སྤྲུལ་སྐུ་ཧཱུྃ་ཀར་རྡོ་རྗེ་མཆོག་སྐུ་བཀྲོངས་མེད་ན་སྐུ་ཕུང་གསང་བའི་ཞུགས་འབུལ་དགོས་དོན་མེད་པའི་བསྒྲགས་གཏམ་སྤེལ།

བོད་ཀྱི་གཞུང་ཁོངས་མིན་པའི་ཚོགས་པ་ཁག་ལྔས་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་སྐུ་ཕུང་གསང་བའི་ཐོག་ནས་ཝི་ཐི་ནམ་དུ་ཞུགས་འབུལ་ཞུས་པར་སྐྱོན་བརྗོད་དང་རྒྱལ་སྤྱིའི་ཐོག་མུ་མཐུད་ཞིབ་འཇུག་བྱ་དགོས་པའི་དགོས་འདུན་བཏོན།

དེ་རིང་དྷ་ས་ས་གནས་མགོ་འཛིན་ལས་ཁུངས་ཀྱི་ཚོགས་ཁང་དུ། བོད་ཀྱི་གཞོན་ནུ་ལྷན་ཚོགས་དང་། བོད་ཀྱི་བུད་མེད་ལྷན་ཚོགས། བོད་རང་བཙན་སློབ་ཕྲུག་ཚོགས་པ། རྒྱལ་སྤྱིའི་བོད་དོན་འབྲེལ་མཐུད་ཁང་། བོད་རྒྱལ་ཡོངས་མང་གཙོ་ཚོགས་པ་བཅས་ཀྱི་གོ་སྒྲིག་འོག ཁ་སང་ཕྱི་ཚེས་ ༢༠ ཉིན་ཝི་ཏི་ནམ་དུ་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་སྐུ་ཕུང་གསང་བའི་ཐོག་ནས་ཞུགས་འབུལ་ཞུས་པར་སྐྱོན་བརྗོད་དང་། རྒྱལ་སྤྱིའི་ཐོག་ཞིབ་འཇུག་བྱ་དགོས་པའི་གསར་འགོད་གསར་བསྒྲགས་ཤིག་སྤེལ་སོང་།

གནད་དོན་དེའི་ཐད་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་མཁན་པོ་འཇུ་བསྟན་སྐྱོང་ལགས་ཀྱིས་འདི་གའི་གསར་འགོད་པར། སྤྲུལ་སྐུ་ཧཱུྃ་ཀར་རྡོ་རྗེ་མཆོག་ཝི་ཏི་ནམ་དུ་སྐུ་གྲོངས་པའི་གནས་ཚུལ་བྱུང་བའི་རྗེས་སུ། ང་ཚོས་རྒྱལ་སྤྱིའི་བརྒྱུད་ལམ་ཁག་དང་འབྲེལ་ཡོད་ཝི་ཏི་ནམ་གཞུང་སོགས་སུ་རིན་པོ་ཆེ་མཆོག་གི་སྐུ་ཕུང་ལ་བརྟག་དཔྱད་བྱ་དགོས་པ་དང་། སྐུ་ཕུང་ནང་མིར་རྩིས་སྤྲོད་བྱས་ཏེ་བོད་ཀྱི་སྲོལ་རྒྱུན་དང་ཆོས་ལུགས་ཀྱི་འགྲོ་སྟངས་ལྟར་གདུང་མཆོད་ཡག་པོ་ཡོང་བའི་རེ་བ་བརྒྱབ་པ་རེད། ཡིན་ནའང་། ཟླ་འདིའི་ཕྱི་ཚེས་ ༡༨ ཉིན་གྱི་མཚན་མོ་ནས་གོ་ཐོས་ལྟར་ན། ང་ཚོའི་དགོས་འདུན་དོན་ཚན་དག་ངོས་འཛིན་གང་ཡང་མ་བྱས་པའི་ཐོག ཁ་སང་ཕྱི་ཚེས་ ༢༠ གྱི་སྔ་དྲོར་ཝི་ཏི་ནམ་གྱི་ས་ཆ་ཞིག་ཏུ་རིན་པོ་ཆེ་མཆོག་གི་སྐུ་ཕུང་ཞུགས་འབུལ་བྱས་ཡོད་པ་རེད། ཅེས་བརྗོད་བྱུང་།

ཡང་ཁོང་གིས། འདས་ལོའི་ཕྱི་ཟླ་ ༨ ནང་རྒྱ་ནག་གཞུང་གིས་རིན་པོ་ཆེ་མཆོག་བཙན་བཟུང་བྱེད་པའི་ཉེན་ཁ་ཚབས་ཆེན་དུ་མཐོང་སྟེ། ཕ་ཡུལ་དུ་སྡོད་མ་ཐུབ་པར་ཉེན་གཡོལ་ཆེད་ཝི་ཏི་ནམ་དུ་ཕེབས་པ་རེད། ཡིན་ནའང་ཕྱི་ཟླ་ ༩ ཚེས་ ༢༨ ཙམ་ལ་རིན་པོ་ཆེ་མཆོག་ཕ་ཡུལ་ནས་གར་སོང་ཆ་མེད་དུ་གྱུར་སྟེ་གནས་ཚུལ་གང་ཡང་གོ་ཐོས་མེད་པའི་ཁྲོད་ལྷག་པ་རེད། འདི་ལོའི་ཕྱི་ཟླ་ ༣ ཚེས་ ༢༠ ཙམ་ལ་རིན་པོ་ཆེ་མཆོག་གི་གནས་ཚུལ་གང་འཚམ་ཕྱི་རུ་ཡོང་ཡོད། ཕྱི་ཟླ་ ༤ ཚེས་ ༡ ཉིན་རྒྱ་ནག་གཞུང་གིས་རིན་པོ་ཆེ་མཆོག་ཝི་ཐི་ནམ་དུ་སྐུ་གྲོངས་ཡོད་ཟེར་བའི་ཡིག་ཆ་ནང་མིར་སྤྲད་པ་དང་། ཕྱི་ཚེས་ ༢ ནས་བཟུང་དགོན་པའི་ངོས་ནས་རིན་པོ་ཆེ་མཆོག་སྐུ་གྲོངས་པ་ཡོངས་གྲགས་བྱས་པའི་གནས་ཚུལ་བྱུང་བ་རེད། གནས་ཚུལ་འདིའི་ཁྲོད་ནས་ང་ཚོའི་དགོས་འདུན་དོན་ཚན་གཉིས་ལ་དྭང་ལེན་མ་བྱས་པར་ང་ཚོས་བསམ་བློ་གཏོང་དགོས། སྐུ་ཕུང་ལ་བརྟག་དཔྱད་བྱས་པར་རྩ་བ་ནས་ངོས་ལེན་མ་བྱས་པ་རེད། དེར་ང་ཚོས་བསམ་བློ་གཟབ་ནན་བྱས་ནས་གཏོང་དགོས། རིན་པོ་ཆེ་མཆོག་གི་གྲོངས་རྐྱེན་གྱི་གནད་དོན་དེ་རྒྱ་ནག་གཞུང་དང་ཝི་ཐི་ནམ་གཉིས་ཀར་འགན་ཡོད། རིན་པོ་ཆེ་མཆོག་རང་བཞིན་གྱིས་སྐུ་གྲོངས་ཡོད་ཚེ་སྐུ་ཕུང་ལ་བརྟག་དཔྱད་བྱ་ཆོག་གི་མེད་པ་དང་། དེ་འདྲའི་དམ་དྲག་དང་གསང་བ་བྱ་དགོས་དོན་མེད་པ་རེད། དེ་ནི་རྒྱ་ནག་གི་ངན་ཇུས་ཐོག་ནས་རིན་པོ་ཆེ་མཆོག་བཀྲོངས་པ་གསལ་བོ་རེད། རིན་པོ་ཆེ་མཆོག་གི་སྐུ་ཕུང་མེར་བསྲེགས་ཙམ་གྱིས་གནད་དོན་འདི་ནག་གསུབ་ཆགས་མེད། ད་དུང་རིན་པོ་ཆེ་མཆོག་གི་གྲོངས་རྐྱེན་གསལ་བོ་ཆགས་མེད་པས། འཛམ་གླིང་དང་རྒྱལ་སྤྱི་སོགས་གང་དུ་འགྲོ་དགོས་ཀྱང་གནད་དོན་འདི་གསལ་བོ་མ་ཆགས་བར་དུ་འཐབ་རྩོད་བྱ་རྒྱུ་ཡིན། ཅེས་བརྗོད་བྱུང་།

གནད་དོན་འདིའི་ཐོག་བོད་ཀྱི་གཞུང་ཁོངས་མིན་པའི་ཚོགས་ཁག་ལྔས་ཛ་དྲག་གི་གསར་འགོད་གསལ་བསྒྲགས་སྤེལ་བའི་ནང་། མཆོག་སྤྲུལ་རིག་འཛིན་ཧཱུྃ་ཀར་རྡོ་རྗེ་མཆོག་ཝི་ཏི་ནམ་ནང་གི་བཀག་ཉར་ཁང་དུ་རྐྱེན་འདས་སུ་གྱུར་རྗེས་ནང་མིའི་མོས་མཐུན་མེད་པར་སྐུ་ཕུང་ཞུགས་འབུལ་ཞུས་པར་སྐྱོན་བརྗོད་དང་རྒྱལ་སྤྱིའི་རང་བཞིན་གྱི་ཞིབ་དཔྱོད་བྱེད་དགོས་པའི་འབོད་སྐུལ་ཞུ་ཡི་ཡོད། དེ་ཡང་མཆོག་སྤྲུལ་རིག་འཛིན་ཧཱུྃ་ཀར་རྡོ་རྗེ་རིན་པོ་ཆེ་འཛིན་བཟུང་དང་རྐྱེན་འདས་སུ་གྱུར་རྗེས་སྐུ་ཕུང་ལ་ཞིབ་དཔྱོད་གང་ཡང་མ་བྱས་བར་ཞུགས་འབུལ་བྱས་པ་དེར་རྒྱ་ནག་གཞུང་གིས་གཡོ་བྱུས་བཤམས་ཡོད་པའི་དོགས་གཞི་ཆེན་པོ་ཡོད། བོད་ཀྱི་རླབས་ཆེན་གྱི་སྐྱེས་བུ་མཆོག་སྤྲུལ་ནང་མིའི་མོས་མཐུན་མེད་བར་ཞུགས་འབུལ་བྱས་པར་བོད་ཀྱི་གཞུང་འབྲེལ་མིན་པའི་ཚོགས་པ་ཆེ་ཁག་ལྔས་མཐའ་གཅིག་ཏུ་ངོས་ལེན་མེད་པའི་ཐོག་སྐྱོན་བརྗོད་ནན་པོ་བྱེད་རྒྱུ་ཡིན། དེ་ཡང་རིན་པོ་ཆེ་མཆོག་ཕྱི་ལོ་ ༢༠༢༥ ལོའི་ཟླ་ ༣ བའི་ཟླ་མཇུག་ཏུ་ཝི་ཏི་ནམ་གྱི་ཧོ་ཅི་མིན་གྲོང་ཁྱེར་གྱི་བཀག་ཉར་ཁང་དུ་དོགས་གཞི་ཅན་གྱི་གནས་སྟངས་འོག་སྐུ་གཤེགས་ཡོད་པ་དང༌། དེའི་རྗེས་གནད་དོན་དེར་འཕྲལ་དུ་ཞིབ་དཔྱོད་ནན་པོ་བྱེད་དགོས་པའི་རེ་སྐུལ་ཞུས་ཡོད་ཀྱང་ཡིད་སྐྱོའི་གནས་ཚུལ་ཞིག་ལ་རིན་པོ་ཆེ་མཆོག་གི་སྐུ་ཕུང་ལ་ཞིབ་དཔྱོད་གང་ཡང་མ་བྱས་བའི་ཁར་ནང་མིའི་མོས་མཐུན་ཆོག་མཆན་མེད་པར་སྐུ་ཕུང་ཞུགས་འབུལ་བྱས་ཡོད་འདུག རིན་པོ་ཆེ་མཆོག་འཛིན་བཟུང་དང་། བཀག་ཉར་ཁང་དུ་རྐྱེན་འདས་སུ་གྱུར་བ། དེ་བཞིན་ནང་མིའི་ཆོག་མཆན་མེད་བར་སྐུ་ཕུང་ཞུགས་འབུལ་བྱས་བ་བཅས་ནི་རྒྱལ་སྤྱིའི་ཁྲིམས་ལུགས་ཀྱི་ཚད་གཞི་ལས་འགལ་བའི་གནད་དོན་ཚབས་ཆེན་ཞིག་ཡིན་པ་དང༌། དེ་ནི་དྲང་བདེན་ཞིབ་དཔྱོད་ལ་འགོག་རྐྱེན་བྱས་པར་ངོས་འཛིན་ཐུབ་པ་མ་ཟད། ཁོང་འཛིན་བཟུང་དང་རྐྱེན་འདས་སུ་གྱུར་བའི་གནད་དོན་ནང་རྒྱ་ནག་གཞུང་དང་ཐད་ཀར་འབྲེལ་བ་ཡོད་པའི་དོགས་གཞི་ཆེན་པོ་ཞིག་ཆགས་ཡོད། དེར་བརྟེན་བོད་ཀྱི་གཞུང་ཁོངས་མིན་པའི་ཚོགས་པ་ཆེ་ཁག་ནས་སྤྲུལ་སྐུ་རིག་འཛིན་ཧཱུྃ་ཀར་རྡོ་རྗེ་མཆོག་བཀག་ཉར་དང་རྐྱེན་འདས་ཀྱི་གནས་ཚུལ་བྱུང་བའི་རྐྱེན་ཐད་རྒྱལ་སྤྱིའི་ཚད་གཞི་དང་ལྡན་པའི་ཕྱི་གསལ་ནང་གསལ་གྱི་ཞིབ་དཔྱོད་ཆ་ཚང་བ་ཞིག་དགོས་པ་ནན་སྐུལ་ཞུ་རྒྱུ་ཡིན་ཞེས་བརྗོད་འདུག

དེ་བཞིན་བོད་ཀྱི་གཞུང་ཁོངས་མིན་པའི་ཚོགས་ཁག་ལྔ་ནས་རྒྱལ་སྤྱིའི་ཐོག་དགོས་འདུན་དོན་ཚན་གསུམ་བཏོན་ཡོད་པའི་ནང་། ༡ སྤྲུལ་སྐུ་རིག་འཛིན་ཏུཾ་ཀར་རྡོ་རྗེ་མཆོག་རྐྱེན་འདས་སུ་གྱུར་བའི་གནས་སྟངས་ཐད་ཕྱི་གསལ་ནང་གསལ་གྱི་ཞིབ་འཇུག་ཆ་ཚང་བ་ཞིག་དགོས་པའི་དགོས་འདུན་འདོན་རྒྱུ་ཡིན། ༢ ཕྱི་རྒྱལ་སྲིད་གཞུང་ཁག་ནས་ཝི་ཏི་ནམ་དང་རྒྱ་ནག་གཞུང་ལ་ལན་འདེབས་དགོས་པའི་གནོན་ཤུགས་སྤྲོད་དགོས་པའི་རེ་འདུན་ཞུ་རྒྱུ་དང༌། བོད་ནང་གི་སྤྲུལ་སྐུ་ཧཱུྃ་ཀར་རྡོ་རྗེ་རིན་པོ་ཆེའི་དགོན་པར་དམ་བསྒྲགས་ཤུགས་ཆེ་རུ་བཏང་བ་དང༌། ཉེན་སྲུང་ཐབས་ལམ་སྐོར་གྱི་ལན་འདེབས་ཕུལ་ཆེད། ཕྱི་རྒྱལ་སྲིད་གཞུང་ཁག་ནས་ཝི་ཐི་ནམ་དང་རྒྱ་ནག་གཞུང་ལ་གནོན་ཤུགས་སྤྲོད་དགོས་རྒྱུ་དང་། དེ་བཞིན་དེ་དག་ལ་སྐྱོན་བརྗོད་བྱེད་དགོས་པའི་འབོད་སྐུལ་ཞུ་རྒྱུ། ༣ མཉམ་འབྲེལ་རྒྱལ་ཚོགས་ལ་སྤྲུལ་སྐུ་ཧུཾ་ཀར་རྡོ་རྗེ་རིན་པོ་ཆེ་ཁྲིམས་ཐོག་མིན་པར་དམར་གསོད་བཏང་བ་ཡིན་མིན་ཞིབ་འཇུག་བྱེད་དགོས་པ་དང༌། སྤྲུལ་སྐུ་ཧུཾ་ཀར་རྡོ་རྗེ་རིན་བོ་ཆེའི་རྐྱེན་འདས་དང་འབྲེལ་བའི་གནད་དོན་ཁག་གི་ངན་བྱུས་དང་། འཆར་གཞི་བཟོ་མཁན། ལག་བསྟར་བྱེད་མཁན་ཡོངས་རྫོགས་ངོས་འཛིན་ཡོང་བའི་འབོད་སྐུལ་ཞུ་རྒྱུ་ཡིན། ཞེས་བཀོད་འདུག

སྤྲུལ་སྐུ་ཧཱུྃ་ཀར་རྡོ་རྗེ་མཆོག་ནི་བོད་ནང་སྙན་གྲགས་ཡོད་པའི་ལུང་སྔོན་དགོན་ཕྱག་འདེབས་མཁན་སྤྲུལ་སྐུ་པདྨ་གཏུམ་པོ་མཆོག་གི་སྲས་ཡིན་ཞིང་། ཕྱི་ལོ་ ༢༠༠༤ ལོར་ཁོང་གིས་མཚོ་སྔོན་ཞིང་ཆེན་གེ་སར་གཞན་ཕན་ཐེབས་རྩ་གསར་འཛུགས་གནང་སྟེ་གེ་སར་རིག་གནས་རྒྱུན་འཛིན་ཐད་ཕྱག་ལས་མང་པོ་གནང་།  ཕྱི་ལོ་ ༢༠༠༧ ལོ་ནས་མགོ་ལོག་ཁུལ་སྲིད་གཞུང་དང་སློབ་གསོ་ཁང་གི་ཆོག་མཆན་ཐོབ་པ་བརྒྱུད་དགེ་སློབ་ཆིག་སྟོང་ཙམ་ཡོད་པའི་ཧཱུྃ་ཀར་རྡོ་རྗེ་མི་རིགས་ལག་རྩལ་མཐོ་འབྲིང་གསར་འཛུགས་གནང་བ་སོགས་བོད་ཁུལ་གྱི་རོང་འབྲོག་གི་བྱིས་པ་སྟོང་ཕྲག་མང་པོར་རིན་མེད་ཐོག་ཤེས་ཡོན་སློབ་སྦྱོང་གི་གོ་སྐབས་ཐོབ་སླད་སློབ་གྲྭ་ཆུང་འབྲིང་ ༡༤ ཙམ་སྔ་གཞུག་ཏུ་ཆེད་འཛུགས་གནང་ཡོད་པ་དང་། དེ་བཞིན་དགོན་པ་དང་བཤད་གྲྭ་མང་པོ་ཕྱག་བཏབ་སྟེ་བོད་ཀྱི་ཆོས་དང་རིག་གཞུང་སྐད་ཡིག་སོགས་མི་ཉམས་རྒྱུན་འཛིན་དང་ཉམས་པ་སླར་གསོའི་ཆེད་མཛད་འཕྲིན་རླབས་ཆེན་བསྐྱངས་ཡོད་པར་བརྟེན། རྒྱ་ནག་གཞུང་གིས་ཁོང་ལ་ཆབ་སྲིད་ཀྱི་སྙོན་འཛུགས་སྣ་ཚོགས་བྱས་ཡོད་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།