གཞུང་ཆེན་རིས་མེད་བགྲོ་གླེང་ཚོགས་ཆེན་ཐེངས་བརྒྱད་པའི་སྟེང་ཆོས་མངོན་པ་མཛོད་དང་སྲིད་པའི་མཛོད་ཕུགས་གཉིས་ཀྱི་བརྗོད་གཞིའི་ཐོག་བགྲོ་གླེང་གནང་བཞིན་འདུག
ཟླ་འདིའི་ཕྱི་ཚེས་ ༤ ནས་ ༧ བར་ཧི་མ་ཅལ་མངའ་སྡེའི་ཀང་ར་རྫོང་འཕགས་ཡུལ་རྫོང་སར་བཤད་གྲྭ་ཆོས་ཀྱི་བློ་གྲོས་སུ། བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་དང་རྫོང་སར་བཤད་གྲྭ་གཉིས་ཀྱི་གོ་སྒྲིག་འོག གཞུང་ཆེན་རིས་མེད་བགྲོ་གླེང་ཚོགས་འདུ་ཐེངས་བརྒྱད་པ་འཚོག་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་དྲུང་ཆེ་བདུད་འདུལ་རྡོ་རྗེ་ལགས་དང་། རྫོང་སར་བཤད་གྲྭ་ཆོས་ཀྱི་བློ་གྲོས་ཀྱི་མཁན་པོ་ནོར་བུ་ཚེ་རིང་མཆོག མཁན་པོ་ཚུལ་ཁྲིམས་དཔལ་ལྡན་མཆོག་བཅས་གཙོས། ཕྱོགས་མཐའ་ཁག་གི་དགོན་སྡེ་གྲངས་ ༤༧ ནས་ཚོགས་བཅར་བ་གྲངས་ ༩༢ དང་། རྫོང་སར་བཤད་གྲྭའི་དགེ་འདུན་འདུས་མང་བཅས་གདན་འཛོམས་བྱུང་ཡོད་འདུག
ཐེངས་འདིའི་གཞུང་ཆེན་རིས་མེད་བགྲོ་གླེང་སྐོར་ལ་ཆོས་རིག་ལས་ཁུངས་ཀྱི་གོ་སྒྲིག་པ་བསྟན་འཛིན་རྣལ་འབྱོར་ལགས་སུ་དྲིས་པར། ཁོང་གིས། སྤྱིར་ཆོས་རིག་ལས་ཁུངས་ཀྱིས་དགོན་སྡེ་མང་པོར་མགྲོན་ཤོག་བཏང་ཡོད་ཀྱང་། ད་ལན་གྱི་བགྲོ་གླེང་ཐོག་ཕྱོགས་མཐའ་ཁག་གི་དགོན་སྡེ་ཁག་ ༤༧ གྱི་དགོན་པ་ཆེ་བ་རེ་ནས་གྲྭ་བཙུན་ ༢ རེ་དང་། དགོན་པ་ཆུང་བ་རེ་ནས་གྲྭ་བཙུན་ ༡ རེ་ཕེབས་ཡོད། ཐེངས་འདིའི་བགྲོ་གླེང་གི་བརྗོད་གཞི་ནི་གཞུང་ཆེན་བཀའ་པོད་ལྔ་ལས་སློབ་དཔོན་དབྱིག་གཉེན་གྱི་ཆོས་མངོན་པ་མཛོད་ཀྱི་རྩ་བའི་སྐོར་རེད། བོན་གཞུང་གི་བརྗོད་གཞི་ནི་སྲིད་པའི་མཛོད་ཕུགས་ཐོག་བགྲོ་གླེང་གནང་བཞིན་ཡོད། ཟླ་དགུའི་སྔོན་ནས་ཆོས་བརྒྱུད་ཁག་ནས་དགེ་འདུན་པ་ ༢ རེ་དང་བཙུན་མ་ ༡ རེའི་དཔྱད་རྩོམ་འབྲི་བཅུག་སྟེ་ཕྱོགས་སྒྲིག་བྱས་ཡོད་པ་བཞིན་བགྲོ་གླེང་གནང་བཞིན་ཡོད། ཅེས་འགྲེལ་བརྗོད་གནང་བྱུང་།
གཞུང་ཆེན་རིས་མེད་བགྲོ་གླེང་གི་གལ་གནད་སྐོར་ལ་ཁོང་གིས། ༧གོང་ས་རྒྱལ་བ་རིན་པོ་ཆེ་མཆོག་ནས་བཀའ་ཡང་ཡང་ཕེབས་པ་བཞིན། ཕྱི་ལོ་ ༢༠༡༣ ལོར་བོད་ཀྱི་དགོན་སྡེ་ཆེ་ཁག་ ༥༠ ཀྱི་སྐུ་ཚབ་གདན་འདྲེན་ཞུས་ཏེ་བཤད་སྒྲུབ་བསྟན་པ་གོང་སྤེལ་ལྷན་ཚོགས་སྐབས་སུ་གྲོས་ཆོད་བཞག ཕྱི་ལོ་ ༢༠༡༥ ལོར་མགོ་བཙུགས་ཏེ་ད་ལྟ་བར་གཞུང་ཆེན་རིས་མེད་བགྲོ་གླེང་ཐེངས་བརྒྱད་འཚོགས་ཡོད། དེའི་དམིགས་ཡུལ་དང་པོ་ཤེས་ཡོན་ཡར་རྒྱས་གཏོང་རྒྱུ་དང་། གཉིས་པ་ཆོས་བརྒྱུད་ཕན་ཚུན་བར་འཆམ་མཐུན་ཡོང་རྒྱུ། གསུམ་པ་དགོན་སྡེ་ཁག་ངོ་སྤྲོད་བྱེད་པའི་ཆེད་དུ་རེད། དམིགས་ཡུལ་དང་པོ་དེ་ཤེས་ཡོན་ཡར་རྒྱས་ཇི་ཙམ་ཕྱིན་ཡོད་མེད་བཤད་ཚོད་ཐིག་གི་མི་འདུག་ཀྱང་། དམིགས་ཡུལ་གཉིས་པ་དང་གསུམ་པའི་ཐོག་ཕན་ཐོགས་ཧ་ཅང་ཆེན་པོ་ཡོང་གི་འདུག དེ་བཞིན་གཞུང་ཆེན་རིས་མེད་བགྲོ་གླེང་ཐེངས་ལྔ་པ་ནས་ཐད་བསྲིང་གཏོང་མགོ་ཚུགས་ཡོད་པས། བགྲོ་གླེང་ཐོག་ཕེབས་མ་ཐུབ་པ་རྣམས་ཀྱིས་དྲ་ལམ་གྱི་ཐོག་ནས་གཟིགས་ཏེ་ཕན་ཐོགས་ཆེན་པོ་ཡོང་གི་རེད་བསམ་གྱི་འདུག ཅེས་འགྲེལ་བརྗོད་གནང་བྱུང་།
བགྲོ་གླེང་ཐོག་བཙུན་མ་རྣམས་ཀྱིས་མཉམ་ཞུགས་གནང་སྟངས་སྐོར་ལ་ཁོང་གིས། གཞུང་ཆེན་རིས་མེད་བགྲོ་གླེང་སྐབས་དང་པོ་ནས་བཞི་བའི་བར་བཙུན་མ་རྣམས་ཀྱིས་ཟུར་ཉན་བྱེད་པ་མ་གཏོགས། བགྲོ་གླེང་ནང་དུ་དཔྱད་རྩོམ་བྲིས་ཏེ་གཏམ་བཤད་ཀྱི་ཆ་ཤས་བླངས་ཡོད་པ་མ་རེད། དཔལ་གཤིན་བསྟན་སྨན་རིའི་གླིང་དུ་བགྲོ་གླེང་ཐེངས་བཞི་པའི་ཉིན་མཐའ་མར་མྱོང་ཚོར་བཤད་སྐབས། བཙུན་མ་རྣམས་ལའང་བགྲོ་གླེང་གི་གོ་སྐབས་སྤྲོད་དགོས་པའི་བསམ་ཚུལ་བཏོན་པ་བཞིན། བགྲོ་གླེང་ཐེངས་བཞི་པ་ནས་ད་ལྟ་བར་བཙུན་མ་རྣམས་བགྲོ་གླེང་ནང་མཉམ་ཞུགས་གནང་བཞིན་ཡོད་ལ། ད་ལན་གྱི་བགྲོ་གླེང་ཐོག་བཙུན་མ་ཟུར་ཉན་བྱེད་མཁན་གྲངས་ ༢༡ དང་། གཏམ་བཤད་གནང་མཁན་ནང་ས་སྐྱའི་སྐུ་ཚབ་ཕེབས་ཐུབ་མི་འདུག གཞན་ཆོས་བརྒྱུད་ཁག་དང་རིས་མེད་ཀྱི་དགོན་སྡེའི་སྐུ་ཚབ་བཅས་མཉམ་ཞུགས་གནང་ཡོད། ཅེས་བརྗོད་བྱུང་།
གཞུང་ཆེན་རིས་མེད་བགྲོ་གླེང་ཚོགས་འདུ་ནི་ཕྱི་ལོ་ ༢༠༡༡ ལོར་བཙན་བྱོལ་བོད་མིའི་ཆོས་ཚོགས་ཐེངས་ ༡༡ ཐོག ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དགོངས་བཞིན། ཕྱི་ལོ་ ༢༠༡༣ ལོའི་བཤད་སྒྲུབ་བསྟན་པ་གོང་སྤེལ་ལྷན་ཚོགས་སྐབས་གྲོས་ཆོད་དུ་བཞག་པ་དབུ་ཚུགས་ཤིང་། ཕྱི་ལོ་ ༢༠༡༥ ལོར་དཔལ་ལྡན་རྒྱུད་སྟོད་གྲྭ་ཚང་དུ་གཞུང་ཆེན་རིས་མེད་བགྲོ་གླེང་ཐེངས་དང་པོ་འཚོགས་ཡོད་ཅིང་། ཕྱི་ལོ་ ༢༠༡༦ ལོར་བཀའ་བརྒྱུད་ཀྱི་གདན་ས་དཔལ་སྤུངས་ཤེས་རབ་གླིང་དུ་ཚོགས་ཐེངས་གཉིས་པ་འཚོགས་ཡོད་པ་དང་། ཕྱི་ལོ་ ༢༠༡༨ ལོར་དཔལ་ལྡན་ས་སྐྱའི་མཐོ་སློབ་ཏུ་ཚོགས་ཐེངས་གསུམ་པ་འཚོགས། ཕྱི་ལོ་ ༢༠༡༩ ལོར་གཡུང་དྲུང་བོན་གྱི་གདན་ས་དཔལ་གཤེན་བསྟན་སྨན་རི་གླིང་དུ་ཚོགས་ཐེངས་བཞི་བ་འཚོགས། ཕྱི་ལོ་ ༢༠༢༢ ལོར་སྔ་འགྱུར་རྙིང་མའི་གདན་ས་ཐེག་ཆེན་རྣམ་གྲོལ་བཤད་སྒྲུབ་དར་རྒྱས་གླིང་དུ་ཚོགས་ཐེངས་ལྔ་བ་འཚོགས། ཕྱི་ལོ་ ༢༠༢༣ ལོར་གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་དུ་ཚོགས་ཐེངས་དྲུག་པ་འཚོགས། དེ་བཞིན་ཕྱི་ལོ་ ༢༠༢༤ ལོར་བཀྲ་ཤིས་ལྗོངས་ཁམས་སྒར་འབྲུག་མཐོ་སློབ་དྷརྨ་ཀཱ་རའི་གཙུག་ལག་སློབ་གཉེར་ཁང་དུ་ཚོགས་ཐེངས་བདུན་པ་འཚོགས་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
