རྒྱ་གར་གྱི་པཱ་ཀི་སི་ཐན་གྱི་གཞུང་ཚབ་སོགས་ཕྱིར་འབུད་གཏོང་རྒྱུ་ཡིན་འདུག

པཱ་ཧལ་གྷམ་ཁུལ་གྱི་དམར་གསོད་དོན་རྐྱེན་བཟོ་མཁན་དྲག་སྤྱོད་པ་དེ་དག་པཱ་ཀི་སི་ཐན་དང་འབྲེལ་བ་ཡོད་པའི་དོགས་གཞིའི་འོག་རྒྱ་གར་གཞུང་གིས་པཱ་ཀི་སི་ཐན་གྱི་གཞུང་ཚབ་པ་སོགས་ཕྱི་འབྲེལ་མི་སྣ་དང་མི་སེར་རྣམས་རྒྱ་གར་ནས་ཕྱིར་འབུད་གཏོང་གི་ཡོད་པ་སོགས་ཐག་གཅོད་ནན་པོ་གནང་རྒྱུ་ཡིན་སྐོར་བསྒྲགས་འདུག

ཟླ་འདིའི་ཕྱི་ཚེས་ ༢༢ ཉིན་རྒྱ་གར་བྱང་རྒྱུད་ཀྱི་ཇ་མུ་དང་ཀ་ཤི་མིར་མངའ་སྡེའི་པཱ་ཧལ་གྷམ་ (Pahalgam) ཁུལ་དུ་མེ་མདའ་བཟུང་བའི་དྲག་སྤྱོད་པ་ཁག་ཅིག་གིས་ཉུང་མཐར་མི་གྲངས་ ༢༦ རྐྱེན་འདས་དང་མི་གྲངས་ ༡༠ རྨས་སྐྱོན་བཟོས་པར་བརྟེན། ཁ་སང་ཕྱི་ཚེས་ ༢༣ ཉིན་རྒྱ་གར་གཞུང་གིས་གསར་འགོད་གསལ་བསྒྲགས་ཤིག་སྤེལ་ཏེ།  པཱ་ཧལ་གྷམ་དུ་དྲག་སྤྱོད་སྤེལ་མཁན་ཚོ་པཱ་ཀི་སི་ཐན་དང་འབྲེལ་བ་ཡོད་པའི་དོགས་གཞིའི་འོག ལྡི་ལིར་ཡོད་པའི་པཱ་ཀི་སི་ཐན་གྱི་གཞུང་ཚབ་པ་སོགས་ཕྱི་འབྲེལ་མི་སྣ་དང་། དེ་བཞིན་པཱ་ཀི་སི་ཐན་གྱི་མི་སེར་རྒྱ་གར་ནང་ཡོད་པ་རྣམས་ཆུ་ཚོད་ ༤༨ ནང་རྒྱ་གར་ནས་ཕྱིར་འཐོན་དགོས་པའི་བཀའ་རྒྱ་བསྒྲགས་ཡོད་པ་མ་ཟད། པཱ་ཀི་སི་ཐན་ནང་ཡོད་པའི་རྒྱ་གར་གྱི་གཞུང་ཚབ་པ་ཕྱིར་འཐེན་གནང་སྟེ་རྒྱལ་ཁབ་གཉིས་བར་གྱི་འགྲོ་འོང་མཚམས་འཇོག་རྒྱུ་ཡིན་སྐོར་གསུངས་འདུག

དེ་འབྲེལ་རྒྱ་གར་གྱི་སྲིད་བློན་མོ་དྷི་མཆོག་གིས། གདུག་རྩུབ་ཅན་གྱི་བྱ་ངན་འདིའི་རྒྱབ་ཏུ་ཡོད་མཁན་ཚོ་ཁྲིམས་ཐོག་ནས་ཐག་གཅོད་ནན་མོ་བྱ་རྒྱུ་ཡིན། ཞེས་འཇིགས་སྐུལ་དྲག་སྤྱོད་དེ་ལ་འཐབ་རྩོད་བྱ་རྒྱུའི་ཆོད་སེམས་བརྟན་པོ་ཡོད་སྐོར་གསུངས་འདུག་ལ། ཡུལ་དངོས་ནས་བསད་པའི་དྲག་སྤྱོད་པ་གཅིག་པཱ་ཀི་སི་ཐན་ནང་ཡོད་པའི་ཨའེ་ཨེ་སི་དྲག་སྤྱོད་ཚོགས་པ་དང་ལག་འབྲེལ་ཡིན་པའི་ཚོད་དཔག་བྱེད་བཞིན་འདུག ད་ལྟའི་ཆར་རྒྱ་གར་གཞུང་གིས་དྲག་སྤྱོད་པ་གཞན་རྣམས་འཚོལ་ཞིབ་བྱས་དང་བྱེད་མུས་ཡིན་འདུག འོན་ཀྱང་། ཁ་སང་ཕྱི་ཚེས་ ༢༣ ཉིན་པཱ་ཀི་སི་ཐན་གྱི་ཕྱི་སྲིད་བློན་ཆེན་མོ་ཧ་མ་ཌི་ (Mohammad Isaq Dar) ཡིས། འཇབ་རྒོལ་དེ་པ་ཀི་སི་ཐན་དང་འབྲེལ་བ་མེད། ཅེས་དང་། པཱ་ཧལ་གྷམ་དུ་དྲག་སྤྱོད་སྤེལ་ཏེ་ཡུལ་སྐོར་སྤྲོ་འཆམ་པའི་ཚེ་སྲོག་ཤོར་བར་བློ་ཕམ་དང་གདུང་སེམས་མཉམ་སྐྱེད་ཡོད། ཅེས་བརྗོད་འདུག

ད་ལྟ་རྒྱ་གར་དབུས་གཞུང་གིས་ཡུལ་སྐོར་བ་ཧ་ཅང་མང་བའི་ས་ཁུལ་དེར་འགོག་སྲུང་ནན་མོ་བྱེད་མུས་ཡིན་འདུག་ལ། པཱ་ཧལ་གྷམ་ནི་ལོ་ལྟར་དབྱར་དུས་སོགས་རྒྱ་གར་གཙོས་ཡུལ་སྐོར་སྤྲོ་འཆམ་པ་རྒྱུན་མ་ཆད་པའི་ཡུལ་སྐོར་བའི་ས་ཚིགས་གལ་ཆེན་ཞིག་ཡིན་ཞིང་། ཉེ་བའི་ལོ་འགའི་རིང་སྲིད་གཞུང་གིས་ས་ཁུལ་དེར་ཡུལ་སྐོར་སྤྲོ་འཆམ་པ་ཇེ་མང་དུ་གཏོང་བར་སྐུལ་མ་བཏང་ཡོད་འདུག་ལ། ཝེ་ཁེ་རིག་མཛོད་ནང་གསལ་བ་ལྟར་ན། འདས་ལོར་ཀ་ཤི་མིར་མངའ་སྡེའི་ནང་ཡུལ་སྐོར་སྤྲོ་འཆམ་པ་ས་ཡ་ ༣།༥ ཙམ་བསླེབས་ཡོད་འདུག

རྒྱ་གར་དང་པཱ་ཀི་སི་ཐན་གཉིས་ཀྱི་འབྲེལ་བ་ནི་རྙོག་འཛིང་ཆེ་ཞིང་། འཛམ་གླིང་གི་དམག་ཆེན་གཉིས་པ་མཇུག་སྒྲིལ་ནས་ལོ་གཉིས་ཀྱི་རྗེས་སུ། ཕྱི་ལོ་ ༡༩༤༧ ལོར་རྒྱ་གར་ལ་རང་བཙན་ཐོབ་པ་དང་བསྟུན། དབྱིན་ཇིའི་རྒྱལ་ཁབ་ཀྱིས་རྒྱ་གར་དང་པཱ་ཀི་སི་ཐན་གཉིས་སུ་ཕྱེས་ཏེ། རྒྱལ་ཁབ་གཉིས་ཀྱི་འབྲེལ་ལམ་ཡར་རྒྱས་གཏོང་ཐབས་སུ་ཕྱི་ལོ་ ༡༩༧༢ ལོར་ཤིམ་ལའི་ཚོགས་ཆེན་དང་། ཕྱི་ལོ་ ༡༩༩༩ ལོར་ལ་ཧོར་གྱི་ཚོགས་ཆེན། དེ་བཞིན་ཕྱི་ལོ་ ༢༠༠༡ ལོར་ཨག་རའི་ཚོགས་ཆེན་སོགས་ཚོགས་ཡོད་ཀྱང་། ཇ་མུ་དང་ཀ་ཤི་མིར་མངའ་སྡེ་དང་འབྲེལ་ནས་རྩོད་རྙོག་ཤུགས་ཆེན་བྱུང་བར་བརྟེན། ཕྱི་ལོ་ ༡༩༤༧ ནས་བཟུང་རྒྱལ་ཁབ་གཉིས་ཀྱི་བར་ལ་གདོང་ཐུག་མང་པོ་བྱུང་། རྒྱ་གར་དང་པཱ་ཀི་སི་ཐན་གྱི་ས་མཚམས་ནི་འཛམ་གླིང་ནང་སྲུང་དམག་མང་ཤོས་བཀོད་སྒྲིག་བྱས་ཡོད་པའི་རྒྱལ་མཚམས་གྲས་ཤིག་ཡིན་པ་མ་ཟད། པཱ་ཀི་སི་ཐན་ལ་རྒྱབ་སྐྱོར་ཡོད་པའི་དྲག་སྤྱོད་པ་ཁག་ཅིག་གིས་འཇབ་རྒོལ་ཡང་ཡང་བྱས་རྐྱེན་རྒྱལ་ཁབ་གཉིས་ཀྱི་འབྲེལ་ལམ་ཇེ་ཞན་ཇེ་སྡུག་ཏུ་འགྲོ་བཞིན་ཡོད་འདུག

གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།