རྩོམ་ཁུངས། བོད་ཀྱི་དུས་བབ།
རྩོམ་པ་པོ། བླ་གཡུ། ༢༠༢༥།༦།༡༡
མལ་ལས་སད་མ་ཐག་ཅི་ཡང་ལ་སྙིང་པོ་མེད་སྙམ་པ་ལྟ་བུའི་སེམས་ཁམས་ཤིག་གི་ངང་ལུས་ཕྱེད་ཡར་འགྲེང་སྟེ། ཅི་ཞིག་ལ་མིག་གིས་ཅེ་རེར་ལྟ་ཞིང་། བསམ་པའི་རྩིག་ལྡེབས་སུ་ཉར་བའི་འཆར་ཡན་གྱི་སྣང་བརྙན་དེ་དག་དྲན་ཤེས་ཀྱི་ཡོལ་བས་ཡང་ཡང་སྒུལ་ཏེ། ཐང་ཙམ་ཡུད་ཙམ་ཞིག་ལ་ཡ་ན་ཡུན་གྱི་ངང་དལ་ཅག་གེར་ལྷག བཙུམ་མ་ཕྱེས་ཀྱི་མིག་གཉིས་ལ་འཕྱིད་འཕྱིད་ཙམ་བྱས་རྗེས་ཉེ་རྒྱང་མི་རིང་བའི་སར་ཤེལ་གྱི་དམ་བུ་ཞིག་ལ་གསོས་པའི་མེ་ཏོག་དེ་སྒྱིད་ལུག་དང་སྣང་མེད་རྐྱ་འཐབ་སྟེ་ཆུ་སྦྲེང་རྒྱུ་བརྗེད་པས། ད་ནི་ལོ་འདབ་རྙིད་ཅིང་བྲུལ་ནས་ཚེ་སྲོག་གི་ཆེས་མཐའ་མཇུག་ལ་བསླེབས་འདུག་པ་མཐོང་། དེ་ནི་གྱ་ཁ་གྱུ་ཁུག་གི་འཚོ་བའི་དགའ་སྡུག་ཐམས་ཅད་མྱངས་ཤིང་། ལོ་ཞག་གིས་ཁྱུ་འདེད་བྱས་ཏེ་རི་རྩེའི་ཉི་ཐིག ལ་རྟིང་གི་གྲིབ་མའི་ཚོད་ལ་བསླེབས་པའི་རྒས་ཁོག་ཅིག་དང་ཤིན་ཏུ་མཚུངས་སོ། །
ང་ལ་གོམས་གཤིས་རྙིང་བ་ཞིག་ཡོད་དེ། དེ་ནི་མི་རྙིང་བ་ལ་དགའ་ཞིང་པར་རྙིང་བ་ཉར་ཚགས་བྱེད་རྒྱུ་དེ་རེད། ཉར་ཚགས་བྱས་ཟིན་པའི་པར་རྙིང་དེ་དག་གིས་ནམ་ཞར་དུ་ང་ལ་གཏམ་རྒྱུད་ཀྱི་སྒྲོས་མང་བོ་ཞིག་ཁྱེར་ནས་ཡོང་ཞིང་། མགྲིན་ངག་འཛེར་འཛེར་གྱི་གཅོམ་བསྐྱུངས་མང་བོ་ཞིག་ཀྱང་ཨམ་ཆོག་ལ་བླུག་ཡོང་། དེའི་ནང་གི་པར་རྙིང་ཞིག་ནི། ༡༩༣༣ལོར་བསྒྲོན་པའི་༧རྒྱལ་དབང་སྐུ་གོང་མའི་སྐུ་པར་དེ་རེད། སྐྱིད་སྡུག་གི་གཉེར་མ་ཤར་ཤུར་བབས་པའི་བཞིན་རས་དང་། དགའ་སྐྱོ་ཟུང་གིས་བྲན་པའི་གཉོམ་དུང་ངེ་བའི་སྤྱན་རས་དེས་ང་ལ་ཡང་ཡང་ཅེར་ཞིང་། མི་ཚོགས་ཀྱི་དབུས་སུ་ཀུ་རེ་བྱས་ནས་འོས་མེད་དུ་བཟོས་པ་ལྟར། སེམས་གཅོང་དང་འཕང་སེམས་རྐྱ་བསྒྲིལ་ཏེ་ཡང་བསྐྱར་རེ་ཞིག་ལ་མགོ་བོ་སྨད་ཅིང་ཁུ་སིམ་མེར་ལྷག་སོང་། ཡང་སྙིང་། བག་ཉལ་གྱི་མིག་དཀྱུས་དེའི་ནང་དུ་གབ་སྦས་ཀྱི་གསང་བ་ཅི་ཞིག་ཡོད་དམ།
མི་ལོ་དྲུག་ཅུར་ཉེ་བའི་ལ་བརྒལ་ཆུ་གཅོད་ཀྱི་ས་ཐག་གང་ཙམ་དེ་གོམས་འགྲོས་ཀྱིས་གཞལ་ཏེ་ཚེ་ཕྱི་མར་འགྲོ་སའི་སྐྱ་ཐིག་སྒང་ལ་ཐོན་དུས། མི་སུ་ཡིན་རུང་ཞེ་གཅོང་དང་ཡི་མུག་རྫོགས་མེད་ཅིག་ཡོད་སྲིད་ཅིང་། ཉེ་རྒྱང་དེ་ནས་ཅེར་བའི་སྐད་ཅིག་མའི་མིག་མདངས་དེ་ལས་ལྐོག་ནས་སྐད་ཆ་ཤབ་ཤུབ་སྨྲ་མཁན་དང་། ཟོལ་རྫི་དང་སྤྲེལ་ལད་ཀྱིས་བཀབ་པའི་ངོ་གདོང་མང་བོ་ཞིག་མཐོང་ཡོང་ལ། ས་འཇོར་གཅིག་བརྐོ་མ་མྱོང་ཞིང་། ཆུ་ཟོམ་གཅིག་བཅུ་མྱོང་བའི་བཀའ་དྲིན་མེད་ནའང་། ཕྱུག་པོས་རྒུད་སྐྱོབ་དང་། མཐོན་པོས་ཟེ་འཐེན་བྱས་ཏེ་བསྐྱངས་པའི་མི་དེ་དག་གིས་རང་གི་གཉའ་བཅགས། ལུས་ཀྱི་རུས་བརྡུངས་པའི་གཏམ་རྒྱུད་དེ་དག་ནི། སྐྱིད་སྡུག་གི་གཉེར་མ་ཤར་ཤུར་བབས་པའི་ཡ་ཐོད་ལ་མི་ཤོང་ནའང་། དྲན་འཛིན་གྱི་ཡོལ་གོ་རུ་ཅིས་ཀྱང་ཤར་ཡོད་ངེས།
གཡག་སྣ་ལོ་ཞིག་གི་ཚོད་ལ་ཡོད་པའི་ན་གཞོན་ཕོ་མོ་དེ་དག་གིས་འདས་སོང་གི་ལོ་རྒྱུས་ལ་ལེ་ཁག་དཀྲི་ཞིང་། བྱས་ཉེས་མང་བོ་ཞིག་གི་རེའུ་མིག་གཏོར་ནས་ཁྱེད་ཀྱི་འདས་མ་ད་གསུམ་ལ་ས་བཅད་འགྲེམ་བཞིན་འདུག་ནའང་། ཁོང་ཚོ་ཡང་ང་དང་འདྲ་བར་ཁ་ངག་འཆོལ་ལེ་བ་དང་། རྒྱ་རལ་བའི་ལོ་རྒྱུས་ཀྱི་དྲན་པ་གཞན་ཞིག་གི་ལམ་ཟུར་ན་ཡོད་པ་ཤ་སྟག་ཡིན་པས། ཁ་ཤོམ་གྱི་ཚིག་ཐོ་ཇི་ལྟར་བཀོད་ན་ཡང་། རྡོག་སྣེ་ཁོ་ནར་བལྟས་ཏེ་རང་གི་གྲིབ་མདངས་རབ་རིབ་དེད་ཅིང་། འབྱམས་ཀླས་པའི་གོ་འཛོལ་གྱི་རྐང་ལམ་གཏུབ་མཁན་ཡིན་པའི་ངེས་ཤེས་འདྲོངས་པ་དང་ལྷན། ཐོགས་རེག་བྲལ་བའི་སེམས་དོགས་དང་འཚེར་སྣང་ཞིག་གིས་བྲང་ཁོག་ཧྲིལ་བོར་ལྗིད་ཏིག་གེར་བྱས་སོང་།
སྔོན་ཆད་ཁྱོད་ཀྱིས་མིག་མདངས་སྲུང་མཁན་དང་ངག་བརྩིས་ནས་ལོ་རྒྱུས་ཀྱི་ཉིན་སྲིབ་གཅོད་མཁན་ནི། མིག་གིས་ཀེམ་ཀེམ་ལྟ་ཞིང་སྒྱིད་པ་ཞུམ་ཞུམ་ཀྱིས་ལངས་ཏེ་ཁ་བྱང་གཏན་འཁེལ་བྱེད་པ་དང་། ཐོབ་སྐར་རྒྱག་མཁན་གྱི་ན་གཞོན་ཕོ་མོ་དེ་དག་ཡིན་མི་སྲིད་ལ། ཁོང་ཚོ་ནི་རྟའི་སྲབ་མདའ་བཟུང་ནས་རྒྱ་སོག་ལ་ལམ་སྣ་འཁྲིད་ཅིང་འདས་སོང་གི་ཆག་དུམ་སྒྲིག་མཁན་དང་། ཚར་དུ་དངར་བའི་གངས་ཀྱི་ལྕགས་རི་བརྒལ་ནས་མིག་རྒྱང་འཛམ་གླིང་ལ་སྲིང་མཁན་དག་ཡིན་སྲིད་ལ། ཡང་ན་སྒྱེད་རྩ་ནས་གསོལ་ཇ་དྲངས་ཏེ་གྲོས་ཀྱི་སྣེ་མོར་མདུད་པ་མདུད་མཁན་དེ་དག་ཡིན་ཀྱང་སྲིད། ཡང་ན། མཆོད་སྟེགས་ཀྱི་མཆོད་པ་གཏོར་མཁན་དང་རྡོ་རིང་ངོས་ཀྱི་ཡིག་འབྲུ་འཇིག་པར་བྱེད་མཁན་ཡང་ཡིན་སྲིད། ཡང་ན་ཤར་ལྷོའི་སྒོ་གླེགས་བཅག་ནས་མྱ་ངན་གྱི་སྨག་བསྐྱིལ་མཁན་ཡང་ཡིན་སྲིད་དོ། །
གང་ལྟར་ཁོང་ཚོར་ཡང་བརྗོད་མི་ལང་བའི་ལེ་ཁག་དང་གཏམ་རྒྱུད་ཀྱི་སྒྲོས་མང་བོ་ཞིག་ཡོད་ངེས་ལ། ཁོང་ཚོས་རང་གི་ཡུས་དང་ཡི་མུག་ཁྱེར་ནས་ཁྱེད་ཀྱི་མིག་མདངས་འོག་ནས་ཞེ་འཁང་གི་རྡོག་ཁྲེས་ལྕིད་ཏིག་གེར་དབོག་ཅིང་། སེམས་དོགས་དང་མིག་ཟུར་གྱིས་གོས་པའི་དམའ་འབེབ་ཡོད་ཚད་ཀྱང་རྡུལ་ཉིལ་ལེར་བྱོ་མྱོང་བ་ཐག་གིས་ཆོད། ཡིན་ན་ཡང་། འཇབ་ཉལ་གྱིས་འཁྱིལ་འགྲོས་བྱེད་ཀྱིན་པའི་དུད་པ་ཞིག་དང་འདྲ་བའི་ལེའུ་དེ་དག་རྫོགས་ཤིང་། ཁ་ཁུ་སིམ་པོར་ལུས་པའི་མིག་མདངས་དེས། སྐབས་འགར་ང་ལ་གཏན་དུ་བརྗེད་མི་རུང་བའི་དོན་དག་ཅིག་ལ་གསལ་འདེབས་བྱེད་ཀྱིན་པ་དང་འདྲ་ལ། སྐབས་འགར་ང་ལ་སྐྱོ་ཡུས་འདྲེས་མའི་ལེའུ་གཞན་ཞིག་གི་སེམས་ངོ་སྟོན་བཞིན་པ་དང་ཡང་མཚུངས། དེས་ད་དུང་ཐོ་ཡོར་ལྟ་བུའི་མི་སྣ་མང་བོ་ཞིག་སེམས་ཀྱི་ངོགས་སུ་ཚུར་བསྔོགས་ཏེ་མཛུབ་མོ་ཀེར་དུ་ཡང་འཇུག་གོ ། སྐབས་དེར་ངས་ལྟག་རྒྱབ་ནས་ཚིག་ཐོ་འགོད་མཁན་གྱི་ན་གཞོན་དེ་དག་དྲན་ཡོང་ཞིང་། སྐད་ཅིག་མ་དེ་ལ། ངའི་འཆར་སྣང་ཞིག་ལ་ཁོང་ཚོ་ཡང་ཤོག་ངོས་ཤིག་ལ་ཡིག་འབྲུ་འགོད་མཁན་ཙམ་མ་ཡིན་པར་ཆག་གྲུབ་ཤོར་བའི་ལོ་རྒྱུས་ཀྱི་སིལ་བུ་རྣམས་བྲང་ལ་གླན་ཏེ་གཅོམ་བསྐྱུངས་བྱེད་པའི་མི་འབོར་ཆེན་ཞིག་ཏུ་གྱུར་སོང་།
ཡུད་ཙམ་ཞིག་ནས་ཆར་སྒྲ་ཤག་ཤག་དང་རླུང་བུ་བསིལ་མོ་ཞིག་ངའི་རྩ་ལམ་བརྒྱུད་ནས་སེམས་རྩ་གྲང་སོབ་སོབ་བྱེད་ཅིང་། ཡིད་ཀྱི་རྟ་ཕོ་འཆར་ཡན་གྱི་ཐང་ནས་ལྕགས་དཀྱུས་ཕྱིར་བཀུག་པས། ངའི་འདྲེན་བྱེད་ཀྱི་འབེན་ཁ་སླར་ཡང་སྐུ་པར་རྙིང་པ་དེ་ལ་གཏད་ཅིང་། པར་ངོས་ཀྱི་མིག་མདངས་དེ་ནས་མངོན་པའི་སྐྱིད་སྡུག་གི་མིག་ཆུ་དང་། ཆགས་སྡང་གི་བརྩེ་དུང་ལ་ཡང་ཡང་མཇལ། ཡོལ་བས་བྲེས་པའི་སྒེའུ་ཁུང་ངོས་སུ་ཆར་ཞོད་ཀྱིས་བརྩེ་སེམས་མེད་པར་ཡང་ཡང་བྲན་ཞིང་། ད་དུང་རྒྱང་རིང་ནས་རླུང་བུ་དང་སྡེབ་ནས་འོང་བའི་འཁུན་སྒྲ་དེས་ང་ལ་གཏན་ཚིགས་ཀྱི་སྤྱི་འགྲོས་ཤིག་སྦྲན་པར་མ་ཟད། དེ་དག་ལས་ངས་བདེན་པའི་ངོ་རིས་ཤིག་ཀྱང་རྙེད་པས་སེམས་སྒྲ་ལྟིག་ལྟིག་བྱེད་པའི་མོད་ལ། ཟ་འགྲམ་དུ་ལྷུང་བའི་སྨྲེང་ཤུར་ཤུར་གྱི་འགྱོད་གདུང་གི་མདའ་མོ་སུ་ལ་འཕེན་པའམ། དབྲལ་བའི་གཉེར་རིས་ལ་ཐིམ་པའི་ཁེར་ཧྲེང་གི་སེམས་གཞས་དེ་སུ་ལ་ལེན་པ་ཡིན་ནམ། ངའི་འཆར་སྣང་གི་དྲི་ཚིག་དེ་དག་ལ་ལན་ཅི་ཡང་མེད་པར་རེ་ཞིག་ལ་པར་རྙིང་དེ་དང་འདྲ་བར་སེམས་པ་སྟོང་ལྷང་ལྷང་གི་ངང་འདུག་ཅིང་། གནམ་མཐའ་སྨག་གིས་འཆོས་པ་བཞིན་དུ་མིག་ཆུ་རྡོག་པོ་ཞིག་མིག་ལྕིབས་འོག་ནས་ཟགས་པ་ན་ངའི་མིག་མདངས་ཧྲིལ་བོ་ཡང་མག་མོག་ཏུ་བཟོས་སོང་།
ཅིས་ཀྱང་བདེན་མཆི་ཨང་། ལོ་རྒྱུས་ཁག་ཅིག་མྱ་ངན་གྱི་གཟུགས་བརྙན་ཙམ་ཞིག་ལས་སྨྲ་བ་འགག་ཅིང་། ལོ་ཞག་གི་ཆར་ཆུས་ཁྱུ་འདེད་བྱས་ནས་གཏན་དུ་ང་ཚོ་དང་གྱེས་སོང་བ་རེད། ཞེ་འཁང་དང་སེམས་དོགས་གྲལ་གནས་གཅིག་ཏུ་འདྲེས་ཤིང་། ལེ་ཁག་དང་ཡི་མུག་མཉམ་པོར་རེའུ་མིག་གཅིག་ཏུ་བཅད་པ་དེ་དག་གིས་ངའི་སྙིང་འབེན་ཡང་ཡང་འཕིགས་པར་བརྟེན། འབྱུང་འགྱུར་གྱི་མཚར་སྡུག་ལྡན་པའི་འཚོ་བ་ཐུང་ངུ་ཞིག་ལ་བདེན་དཔང་བྱེད་པའི་ཆེད་དུ་ངས་པར་རྙིང་ལ་དབྱངས་འགྲོས་བཙལ་ནས་སྐད་ཆ་བསྙད་དུ་བཅུག་པ་ཡིན།
