ཨ་རིའི་གྲོས་ཚོགས་འཐུས་མི་ཇིམ་མེག་གྷོ་ཝན་མཆོག་གིས་རྒྱལ་སྤྱིའི་ཐོག་བོད་མི་ཚོར་འགྲོ་བ་མིའི་ཐོབ་ཐང་ལོངས་སྤྱོད་ཆོག་པ་དགོས་རྒྱུའི་དྲན་སྐུལ་ཞུ་རྒྱུ་ཡིན་ཞེས་གསུངས།
ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་ནན་སི་པེ་ལོ་སི་མཆོག་གི་དབུས་ཨ་རིའི་གྲོས་ཚོགས་འཐུས་མི་ཇིམ་མེག་གྷོ་ཝན་ (Jim McGovern) མཆོག་དང་། ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚན་པའི་ཚོགས་གཙོ་དང་གྲོས་ཚོགས་འོག་མའི་འཐུས་མི་ཁི་རི་སི་སི་མི་ཐི་ (Chris Smith) མཆོག ཨ་རིའི་གྲོས་ཚོགས་འོག་མའི་རྒྱ་ནག་ལས་དོན་ཐད་ཀྱི་ཆེད་འཛུགས་ཚོགས་ཆུང་གི་ཚོགས་མི་ར་ཇ་ (Raja Krishnammorthi) མཆོག ཐའེ་ཝན་སོགས་ནས་གནད་ཡོད་མི་སྣ་ཁག་ཅིག་གིས་གསུམ་བཅུའི་དུས་དྲན་ཉིན་བོད་དོན་རྒྱབ་སྐྱོར་གྱི་གསར་འགོད་བསྒྲགས་གཏམ་སྤེལ་གནང་འདུག
ཉིན་དེར་ལྕམ་ནན་སི་པེ་ལོ་སི་མཆོག་གིས། ལོ་ངོ་ ༦༦ གོང་ལ་བོད་མི་སྟོང་ཕྲག་མང་པོས་བོད་ཀྱི་ཆོས་དང་རིག་གཞུང་། སྐད་ཡིག་སོགས་སྲུང་སྐྱོབ་ཀྱི་ཆེད་དུ་རང་ཉིད་ཀྱི་སྲོག་བློས་གཏོང་གིས་བོད་དོན་འཐབ་རྩོད་གནང་བ་དང་། རྒྱ་ནག་གཞུང་གིས་བོད་ནང་དྲག་གནོན་ཤུགས་ཆེན་བྱེད་ཀྱི་ཡོད་པའི་རྐྱེན་གྱིས་སྐུ་ན་ཕྲ་བའི་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་བཙན་བྱོལ་དུ་ཕེབས་དགོས་བྱུང་བ་མ་ཟད། ༧གོང་ས་མཆོག་ནི་བོད་བསྟན་སྲིད་སྤྱི་དང་། བོད་མི་རྣམས་ཀྱི་བདེ་དོན་ཆེད་བློ་སྟོབས་ཞུམ་པ་མེད་པར་འཐབ་རྩོད་གནང་བཞིན་པའི་མཚོན་རྟགས་ཆགས་ཡོད། བོད་དོན་འཐབ་རྩོད་ལ་མུ་མཐུད་དུ་རྒྱབ་སྐྱོར་བྱ་རྒྱུའི་དམ་བཅའ་བརྟན་པོ་ཡོད། ཅེས་གསུངས་འདུག
དེ་བཞིན་ཨ་རིའི་གྲོས་ཚོགས་འཐུས་མི་ཇིམ་མེག་གྷོ་ཝན་ (Jim Mc Govern) མཆོག་གིས། རྒྱ་ནག་གཞུང་གིས་བོད་ནང་གི་བོད་མི་རྣམས་ལ་སྨྲ་བརྗོད་རང་དབང་སྤྲོད་ཀྱི་མེད་པ་མ་ཟད། བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་ཡོད་པར་བརྟེན། ང་ཚོས་བོད་མི་རྣམས་ཀྱི་ཆེད་དུ་མུ་མཐུད་སྐད་འབོད་རྒྱག་དགོས་ཀྱི་ཡོད་པ་རེད། གསུམ་བཅུའི་དུས་དྲན་སྲུང་གཙི་ཞུས་པའི་ཐོག བོད་མི་ཚོས་རང་ཉིད་ཀྱི་ཐུན་མོང་མ་ཡིན་པའི་ངོ་བོ་དང་སྐད་ཡིག་མི་ཉམས་རྒྱུན་འཛིན་བྱ་རྒྱུ། དེ་བཞིན་རིག་གཞུང་སྲུང་སྐྱོབ་དང་། ཆུ་རགས་གསར་རྒྱག་ལ་ངོ་རྒོལ་བྱེད་དགོས་པ་དང་། ཆོས་ཕྱོགས་ཀྱི་དབུ་ཁྲིད་འདེམས་རྒྱུའི་ཐོབ་ཐང་ཡོད་དགོས་པ་ནི་གལ་ཆེན་ཞིག་ཡིན་པར་ངོས་འཛིན་བྱེད་ཀྱི་ཡོད། དེ་རིང་འཛམ་གླིང་གང་སར་ཡོད་པའི་བོད་མི་ཚོས་རང་དབང་འཐབ་རྩོད་ཆེད་ངོ་རྒོལ་བྱེད་པར་རྒྱབ་སྐྱོར་དང་། རྒྱ་ནག་གི་དཔོན་རིགས་དང་། འཛམ་གླིང་མི་མང་ཡོངས་ལ་བོད་མི་ཚོར་འགྲོ་བ་མིའི་ཐོབ་ཐང་ལོངས་སྤྱོད་ཆོག་པ་དགོས་རྒྱུའི་དྲན་སྐུལ་ཞུ་རྒྱུ་དང་། ཨ་རིའི་གྲོས་ཚོགས་འཐུས་མི་ཞིག་ཡིན་པའི་ཆ་ནས་ཨ་རིའི་ཕྱི་འབྲེལ་སྲིད་ཇུས་ཀྱིས་བོད་དོན་རྒྱབ་སྐྱོར་ལ་རོགས་རམ་ཡོང་བ་བྱ་རྒྱུའི་འབད་བརྩོན་ཞུ་ཡི་ཡོད། ཅེས་གསུངས་འདུག
ཟླ་འདིའི་ཕྱི་ཚེས་ ༩ ཉིན་ཐའེ་ཝན་གྱི་རྒྱལ་ས་ཐའེ་པའེ་རུ་གསུམ་བཅུའི་དུས་དྲན་སྲུང་གཙི་དང་། ངོ་རྒོལ་གྱི་ལས་འགུལ་སྤེལ་ཡོད་འདུག སྐབས་དེར་ཐའེ་ཝན་རྒྱལ་ཡོངས་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་གཞོན་པ་ལྕམ་ཝང་ཡུ་ལིང་ (Wang Yu-ling) གི་གཙོས་ཚོགས་མི་རྣམས་ཀྱིས་མཉམ་ཞུགས་གནང་ཡོད་འདུག་ལ། ཚོགས་གཙོ་གཞོན་པ་ཝང་ཡུ་ལིང་མཉམ་ཞུགས་བྱས་པ་ཐེངས་དང་པོ་ཡིན་འདུག
སྐབས་དེར་ལྕམ་ཝང་ཡུ་ལིང་ (Wang Yu-ling) གིས། ང་ཚོས་བོད་ཀྱི་གནད་དོན་ནི་འགྲོ་བ་མིའི་ཐོབ་ཐང་གི་གནད་དོན་ཞིག་ལ་ངོས་འཛིན་བྱེད་ཀྱི་ཡོད། རྒྱ་ནག་གཞུང་གིས་བོད་ལ་བཙན་འཛུལ་བྱས་པ་དང་ཞི་བའི་གྲོས་མཐུན་རྡོག་རོལ་བཏང་ཡོད། ཅེས་དང་། ཕྱི་ལོ་ ༡༩༥༠ ནས་བཟུང་རྒྱ་ནག་གཞུང་གིས་བོད་ནང་དུ་མི་རིགས་རྩ་མེད་གཏོང་བའི་བྱ་སྤྱོད་སྤེལ་ཡོད་ལ། བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་དང་གཏོང་མུས་ཡིན་པ་རེད། ད་ལྟའི་བོད་ནང་གི་གནས་སྟངས་དེ་མ་འོངས་པའི་ཐའེ་ཝན་ནང་གི་གནས་སྟངས་དུ་འགྱུར་སྲིད། དེར་བརྟེན་ཐའེ་ཝན་ནང་གི་སྤྱི་མང་ཚོགས་པ་དང་། ཐའེ་ཝན་ནང་གི་བོད་མི་ཚོ་ལོ་འཁོར་གྱི་དུས་དྲན་ནང་མཉམ་ཞུགས་བྱེད་ཀྱི་ཡོད། ཅེས་གསུངས་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་བྱེད་མཁན། པདྨ་མཚོ།
