༧གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་པ་ངོས་འཛིན་དང་གསེར་ཁྲི་མངའ་གསོལ་གྱི་བྱུང་རབས་ཤེལ་དཀར་ཕྲེང་བ་ཞེས་པའི་དཔེ་དེབ་ཅིག་དབུ་འབྱེད་གནང་།

སྲིད་སྐྱོང་སྤེན་པ་ཚེ་རིང་མཆོག་གིས་རྩོམ་པ་པོ་བསོད་ནམས་རྡོ་རྗེ་ལགས་ཀྱིས་བརྩམས་པའི་དཔེ་དེབ་དེའི་ཁྲོད། རྒྱ་ནག་གཞུང་གིས་བོད་ལ་དབང་བསྒྱུར་བྱས་ཡོད་ཚུལ་གྱི་རྒྱུ་མཚན་དྲངས་ནས། སྐུའི་ཡང་སྲིད་དང་འབྲེལ་བའི་གནད་དོན་འཁྱོག་བཤད་བྱས་པ་དེ་དག་དངོས་ཡོད་མིན་པ་ཁུངས་སྐྱེལ་དཔང་རྟགས་རང་བཞིན་གྱི་ཐོག་ནས་བསྒྲུབས་ཡོད་སྐོར་སོགས་གསུངས་འདུག

འདི་ལོར་༧གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་ ༩༠ རུ་ཕེབས་པ་དང་། གསེར་ཁྲིར་མངའ་གསོལ་ཞུས་ཏེ་མི་ལོ་ ༨༥ འཁོར་བ། དེ་བཞིན་བོད་ཀྱི་ཆོས་སྲིད་གཉིས་ཀྱི་ཐུགས་འགན་གཙང་བཞེས་མཛད་ནས་མི་ལོ ༧༥ འཁོར་བ་བཅས་དུས་བཟང་གསུམ་འཛོམས་ཀྱི་ཉིན་མོ་དང་བསྟུན། དེ་རིང་བོད་ཀྱི་དཔེ་མཛོད་ཁང་གི་ཚོགས་ཁང་དུ་རྩོམ་པ་པོ་བསོད་ནམས་རྡོ་རྗེ་ལགས་ཀྱིས་བརྩམས་པའི་༧གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་པ་ངོས་འཛིན་དང་གསེར་ཁྲི་མངའ་གསོལ་གྱི་བྱུང་རབས་ཤེལ་དཀར་ཕྲེང་བ་ཞེས་པའི་དཔེ་དེབ་ཅིག་དབུ་འབྱེད་གནང་སོང་ལ། དབུ་འབྱེད་མཛད་སྒོ་དེའི་ཐོག་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་དང་། མགྲིན་ཚབ་པ་བསྟན་འཛིན་ལེགས་བཤད་ལགས་སོགས་ཀྱིས་དབུས། དྷ་སའི་ཁུལ་གྱི་ཉམས་ཞིབ་པ་དང་རྩོམ་པ་པོ་སོགས་ཕེབས་འདུག

དབུ་འབྱེད་མཛད་སྒོའི་ཐོག་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་དཔེ་དེབ་ཀྱི་ངོ་སྤྲོད་དུ། རྩོམ་པ་པོ་བསོད་ནམས་རྡོ་རྗེ་ལགས་ཀྱིས་གངས་ལྗོངས་བསྟན་འགྲོའི་ཕན་བདེའི་སྲོག་ཤིང་༧གོང་ས་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོའི་ངོས་འཛིན་དང་གསེར་ཁྲིར་མངའ་གསོལ་གྱི་བྱུང་རབས་ཤེལ་དཀར་ཕྲེང་བ་ཞེས་པའི་དཔེ་དེབ་ཁུངས་ལྡན་བརྩམས་གནང་བ་འདི་ནི་དུས་ཐོག་གི་ཆར་པ་ཞིག་ཡིན། རྒྱ་ནག་དམར་གཞུང་གི་བྱེད་སྟངས་ནི་ཐམས་ཅད་རང་གི་ཆབ་སྲིད་ཀྱི་དགོས་མཁོ་དང་ལག་ཆར་བེད་སྤྱོད་སླད་འཁྱོག་བཤད་བྱ་རྒྱུར་གོམས་ནས་ཡོད། གཅིག་བྱས་ན་མའོ་ཙེ་ཏུང་གིས་རྫུན་གཅིག་ཐེངས་བརྒྱ་ལ་བཤད་ན་བདེན་པར་ཆགས་རྒྱུ་རེད་བཤད་པ་དེ་ལག་ལེན་དུ་བསྟར་གྱིན་པ་མིན་འགྲོ། རྒྱ་དམར་དེ་འཛམ་གླིང་ནང་གི་གལ་ཆེན་རྒྱལ་ཁབ་ཅིག་ཆགས་འདོད་ཡོད་ཀྱང་། ད་ལྟའི་རྒྱ་ནག་དམར་གཞུང་ལ་དོན་དམ་པར་ཡ་རབས་སྤྱོད་བཟང་གི་ལྟ་ཁོམ་སྡོད་ཁོམ་གང་ཡང་མེད་པར། དམག་དང་དཔལ་འབྱོར་སྟོབས་ཤུགས་ཁོ་ནས་རྒྱལ་ཁབ་གལ་ཆེན་ཞིག་ཆགས་འདོད་བྱེད་ཀྱིན་ཡོད། ཡ་རབས་སྤྱོད་བཟང་མེད་པའི་དཔེར་བརྗོད་དེ་ག་རེ་རེད་ཟེར་ན། བོད་ཁོ་ན་མ་ཡིན་པར་ཉེ་འཁྲིས་ཀྱི་ཁྱིམ་མཚེས་ཚང་མའི་ས་ཆ་འཇབ་རྒོལ་བཙན་བཟུང་དང་། དངུལ་དངོས་དང་མི་འབོར་གྱི་དབང་ཤེད་བེད་སྤྱད་ནས་བསླུ་བྲིད་བརྒྱུད། རྫུན་རྒྱབ་རྫུན་གྱིས་འགེབས་ཐབས་ལག་བསྟར་བྱས་དང་བྱེད་མུས་ཡིན་པ་མཁྱེན་གསལ་རེད། བོད་ཀྱི་ས་ཆ་ཚང་མ་བཙན་དབང་གིས་བཟུང་བ་མ་ཟད། དེང་སང་ཐམས་ཅད་རྒྱ་ནག་ཅན་དུ་འགྱུར་དགོས་ཟེར་ནས་ངོ་ཚ་ཁྲལ་མེད་ཀྱི་གདོང་རྗེན་དམར་པོ་བསྟན་ནས། བོད་ཀྱི་ངོ་བོ་མཚོན་བྱེད་ཀྱི་ཆོས་དང་རིག་གཞུང་དང་བཅས་རྩ་མེད་ནག་བསུབས་གཏང་རྒྱུར་ཐབས་ཤེས་བྱེད་མུས་ཡིན། ཞེས་བརྗོད་སོང་།

དཔེ་དེབ་དབུ་འབྱེད་དེ་དང་འབྲེལ་ནས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དྲ་ལམ་ནས། དེ་རིང་ཚོགས་དྲུང་བསོད་ནམས་རྡོ་རྗེ་ལགས་ཀྱིས་འགན་བཞེས་ནས་བོད་ཀྱི་ལོ་རྒྱུས་ཀྱི་ཆ་ཤས་ནང་ནས། དོན་གནད་གལ་ཆེན་པོ་ཞིག་དང་འབྲེལ་ནས། ལོ་མང་པོའི་རིང་རྒྱ་ནག་དང་ཐའེ་ཝན། བོད་སོགས་ནས་ཡིག་ཆ་མཁོ་སྒྲུབ་བྱས་ཏེ། ༧རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གསེར་ཁྲི་མངའ་གསོལ་ཞུ་རྒྱུ་སོགས་དང་འབྲེལ་བའི་རྒྱ་ནག་གཞུང་གིས་འཛམ་གླིང་ལ་འཁྱོག་བཤད་བྱེད་མུས་ཡིན་པ་དེ་དག་བདེན་པ་མིན་པའི་ཐད་ཞིབ་འཇུག་གནང་ནས་དེབ་གཟུགས་ཀྱི་ངོ་བོར་བཏོན་གནང་ཡོད་རེད། དེ་ནི་ལོ་རྒྱུས་ཀྱི་ཆ་ཕྲ་མོ་ཞིག་རེད། དཔེར་ན། ༧གོང་ས་མཆོག་གི་མཛད་རྣམ་དུ་དེ་དག་མཇལ་རྒྱུ་ཡོད་ནའང་། རྩོམ་པ་པོ་བསོད་ནམས་རྡོ་རྗེ་ལགས་ཀྱི་དཔེ་དེབ་ནང་རྒྱ་ནག་གཞུང་གིས་སྐབས་དེ་དུས་བོད་ལ་དབང་བསྒྱུར་བྱས་ཡོད་པའི་རྒྱུ་མཚན་དུ་དྲངས་ནས། སྐུའི་ཡང་སྲིད་དང་འབྲེལ་བའི་གནད་དོན་འཁྱོག་བཤད་བྱས་པ་དེ་དག་དངོས་ཡོད་མིན་པར་ཁུངས་སྐྱེལ་དཔང་རྟགས་ཀྱི་ཐོག་ནས་བསྒྲུབས་གནང་ཡོད་རེད། ཁོང་ཉིད་རྩ་བའི་གཞུང་ཞབས་རེད་ལ་ད་ལྟ་ཚོགས་དྲུང་ཆགས་ཡོད་དུས་ཕྱག་ལས་མང་པོ་ཞེ་དྲགས་ཡོད་རེད་དེ། གནད་དོན་དེ་དག་གལ་ཆེན་དུ་གཟིགས་ནས་དངོས་སུ་ཉམས་ཞིབ་གནང་སྟེ། དེབ་པར་འགྲེམས་བྱ་རྒྱུའི་དུས་ལ་སླེབས་པས། ཁོང་གི་སྐུ་ལས་བསྐྱོན་པར་ངས་སྙིང་ཐག་པ་ནས་ཐུགས་རྗེ་ཆེ་དང་། རྗེས་སུ་ཡི་རངས་ཞུ་རྒྱུ་ཡིན། ཞེས་གསུངས་འདུག

དེའི་རྗེས་རྩོམ་པ་པོ་བསོད་ནམས་རྡོ་རྗེ་ལགས་ཀྱིས། དཔེ་དེབ་དེའི་ནང་དུ་༧གོང་ས་རྒྱལ་བ་རིན་པོ་ཆེ་མཆོག་ཇི་ལྟར་ཡང་སྲིད་ངོས་འཛིན་གནང་མིན་དང་། དེ་བཞིན་གསེར་ཁྲི་མངའ་གསོལ་ཇི་ལྟར་ཞུས་མིན་དང་འབྲེལ་ནས་བྲིས་ཡོད་ཅིང་། དཔེ་དེབ་འདིའི་ནང་རྒྱ་ནག་གི་རྒྱབ་ཤ་དཀར་པོ་དང་། རྒྱ་ནག་གིས་ཨ་རིའི་ཕྱི་ལོ་ ༢༠༢༠ ལོར་སྐུའི་ཡང་སྲིད་དང་འབྲེལ་བའི་ཁྲིམས་འཆར་ལ་ལན་འདེབས་བྱས་པ། རྒྱ་ནག་གཞུང་གིས་ཡིག་ཆ་ཁག་དང་རྒྱལ་སྤྱིའི་སྤྱི་ཚོགས་སུ་༧གོང་ས་རྒྱལ་བ་རིན་པོ་ཆེ་མཆོག་ཡང་སྲིད་ངོས་འཛིན་སྐབས། རྒྱ་ནག་དབུས་གཞུང་གིས་གསེར་བུམ་དཀྲུགས་མི་དགོས་པར་ཡང་སྲིད་ངོས་འཛིན་ཆོག་པའི་ཆོག་མཆན་སྤྲད་ཡོད་ལུགས་ཀྱི་འཁྱོག་བཤད་དག  ལོ་རྒྱུས་ཀྱི་བདེན་དཔང་དང་ཞིབ་འཇུག་རང་བཞིན་ཐོག་ནས་སྐུའི་ཡང་སྲིད་ཀྱི་ངོས་འཛིན་གནང་སྟངས་དང་གསེར་ཁྲི་མངའ་གསོལ་ཞུ་སྟངས་ཀྱི་ཐད་ལ་གསལ་ཁ་བསྟན་ཡོད་སྐོར་དང་། དཔེ་དེབ་འདི་ནི་ལོ་རྒྱུས་མཁས་དབང་གིས་བྲིས་པའི་ལོ་རྒྱུས་ཀྱི་དེབ་ཐེར་ཞིག་མིན་ནའང་། དེའི་ནང་སྐབས་དེའི་དུས་ཀྱི་ལོ་རྒྱུས་དང་ཐད་ཀར་འབྲེལ་བ་ཡོད་པའི་མིས་བྲིས་པའི་རྩོམ་ཡིག་དང་། གཞུང་འབྲེལ་ཡིག་ཆ། རྒྱ་ཡིག་ནང་ཡོད་པའི་ལོ་རྒྱུས་དེབ་ཐེར་སོགས་ལས་ལུང་འདྲེན་དང་། དཔང་རྟགས་མང་པོ་ཞིག་ལུང་འདྲེན་བྱས་པའང་། ལོ་རྒྱུས་ཞིབ་འཇུག་དང་ཉམས་ཞིབ་བྱེད་མཁན་རྣམས་ལ་ཞིབ་འཇུག་གི་རྒྱུ་ཆར་དམིགས་ཡོད་སྐོར་སོགས་བརྗོད་འདུག

ཡང་རྩོམ་པ་པོས། དཔེ་དེབ་འདིའི་ཁྲོད་རྒྱ་ནག་གཞུང་གིས་སྐུའི་ཡང་སྲིད་དང་འབྲེལ་བའི་རྩོམ་ཡིག་ཁག་ཅིག་བོད་ཡིག་ནས་རྒྱ་ཡིག་ཏུ་བསྒྱུར་བ་དང་། རྒྱ་ཡིག་ནས་བོད་ཡིག་ཏུ་བསྒྱུར་བ་སོགས་ཡིག་ཆ་མང་པོ་ཞིག་ཏུ། ཆབ་སྲིད་ཀྱི་དགོས་མཁོ་དང་ཁེ་ཕན་གྱི་དབང་གིས་མ་ཡིག་ལས་འགལ་ནས་བཅོས་སྒྲིག་དང་སྒྲིག་སྦྱོར་བྱས་ཡོད་པ་ཁག དཔེ་མཚོན་རང་བཞིན་ལྡན་པའི་ཐོག་ནས་གསལ་སྟོན་དང་། ཕྱི་ལོ་ ༡༩༣༣ ལོ་༧རྒྱལ་དབང་སྐུ་ཕྲེང་བཅུ་གསུམ་པ་མཆོག་སྐུ་གཤེགས་རྗེས་དང་། ༧རྒྱལ་དབང་སྐུ་ཕྲེང་བཅུ་བཞི་པ་ཆེན་མོ་མཆོག་ཡང་སྲིད་ངོས་འཛིན་གནང་ནས། གསེར་ཁྲི་མངའ་གསོལ་ཞུ་དུས་བར་ཀྱི་དུས་ཚོད་ཐུང་ཐུང་དེའི་རིང་ལའང་། ལོ་རྒྱུས་དེབ་ཐེར་དང་ཡིག་ཆ་མང་པོ་ཞིག་ནས་རྒྱ་ནག་དང་བོད་ཐ་དད་ཡིན་པའི་བདེན་དཔང་གི་ཡིག་ཆ་མང་དག་ཅིག་མཁོ་བསྡུ་གནང་ཡོད་སྐོར་སོགས་བརྗོད་འདུག

གསར་འགོད་པ། དཔལ་ལྡན།