འཛམ་གླིང་རྒྱལ་ཁབ་ ༧༥ ལ་རྒྱ་ནག་གི་བུ་ལོན་གྱི་ཤུགས་རྐྱེན་ཐེབས་རྒྱུ་ཡིན་པའི་ཉེན་བརྡ་བཏང་འདུག

ཕྱི་ལོ་ ༢༠༢༥ ལོར་འཛམ་གླིང་རྒྱལ་ཁབ་ ༧༥ ཡིས་རྒྱ་ནག་ལ་བུ་ལོན་ཨ་སྒོར་ཐེར་འབུམ་མང་པོ་འཇལ་དགོས་པ་དང་། ལོ་རབས་འདིའི་ནང་རྒྱ་ནག་འཛམ་གླིང་གི་བུ་ལེན་བསྡུ་མཁན་བྱས་ནས་འདུག་རྒྱུ་ཡིན་སྐོར་གྱི་སྙན་ཐོ་ཞིག་བཏོན་འདུག

དེ་རིང་རྒྱལ་སྤྱིའི་གསར་ཁང་  (Guardian ) གིས་གནས་ཚུལ་སྤེལ་བ་ལྟར་ན། རྒྱ་ནག་གི་རྒྱུད་གཅིག་ལམ་གཅིག་གི་ལས་གཞིའི་འོག་ནས། དཔལ་འབྱོར་ཞན་ཞིང་དཀའ་ཁག་ཆེ་བའི་འཛམ་གླིང་རྒྱལ་ཁབ་ ༧༥ ལ་ཕྱི་ལོ་ ༢༠༢༥ ལོར་རྒྱ་ནག་གི་བུ་ལོན་ཨ་སྒོར་ཐེར་འབུམ་ ༢༢ འཇལ་དགོས་པའི་དཀའ་ངལ་འཕྲད་རྒྱུ་ཡིན་པའི་ཉེན་བརྡ་བཏང་འདུག་ལ། བུ་ལོན་གྱི་གྲངས་འབོར་དེ་ནི་ཧ་ཅང་ཚད་མཐོ་བོ་ཡིན་པ་མ་ཟད། རྒྱ་ནག་གི་མགོ་སྐོར་འོག་ནས་རྒྱལ་ཁབ་དེ་དག་གིས་ཁྱོན་ཨ་སྒོར་ཐེར་འབུམ་ ༣༥ བུ་ལོན་དུ་བླངས་ཡོད་པའི་སྙན་ཐོ་ཞིག་བཏོན་འདུག

དེ་འབྲེལ་ཨོ་གླིང་གི་ལོ་ཝེ་ (Lowy Institute) བསམ་མཛོད་ལྟེ་གནས་ཁང་གིས་བཏོན་པའི་སྙན་ཐོའི་ནང་། ད་ལྟའི་ལོ་རབས་འདིའི་རིང་རྒྱ་ནག་གིས་འཛམ་གླིང་ནང་ཡར་རྒྱས་འགྲོ་བཞིན་པའི་རྒྱལ་ཁབ་དག་ལ་བུ་ལོན་གཡར་རྒྱུ་མ་ཡིན་པར་བུ་ལོན་བསྡུ་རྒྱུ་ཡིན་པ་དང་། དེ་སྔ་དགོས་མཁོ་ཆེ་བའི་སྐབས་སུ་རྒྱ་ནག་བུ་གཡར་ལས་གཞིར་ཉམས་ཆག་བྱུང་ཡོད།  འོན་ཀྱང་། ཕྱིས་སུ་འཛམ་གླིང་རྒྱལ་ཁབ་མང་པོ་ཞིག་ལ་དཔལ་འབྱོར་གྱི་དཀའ་ངལ་འཕྲད་སྐབས་རྒྱ་ནག་གིས་རྒྱུད་གཅིག་ལམ་གཅིག་གི་ལས་གཞིའི་འོག་ནས་རྒྱལ་ཁབ་དེ་དག་གི་ནང་དུ་མ་འཛུགས་བྱས་ཏེ། སློབ་གྲྭ་དང་ཟམ་ཆེན། སྨན་ཁང་དང་ལམ་ཆེན། གྲུ་གཟིངས་འབབ་ཚིགས་དང་གནམ་ཐང་སོགས་ཀྱི་འཛུགས་སྐྲུན་འོག་ནས་བུ་ལོན་གཡར་ཡོད། ཅེས་བརྗོད་འདུག

གནས་ཚུལ་ནང་། རྒྱ་ནག་གིས་རྒྱུད་གཅིག་ལམ་གཅིག་བརྒྱུད་དེ་ཡར་རྒྱས་འགྲོ་བཞིན་པ་དང་དཔལ་འབྱོར་གྱི་མ་རྩ་དཀོན་པའི་རྒྱལ་ཁབ་དག་ལ་མ་འཛུགས་བྱེད་བཞིན་ཡོད་ཅིང་། མ་འཛུགས་ཀྱི་ལས་གཞི་དང་འབྲེལ་ནས་རྒྱལ་ཁབ་གཞན་གྱི་ནང་དུ་རྒྱ་ནག་གི་ཤུགས་རྐྱེན་རྒྱ་སྐྱེད་ཙམ་དུ་མ་ཟད། ས་ཁོངས་དབང་བསྒྱུར་གྱི་བྱ་སྤྱོད་སྤེལ་སྤེལ་མུས་ཡིན་པ་དང་། དམིགས་བསལ་རྒྱལ་ཁབ་མང་པོ་ཞིག་གི་ནང་དུ་གཞུང་དེར་བཀོལ་སྤྱོད་གང་ཡང་མེད་པའི་འཛུགས་སྐྲུན་སོགས་བྱས་ཏེ་བུ་ལོན་གྱི་དྲ་རྙི་ནང་དུ་འདེད་བཞིན་ཡོད་པ་སོགས་ལ་རྒྱལ་སྤྱིའི་སྟེང་རྒྱ་ནག་ལ་སྐྱོན་བརྗོད་ཤུགས་ཆེན་བྱེད་བཞིན་ཡོད་ཀྱང་། རྒྱ་ནག་གིས་ད་སྔ་བར་སྐྱོན་བརྗོད་དེ་དག་ལ་ངོས་ལེན་བྱེད་ཀྱི་མེད་ཁར། བུ་ལོན་གཡར་མཁན་གྱི་རྒྱལ་ཁབ་ཁག་གིས་ཀྱང་རྒྱ་ནག་ནི་ཡིད་ཆེས་བློ་བཀལ་ཆོག་པའི་མཉམ་ལས་པ་ཞིག་ཡིན་པ་དང་རྒྱལ་ཁབ་གཞན་གྱིས་བུ་ལོན་གཡར་གྱི་མེད་སྐོར་གླེང་གི་ཡོད་ཚུལ་བརྗོད་ནས་རྒྱལ་སྤྱིའི་སྐྱོན་བརྗོད་དག་ལ་ངོས་ལེན་རྩ་བ་ནས་བྱེད་ཀྱི་མེད་སྐོར་བརྗོད་འདུག

སྙན་ཐོའི་ནང་། ཨ་རིའི་སྲིད་འཛིན་ཊོམ་ཕུས་ཕྱིའི་རོགས་དངུལ་འབོར་ཆེན་མཚམས་འཇོག་བྱས་ཡོད་པའི་སྐབས་འདིར། རྒྱ་ནག་གིས་བུ་གཡར་ལས་གཞི་ལ་བརྟེན་ནས་ཆབ་སྲིད་ཀྱི་ཁེ་ཕན་ལེན་བཞིན་པ་མངོན་གསལ་ཡིན་པ་དང་། རྒྱ་ནག་གིས་ཧོན་ཌོ་ར་སི (Honduras) དང་(Nicaragua)། སོ་ལོ་མོན་གླིང་ཕྲན་ (Solomon Islands)། (Burkina Faso) ཌོ་མི་ནེ་ཁན་ (Dominican Republic) སྤྱི་མཐུན་རྒྱལ་ཁབ་སོགས་བུ་ལོན་གཡར་བ་བརྟེན་ནས། རྒྱལ་ཁབ་དེ་དག་གིས་ལོ་གཅིག་དང་ཕྱེད་ཀའི་ནང་ཚུད་དུ་ཐའེ་ཝན་ལ་རྒྱལ་སྲིད་འབྲེལ་ལམ་བཅད་དེ་རྒྱ་ནག་ལ་མགོ་བཏགས་ཡོད་སྐོར་གསལ་འདུག

གནས་ཚུལ་ནང་རྒྱལ་ཁབ་ཚང་མའི་མིང་གསལ་འདོན་བྱས་མེད་ནའང་། ལྷོ་ཤར་ཨེ་ཤ་ཡའི་རྒྱལ་ཁབ་ལོའོ་སི་ནི་ད་ལྟ་རྒྱ་ནག་གི་བུ་ལོན་འོག་དཀའ་ཁག་ཆེན་པོ་འཕྲད་བཞིན་པའི་རྒྱལ་ཁབ་ཅིག་ཡིན་པ་དང་། ད་དུང་པ་ཀི་སི་ཐན་དང་ཁཱ་རྫ་ཀག་སི་ཐན། སོག་པོ། ཨར་ཇན་ཊི་ནཱ་དང་བྷིར་རྫལ་སོགས་སུ་རྒྱ་ནག་གིས་ཐབས་ཇུས་ལྡན་པའི་ཐོག་ནས་བུ་ལོན་གཡར་བཞིན་ཡོད་ཀྱང་། ད་ལྟ་རྒྱ་ནག་གི་དཔལ་འབྱོར་ཉམས་རྒུད་དུ་འགྲོ་བཞིན་པའི་ཁྲོད། རྒྱལ་ཁབ་གཞན་གྱི་ལག་ནས་བུ་ལོན་ཕྱིར་ལེན་པར་དཀའ་ཁག་ཆེ་བས། གཅིག་རྒྱ་ནག་ལ་རྒྱལ་འབྲེལ་གྱི་དཀའ་ངལ་ཞིག་ཆགས་ཡོད་པ་དང་གཉིས་ནས་དཔལ་འབྱོར་འཁོར་རྒྱུག་གི་དཀའ་ངལ་ཞིག་ཀྱང་ཆགས་ཡོད་སྐོར་སོགས་བརྗོད་འདུག

སྤྱིར་རྒྱ་ནག་གཞུང་གིས་རྒྱུད་གཅིག་ལམ་གཅིག་གི་ལས་གཞི་ཁག་ལ་གསང་རྒྱ་བྱས་ཏེ། གནས་ཚུལ་ཉུང་ཉུང་ཙམ་ལས་ཕྱི་གསལ་ནང་གསལ་བཟོས་མེད་པ་དང་། ཨོ་གླིང་གི་ལོ་ཝེ་ (Lowy Institute) བསམ་མཛོད་ལྟེ་གནས་ཁང་གིས་འཛམ་གླིང་དངུལ་ཁང་གི་ཡིག་ཆའི་ནང་རྒྱ་ནག་གི་བུ་གཡར་གྱི་མ་དངུལ་སྐོར་ལ་ཚོད་དཔག་ཧ་ཅང་དམའ་བོ་བྱས་ཡོད་སྐོར་བརྗོད་འདུག་ལ། ཕྱི་ལོ་ ༢༠༢༡ ལོར་ (AidData) ཞེས་པས་རྒྱ་ནག་ལ་གསང་བའི་ཐོག་ཨ་སྒོར་ཐེར་འབུམ་ ༣༨༥ བུ་ལོན་ལེན་རྒྱུ་ཡོད་སྐོར་བསྒྲགས་འདུག

གསར་འགོད་པ། སྐལ་བཟང་སྦྱིན་པ།