འདི་ལོའི་བོད་ཀྱི་ཞོ་སྟོན་རྒྱས་པ་ཐེངས་ཉེར་བརྒྱད་པའི་ཁྲོད་ལྷ་མོའི་ཚོགས་པ་ཁག་ ༡༤ ཡིས་འཁྲབ་གཞུང་མི་འདྲ་བ་བཅུ་གཟིགས་འབུལ་ཞུ་རྒྱུ་ཡིན་འདུག
དེ་རིང་ནས་ཟླ་འདིའི་ཕྱི་ཚེས་ ༡༩ བརབཞུགས་སྒར་བོད་ཀྱི་ཟློས་གར་ཁང་དུ། བོད་ཀྱི་ཞོ་སྟོན་རྒྱས་པ་ཐེངས་༢༨ པ་མགོ་འཛུགས་གནང་སོང་། སྒོ་འབྱེད་མཛད་སྒོའི་ཐོག་དབུས་བོད་མིའི་སྒྲིག་འཛུགས་ཀྱི་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་དང་། སྤྱི་འཐུས་ཚོགས་གཙོ་སྦྲེལ་པོ་རྣམ་གཉིས་ཀྱི་དབུས་པའི་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། དྷ་ས་ཁུལ་གྱི་སེར་སྐྱ་མི་མང་བཅས་འཛོམས་འདུག འདི་ལོའི་ཞོ་སྟོན་ཐོག་ལྷ་མོའི་ཚོགས་པ་ཁག་ ༡༤ ཡིས་འཁྲབ་གཞུང་མི་འདྲ་བ་ ༡༠ སང་ཉིན་ཕྱི་ཚེས་ ༨ ཉིན་ནས་རིམ་གྱིས་གཟིགས་འབུལ་ཞུ་རྒྱུ་ཡིན་འདུག
དབུ་འབྱེད་མཛད་སྒོའི་སྟེང་བོད་ཀྱི་ཟློས་གར་ཁང་གི་འགན་འཛིན་དོན་འགྲུབ་ཚེ་རིང་ལགས་ཀྱིས། འདི་ལོར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་བོད་ལུགས་ལྟར་སྐུ་ཡི་དགུང་གྲངས་ ༩༠ བཞད་པའི་གོ་སྟོན་རྟེན་འབྲེལ་སྲུང་བརྩི་ཞུ་སླད། ཞོ་སྟོན་རྒྱས་པ་ཐེངས་ ༢༧ ཐོག་རྒྱལ་ཡོངས་ཨ་ལྕེ་ལྷ་མོའི་ཚོགས་འདུའི་སྐབས་བོད་ཀྱི་ཟློས་གར་ཚོགས་པ་གཙོས་ཕྱོགས་མཐའི་ལྷ་མོ་ཚོགས་པ་ཐུན་མོང་ནས་གྲོས་ཆོད་གཏན་འབེབས་ཀྱིས་ཞོ་སྟོན་རྒྱས་པ་ཐེངས་ ༢༨ པ་འདི་ཉིད་༧རྒྱལ་བའི་གོ་སྟོན་རྟེན་འབྲེལ་དང་བསྟུན་བཞུགས་སྒར་དུ་འཚོག་རྒྱུ་ཐག་གཅོད་བྱུང་བ་ཞིག་ཡིན་པ་དང་། ང་ཚོའི་ངོས་ནས་ཀྱང་༧རྒྱལ་བའི་བཀའ་དྲིན་རྗེས་དྲན་མཚོན་བྱེད་དུ་དགའ་དད་སྤྲོ་གསུམ་གྱི་སྒོ་ནས་དེ་རིང་ཞོ་སྟོན་རྒྱས་པ་ཐེངས་ ༢༨ པ་འདི་ཉིད་སྲུང་བརྩི་ཞུ་བཞིན་ཡོད། འོན་ཀྱང་དེ་སྔོན་བོད་ཀྱི་ཞོ་སྟོན་རྒྱས་པའི་འགྲོ་གྲོན་ཡོངས་རྫོགས་ཨ་རིའི་རོགས་ཚོགས་(USAID) བརྒྱུད་ནས་བཀའ་འཁྲོལ་བྱུང་ཡོད་ཀྱང་། ཨ་རིའི་སྲིད་གཞུང་གསར་པས་ཨ་རིའི་རོགས་ཚོགས་(USAID) ཡོངས་རྫོགས་མཚམས་འཇོག་གནང་ཟིན་པར་སོང་། འདི་ག་བོད་ཀྱི་ཟློས་གར་ཚོགས་པའི་ངོས་ནས་བསྟན་བདག་བླ་ཆེན་རྣམས་དང་། ཕྱི་ནང་གཏོང་ཕོད་ཅན་གྱི་སྦྱིན་བདག་དང་ཕྱི་རྒྱལ་རོགས་ཚོགས་ཁག་ལ་མཐུན་འགྱུར་ཐབས་འཚོལ་ཞུ་མུས་དང་། ༧རྒྱལ་བ་དོན་གྱི་བདག་པོའི་ཐོག་མའི་དགོངས་བཞེས་འོག་ཕྱི་ལོ་ ༡༩༩༣ ལོར་བོད་ཀྱི་ཞོ་སྟོན་རྒྱས་པ་ཐེངས་དང་པོ་དབུ་འཛུགས་ཞུས་པ་ནས་ད་བར་ཞོ་སྟོན་རྒྱས་པ་ ༢༨ བར་ཆད་ལུས་མེད་པར་སྲུང་བརྩི་ཞུ་རྒྱུའི་འགན་འཁྲི་གཡོལ་ཐབས་མེད་པ་ཞིག་ཏུ་ངོས་འཛིན་བཞིན་ཡོད་ལ། བོད་ཀྱི་རིག་གཞུང་གི་ཡ་གྱལ་དུ་གཏོགས་པའི་ལྷ་མོའི་ཟློས་གར་དེ་ཉིད་སྟོན་པ་བཅོམ་ལྡན་ལྡན་གྱི་སྐྱེས་རབས་མཚོན་པའི་ལེའུ་དང་བྱང་ཆུབ་སེམས་པའི་སྤྱོད་པ་ལ་འཇུག་ཚུལ་གྱི་ལམ་སྣེ་སྟོན་པའི་འཁྲབ་སྟོན་ཟློས་གར་དམིགས་བསལ་བ་ཞིག་ཡིན་སྟབས། ང་ཚོས་མི་རབས་ནས་མི་རབས་བར་དྲག་ཆར་རླུང་འཚུབ་ཅི་འདྲ་ཞིག་ལ་འཕྲད་ཀྱང་སྲུང་བརྩི་ཞུ་རྒྱུར་ཆོད་སེམས་བརྟན་པོ་ཡོད། ཅེས་བརྗོད་སོང་།
ཡང་ཁོང་གིས། སྤྱིར་བཏང་བྱས་ན་ད་ལྟའི་ཆར་ཕྱོགས་མཐའི་ལྷ་མོ་ཚོགས་པའི་ནང་མི་བྱའི་དཀའ་ངལ་འཕྲད་ཀྱི་ཡོད་པར་སོང་ཙང་། ང་ཚོའི་མ་འོངས་པར་བོད་ཀྱི་ལྷ་མོའི་ཟློས་གར་རྒྱུན་གནས་ཐུབ་རྒྱུ་དེ་བོད་ཀྱི་ཟློས་གར་ཚོགས་པའི་འགན་འཁྲི་ཙམ་མིན་པར་ང་ཚོ་བོད་མི་རྩམ་ཟན་པ་ཡོངས་ཀྱི་འགན་ཁུར་ཆགས་ཡོད་པ་མ་ཟད། མ་འོངས་བོད་ཀྱི་སོན་རྩ་གཞི་རིམ་སློབ་གྲྭའི་སློབ་ཕྲུག་རྣམས་ཀྱིས་བོད་ཀྱི་ཕ་མེས་ནས་བརྒྱུད་པའི་ལྷ་མོའི་སྒྱུ་རྩལ་དེ་ཉིད་བདག་གཅེས་གནང་རྒྱུར་རེ་བ་བཅངས་བཞིན་ཡོད་པ་དང་འབྲེལ། མ་སུ་རི་བོད་ཁྱིམ། ཅོན་ཏ་ར་བོད་ཁྱིམ། དྷ་སྟེང་བོད་ཁྱིམ་དང་ཕྱོགས་མཐའི་ལྷ་མོ་ཚོགས་པའི་ནང་ཁྱབ་ཁོངས་སློབ་གྲྭའི་སློབ་ཕྲུག་མཉམ་བཞུགས་གནང་མཁན་ཇེ་མང་དུ་འགྲོ་བཞིན་ཡོད་པ་དང་། འདི་ལོ་ལྟ་བུར་ཆ་མཚོན་ན། ཞོ་སྟོན་ནང་མཉམ་ཞུགས་གནང་མཁན་གྱི་གྲངས་འབོར་བརྒྱ་ཆ་ ༥༠ ཡས་མས་སློབ་གྲྭའི་སློབ་ཕྲུག་ཆགས་ཡོད་པ་ནི་སྤྱི་ནོར་༧གོང་ས་༧སྐྱབས་མགོན་ཆེན་པོའི་དགོངས་གཞི་ལམ་སྟོན་ལྟར་བོད་ཀྱི་ཟློས་གར་ལྷ་མོའི་སྒྱུ་རྩལ་མི་ཉམས་རྒྱུན་འཛིན་དང་བདག་གཅེས་སླད་བོད་ཁྱིམ་གཉིས་དང་སློབ་གྲྭའི་འགན་ཁུར་ཞུ་མཁན་གྱི་དགེ་ལས་དང་སློབ་ཕྲུག་སོ་སོས་སྤྲོ་སྣང་ཐོག་མཉམ་ཞུགས་གནང་བ་ལ་རྗེས་སུ་ཡི་རངས་དང་ཐུགས་རྗེ་ཆེ་ཞུ་རྒྱུ་དང་། མ་འོངས་པར་ཡང་མུ་མཐུད་མཐུན་འགྱུར་ཡོང་བའི་ཞུ་བསྐུལ་ཞུ་བཞིན་ཡོད། སྒོས་སུ་བཙན་བྱོལ་བོད་མིའི་གཞིས་ཆགས་ཁག་ནང་སྔར་དང་མི་འདྲ་བའི་༧རྒྱལ་བའི་ལྷག་དཀར་སྲུང་བརྩི་དང་སྟབས་བསྟུན་སྒོར་གཞས་ཐོག་དོ་དབྱིངས་བྱེད་མཁན་ཇེ་མང་དུ་འགྲོ་བཞིན་པའི་གནས་སྟངས་འོག གཞོན་སྐྱེས་ཁྲོད་ནས་བོད་ཀྱི་ཐུན་མོང་མ་ཡིན་པའི་བོད་ཀྱི་ཟློས་གར་སྒྱུ་རྩལ་དང་ལྷ་མོའི་སྒྱུ་རྩལ་ནང་མཉམ་ཞུགས་གང་མང་ཡོང་ཐབས་སུ་ཕ་མ་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམས་ནས་གཞུང་འབྲེལ་འཚམས་གཟིགས་ཆེད་ཕེབས་སྐབས་རྒྱ་ཆེའི་མང་ཚོགས་སུ་བོད་ཀྱི་ཟློས་གར་སྒྱུ་རྩལ་དང་ལྷ་མོ་སྒྱུ་རྩལ་ནང་མཉམ་ཞུགས་དགོས་སྐོར་ལམ་སྟོན་བཀའ་སློབ་བྱུང་ན་འཛུལ་ཞུགས་བྱེད་མཁན་ལ་སེམས་ཤུགས་དང་ཀུན་སློང་སྐྱེད་སྲིང་ཡོང་རྒྱུར་ཕན་ཐོགས་མངོན་པར་སོང་། དེ་ལྟར་གནང་ཐབས་སུ་སྡིངས་ཆ་འདི་བརྒྱུད་དེ་ཞུ་བསྐུལ་ཞུ་འབུལ་བཞིན་ཡོད། ཅེས་བརྗོད་སོང་།
ཐེངས་འདིའི་བོད་ཀྱི་ཞོ་སྟོན་ཐེངས་ཉེར་བརྒྱད་པའི་སྟེང་། ཀ་སྦུབ་ལྷ་མོ་ཚོགས་པ་དང་ཨོ་རི་ས་ལྷ་མོ་ཚོགས་པ། བལ་ཡུལ་ལྷ་མོ་ཚོགས་པ། ལྕགས་ཟམ་པ་ལྷ་མོ་ཚོགས་པ། མ་སུ་རི་ལྷ་མོ་ཚོགས་པ། མན་སྤར་ལྷ་མོ་ཚོགས་པ། ཀོ་ལི་གྷལ་ལྷ་མོ་ཚོགས་པ། སྦེལ་ཀོབ་ལྷ་མོ་ཚོགས་པ། སྦན་རྡ་ར་ལྷ་མོ་ཚོགས་པ། ཅོན་དྷ་ར་བོད་ཁྱིམ་ལྷ་མོ་ཚོགས་པ། དྷ་སྟེང་བོད་ཁྱིམ་ལྷ་མོ་ཚོགས་པ། མོན་གྷོ་ལྷ་མོ་ཚོགས་པ། བོད་ཀྱི་ཟློས་གར་ཚོགས་པ་བཅས་ལྷ་མོ་ཚོགས་པ་ཁྱོན་ ༡༤ ཡིས། ལྷ་གཞུང་འགྲོ་བ་བཟང་མོ་དང་ཆོས་རྒྱལ་དྲི་མེད་ཀུན་ལྡན། གཟུགས་ཀྱི་ཉི་མ། མཁན་སློབ་ཆོས་གསུམ། རྒྱལ་པོ་འཇིག་རྟེན་དབང་ཕྱུག གཅུང་པོ་དོན་ཡོད་དོན་གྲུབ། པདྨ་འོད་འབར། མི་ལ་རས་པ། ཆོས་རྒྱལ་ནོར་བཟང་། རྒྱལ་སྲས་དད་པ་བརྟན་པ། སྟོན་པའི་མཛད་རྣམ་སོགས་གཟིགས་འབུལ་ཞུ་རྒྱུ་ཡིན་འདུག
དེ་ཡང་བོད་ཀྱི་རྩོམ་པ་པོའི་དྲ་བ་རུ། ཞོ་སྟོན་ནི་གནའ་སྔ་མོ་རྒྱ་གར་གྱི་དགེ་འདུན་པ་རྣམས་དབྱར་གནས་ལ་བཞུགས་པའི་ཚེ། བསོད་སྙོམས་ལ་ཕེབས་མི་དགོས་པར་སྦྱིན་བདག་རྣམས་ཀྱིས། ཞོ་དང་འོ་མ་ལ་སོགས་པའི་བསྙེན་བཀུར་ཞུ་སྲོལ་ཡོད་པ་ལྟར། བོད་ཀྱི་གདན་ས་ཆེན་པོ་སེ་འབྲས་དགའ་གསུམ་སོགས་སུ་དབྱར་གནས་འཚོག་པའི་སྐབས་ཞོ་ཡི་སྟོན་མོ་སྟེ་ཞོ་ཡི་ཞལ་ལག་སོགས་འབུལ་བས་ན་ཞོ་སྟོན་ཞེས་ཐོགས་པ་ཡིན་སྐོར་དང་། ཞོ་སྟོན་དེ་དུས་རབས་བཅུ་བདུན་པ་སྟེ་༧རྒྱལ་དབང་སྐུ་ཕྲེང་ལྔ་པའི་སྐབས་ནས་དར་བ་ཞིག་དང་། བོད་ཟླ་དྲུག་པའི་གནམ་གང་སྟེ་ཞོ་སྟོན་ཉིན་བོད་ཀྱི་བཀྲ་ཤིས་ཞོལ་པ་དང༌། བྲོ་པ། ཤེལ་རོང་འབྲོང་རྩེད་པ་བཅས་འབྲས་སྤུངས་སུ་ཡོང་ནས་དགའ་ལྡན་ཕོ་བྲང་གི་མདུན་ངོས་སུ་ཟློས་གར་དང་ལྷ་མོའི་འཁྲབ་སྟོན་གཟིགས་འབུལ་ཞུ་སྲོལ་ཡོད་སྐོར་གསལ་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
