༧གོང་ས་རྒྱལ་བ་རིན་པོ་ཆེ་མཆོག་ནས་སྤྲུལ་སྐུ་ཧཱུྃ་ཀར་རྡོ་རྗེ་མཆོག་དམ་པར་ཐུགས་སྨོན་མཛད།

༧གོང་ས་རྒྱལ་བ་རིན་པོ་ཆེ་མཆོག་ནས་མགོ་ལོག་དགའ་བདེ་རྫོང་ལུང་སྔོན་དགོན་པའི་ཁྲི་པ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་དམ་པར་ཐུགས་སྨོན་མཛད་འདུག

དེ་རིང་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་མཁན་པོ་འཇུ་བསྟན་སྐྱོང་ལགས་ཀྱིས། ༧བཞུགས་སྒར་རྒྱལ་བའི་ཕོ་བྲང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཏེ། བོད་མགོ་ལོག་དགའ་བདེ་རྫོང་ལུང་སྔོན་དགོན་པའི་ཁྲི་པ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་སྐུ་གྲོངས་བའི་གནས་ཚུལ་དང་། དམ་པ་ཁོང་གིས་བོད་ནང་དུ་བོད་ཀྱི་སྐད་ཡིག་རིག་གཞུང་དང་བཅས་པ་རྒྱུན་འཛིན་དར་སྤེལ་ཆེད་ཕྱག་ལས་ཧ་ཅང་མང་པོ་གནང་ཡོད་པའི་སྐོར་སོགས་སྙན་གསེང་ཞུས་ཡོད་འདུག 

དེའི་ཐད་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་མཁན་པོ་འཇུ་བསྟན་སྐྱོང་ལགས་ཀྱིས། དེ་རིང་ང་ཚོས་སྤྲུལ་སྐུ་ཧཱུྃ་ཀར་རྡོ་རྗེ་མཆོག་ཝེ་ཐི་ནམ་ནས་སྐུ་སྲོག་ཤོར་བའི་གནད་དོན་གང་གོ་ཐོས་བྱུང་བ་དང་འབྲེལ་ནས། སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་ཐུགས་དགོངས་ག་རེ་ཡོད་མེད་དང་ས་ལམ་ལ་བར་ཆད་མེད་པའི་ཐུགས་སྨོན་སྐྱབས་འཇུག་གནང་སླད། ༧གོང་ས་རྒྱལ་བ་རིན་པོ་ཆེ་མཆོག་གི་སྐུ་མདུན་དུ་བཅར་ནས་སྙན་ཞུ་ཆ་ཚང་ཕུལ་བ་ཡིན། ༧གོང་ས་རྒྱལ་བ་རིན་པོ་ཆེ་མཆོག་ནས་ཀྱང་ཐུགས་ཕམ་དང་ཐུགས་སྨོན་གནང་བྱུང་། ང་ཚོ་ལ་རྒྱ་ནག་གཞུང་དང་འབྲེལ་བ་བྱས་ནས་དྲང་བདེན་ཡོང་གི་རེད་བསམས་པའི་ཡིད་ཆེས་རྩ་བ་ཉིད་ནས་ཡོད་པ་མ་རེད། ད་ལན་གྱི་གནས་ཚུལ་གཅིག་པུ་མིན་པར། ང་ཚོར་འདི་ལྟ་བུའི་གནས་ཚུལ་མང་པོ་བྱུང་རེད། ཅེས་བརྗོད་འདུག

ཡང་ཁོང་གིས། རིན་པོ་ཆེ་མཆོག་གི་དགོངས་པ་རྫོགས་སྟངས་དེ་བོད་ནང་དུ་དགོངས་པ་རྫོགས་པའི་གནས་སྟངས་དང་མ་འདྲ་བ་བྱས་ནས། རྒྱ་ནག་གཞུང་གིས་རྒྱལ་མཚམས་ལས་བརྒལ་ནས་དྲག་གནོན་དང་དཀའ་ངལ་ཞིག་འབྱུང་གི་ཡོད་པ་གསལ་པོ་ཡིན་དུས། ཝེ་ཐི་ནམ་གཞུང་གིས་བསམ་ཤེས་བྱ་རྒྱུར་རེ་བ་ཡོད། ད་ལྟ་དགོངས་པ་རྫོགས་ས་དེ་ཝེ་ཐི་ནམ་ཡིན་པ་དང་ཝེ་ཐི་ནམ་ཉེན་རྟོག་པས་འཛིན་བཟུང་བྱས་པའི་བརྒྱུད་རིམ་གྱི་ཁྲོད་ནས། དེའི་འགན་དེ་ཝེ་ཐི་ནམ་གཞུང་ལའང་བརྒྱ་ཆ་བརྒྱ་ཡོད་རེད། ང་ཚོས་ཝེ་ཐི་ནམ་གཞུང་གིས་འགན་ཁུར་བའི་ཐོག རྒྱལ་སྤྱིའི་ཚོགས་སྡེ་ཁག་དང་གཞུང་ཚབ་རྣམ་པས་རྒྱབ་སྐྱོར་བྱས་ནས་དྲང་བདེན་གྱི་སྒོ་ནས་སྔོན་མ་དང་མི་འདྲ་བའི་ཐག་གཅོད་ཅིག་ཡོང་རྒྱུར་རེ་བ་ཏོག་ཙམ་ཡོད། ཅེས་བརྗོད་འདུག 

སྤྲུལ་སྐུ་ཧཱུྃ་ཀར་རྡོ་རྗེ་མཆོག་ནི་བོད་ནང་སྙན་གྲགས་ཡོད་པའི་ལུང་སྔོན་དགོན་ཕྱག་འདེབས་མཁན་སྤྲུལ་སྐུ་པདྨ་གཏུམ་པོ་མཆོག་གི་སྲས་ཡིན་ཞིང་། ཕྱི་ལོ་ ༢༠༠༤ ལོར་ཁོང་གིས་མཚོ་སྔོན་ཞིང་ཆེན་གེ་སར་གཞན་ཕན་ཐེབས་རྩ་གསར་འཛུགས་གནང་སྟེ་གེ་སར་རིག་གནས་རྒྱུན་འཛིན་ཐད་ཕྱག་ལས་མང་པོ་གནང་།  ཕྱི་ལོ་ ༢༠༠༧ ལོ་ནས་མགོ་ལོག་ཁུལ་སྲིད་གཞུང་དང་སློབ་གསོ་ཁང་གི་ཆོག་མཆན་ཐོབ་པ་བརྒྱུད་དགེ་སློབ་ཆིག་སྟོང་ཙམ་ཡོད་པའི་ཧཱུྃ་ཀར་རྡོ་རྗེ་མི་རིགས་ལག་རྩལ་མཐོ་འབྲིང་གསར་འཛུགས་གནང་བ་སོགས་བོད་ཁུལ་གྱི་རོང་འབྲོག་གི་བྱིས་པ་སྟོང་ཕྲག་མང་པོར་རིན་མེད་ཐོག་ཤེས་ཡོན་སློབ་སྦྱོང་གི་གོ་སྐབས་ཐོབ་སླད་སློབ་གྲྭ་ཆུང་འབྲིང་ ༡༤ ཙམ་སྔ་གཞུག་ཏུ་ཆེད་འཛུགས་གནང་ཡོད་པ་དང་། དེ་བཞིན་དགོན་པ་དང་བཤད་གྲྭ་མང་པོ་ཕྱག་བཏབ་སྟེ་བོད་ཀྱི་ཆོས་དང་རིག་གཞུང་སྐད་ཡིག་སོགས་མི་ཉམས་རྒྱུན་འཛིན་དང་ཉམས་པ་སླར་གསོའི་ཆེད་མཛད་འཕྲིན་རླབས་ཆེན་བསྐྱངས་ཡོད་པར་བརྟེན། རྒྱ་ནག་གཞུང་གིས་ཁོང་ལ་ཆབ་སྲིད་ཀྱི་སྙོན་འཛུགས་སྣ་ཚོགས་བྱས་ཡོད་འདུག

སྤྲུལ་སྐུ་ཧཱུྃ་ཀར་རྡོ་རྗེ་མཆོག་ནི་ཕྱི་ལོ་ ༡༩༦༩ ལོར་བོད་མགོ་ལོག་ཁུལ་དགའ་བདེ་རྫོང་ཁོངས་སུ་ཡབ་བླ་མ་༧པདྨ་གཏུམ་དྲག་རྡོ་རྗེ་མཆོག་དང་། ཡུམ་ཀ་བཟའ་གདུགས་དཀར་སྒྲོལ་མ་ལགས་གཉིས་ཀྱི་སྲས་སུ་སྐུ་འཁྲུངས་ཤིང་། ཕྱི་ལོ་ ༡༩༨༠ ནས་ ༡༩༨༩ བར་ལུང་སྔོན་དགོན་པ་ནས་ཐུན་མིན་རིག་གནས་སྤྱི་དང་། ལྷག་པར་དུ་ནང་བསྟན་གཞུང་ཆེན་ལ་གསན་བསམ་རྒྱ་ཆེན་མཛད།  ཕྱིས་སུ་རྒྱ་གར་ནང་བཙན་བྱོལ་དུ་ཕེབས་ཏེ་ཕྱི་ལོ་ ༡༩༨༩ ནས་ ༡༩༩༤ བར་རྒྱ་གར་ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་དུ་སློབ་གཉེར་མཛད། ཕྱི་ལོ་ ༡༩༩༥ ནས་ ༡༩༩༧ བར་ཨ་རིར་ཕེབས་ཏེ་སློབ་གཉེར་མཛད་རྗེས་ཕྱིར་བོད་དུ་ཕེབས། ཕྱི་ལོ་ ༢༠༠༢ ལོར་རྒྱ་ནག་དམར་གཞུང་གི་ཆོག་མཆན་ཐོབ་པ་ལྟར་མགོ་ལོག་དགའ་བདེ་རྫོང་ཁོངས་ཀྱི་ལུང་སྔོན་དགོན་པའི་གདན་རབས་བཅུ་པར་གསེར་ཁྲིར་མངའ་གསོལ་ཞུས། ཕྱི་ལོ་ ༢༠༠༤ ནས་ ༢༠༠༦ བར་པེ་ཅིན་དུ་ཕེབས་ནས་ནང་བསྟན་ཆོས་ལུགས་ཐོག་དམིགས་བསལ་གསན་བསམ་མཛད་ཡོད་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།