་གནང་བ་དང་། རྒྱ་གར་གྱི་བདེ་འཇགས་ཆེད་དུ་བོད་ཀྱི་ས་ཁམས་ཆབ་སྲིད་སྐོར་ཤེས་རྟོགས་དགོས་རྒྱུ་གལ་ཆེན་པོ་ཡིན་པ་མ་ཟད། ནང་ཆོས་ཁྲོད་སྐད་ཡིག་གལ་ཆེ་ཤོས་བོད་ཡིག་ཡིན་པ་དང་། སྐད་ཡིག་རྙིང་ཤོས་བཅོ་ལྔའི་གྲས་སུ་ངོས་འཛིན་གནང་ཡོད་སྐོར། སློབ་ཕྲུག་རྣམས་ཀྱིས་བོད་ཀྱི་མ་འོངས་པའི་རེ་བ་མཚོན་གྱི་ཡོད་ལ། བོད་དོན་འཐབ་རྩོད་ཀྱི་འགན་འཁྲི་ཡོད་པས་སློབ་སྦྱོང་ཐོག་འབད་བརྩོན་གནང་དགོས་པའི་སྐུལ་མ་གནང་ཡོད་འདུག
ཕྱི་ཚེས་ ༡༤ ཉིན་གྱི་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། རྒྱ་གར་དབུས་གཞུང་ནང་སྲིད་ལྷན་ཁང་གི་བློན་ཆེན་གཞོན་པ་སྐུ་ཞབས་བྷན་དི་སན་ཇེ་ཀུ་མར་ (Bandi Sanjay Kumar) མཆོག་གིས་གཙོས་ཨནྡྲ་ཝམ་སི་ (Andra Vamsi) མཆོག་དང་། ཤྲི་ནི་ཝ་སི་པ་རི་མ་ལ་ (Srinivas Parimala)མཆོག མ་དྷུ་པ་སུ་ནུ་རུ་ (Madhu Pasunuru) ལགས། དེ་བཞིན་རྒྱ་གར་ཀར་ན་ཊ་མངའ་སྡེའི་ནང་སྲིད་བློན་ཆེན་འབུམ་རམས་པ་གངྒ་དྷ་རི་ཡ་པ་ར་མེཤ་ཊ་ར་ (Dr. Gangadharaiah Parameshwara) མཆོག་དང་། ཁོང་གི་བཟའ་ཟླ་ལྕམ་ཀ་ནི་ཀ་པ་ར་མེཤ་ཝ་ར་ (Kannika Parameshwari Parameshwara) མཆོག་བཅས་ལ་མཇལ་ཁ་སྩལ་ཡོད་འདུག
དེ་ནས་སྲིད་སྐྱོང་སྤེན་པ་ཚེ་རིང་མཆོག་སྦེལ་ཀོབ་བོད་ཁྱིམ་སློབ་གྲྭར་གཟིགས་སྐོར་དུ་ཕེབས་ཏེ་འཛིན་རིམ་བཅུ་གཉིས་ཀྱི་སློབ་ཕྲུག་རྣམས་ལ་ཐུག་འཕྲད་གནང་ཞིང་། ཡིག་རྒྱུགས་ཐོག་གྲ་སྒྲིག་ཡག་པོ་གནང་གལ་ཆེ་སྐོར་ལམ་སྟོན་གནང་རྗེས། སློབ་གྲྭའི་འཛིན་སྐྱོང་ལས་བྱེད་རྣམས་ལ་ཐུག་འཕྲད་ཀྱིས་བོད་ཁྱིམ་སློབ་གྲྭ་ནས་བོད་པའི་སློབ་ཕྲུག་རྣམས་ལ་ཤེས་ཡོན་དང་། སྤྱི་ཚོགས་སྲ་བརྟན་ཆེད་མཐུན་རྐྱེན་གནང་བར་བསྔགས་བརྗོད་གནང་ཞིང་། བོད་ཁྱིམ་སློབ་གྲྭས་ཐུགས་འགན་བཞེས་ཏེ་བོད་པའི་སྤྱི་ཚོགས་ཀྱི་དགོས་མཁོ་དང་མཐུན་པའི་གཞོན་སྐྱེས་རྣམས་ཀྱི་མ་འོངས་མདུན་ལམ་སྲ་བརྟན་ཡོང་བར་རོགས་རམ་གནང་ཡོད་སྐོར་སོགས་གསུངས་ཡོད་འདུག
ཟླ་འདིའི་ཕྱི་ཚེས་ ༡༣ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་སྦེལ་ཀོབ་བོད་མིའི་གཞིས་ཆགས་ཀྱི་དགོན་སྡེ་ཁག་དང་། སློབ་གྲྭ། སྨན་ཁང་སོགས་ལ་གཟིགས་སྐོར་གནང་རྗེས། ས་གནས་མགོ་འཛིན་དང་ལྷན་དུ་སློབ་གྲྭའི་མཐུན་རྐྱེན་དང་མ་འོངས་པའི་མདུན་ལམ་སྐོར་གོ་བསྡུར་གནང་ཡོད་འདུག
གསར་འགོད་པ་བསྟན་འཛིན་ཕུར་བུས་བོད་མིའི་སྒྲིག་འཛུགས་ཀྱི་དྲ་རྒྱ་ལས་བཏུས།
རྩོམ་སྒྲིག་བྱེད་མཁན། པདྨ་མཚོ།
