ཕྱི་དྲིལ་བཀའ་བློན་མཆོག་འཇར་མན་རྒྱལ་ཁབ་ནང་གཞུང་འབྲེལ་ཕྱོགས་ཕེབས།

ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་འཇར་མན་གྱི་མངའ་སྡེའི་ཁག་ཅིག་གི་གནད་ཡོད་མི་སྣ་མཇལ་འཕྲད་ཀྱིས་རིག་གཞུང་དང་ཕྱི་འབྲེལ་གྱི་འབྲེལ་ལམ་ཐོག་བགྲོ་གླེང་གནང་ཡོད་འདུག

ཟླ་འདིའི་ཚེས་ ༢༢ ཉིན་ནས་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་འཇར་མན་རྒྱལ་ཁབ་ནང་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༢༤ ཉིན་གྱི་སྔ་དྲོ་འཇར་མན་མངའ་སྡེ་ཤི་ལེ་སི་ཝི་གྷི་ཧོལ་སི་ཌིན་ (Schleswig-Holstein) རུ། ཕྱི་དྲིལ་བཀའ་བློན་མཆོག་གི་སྣེ་ཁྲིད་པའི་སྐུ་ཚབ་ཚོགས་ཆུང་གིས་ཐེ་ཨོ་དོར་སི་ཏེལ་ཙེར་ཀ་སེར་ནེ་ (Theodor-Steltzer-Kaserne)  དམག་སྒར་དུ་གཟིགས་ཞིབ་དང་། འཇར་མན་ཤི་ལེ་སི་ཝི་གྷི་ཧོལ་སི་ཌིན་མངའ་སྡེའི་གྲོས་ཚོགས་ཀྱི་ཚོགས་གཞོན་དང་། མངའ་སྡེའི་གྲོས་ཚོགས་འཐུས་མི་དང་། གྲོས་ཚོགས་ཀྱི་དྲུང་ཆེ། ཁེ་ཁི་བྷོན་གྲོང་སྡེ་ལྷན་ཁང་གི་གཙོ་འཛིན། འཇར་མན་རང་དབང་མང་གཙོ་ཚོགས་པའི་གྲོས་ཚོགས་ཀྱི་ཚོགས་གཙོ་དང་འཐུས་མི། མེ་ཁི་ལེན་བྷར་གྷི་(Mecklenburg Western Pomerania )མངའ་སྡེ་གྲོས་ཚོགས་ཀྱི་ཚོགས་གཙོ་སོགས་དང་མཇལ་འཕྲད་གནང་འདུག

དེ་བཞིན་ཕྱི་དྲིལ་བཀའ་བློན་མཆོག་གིས་ཤི་ལེ་སི་ཝི་གྷི་ཧོལ་ཤི་ཌིན་མངའ་སྡེའི་གྲོས་ཚོགས་ལ་གཟིགས་སྐོར་གནང་སྟེ།   མངའ་སྡེའི་གྲོས་ཚོགས་ཀྱི་འཐུས་མི་དང་འཇར་མན་རང་དབང་དམངས་གཙོ་ཚོགས་པའི་སྐུ་ཞབས་ཧེ་ནར་གྷར་གྷི་(Heiner Garg) ལགས་དང་མཇལ་འཕྲད་གནང་ཡོད་ཅིང་། སྐབས་དེར་མངའ་སྡེའི་གྲོས་ཚོགས་ཀྱིས་འཇར་མན་སྲིད་གཞུང་གི་ལམ་ལུགས་སོགས་ཀྱི་ཐོག་བཀའ་མོལ་གནང་ཡོད་པ་དང་། ཤི་ལེ་སི་ཝི་གྷི་ཧོལ་ཤི་ཌེན་གྱི་ཚོང་ལས་དང་བཟོ་ལས་ཚོགས་པའི་ས་གནས་ཀྱི་དཔལ་འབྱོར་ཡར་རྒྱས་གོང་འཕེལ་དང་བཟོ་ལས་མཉམ་འབྲེལ་ལ་རྒྱབ་སྐྱོར་གྱི་ནུས་པ་གལ་ཆེན་སྐོར་འགྲེལ་བརྗོད་གནང་འདུག

ཟླ་འདིའི་ཚེས་ ༢༣ ཉིན་འཇར་མན་ཧཱམ་བྷུར་གྷི་མངའ་སྡེའི་གྲོས་ཚོགས་སུ། ཧཱམ་བགྷུར་གྷིའི་རྒྱ་གར་གྱི་བདུན་ཕྲག་ཐེངས་ ༡༡ པ་(11th India Week Hamburg) སྲུང་གཙི་ཞུས་ཡོད་ཅིང་། སྐབས་དེར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཧཱམ་བྷུར་གྷི་མངའ་སྡེའི་གྲོས་ཚོགས་ཀྱི་ཚོགས་གཙོ་དང་།  རྒྱ་གར་གི་འཇར་མན་གཞུང་ཚབ་པ། རྒྱ་གར་ཧི་མཱ་ཅལ་མངའ་སྡེའི་འཛིན་སྐྱོང་སློབ་སྟོན་པ་གྷོ་ཀུལ་བྷུ་ཊ་ཡིལ་ (Gokul Butail) ལགས། ཚོང་ལས་སྡེ་ཁག་གི་སྐུ་ཚབ་ཚུད་པའི་གནད་ཡོད་མི་སྣ་ཁག་གཅིག་དང་མཇལ་འཕྲད་གནང་ཡོད། དེ་བཞིན་ཕྱི་ཚེས་ ༢༢ ཉིན་འཇར་མན་ཧཱམ་བྷུར་གྷི་མངའ་སྡེ་རུ། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ལ་འཇར་མན་རོགས་ཚོགས་ (Friedrich Naumann Foundation) ཀྱི་ལས་འཆར་འགན་འཛིན་རྒན་པ་ནུ་པུར་ཧ་ས་ཇི་ཡ་ (Nupur Hasija) ལགས་དང་། ལས་འཆར་འགན་འཛིན་ཕེ་རན་ཀི་ཧོབ་མན (Frank Hoffmann) ལགས། ཇོ་ཧ་ནེས་སི་བོ་གྷ་ཊི་ཛི་ (Johannes Bogatz) ལགས་བཅས་ལ་མཇལ་འཕྲད་གནང་ཡོད་འདུག་ལ།  བཀའ་བློན་མཆོག་གིས་༸གོང་ས་ཡང་སྲིད་དང་འབྲེལ་བོད་ཀྱི་མགོ་ཁྲིད་ཀྱི་མ་འོངས་མདུན་ལམ་ (The Future of Tibetan Leadership: Insights on His Holiness the Dalai Lama’s Succession) ཞེས་པའི་བརྗོད་གཞིའི་ཐོག་གི་གསར་འགོད་ཚོགས་འདུ་དང་བགྲོ་གླེང་གནང་རྒྱུ་ཡིིན་འདུག

གསར་འགོད་པ་བྱམས་པ་ཚེ་རིང་གིས་བོད་མིའི་སྒྲིག་འཛུགས་ཀྱི་དྲ་བ་ལས་བསྡུ་སྒྲིག་བྱས།