བོད་དོན་ལས་འགུལ་བ་འཇམ་དབྱངས་བསྟན་འཛིན་ལགས་ཀྱིས་དགོས་འདུན་དོན་ཚན་གསུམ་གྱི་འོག་ནས་རྡེ་ར་ལྡུན་ནས་སིམ་ལ་དང་མ་ནཱ་ལི། དེ་ནས་དྷ་ས་དང་ལྡི་ལི་བཅས་ཀྱི་བར་དུ་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་སྤེལ་གྱིན་འདུག
ཟླ་འདིའི་ཕྱི་ཚེས་ ༢༥ ཉིན་ ༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་ཆེན་པོའི་འཁྲུངས་སྐར་དང་བསྟུན། བོད་དོན་ལས་འགུལ་བ་འཇམ་དབྱངས་བསྟན་འཛིན་ལགས་ཀྱིས། རྒྱ་གར་བྱང་ཕྱོགས་རྡེ་ར་ལྡུན་ནས་མགོ་འཛིན་གྱིས་སིམ་ལ་དང་མ་ནཱ་ལི། དེ་བཞིན། དྷ་རམ་ས་ལ་ནས་ལྡི་ལིའི་བར་དུ་བོད་དོན་ཞི་བའི་གོམ་བགྲོད་གནང་གི་འདུག་ལ། དེ་རིང་འཇམ་དབྱངས་བསྟན་འཛིན་ལགས་སིམ་ལར་འབྱོར་ཡོད་ཅིང་། ཁོང་གིས་ཐེངས་འདིའི་ལས་འགུལ་ལ་རོབ་རྩིས་བྱས་ན་ཟླ་གཉིས་ཡས་མས་ཙམ་འགོར་སྲིད་སྐོར་བརྗོད་བྱུང་།
འདི་གའི་གསར་འགོད་པས་འཇམ་དབྱངས་ལགས་སུ་ལས་འགུལ་གྱི་དམིགས་ཡུལ་སྐོར་ལ་བཀའ་འདྲི་ཞུས་པར་ཁོང་གིས། ད་ལན་གྱི་ལས་འགུལ་གཙོ་བོ་ནི་ཡུལ་སྐོར་སྤྲོ་འཁྱམ་པ་མང་སའི་ས་ཁུལ་དུ་རྒྱ་གར་གྱི་མི་སེར་དང་ཕྱི་རྒྱལ་བ་སོགས་ལ་པཎ་ཆེན་རིན་པོ་ཆེའི་གནས་སྟངས་སྐོར་གསལ་འདོན་བྱེད་ཐུབ་པ་ཡིན་ན། ཕན་ཐོགས་ཆུང་ཆུང་ཞིག་ལས་མ་བྱུང་ནའང་འགྲིག་གི་འདུག་བསམས་ནས་ལས་འགུལ་སྤེལ་བ་ཡིན། ཞེས་བརྗོད་བྱུང་།
ཕྱི་ཟླ་ ༥ ཚེས་ ༡༧ ཉིན་རྒྱ་ནག་དམར་གཞུང་གིས་༸ཀུན་གཟིགས་༸པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་འཛིན་བཟུང་བཙན་འཁྲིད་འོག་གར་སོང་ཆ་མེད་དུ་གྱུར་ཏེ་ལོ་ངོ་ཧྲིལ་པོ་ ༣༠ འཁོར་བའི་གལ་ཆེའི་དུས་དྲན་དང་སྟབས་བསྟུན་གྱིས། འཇམ་དབྱངས་ལགས་ནས་ཡུལ་སྐོར་བ་མང་སའི་མ་ནཱ་ལིའི་ཁུལ་དུ་པཎ་ཆེན་རིན་པོ་ཆེ་མཆོག་གི་གནས་སྟངས་སྐོར་ལ་མང་ཚོགས་ཁྲོད་གོ་རྟོགས་སྤེལ་བ་དང་ལྷན་དུ། གསར་འགོད་གསལ་བསྒྲགས་ཤིག་ཀྱང་སྤེལ་རྒྱུ་ཡིན་འདུག
འཇམ་དབྱངས་ལགས་ཀྱིས་ད་རེས་ལས་འགུལ་འདི་བརྒྱུད་ ༸པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་ཆེན་པོ་མཆོག་གི་གནས་སྟངས་ཐོག རྒྱ་གཞུང་ནས་ལན་འདེབས་གསལ་བཤད་ཅིག་ཡོང་ཐབས་སུ་རྒྱལ་སྤྱིའི་སྤྱི་ཚོགས་ནས་གནོན་ཤུགས་སྔར་ལྷག་སྤྲོད་དགོས་པའི་འབོད་སྐུལ་དང་། རྒྱ་གར་གཞུང་དམངས་གཉིས་ནས་ཀྱང་གནད་དོན་དེའི་ཐོག་མཁྱེན་རྒྱ་དང་རྒྱབ་སྐྱོར་ཚད་མཐོ་རགས་ཐབས་དང་། དམིགས་བསལ་བོད་རིགས་གཞོན་སྐྱེས་དང་ཆོལ་གསུམ་བོད་རིགས་སྤུན་ཟླ་རྣམས་རྡོག་རྩ་ཆིག་སྒྲིལ་ངང་བོད་ཀྱི་བདེན་པའི་འཐབ་རྩོད་ཐོག་ནུས་པ་སྔར་ལྷག་མཉམ་སྤུངས་ཡོང་རྒྱུ་སོགས་ལ་དམིགས་ཏེ་གོ་རྟོགས་ཀྱི་ལས་འགུལ་སྤེལ་རྒྱུར་ཐག་གཅོད་བྱུང་ཡོད།
འཇམ་དབྱངས་ལགས་ཀྱི་རྐང་འཁོར་སྐོར་སྐྱོད་ཀྱི་ལས་འགུལ་ལ་དགོས་འདུན་དོན་ཚན་གསུམ་ཡོད་པ་དག་ནི། གཅིག རྒྱལ་སྤྱིའི་སྤྱི་ཚོགས་ནས་རྒྱ་ནག་དམར་གཞུང་ལ་གནོན་ཤུགས་སྤྲད་དེ་༸པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་མཆོག་གཙོས་ཉེས་མེད་བོད་ཀྱི་ཆབ་སྲིད་བཙོན་པ་རྣམས་གང་མགྱོགས་ཀློད་གྲོལ་ཡོང་བའི་རེ་སྐུལ་ཞུ་རྒྱུ་དང་། གཉིས། རྒྱ་གར་གཞུང་དམངས་གཉིས་ཀྱི་རྒྱབ་སྐྱོར་འོག རྒྱ་ནག་དམར་གཞུང་ནས་བོད་རྒྱའི་དཀའ་རྙོག་སེལ་ཐབས་སུ་གྲོས་མོལ་ཡོང་བར་ཤུགས་སྣོན་རྒྱག་དགོས་པའི་འབོད་སྐུལ། དེ་བཞིན། རང་རིགས་གཞོན་སྐྱེས་ཚོ་གཙོ་བྱས་པའི་ཆོལ་གསུམ་བོད་རིགས་སྤུན་ཟླ་རྣམས་ནས་ཆིག་སྒྲིལ་ངང་བོད་ཀྱི་བདེན་པའི་འཐབ་རྩོད་ཐོག་ནུས་པ་མཉམ་སྤུངས་སྔར་ལྷག་གནང་སྐྱོང་ཡོང་བའི་རེ་སྐུལ་ནན་པོ་ཞུ་རྒྱུ་བཅས་རེད་འདུག
གསར་འགོད་པ། སྐལ་བཟང་སྦྱིན་པ།
