ཊོམ་ཕུ་གཞུང་གིས་རྒྱལ་ཁབ་བཅུ་གཉིས་ཀྱི་མི་སེར་ཨ་རིར་ཡོང་རྒྱུ་གཏན་འགོག་བྱ་རྒྱུ་ཡིན་འདུག 

ཟླ་འདིའི་ཕྱི་ཚེས་ ༩ ཉིན་ནས་ཊོམ་ཕུ་སྲིད་གཞུང་གིས་འཛམ་གླིང་ཤར་ནུབ་ཀྱི་རྒྱལ་ཁབ་བཅུ་གཉིས་ཀྱི་མི་སེར་རྣམས་ཨ་རིར་ཡོང་རྒྱུ་གཏན་འགོག་དང་རྒྱལ་ཁབ་ ༧ གྱི་མི་སེར་ལ་དམ་དྲག་བྱ་རྒྱུ་ཡིན་འདུག

ཁ་སང་ཕྱི་ཚེས་ ༤ ཉིན་གྱི་དགོང་མོར་ཨ་རིའི་སྲིད་འཛིན་སྐུ་ཞབས་ཊོམ་ཕུ་གཞུང་གིས་ཨ་རིའི་གཞུང་དམངས་གཉིས་ཀྱི་བདེ་འཇགས་ལ་དམིགས་ནས་ཨི་རན་དང་། ཨབ་གྷ་ནི་སི་ཐན་གཙོས་འཛམ་གླིང་ཤར་ནུབ་ཀྱི་རྒྱལ་ཁབ་བཅུ་གཉིས་ཀྱི་མི་སེར་ཨ་རིར་ཡོང་བར་གཏན་འགོག་དང་། གཞན་རྒྱལ་ཁབ་བདུན་གྱི་མི་སེར་ལ་དམ་དྲག་བྱ་རྒྱུ་ཡིན་པའི་གསལ་བསྒྲགས་ཤིག་སྤེལ་ཏེ།  ཟླ་འདིའི་ཕྱི་ཚེས་ ༩ ཉིན་ནས་དངོས་སུ་ལག་བསྟར་བྱ་རྒྱུ་ཡིན་འདུག

གནད་དོན་དེའི་ཐད་སྲིད་འཛིན་ཊོམ་ཕུ་མཆོག་གིས། ཨ་རིར་ཡོང་ནས་མི་དམངས་ལ་གནོད་འཚེ་གཏོང་འདོད་མཁན་རྣམས་ཨ་རིར་ཡོང་རྒྱུ་གཏན་འགོག་བྱ་རྒྱུ་ཡིན། ང་ཚོས་ཨ་རི་བདེ་སྲུང་བྱེད་བཞིན་པར་སུ་ཞིག་གིས་འགོག་རྐྱེན་བཟོ་ཐུབ་ཀྱི་མེད། ཅེས་གསུངས་འདུག་ལ། དེ་བཞིན་ཨ་རིའི་ཕོ་བྲང་དཀར་པོའི་གསར་འགོད་འབྲེལ་མཐུད་པའི་དྲུང་གཞོན་སྐུ་ཞབས་ཨ་བྷི་གྷལ་ཇེག་སིན་(Abigail Jackson ) ལགས་ཀྱིས། སྲིད་འཛིན་སྐུ་ཞབས་ཊོམ་ཕུ་མཆོག་གིས་ཡིད་སེམས་བརྟན་པོའི་ཐོག་ནས་ཕྱི་རྒྱལ་གྱི་གྲགས་ཅན་མི་སྣ་སོགས་ཨ་རིར་ཡོང་ནས་མི་དམངས་ལ་གནོད་འཚེ་གཏོང་བར་སྲུང་སྐྱོབ་བྱེད་ཀྱི་ཡོད། དམ་དྲག་དེ་དག་ནི་ཆེད་དུ་ཞིབ་བཤེར་ལེགས་པོ་མེད་པའི་ས་ཚིགས་དང་། ཆེད་ལས་པའི་ཐོངས་མཆན་འཁྱེར་ནས་ཨ་རིར་གནས་སྡོད་ཀྱི་དུས་ཡུན་ཚད་ལས་བརྒལ་བ། དེ་བཞིན་ངོ་སྤྲོད་ལག་ཁྱེར་དང་ཉེས་གསོག་གི་གནས་ཚུལ་སྦས་སྐོང་བྱེད་བཞིན་པ་རྣམས་ཀྱི་ཆེད་དུ་རེད། ཅེས་བརྗོད་འདུག

ཊོམ་ཕུ་གཞུང་གིས་ཨ་རིར་གཏན་འགོག་བྱས་པའི་རྒྱལ་ཁབ་བཅུ་གཉིས་ཀྱི་ཁྲོད། ཨབ་གྷ་ནི་སི་ཐན། འབར་མ། དབུས་ཨ་ཧྥི་རི་ཁའི་ཆ་ཊི་(Chad)།  ཁོན་བྷོ་སྤྱི་མཐུན་རྒྱལ་ཁབ་(Republic of the Congo)། དབུས་ཨ་ཧྥི་རི་ཁའི་ཨ་ཀེ་ཌོ་རིལ་གྷི་ནི་(Equatorial Guinea)། ཤར་ཨ་ཧྥི་རི་ཁའི་ཨེ་རི་ཊི་རི་ཡ་(Eritrea) ། ཧེ་ཊི་(Haiti)། ཨི་རན། ལི་བྷི་ཡ་(Libya)། སོ་མོ་ལི་ཡ་(Somalia)། སུ་ཌན་(Sudan) དང་ཡ་མན་(Yemen) རྒྱལ་ཁབ་བཅས་ཡོད་ཅིང་། དམ་དྲག་ནན་མོ་བྱ་རྒྱུ་ཡིན་པའི་རྒྱལ་ཁབ་བདུན་གྱི་ཁྲོད། བྷུ་རུན་དྷི་(Burundi)། ཁུ་བྷ་(Cuba) ། ལའོ་སི། སེ་ཨེ་ར་ལུ་ནི་( Sierra Leone) ། ཊོ་གྷོ་(Togo)། ཊུག་མི་ནི་སི་ཐན་(Turkmenistan) དང་ཝེ་ནི་ཛུ་ལ་(Venezuela) བཅས་ཡོད་འདུག

ཁ་སང་ཊོམ་ཕུ་གཞུང་གིས་རྒྱལ་ཁབ་དེ་དག་གི་མི་སེར་རྣམས་ཨ་རིར་ཡོང་རྒྱུ་གཏན་འགོག་དང་དམ་དྲག་བྱ་རྒྱུ་ཡིན་སྐོར་སོགས་བསྒྲགས་རྗེས། རྒྱལ་སྤྱིའི་ཉེས་ཡངས་ཚོགས་པ་དང་། ཨ་རིའི་འགྲོ་བ་མིའི་ཐོབ་ཐང་རྩོད་ལེན་པ་མང་དག་ཅིག་གིས། ཊོམ་ཕུ་ཕྱིར་ཕུད་གཏོང་དགོས། སྐྱབས་བཅོལ་བ་རྣམས་ཨ་རིར་ཕེབས་ཆོག ཅེས་པའི་འཕྲེད་དར་སོགས་འཕྱར་ནས་ངོ་རྒོལ་ལས་འགུལ་སྤེལ་ཡོད་པ་མ་ཟད། མི་རིགས་དང་རྒྱལ་ཁབ་དམིགས་སུ་བཀར་ནས་བཀག་སྡོམ་བྱས་པ་དེས། མི་རིགས་དབྱེ་འབྱེད་དང་གོ་ལ་ཡོངས་ལ་བརྡ་ལན་ངན་པ་ཞིག་སྤྲོད་ཀྱིན་ཡོད་པའི་མུར། དྲག་གནོན་དང་གཉའ་གནོན་ལ་རྒོལ་ནས་ཨ་རིར་ཡོང་མཁན་རྣམས་ཀྱི་ཐོབ་ཐང་ལ་བརྩི་འཇོག་མ་བྱས་པ་ཡིན་པའི་སྐྱོན་བརྗོད་དང་ངོ་རྒོལ་ཤུགས་ཆེན་བྱས་འདུག

དེ་བཞིན་ཉེ་ལམ་ཨ་རིར་ཁོ་ལོ་རི་ཌ་ཁུལ་དུ་ཨི་ཇིབ་ཀྱི་མི་སེར་ཞིག་གིས་དྲག་རྒོལ་བྱས་ནས་མི་སེར་ལ་གནོད་འཚེ་བཏང་ཡོད་ནའང་། ཊོམ་ཕུ་སྲིད་གཞུང་གིས་ཨི་ཇིབ་ཀྱི་མི་སེར་རྣམས་ཨ་རིར་གཏན་འགོག་མི་བྱེད་པའི་ཐད་མང་ཚོགས་ཁྲོད་དྲང་ལྡོག་གཉིས་ཀྱི་ཐད་ནས་བསམ་ཚུལ་མང་དག་ཅིག་ཡོང་གི་ཡོད་སྟབས། གནད་དོན་དབྱེ་ཞིབ་པ་དག་གིས། ཨ་རི་དང་ཨི་ཇིབ་གཉིས་ཀྱིས་དམག་དོན་དང་བདེ་སྲུང་གི་ཐད་ནས་མཉམ་ལས་མང་དག་ཅིག་བྱེད་མུས་ཡིན་པ་མ་ཟད། འདས་ལོར་ཨ་རིས་ཨི་ཇེབ་ཀྱི་དམག་དོན་བདེ་སྲུང་སླད་ཨ་སྒོར་ཐེར་འབུམ་༡། ༤ ཡི་འགྲོ་གྲོན་བཏང་ཡོད་པས། ཕྱོགས་གཉིས་ཀྱི་བདེ་སྲུང་དང་དམག་དོན་གྱི་མཉམ་ལས་ལ་ཤུགས་རྐྱེན་མི་ཐེབས་སླད། ད་ལན་ཨི་ཇིབ་བཀག་སྡོམ་བྱས་མེད་པའི་ཚོད་དཔག་བྱེད་ཀྱིན་འདུག

ཕྱི་ལོ་ ༢༠༡༧ ལོར་ཊོམ་ཕུ་མཆོག་གི་སྲིད་འཛིན་ལས་ཡུན་དང་པོའི་སྐབས། ཨ་རིས་ཁ་ཆེ་རྒྱལ་ཁབ་བདུན་གྱི་མི་སེར་རྣམས་ཨ་རིར་གཏན་འགོག་བྱེད་ཐབས་བྱས་ཡོད་ཀྱང་། དམངས་གཙོ་ཚོགས་པའི་ཚོགས་མི་ཁག་གིས་མི་སྒེར་དང་ཆོས་ལུགས་དམིགས་སུ་བཟུང་ནས་འགྲིམ་འགྲུལ་བཀག་སྡོམ་བྱས་པ་ནི་ཁྲིམས་སྒྲིག་དང་འགལ་བ་ཞིག་ཡིན་པའི་སྐྱོན་བརྗོད་ཤུགས་ཆེན་བྱས་རྐྱེན། ཨ་རིའི་ནང་རྙོག་འཛིང་ཅན་གྱི་གནད་དོན་ཞིག་ཏུ་གྱུར་ནས་ལམ་ལྷོང་མ་བྱུང་བ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།