བོད་ཁུལ་གྱི་དཔོན་པོ་གཉིས་རྒྱ་ནག་དམར་ཤོག་གི་སྐྱིད་སྡུག་ནས་ཕྱིར་ཕུད་བཏང་།

ཡུན་ནན་བདེ་ཆེན་བོད་རིགས་རང་སྐྱོང་ཁུལ་གྱི་ཁུལ་དཔོན་ཟུར་པ་བྱང་ཆུབ་དང་ཁུལ་དཔོན་གཞོན་པ་ཟུར་པ་ཆི་ཅིན་ཤིང་གཉིས་ཀྱིས། རྒྱ་ནག་དམར་ཤོག་ཚོགས་པར་བློ་མི་དཀར་བ་དང་ཚོགས་པར་རྒྱབ་འགལ་བྱས་པ་སོགས་ཀྱི་ཉེས་མིང་འོག་ཚོགས་པའི་སྐྱིད་སྡུག་ནས་ཕྱིར་ཕུད་བཏང་འདུག

རྒྱ་ནག་གཞུང་གིས་དམར་ཤོག་གི་ལངས་ཕྱོགས་དང་མི་མཐུན་པའི་ལྟ་སྤྱོད་ཅན་དང་། བཙན་བཟུང་འོག་ཡོད་པའི་གྲངས་ཉུང་མི་རིགས་ཁག་གི་དཔོན་རིགས་ཚོར་སྟག་དང་སྦྲང་མ་ལེབ་རྡུང་གི་སྲིད་ཇུས་འོག་ནས།  ཞིབ་བཤེར་དང་བཙོན་འཇུག་ཁྲིམས་ཐག་གཅོད་ཀྱིན་ཡོད་པ་ལྟར། ཟླ་འདིའི་ཕྱི་ཚེས་ ༢༤ ཉིན་རྒྱ་ནག་གཞུང་གིས་ཡུན་ནན་བདེ་ཆེན་བོད་རིགས་རང་སྐྱོང་ཁུལ་གྱི་ཁུལ་དཔོན་ཟུར་པ་བོད་མི་བྱང་ཆུབ་དང་། ཁུལ་དཔོན་གཞོན་པ་ཟུར་པ་ཆི་ཅིན་ཤིང་(Qi Jianxin) གཉིས་ཀྱིས། ཁྲིམས་འགལ་ཁེ་ཕན་བླངས་པ་དང་། རྒྱ་ནག་དམར་ཤོག་རིང་ལུགས་ལ་རྒྱབ་འགལ་དང་ཡིད་ཆེས་མེད་པ་སོགས། ཁྲིམས་སྒྲིག་ལ་གཏོར་བརླག་ཚབས་ཆེན་བཏང་བའི་ཉེས་མིང་འོག རྒྱ་ནག་དམར་ཤོག་ཚོགས་པའི་སྐྱིད་སྡུག་ནས་ཕྱིར་ཕུད་བཏང་བའི་གསལ་བསྒྲགས་བྱས་འདུག

འདས་པའི་ལོ་ཤས་རིང་རྒྱ་ནག་གཞུང་གིས་བོད་ཁུལ་གྱི་མགོ་ཁྲིད་མང་པོ་ཞིག་འཛིན་བཟུང་ཁྲིམས་ཐག་བཅད་པའི་གནས་ཚུལ་ཐོན་ཡོད་པ་དང་འབྲེལ་ཏེ། འདི་གའི་གསར་འགོད་པས་བོད་ཀྱི་སྲིད་ཇུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་སུ་དེའི་རྒྱུ་རྐྱེན་སྐོར་བཀའ་འདྲི་ཞུས་པར་ཁོང་གིས། རྒྱ་རིགས་ཀྱི་དཔོན་རིགས་ཚོ་ཕྱོགས་ཁག་གི་ཐོག་ནས་དབང་ཆ་འཐབ་རྩོད་ཀྱི་རྣམ་པའི་དབང་གིས་ལྐོག་ཟ་རུལ་སུངས་ཀྱི་ནག་ཉེས་གཡོགས་ཏེ། ཏང་གི་སྐྱིད་སྡུག་ནས་ཕུད་པ་དང་བཙོན་འཇུག་མང་པོ་བྱེད་ཀྱིན་ཡོད་རེད། འོན་ཀྱང་། བོད་ཀྱི་དཔོན་རིགས་ཚོ་རྒྱ་ནག་གཞུང་གི་ཁ་ལ་ཉན་མི་ཉན་དང་ཁ་བྲལ་རིང་ལུགས་ཟེར་བར་ངོ་རྒོལ་བྱེད་མིན་ལྟ་བ་ལས། རྒྱ་རིགས་ཀྱི་དཔོན་རིགས་བཞིན་དབང་ཆ་འཐབ་རྩོད་ཀྱི་ཐད་འབྲེལ་བ་ཅི་ཡང་ཡོད་མ་རེད། ལྷག་པར་དུ་ཏིན་ཞོ་ཕིང་དང་ཅང་ཙི་མིང་སོགས་ཀྱི་སྐབས་སུ་བོད་པའི་དཔོན་རིགས་ཚོས་ལྐོག་ཟ་རུལ་སུངས་བྱེད་པ་སྣང་མེད་དུ་བཞག་ནས། ཆེད་དུ་བོད་རིགས་དཔོན་པོ་དེ་དག་བཀོལ་ནས་ཏཱ་ལའི་ཁ་བྲལ་ཚོགས་པ་ཟེར་བ་དང་། ༧གོང་ས་རྒྱལ་བ་རིན་པོ་ཆེ་མཆོག་ལ་མཚན་སྨད་ཞུ་བཅུག་གི་ཡོད།  དཔེར་ན། ཏིན་ཞོ་ཕིང་གི་རིག་གནས་གསར་བརྗེ་སྐབས། ལྐོག་ཟ་རུལ་སུངས་དང་ངོ་རྒོལ་བྱེད་མཁན་གྱི་རྒྱ་རིགས་ཚང་མ་མེད་པར་བཟོས་ཟིན་ནའང་། བོད་རིགས་དཔོན་པོ་ཚང་མ་ཆེད་དུ་བེད་སྤྱོད་བཏང་ཡོད་སྟབས། རྒྱ་ནག་གཞུང་གི་བོད་པ་བེད་སྤྱོད་བྱས་ནས་བོད་པར་སྟངས་འཛིན་བྱས་ཞེས་པའི་སྲིད་ཇུས་ཀྱི་འོག་ནས། བོད་རིགས་དཔོན་པོ་ཚོས་རྒྱ་ནག་གཞུང་གི་ཁ་ལ་ཉན་གྱི་ཡོད་མེད་ལྟ་བ་ལས། ནག་ཉེས་དང་ལྐོག་ཟ་རུལ་སུངས་བྱས་ཡོད་མེད་ལྟ་ཡི་མེད་པ་རེད། ཅེས་བརྗོད་བྱུང་།

ཡང་ཁོང་གིས། ཞི་ཅིན་ཕིན་གྱིས་རྒྱ་ནག་གཞུང་གི་མགོ་ཁྲིད་བྱས་པ་ནས་བཟུང་། མུ་མཐུད་དུ་བོད་པ་བེད་སྤྱོད་བྱས་ནས་བོད་པར་སྟངས་འཛིན་བྱས་ཞེས་པའི་སྲིད་ཇུས་དེ་དྲག་པོའི་ཐོག་ནས་སྟངས་འཛིན་ལག་བསྟར་བྱེད་མགོ་བརྩམས་པས།  ཞི་ཅིན་ཕིན་གྱི་དྲག་པོའི་སྲིད་ཇུས་ལ་མི་དགའ་མཁན་དང་མགོ་བདེ་པོ་བྱེད་མི་ཤེས་མཁན་གྱི་བོད་རིགས་དཔོན་པོ་མང་པོ་ཞིག་ལ་ལྐོག་ཟ་རུལ་སུངས་སོགས་ཀྱི་ཉེས་མིང་གཡོགས་ཏེ། རྒྱ་ནག་དམར་ཤོག་ཚོགས་པའི་སྐྱིད་སྡུག་ནས་ཕྱིར་ཕུད་དང་བཙོན་འཇུག་བྱེད་ཀྱི་ཡོད་པ་རེད། སྤྱིར་ཏིན་ཞོ་ཕིང་དང་ཞི་ཅིན་ཕིན་གཉིས་ཀྱི་རྩ་བའི་སྲིད་ཇུས་གཅིག་ཡིན་ན་ཡང་། སྔོན་མ་ནག་ཉེས་ཅན་དེ་དག་ཚེ་ཐར་བཏང་ནས་བོད་རིགས་དཔོན་པོ་ཚོར་ཆེད་དུ་རྒྱ་ནག་གཞུང་གི་ཁ་ལ་ཉན་དུ་འཇུག་པ་དང་།  ད་ལྟ་དྲག་པོའི་ཐོག་ནས་ཁ་ལ་ཉན་དུ་བཅུག་སྟེ། སྲིད་ཇུས་ཀྱི་རྣམ་པར་ཅུང་ཙམ་འགྱུར་བ་ལས་ངོ་བོ་གཅིག་རེད་བསམ་གྱི་འདུག ཅེས་བརྗོད་བྱུང་།

འདས་ལོའི་ལོ་མགོ་ཙམ་ནས་རྒྱ་ནག་གཞུང་གིས་ཁུལ་དཔོན་ཟུར་པ་བོད་མི་བྱང་ཆུབ་དང་ཁུལ་དཔོན་གཞོན་པ་ཟུར་པ་ཆི་ཅིན་ཤིང་གཉིས་ཀྱིས་ལྐོག་ཟ་རུལ་སུངས་དང་། གནོད་སྐྱོན་ཚབས་ཆེན་དང་ཤུགས་རྐྱེན་ངན་པ་སྤྲོད་ཀྱིན་ཡོད་ལུགས་བཤད་ནས་ཞིབ་བཤེར་ཐོག་མར་མགོ་བཙུགས་ཡོད་ཅིང་། འདས་ལོའི་ཕྱི་ཟླ་ ༥ ཚེས་ ༡༩  ཉིན་ཁུལ་ཟུར་བྱང་ཆུབ་དང་ཕྱི་ཟླ་ ༤ ཚེས་ ༩ ཉིན་ཆི་ཅིན་ཤིང་ལས་གནས་ནས་གནས་དབྱུང་བཏང་འདུག་ལ། ཕྱི་ལོ་ ༢༠༢༤ ཡི་ལོ་མགོ་ནས་རྒྱ་ནག་གཞུང་གིས་ཁྲིམས་སྒྲིག་ལ་གཏོར་བརླག་དང་། ལྐོག་ཟ་རུལ་སུངས་བྱས་པ་སོགས་ཀྱི་ཉེས་མིང་འོག ཡུན་ནན་བདེ་ཆེན་བོད་རིགས་རང་སྐྱོང་ཁུལ་འཐབ་ཕྱོགས་གཅིག་གྱུར་ཁང་གི་མགོ་ཁྲིད་སྐལ་བཟང་རྣམ་རྒྱལ་དང་། ཡུན་ནན་བདེ་ཆེན་བོད་རིགས་རང་སྐྱོང་ཁུལ་གྱི་ཁུལ་དཔོན་གཞོན་པ་ཟུར་པ་བཀྲ་ཤིས་དོན་གྲུབ།  ཡུན་ནན་བདེ་ཆེན་བོད་རིགས་རང་སྐྱོང་ཁུལ་གྱི་རྒྱུན་ལས་ཧྥང་ཡུ་ཤང་(Feng Yuxiang) སོགས་ལས་གནས་ནས་ཕྱིར་ཕུད་བཏང་སྟེ་ཞིབ་བཤེར་བྱེད་མགོ་བཙུགས་ཡོད་འདུག

འདས་པའི་མི་ལོ་གཉིས་ལྷག་གི་རིང་ཉུང་མཐར་བོད་ཁུལ་གྱི་མཐོ་རིམ་དཔོན་རིགས་ ༢༠  ཙམ་གནས་དབྱུང་ཞིབ་བཤེར་བྱས་ཡོད་པའི་ཁྲོད།  ཟླ་འདིའི་ཚེས་ ༡༢ ཉིན་རྒྱ་ནག་གཞུང་གིས་རྒྱལ་ཁབ་ལ་བློ་མི་དཀར་བ་དང་ཏང་གཤིས་རྩ་དོན་ཤོར་བ། བོད་སྐྱེ་རྒུ་མདོ་ཁུལ་གྱི་དམར་ཤོག་དྲུང་ཆེ་གཞོན་པ་ཤེས་རབ་རྒྱ་མཚོ་དང་། འདི་ལོའི་ཕྱི་ཟླ་ ༡ ཚེས་ ༢༣ ཉིན་བོད་རང་སྐྱོང་ལྗོངས་ཟེར་བའི་སྲིད་གཞུང་གི་མགོ་གཙོ་ཆེ་དགྲ་ལྷ། དེ་བཞིན་འདས་ལོའི་ཕྱི་ཟླ་ ༡༢ ཚེས་ ༡༡ ཉིན། བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཟུར་པ་ཝུའུ་ཡེན་ཇེ་(Wu Yingjie)ཡིས། ཏང་ལ་དད་སེམས་ཉམས་པ་དང་ཏང་གཤིས་ཀྱི་རྩ་དོན་ཤོར་བ། ཕུགས་བསམ་ཉམས་པ་སོགས་ཀྱི་ཉེས་མིང་འོག་དམར་ཤོག་ཚོགས་ཁོངས་ནས་ཕྱིར་ཕུད་བཏང་།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།