མི་རིང་བར་མཚོ་རླབས་ཀྱི་གནོད་སྐྱོན་ཆེན་པོ་འབྱུང་རྒྱུ་ཡིན་ནམ།

ཉི་ཧོང་གི་དེང་རབས་རི་མོའི་སྒྱུ་རྩལ་བ་ལྕམ་རི་ཡོ་ཐ་ཚུ་ཁེ་ཡིས་འདི་ལོའི་ཕྱི་ཟླ་བདུན་པའི་ནང་ཉི་ཧོང་སོགས་སུ་མཚོ་རླབས་ཆེན་པོ་འཕྱུར་རྒྱུའི་ཉེན་བརྡ་བཏང་བ་དངོས་སུ་འབྱུང་སྲིད་པའི་ཚོད་དཔག་བྱེད་ཀྱི་འདུག

ཉི་ཧོང་གི་བྷ་བྷ་ཝང་གྷ་ (Baba Vanga) རི་ཡོ་ཐ་ཚུ་ཁེ་ (Ryo Tatsuki) ཞེས་པའི་བུད་མེད་དེང་རབས་རི་མོའི་སྒྱུ་རྩལ་བ་ཞིག་གིས། འདི་ལོའི་ཕྱི་ཟླ་ ༧ པའི་ནང་ཉི་ཧོང་སོགས་ཀྱི་ནང་མཚོ་རླབས་ (Tsunami) ཆེན་པོ་འཕྱུར་རྒྱུའི་ཉེན་བརྡ་བཏང་ཡོད་པ་དང་། བུད་མེད་དེས་ཕྱི་ལོ་ ༢༠༢༠ ལོར་ཏོག་དབྱིབས་གཉན་རིམས་ཁྱབ་རྡལ་དང་། ཕྱི་ལོ་ ༢༠༡༡ ལོར་ཉི་ཧོང་ནང་ས་ཡོམ་དང་མཚོ་རླབས་འབྱུང་སྲིད་པའི་ཉེན་བརྡ་བཏང་བ་དངོས་སུ་བྱུང་ཡོད་སྟབས། འདི་ལོའི་མཚོ་རླབས་ཀྱི་འཇིགས་པ་ཆེན་པོ་དེའང་དངོས་སུ་ཡོང་ཉེན་ཡོད་འདུག

ལྕམ་རི་ཡོ་ཡིས་མ་འོངས་ཟླ་གསུམ་གྱི་ནང་མཚོ་རླབས་ཆེན་པོ་འཕྱུར་རྒྱུ་ཡིན་པའི་ཚོད་དཔག་དེར་གླེང་སློང་ཆེན་པོ་ཡོང་གི་ཡོད་པ་མ་ཟད། ཉི་ཧོང་གི་གནམ་གཤིས་རིག་པའི་ལས་ཁུངས་ (Japan Meteorological Agency) ཀྱིས་ཞིབ་འཇུག་བྱས་པ་བརྒྱུད།  ཉེ་ལམ་ནས་ཉི་ཧོང་ནང་མཚོ་འོག་མེ་རླབས་ཤུགས་ཆེ་རུ་འགྲོ་བཞིན་ཡོད་སྐོར་བསྒྲགས་ཡོད་སྟབས། རི་ཡོ་ཡི་སྐད་ཆ་དེ་ལ་སྔར་ལས་དོ་སྣང་ཆེ་རུ་ཕྱིན་འདུག

ལྕམ་བྷ་བྷ་ཝང་གྷ་ལགས་ཀྱིས་འབྱུང་སྲིད་པའི་མཚོ་རླབས་ཆེན་པོ་དེས། ཉི་ཧོང་དང་། ཐའེ་ཝན། ཨིན་ཌོ་ནེ་ཤི་ཡ། བྱང་མ་རི་ཡ་ན་ (Mariana) གླིང་ཕྲན་སོགས་སུ་ཤུགས་རྐྱེན་ཆེན་པོ་ཐེབས་སྲིད་སྐོར་བརྗོད་པ་མ་ཟད། མཚོ་རླབས་དེ་ནི་ཕྱི་ལོ་ ༢༠༡༡ ལོའི་ཉི་ཧོང་གི་མི་གྲངས་ ༡༠,༠༠༠ ལྷག་རྐྱེན་འདས་དང་ཨ་སྒོར་ཐེར་འབུམ་ ༣༠༠ ལྷག་གི་དཔལ་འབྱོར་གོད་ཆག་བྱུང་བའི་མཚོ་རླབས་ལས་ཀྱང་ཚབས་ཆེ་བ་ཡོད་སྐོར་བརྗོད་ཡོད་པ་རེད།

ཕྱི་ལོ་ ༡༩༩༩ ལོར་མོས་བྲིས་པའི་ཉིན་ཐོ་ངས་མཐོང་བའི་མ་འོངས་པ་ཞེས་པའི་ནང་ཕྱི་ལོོ་ ༢༠༢༠ ཙམ་ལ་ནད་འབུ་ངོ་མི་ཤེས་པ་བསླེབས་ནས་ཕྱི་ཟླ་ ༤ ནང་ཁྱབ་ཆེ་ཤོས་ཆགས་རྒྱུ་རེད་ཅེས་བྲིས་ཡོད་ལ། ཏག་ཏག་ཕྱི་ལོ་ ༢༠༢༠ ལོ་མགོར་རྒྱ་ནག་ཝུའུ་ཧན་ནས་ཏོག་དབྱིབས་ནད་འབུ་འཛམ་གླིང་གི་ཡུལ་ལུང་གང་སར་ཁྱབ་སྟེ། ཝེ་ཁེ་རིག་མཛོད་ལྟར་ན། ཏོག་དབྱིབས་ནད་འབུས་ཉུང་མཐར་མི་གྲངས་ ༧,༠༡༠,༦༨༡ རྐྱེན་འདས་དང་མི་གྲངས་ ༧༠༤,༧༥༣,༨༩༠ ལ་འགོས་ཁྱབ་ཕྱིན་ནས་འཛམ་གླིང་གི་ལོ་རྒྱུས་ནང་ནད་འབུ་གནོད་ཚབས་ཆེ་ཤོས་སུ་གྱུར་ཡོད་པ་རེད།

དེ་བཞིན་ཁོང་མོས་རྨི་ལམ་ལ་བརྟག་པའི་ཉེན་བརྡ་དངོས་བྱུང་གྲགས་ཆེ་ཤོས་ཤིག་ནི། ཕྱི་ལོ་ ༡༩༩༡ ལོར་རི་ཡོ་ལ་རྨི་ལམ་རྨིས་པའི་ནང་། ཕྱི་ལོ་ ༡༩༩༥ ལོར་ཉི་ཧོང་ནང་ས་ཡོམ་འབྱུང་རྒྱུ་དང་། སྐབས་དེར་མི་མང་པོ་རྐྱེན་འདས་སུ་འགྲོ་རྒྱུ་རེད། ཅེས་ཉེན་བརྡ་བཏང་བ་ལྟར། ཕྱི་ལོ་ ༡༩༩༥ ཟླ་ ༡ ཚེས་ ༡༧ ཉིན་ཉི་ཧོང་གི་གྲོང་ཁྱེར་ཀོ་བྷེ་ (Kobe) རུ་ས་ཡོམ་བྱུང་སྟེ་མི་གྲངས་ ༦༠༠༠ ལྷག་རྐྱེན་འདས་སུ་ཕྱིན་པ་རེད། དེ་བཞིན་ཕྱི་ལོ་ ༡༩༩༩ ལོར་མོས་ཕྱི་ལོ་ ༢༠༡༡ ལོར་ཉི་ཧོང་ནང་མཚོ་རླབས་ཀྱི་གོད་ཆག་འབྱུང་རྒྱུའི་ཉེན་བརྡ་བཏང་བ་ལྟར། ཕྱི་ལོ་ ༢༠༡༡ ཟླ་ ༣ ཚེས་ ༡༡ ཉིན་ཉི་ཧོང་དུ་མཚོ་རླབས་འཕྱུར་ནས་མི་གྲངས་ ༡༩,༧༥༩ རྐྱེན་འདས་དང་མི་གྲངས་ ༦༢༤༢ ལ་རྨས་སྐྱོན་ཕོག དེ་བཞིན་མི་གྲངས་ ༢༥༥༣ གར་སོང་ཆ་མེད་དུ་གྱུར་བའི་གོད་ཆག་ཚབས་ཆེན་བྱུང་ཡོད་པ་རེད།

ཕྱི་ལོ་ ༢༠༢༥ ལོའི་ཟླ་མགོ་རུ་འཛམ་གླིང་ཡོངས་སུ་རང་བྱུང་རྐྱེན་ངན་ཚབས་ཆེན་ཁག་ཅིག་བྱུང་ཡོད། ཨ་རིའི་མངའ་སྡེ་ཁེ་ལི་ཧྥོར་ནི་ཡའི་གྲོང་ཁྱེར་ལོ་སི་ཨན་ཇ་ལ་སི་ (Los Angeles) ནང་མེ་སྐྱོན་ཆེན་པོ་བྱུང་སྟེ། མི་གྲངས་ ༣༠ རྐྱེན་འདས་དང་། སྡོད་ཁྱིམ་ ༡༨,༠༠༠ ལྷག་འཚིག་ནས་མི་གྲངས་ ༢༠༠,༠༠༠ ལྷག་གི་སྡོད་གནས་མེད་པར་གྱུར། ཐའེ་ལན་ཌི་དང་འབར་མའི་ནང་ས་ཡོམ་ཚད་རིམ་ ༧།༧ ཅན་ཞིག་བྱུང་སྟེ། ཉུང་མཐར་མི་གྲངས་ ༣༠༠༠ རྐྱེན་འདས་དང་མི་གྲངས་༥༠༠༠ ལྷག་ལ་རྨས་སྐྱོན་ཕོག་འདུག འདི་ལོའི་ཕྱི་ཟླ་ ༣ ཚེས་ ༢༨ ཉིན་འབར་མ་དང་ཐའེ་ལན་ཌིའི་ནང་ས་ཡོམ་ཚད་རིམ་ ༧།༧ ཅན་ཞིག་བརྒྱབ་སྟེ། ཉུང་མཐར་མི་གྲངས་ ༣༠༠༠ ལྷག་རྐྱེན་འདས་དང་མི་གྲངས་ ༤༥༠༠ ལྷག་ལ་རྨས་སྐྱོན་བཟོས་ཡོད་པ་རེད།

དུས་རབས་བཅུ་དྲུག་པའི་ཧྥ་རན་སིའི་སྐར་རྩིས་རིག་པ་བ་ནི་སི་ཊ་ཌ་མུ་སི་(Nostradamus) ལགས་དང་། ཡུ་རོབ་ལྷོ་ཤར་གྱི་རྒྱལ་ཁབ་བྱང་མཱ་སི་ཌོ་ནི་ཡའི་(North Macedonia)མིག་གཉིས་ལུང་བ་ཡིན་པའི་མངོན་ཤེས་ཤོད་མཁན་རྨོ་ཝན་གྷི་ལི་ཡ་(Vangeliya Pandeva Gushterova)གཉིས་ཀྱིས་ཀྱང་ཕྱི་ལོ་ ༢༠༢༥ ལོར་ཡུ་རོབ་ནང་དམག་འཁྲུག་གི་གོད་ཆག་འབྱུང་རྒྱུ་དང་། འཛམ་གླིང་ནང་འབྱུང་བའི་གོད་ཆག དེ་བཞིན་ནུས་པའི་འབྱུང་ཁུངས་གསར་རྙེད་འབྱུང་རྒྱུ་ཡིན་ལུགས་སོགས་བརྗོད་ཡོད་འདུག་ལ། དེ་དག་ལས་དམག་འཁྲུག་དང་ས་ཡོམ་གོད་ཆག་ནི་དཔེ་མཚོན་དུ་འོས་པ་རེ་བྱུང་ཡོད་ལ། ནུས་པའི་འབྱུང་ཁུངས་གསར་པའང་བྱུང་ཡོད་པ་རེད།

སྤྱིར་བཏང་བྷ་བྷ་ཝང་གྷ་ (Baba Vanga) ཞེས་པ་ནི་རྨོ་ལགས་དང་ཡང་ན་མ་འོངས་མངོན་ཤེས་ཅན་ལ་གོ་ཡི་ཡོད་འདུག་ལ། ཉི་ཧོང་གི་རྨོ་ལགས་དེ་ལའང་བྷ་བྷ་ཝང་གྷ་ཞེས་འབོད་ཀྱི་འདུག བུད་མེད་དེ་རི་མོ་བ་ཞིག་ཡིན་ནའང་མོས་མཚན་མོའི་རྨི་ལམ་རྣམས་རི་མོའི་ལམ་ནས་བྲིས་ཏེ། མ་འོངས་པའི་གོད་ཆག་སོགས་ལ་ཚོད་དཔག་བྱེད་ཀྱི་ཡོད་འདུག་ལ། མོ་རང་ནི་སྐར་རྩིས་རིག་པ་བ་ནི་སི་ཊ་ཌ་མུ་སི་དང་། རྨོ་ཝན་གྷི་ལི་ཡ་གཉིས་ཀྱི་རྗེས་འཇུག་པ་ངོ་མ་ཞིག་ཏུ་ངོས་འཛིན་བྱེད་མཁན་མང་པོ་འདུག

གསར་འགོད་པ་བསྟན་འཛིན་ཕུར་བུས་ཕྱོགས་བསྡུས་བྱས། པདྨ་མཚོས་རྩོམ་སྒྲིག་བྱས།