སྲིད་སྐྱོང་མཆོག་གིས་ལྕམ་སྐུ་ནན་སི་པོལ་སི་མཆོག་གི་འཁྲུངས་སྐར་ལ་འཚམས་འདྲི་ཞུས་ཏེ་མ་འོངས་པའི་ལོ་ཟླའི་ནང་སྐུ་གཟུགས་གསལ་ཐང་ཡོང་བའི་སྨོན་འདུན་ཞུས་འདུག
US Speaker of the House Nancy Pelosi visiting His Holiness the Dalai Lama in Dharamsala, HP, India on March 21, 2008. (Photo by Tenzin Choejor/OHHD
དེ་རིང་༧གོང་ས་རྒྱལ་བ་རིན་པོ་ཆེ་མཆོག་གི་གྲོགས་པོ་དང་། ཨ་རིའི་གྲོས་ཚོགས་ཀྱི་ཚོགས་གཙོ་ཟུར་བ་བོད་དོན་རྒྱབ་སྐྱོར་བ་ལྕམ་སྐུ་ནན་སི་པོལ་སི་(Nancy Pelosi) མཆོག་གི་འཁྲུངས་སྐར་གྱི་ཉིན་མོར། དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བོད་མི་རྣམས་ཀྱི་ཚབ་ཞུས་ཏེ་འཚམས་འདྲི་ཞུས་པ་དང་སྦྲགས། ཁོང་མོའི་མ་འོངས་པའི་ལོ་ཟླའི་ནང་སྐུ་གཟུགས་གསལ་ཐང་དང་བྱ་བ་ལམ་འགྲོ་ཡོང་བའི་སྨོན་འདུན་ཞུས་འདུག
དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་འཚམས་འདྲི་ཞུས་པའི་ནང་། བཙན་བྱོལ་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ། ཁྱེད་ཀྱི་འགྲན་ཟླ་མེད་པའི་མཛའ་མཐུན་ལ་ང་ཚོས་ཡི་རངས་བསྔགས་བརྗོད་ཞུ་ཡི་ཡོད། ཁྱེད་ཀྱི་མགོ་ཁྲིད་བཟང་པོའི་ལམ་སྟོན་ནི་མི་ལོ་བཅུ་ཕྲག་འགའི་རིང་གདུག་རྩུབ་ཀྱི་འོག་ཏུ་ཡོད་པའི་བོད་མི་རྣམས་ཀྱི་རེ་བའི་དབུགས་ཐག་ལྟ་བུར་གྱུར་ཡོད། ཁྱེད་ཀྱིས་༧གོང་ས་རྒྱལ་བ་རིན་པོ་ཆེ་མཆོག་དང་དམ་ཚིག་གཡོ་བ་མེད་པའི་ཐོག་ནས་བོད་དོན་ལ་རྒྱབ་སྐྱོར་གནང་བ་དེས། འགྲོ་བ་མིའི་ཐོབ་ཐང་གི་གནས་བབ་ལ་སྔར་མེད་ཀྱི་སྟོབས་ཤུགས་དང་སྙིང་རྗེ་ཡི་ནུས་པ་ཞིག་མཚོན་ཡོད། ཁྱེད་རང་བོད་དང་དྷ་སར་ཕེབས་པ་ནི་བོད་མི་རྣམས་ཀྱི་སེམས་དབུས་ཀྱི་བརྗེད་ཐབས་བྲལ་བའི་སྣང་བརྙན་ཞིག་ཡིན་ཞིང་། ཁྱེད་ཀྱི་མ་འོངས་པའི་ལོ་ཟླའི་ནང་སྐུ་གཟུགས་གསལ་ཐང་དང་། སྤྲོ་སྣང་ལྡན་པ་ཞིག་ཡོང་བའི་སྨོན་འདུན་ཞུ། ཞེས་གསུངས་འདུག
ལྕམ་སྐུ་མཆོག་ནི་ཨ་རིའི་གྲོས་ཚོགས་འཐུས་མིའི་ནང་ནས་བོད་དང་བོད་མིར་དམིགས་བསལ་གྱིས་འབྲེལ་ལམ་ཟབ་ཅིང་རྒྱུས་མངའ་ཆེ་བ། ཨ་རིའི་གྲོས་ཚོགས་ནང་བོད་དོན་ལ་རྒྱབ་སྐྱོར་གནང་མཁན་གྱི་དབུ་འཁྲིད་ཤུགས་ཆེ་ཤོས་ཤིག་ཡིན་པ་མ་ཟད། ཕྱི་ལོ་ ༢༠༡༥ ལོར་ཁོང་མོས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་གི་དབུ་འཁྲིད་དེ་བོད་ནང་དངོས་སུ་ཕེབས་ཏེ་བོད་མིའི་གནས་སྟངས་ལ་གཟིགས་ཞིབ་གནང་། དེ་བཞིན་ཕྱི་ལོ་ ༢༠༠༨ ལོའི་ས་བྱི་ཞི་རྒོལ་སྐབས་བོད་དུ་ཕེབས་ཡོད་པ་མ་ཟད། ཕྱི་ལོ་ ༢༠༡༧ ལོའི་ཟླ་ ༤ པའི་ནང་ཁོང་མོས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་གི་དབུ་འཁྲིད་དེ་བཞུགས་སྒར་དྷ་རམ་ས་ལ་རུ་༧གོང་ས་མཆོག་ལ་མཇལ་བཅར་དང་། ཕྱི་ལོ་ ༢༠༢༤ ཟླ་ ༡༢ ནང་ཆེད་དུ་བཞུགས་སྒར་དུ་ཕེབས་ནས་ཨ་རིའི་བོད་དོན་དམིགས་བསལ་ཁྲིམས་འཆར་༧གོང་ས་རྒྱལ་བ་རིན་པོ་ཆེ་མཆོག་ལ་སྤྱན་འབུལ་ཞུས།
དེ་བཞིན་ཕྱི་ལོ་ ༢༠༢༣ ལོའི་སྔོན་རྩིས་གྲོས་ཚོགས་སྐབས་ལྕམ་སྐུ་པེ་ལོ་སི་མཆོག་ལ་ཐུགས་རྗེ་ཆེ་ཞུའི་གྲོས་ཆོད་ཅིག་སྤྱི་མོས་གཏན་འབེབས་གནང་ཡོད་ཅིང་། གྲོས་ཆོད་དེའི་ཁྲོད། ལྕམ་སྐུ་ནེན་སི་པི་ལོ་སི་(Nancy Pelosi) མཆོག་ཨ་རིའི་ལོ་རྒྱུས་སུ་གྲོས་ཚོགས་ཀྱི་ཚོགས་གཙོ་གནང་མཁན་བུད་མེད་ཐོག་མ་དང་ད་བར་བུད་མེད་ཀྱི་ཚོགས་གཙོ་གནང་མཁན་ཁོང་ལས་བྱུང་མྱོང་མེད། མང་གཙོ་དང་། རྩ་ཁྲིམས་སྲུང་སྐྱོབ། བྱིས་པའི་ཐོབ་ཐང་། གནམ་གཤིས་དང་ཁོར་ཡུག སྨྲ་བརྗོད་རང་དབང་གི་གླེང་སྟེགས་མེད་པ་བཅས་ཀྱི་མགྲིན་ཚབ་པ་གནང་མཁན་གྲོས་ཚོགས་ཀྱི་འཐུས་མི་སྙན་གྲགས་ཅན་ཞིག་ཡིན་པ་མ་ཟད། ལོ་ངོ་བཅུ་ཕྲག་མང་པོའི་རིང་བོད་དོན་ཐོག་རྒྱབ་སྐྱོར་གནང་མཁན་དང་། བོད་ཀྱི་བློས་ཐུབ་ཀྱི་གྲོགས་པོ་རླབས་ཆེན་ཞིག་ཡིན་པར་ངོས་འཛིན་ཞུ་རྒྱུ། དེ་བཞིན་བོད་ཀྱི་ཁྱིམ་མཚེས་རྒྱལ་ཁབ་རྒྱ་ནག་དམར་གཞུང་གིས་བོད་ས་བཙན་བཟུང་བྱས་ཏེ་བོད་ནང་གདུག་རྩུབ་ཆེ་བའི་སྲིད་བྱུས་རིམ་པ་ལག་བསྟར་བྱས་དང་བྱེད་བཞིན་པའི་ཛ་དྲག་གི་གནས་སྟངས་ལ་ཨ་རིའི་གྲོས་ཚོགས་འོག་མའི་ཚོགས་གཙོའི་ཐུགས་འགན་བཞེས་བཞིན་པའི་སྐབས་ལྷག་བསམ་དང་སྙིང་སྟོབས་ཆེན་པོས་བོད་རྒྱ་ཞི་མོལ་ལམ་ནས་དངོས་ཡོད་དཀའ་ངལ་རྣམས་སེལ་ཏེ་བོད་ནང་ཆོས་དད་རང་དབང་དང༌། འགྲོ་བ་མིའི་ཐོབ་ཐང་སོགས་ལ་རྩིས་མེད་རྡོག་རོལ་བཏང་དང་གཏོང་བཞིན་པར་རྒྱ་གཞུང་ལ་སྐྱོན་བརྗོད་དང་། དམ་དྲག་ཤུགས་ཆེ་བྱེད་བཞིན་པ་རྣམས་མཚམས་འཇོག་དགོས་པའི་གཞེན་བསྐུལ་ཡང་ཡང་གནང་བ་དང་། དེ་བཞིན་ཁོང་གིས་འགན་འཁུར་ཆེ་བཞེས་ཀྱིས་ཨ་རིའི་ཆབ་སྲིད་ཚོགས་པ་གཉིས་ནས་རྒྱབ་སྐྱོར་གྱིས་ཨ་རིའི་གྲོས་ཚོགས་ནང་བོད་དོན་དང་འབྲེལ་བའི་ཁྲིམས་ཡིག་གཏན་འབེབས་བྱུང་བ་ཁག་ནི་བོད་ཀྱི་བདེན་པའི་འཐབ་རྩོད་ཐོག་རེ་བ་དང་སྤོབས་པ་སྦྱིན་པར་མཛད་པའི་ཧ་ཅང་རིན་ཐང་ལྡན་པའི་བྱས་རྗེས་བཞག་ཡོད། ཅེས་གསལ་འདུག
ལྕམ་སྐུ་ནན་སི་པོལ་སི་མཆོག་ནི་ཕྱི་ལོ་ ༡༩༤༠ ཟླ་ ༣ ཚེས་ ༢༦ ཉིན་ཨ་རིའི་མངའ་སྡེ་མའེ་རེ་ལན་ཌའི་གྲོང་ཁྱེར་བྷེལ་ཊི་མེར་(Baltimore) ནང་སྐྱེས་ཤིང་། ཁོང་མོའི་པ་ལགས་ཐའོ་མ་སི་(Thomas D’Alesandro Jr) ལགས་ནི་མའེ་རེ་ལན་ཌིའི་གྲོས་ཚོགས་འཐུས་མི་དང་ཨ་མ་ཨ་ཐུ་ན་ཀཱ་ (Anunciata D’Alesandro) ལགས་ནི་སྲིད་དོན་ཐོག་དོ་དབྱིངས་ཆེན་པོ་གནང་མཁན་ཞིག་ཡིན་སྟབས། ལྕམ་སྐུ་ནན་སི་པེ་ལོ་སི་མཆོག་ཆུང་དུས་ནས་ཕ་མ་གཉིས་ཀྱི་ཤུགས་རྐྱེན་འོག་ཨ་རིའི་ཆབ་སྲིད་ནང་ཞུགས། ཁོང་མོ་དང་བཟའ་ཟླ་པོལ་པེ་ལོ་སི་ (Paul Pelosi) གཉིས་ལ་བྱིས་པ་ལྔ་ཡོད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
