སྐྱེས་ཆེན་ཞིག་ཞིང་ལ་གཤེགས་པའི་སྐྱོ་གར། 

རྩོམ་ཁུངས། རྒྱ་རིགས་ན་གཞོན་བོད་དོན་རྒྱབ་སྐྱོར་དྲ་བ།
བོད་སྒྱུར་བ། དཔལ་ལྡན། དུས་བབ་གསར་འགོད་པ།

སྙན་གྲགས་ཅན་གྱི་བོད་བརྒྱུད་ནང་བསྟན་གྱི་བླ་ཆེན་དང་། ཤེས་ཡོན་པ། དགེ་སློང་བཅས་ཡིན་པའི་མཆོག་སྤྲུལ་ཧཱུྃ་ཀར་རྡོ་རྗེ་མཆོག་ནི་ཕྱི་ལོ་ ༡༩༦༩ ལོར་བོད་མདོ་སྨད་མགོ་ལོག་ཏུ་སྐུ་འཁྲུངས་ཤིང་། ཁོང་ནི་ལུང་སྔོན་དགོན་པའི་དགོན་བདག་དང་། གླིང་གེ་སར་གྱི་སྐོར་ཆེད་མཁས་པ་ཞིག་ཡིན་པ་མ་ཟད། ཁོང་གིས་ཧཱུྃ་ཀར་རྡོ་རྗེ་ལས་རིགས་ལག་རྩལ་སློབ་གླིང་གསར་འཛུགས་མཛད་དེ། བོད་དང་རྒྱལ་ཁབ་ཀུན་ནས་དགའ་བསུ་ཆེན་པོ་ཐོབ་ཡོད། 

ཕྱི་ལོ་ ༢༠༢༤ ལོའི་ཟླ་ ༨ ཙམ་ནས་ཁོང་གིས་རྒྱ་ནག་གཞུང་གི་མངོན་འདོད་བཞིན་རྒྱ་ནག་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་ཟེར་བ་མགོ་ལོག་ཁུལ་དུ་ཡོང་སྐབས། ཕེབས་བསུ་དང་སྣེ་ལེན་མ་བྱས་སྟབས་ས་གནས་རྒྱ་ནག་གཞུང་འབྲེལ་མི་སྣས་སུན་གཙེར་ཡང་ཡང་བཟོས་ཏེ། ཕྱི་ཟླ་ ༡༡ པའི་ཟླ་མགོ་ཙམ་ནས་ཁོང་ཉིད་གར་སོང་ཆ་མེད་དུ་གྱུར་བའི་གནས་ཚུལ་ཐོན།  དོན་དངོས་ཐོག་ཁོང་ཉིད་རྒྱ་ནག་གཞུང་གི་འཛིན་བཟུང་བཀག་ཉར་ལ་གཡོལ་ཆེད་ཝེ་ཐི་ནམ་དུ་ཕེབས། 

ཕྱི་ལོ་ ༢༠༢༥ ཟླ་ ༣ ཚེས་ ༢༥ ཉིན་རིན་པོ་ཆེ་མཆོག་རྒྱ་ནག་གསང་བའི་ལས་ཁུངས་ཀྱི་མི་སྣ་དང་ཝེ་ཐི་ནམ་ཉེན་རྟོག་པས་ཧོ་ཆེ་མེན་( Ho Chi Minh )གྲོང་ཁྱེར་དུ་འཛིན་བཟུང་བྱས་ནས། ཕྱི་ཟླ་ ༣ ཚེས་ ༢༨ ཉིན་ས་གནས་ཉེན་རྟོག་པར་རྩིས་སྤྲོད་བྱས་ཏེ། ཟླ་དེའི་ཚེས་ ༢༩ ཉིན་དོགས་གཞི་ཅན་གྱི་དོ་དམ་འོག་ནས་འདས་གྲོངས་སུ་གྱུར། འོན་ཀྱང་།  གཞུང་འབྲེལ་མི་སྣས་ཁོང་གི་ནང་མིར་ཐུག་འཕྲད་དང་དཔང་རྟགས་རིགས་གང་ཡང་མེད་པར་སྙིང་ནད་ཀྱི་རྐྱེན་གྱིས་དགོངས་པ་རྫོགས་ཡོད་ལུགས་བསྒྲགས། 

ས་གནས་ཀྱི་གནས་ཚུལ་མཁོ་སྤྲོད་པས།  ས་གནས་གཞུང་འབྲེལ་མི་སྣས་སྤྲུལ་ཧཱུྃ་ཀར་རྡོ་རྗེ་མཆོག་ལ་གཅར་རྡུང་བྱས་ཏེ། མགོ་དང་ལུས་པོ་ཡོངས་སུ་རྨས་ཤུལ་གྱིས་ཁེངས་ནས་དགོངས་པ་རྫོགས་པ་མ་ཟད། ཕྱི་ཟླ་ ༤ ཚེས་ ༢༠ ཉིན་རྒྱ་ནག་དང་ཝི་ཐི་ནམ་ཉེན་རྟོག་པས་གསང་བ་དམ་པོའི་ཐོག་ནས་སྐུ་ཕུང་ཞུགས་འབུལ་བྱས་ཡོད་སྐོར་བརྗོད་བྱུང་།

སྤྲུལ་སྐུ་མཆོག་གིས་སྐུ་ཚེ་ཧྲིལ་པོར་ཚད་མེད་པའི་སྙིང་རྗེ་དང་ཟབ་ཅིང་རྒྱ་ཆེ་བའི་ཤེས་རབ་ཀྱི་ཐོག་ནས། སེམས་ཅན་ཐམས་ཅད་ལ་ཕན་བདེ་བསྒྲུབས་པ་དང་། དམ་པའི་ཆོས་འཛིན་སྐྱོང་སྤེལ་གསུམ། བོད་ཀྱི་རིག་གཞུང་དར་སྤེལ་གནང་བ་མ་ཟད། དགོན་སྡེ་ཁག་གི་རྒན་རྒོན་དང་མི་རྐྱང་མང་པོར་མཐུན་རྐྱེན་སྦྱོར་སྤྲོད་དང་།  བོད་རིགས་དང་རྒྱ་རིགས་དབུལ་ཕོངས། དེ་བཞིན་སློབ་མ་མང་པོར་སློབ་ཡོན་གྱི་མཐུན་རྐྱེན་སྦྱོར་ཏེ་སློབ་མཐར་ཕྱིན་ཡོད་ཅིང་། སློབ་གྲྭ་འཛུགས་སྐྲུན་དང་འབྲོག་ཁུལ་དུ་འགྲིམ་འགྲུལ་སྟབས་བདེ་ཡོང་ཆེད་གཞུང་ལམ་དང་ཟམ་པ་བཅས་བསྐྲུན་ཡོད།

ཁོང་གིས་བཙུགས་པའི་གེ་སར་བདེ་རྩའི་ཐེབས་རྩ་ཁང་གིས་བོད་ཁུལ་གྱི་དབུལ་ཕོངས་མང་ཚོགས་ལ་ཟས་རིགས་དང་གྱོན་ཆས། སྨན་རྫས་སོགས་གྲངས་ལས་འདས་པ་ཞིག་སྦྱིན་གཏོང་དང་།  ཁོང་གིས་ལུང་སྔོན་དགོན་པའི་བཙུན་དགོན་བཙུགས་ཏེ་བོད་ཀྱི་བུད་མེད་ཚོས་རབ་བྱུང་དང་སྒྲུབ་པ་ཉམས་ལེན་བྱེད་པའི་ལམ་ཁ་ཞིག་གསར་དུ་བཏོད།  དེ་བཞིན་ཁོང་གིས་ཧཱུྃ་ཀར་རྡོ་རྗེ་ལས་རིགས་ལག་རྩལ་སློབ་གླིང་བཙུགས་ཏེ་འབྲོག་ཁུལ་གྱི་བྱིས་པ་ཚོར་སློབ་གསོ་དང་ལག་རྩལ་སོགས་རིན་མེད་སྦྱོང་དུ་བཅུག་ཡོད་ལ། རྨ་ཡུལ་མགོ་ལོག་གེ་སར་རིག་གནས་ཤུལ་བཞག་ལྟེ་གནས་གཟུག་རྒྱུར་སྐུལ་འདེད་བཏང་སྟེ་མི་རིགས་ཀྱི་རིག་གནས་ཤུལ་བཞག་གཅེས་སྐྱོང་སླད་སྐུ་ལས་ཚད་མེད་བསྐྱོན། 

མཆོག་སྤྲུལ་རིན་པོ་ཆེ་མཆོག་གི་འཆད་འཁྲིད་རྣམས་དྲ་ལམ་བརྒྱུད་ཝེ་ཐི་ནམ་དང་། ཨ་རི། ཁེ་ན་ཌ། ཉི་ཧོང་། ལྷོ་ཀོ་རི་ཡ། ཐའེ་ཝན། ཧོང་ཀོང་བཅས་གཙོས་འཛམ་གླིང་ས་ཕྱོགས་གང་སར་ཁྱབ་བརྡལ་ཤུགས་ཆེན་ཕྱིན་ལ། ཁོང་གི་བྱམས་སེམས་དང་གཞན་ཕན་གྱི་ཀུན་ནས་བསླངས་པའི་ཐུགས་དགོངས་ཁོ་ནས་འཛམ་གླིང་ས་ཕྱོགས་གང་སར་ཡོད་པའི་རྗེས་འབྲང་བ་རྣམས་ཀྱི་གུས་ཞབས་དང་ཡིད་སྨོན་ཤུགས་ཆེན་ཐོབ་ཡོད་ལ། ཁོང་གིས་ཝེ་ཐི་ནམ་གྱི་དད་ལྡན་མང་ཚོགས་ལ་ཆོས་འབྲེལ་ལན་མང་གནང་རྐྱེན་ཁུལ་དེར་ཁོང་ལ་དད་ལྡན་པ་མང་དག་ཅིག་ཡོད་སྟབས། ཁོང་ཉིད་ཝེ་ཐི་ནམ་ལ་བྲོས་བྱོལ་དུ་ཕེབས་དོན་ཡང་གནད་དོན་དེར་ཐུག་ཡོད།

ད་ལན་སྙིང་རྗེ་དང་ཤེས་རབ་ཀྱི་སླད་སྐུ་ལས་བསྐྱོན་ནས་སྐུ་ཚེ་འདའ་བར་བྱས་པའི་དམ་པ་ཁོང་ཉིད་ཕྱིའི་རྒྱལ་ཁབ་ཅིག་ཏུ་སྐུ་བཀྲོངས་པ་དང་། སྐུ་ཕུང་ལ་དམ་དྲག་ཆེན་པོས་ལྟ་རྟོག་དང་གསང་བའི་ཐོག་ནས་སྐུ་ཕུང་ཞུགས་འབུལ་བྱས་ཏེ། དངོས་ཡོད་ཀྱི་གནས་ཚུལ་སྦས་སྐུང་ཆེན་པོ་བྱས་ཡོད་སྟབས། ཆེས་ཡིད་སེམས་སྨྲེང་བའི་གནས་ཚུལ་དེ་བོད་ནང་ཐོས་སྐབས། བོད་མི་ཁྲི་སྟོང་མང་པོའི་སེམས་ལ་སྐྱོ་སྣང་ཆེན་པོ་ཞིག་བྱུང་བས། རྒྱ་ནག་གཞུང་གིས་དམ་དྲག་ལ་མ་བལྟོས་པར་མཆོད་འབུལ་དང་སྨོན་ལམ་འཚོགས་ནས་དངོས་ཡོད་ཀྱི་གནས་ཚུལ་ལ་རྒྱུས་ལོན་གང་མང་བྱས། 

ང་ཚོས་རྒྱལ་སྤྱིའི་སྤྱི་ཚོགས་ཀྱིས་མཆོག་སྤྲུལ་ཧཱུྃ་ཀར་རྡོ་རྗེ་མཆོག་གི་གནད་དོན་ཐད་དྲང་བདེན་ཡོང་རྒྱུར་ནན་སྐུལ་བྱེད་ཀྱི་ཡོད། 

མ་རྩོམ་གྱི་དྲ་ཐག https://chineseyouthstandfortibet.substack.com/p/horgyal-dorje-rinpoche?utm_campaign=post&utm_medium=web&fbclid=IwY2xjawKFHeVleHRuA2FlbQIxMQBicmlkETF1MzZXUWp1NHRPVHRxbUlaAR5H7e43anzXmkCpJcg0BnI_3drNHzJ0n5xNEmkbSvlXLkuIaDh-l6HmEEtCDw_aem_8ImPyMfN2IfbDokrOjuAvg&triedRedirect=true