ཨ་རིའི་གྲོས་ཚོགས་ནང་༧སྐུའི་གོ་སྟོན་སྲུང་གཙི་གནང་།

ཨ་རིའི་རྒྱལ་ས་ཝ་ཤིན་ཊོན་གྱི་ཨ་རིའི་གྲོས་ཚོགས་སུ་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་དགུ་བཅུར་བཞེས་པའི་སྐུའི་འཁྲུངས་སྐར་སྲུང་གཙི་གནང་སྟེ། ཕྱི་ཟླ་ ༧ ཚེས་ ༦ སྟེ་སྐུའི་འཁྲུངས་སྐར་ཉིན་བྱམས་བརྩེའི་ཉིན་མོར་སྲུང་གཙི་གནང་རྒྱུ་ཡིན་འདུག

ཟླ་འདིའི་ཕྱི་ཚེས་ ༢༥ ཉིན་རྒྱལ་སྤྱིའི་བོད་དོན་ལས་འགུལ་ཁང་དང་། བྱང་ཨ་རི་སྐུ་ཚབ་དོན་གཅོད་ལས་ཁུངས། དེ་བཞིན་རྒྱལ་སའི་མངའ་ཁུལ་གྱི་བོད་རིགས་སྤྱི་མཐུན་ཚོགས་པ་བཅས་ཐུན་མོང་གི་གོ་སྒྲིག་འོག ཨ་རིའི་རྒྱལ་ས་ཝ་ཤིན་ཊོན་གྱི་ཨ་རིའི་གྲོས་ཚོགས་སུ་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་དགུ་བཅུར་བཞེས་པའི་སྐུའི་འཁྲུངས་སྐར་སྲུང་གཙི་གནང་ཡོད་ཅིང་། སྐབས་དེར་ཨ་རིའི་གྲོས་ཚོགས་ཀྱི་འཐུས་མི་སྐུ་ཞབས་མ་ཧི་ཀལ་མེ་ཀོལ་  (Michael McCaul) མཆོག་དང་། ལྕམ་སྐུ་ནེན་སི་པི་ལོ་སི་ (Nancy Pelosi) མཆོག སྐུ་ཞབས་ཇིམ་མེག་གྷོ་ཝན་ (Jim McGovern) མཆོག་སོགས་ཕེབས་ཡོད་འདུག

གྲོས་ཚོགས་འཐུས་མི་སྐུ་ཞབས་མ་ཧི་ཀལ་མེ་ཀོལ་མཆོག་དང་། སྐུ་ཞབས་ཇིམ་མེག་གྷོ་ཝན་མཆོག ལྕམ་སྐུ་ནེན་སི་པི་ལོ་སི་མཆོག་བཅས་ནས་མཛད་སྒོར་མི་སེམས་འགུལ་བའི་གསུང་བཤད་གནང་བའི་ཁྲོད། འདས་ལོར་ལོ་རྒྱུས་རང་བཞིན་ལྡན་པའི་ཨ་རིའི་བོད་དོན་དམིགས་བསལ་ཁྲིམས་འཆར་གཏན་འབེབས་བྱུང་བ་དང་། འདི་ལོར་གྲོས་ཚོགས་གོང་འོག་གཉིས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་འཁྲུངས་སྐར་དེ་བྱམས་བརྩེའི་ཉིན་མོར་སྲུང་གཙི་གནང་རྒྱུ་ཡིན་པའི་མུར། ཨ་རིའི་གྲོས་ཚོགས་གོང་འོག་གཉིས་སུ་བོད་དང་བོད་དོན་རྒྱབ་སྐྱོར་གནང་མཁན་ཡོད་པ་ནི། ༧གོང་ས་རྒྱལ་བ་རིན་པོ་ཆེ་མཆོག་ནས་བྱམས་བརྩེ་དང་། འཚེ་བ་མེད་པ། གཞན་ཕན་ཁོ་ནའི་ཆེད་དུ་སྐུ་ལས་བསྐྱོན་པ་ལས་བྱུང་བ་ཞིག་ཡིན་སྐོར་སོགས་གསུངས་འདུག

བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་སྲུང་གཙི་བྱས་པ་ནི། ༧མགོན་པོ་གང་ཉིད་ཀྱིས་བོད་དང་བོད་མི་ཙམ་མིན་པར་འཛམ་གླིང་སྤྱི་ཡོངས་ཀྱི་བདེ་སྡུག་ལ་ཐུགས་ཁུར་དང་། འགྲོ་བ་མིའི་རིགས་ཀྱི་བདེ་སྡུག་གི་ཆེད་སྐུ་ལས་བསྐྱོན་པ་ལས་བྱུང་བ་ཞིག་ཡིན་སྐོར་དང་། རྒྱ་ནག་གཞུང་གིས་བོད་ནང་དུ་སྲིད་ཇུས་འདྲ་མིན་ལག་བསྟར་བྱས་ཏེ་བོད་ནང་གི་བོད་མི་རྣམས་ལ་ཚད་ལས་འདས་པའི་གཉའ་གནོན་དང་དཀའ་ངལ་སྤྲོད་མུས་ཡིན་ཡང་། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས། བོད་མི་རྣམས་ཀྱིས་འཚེ་བ་མེད་པའི་ཐོག་ནས་བོད་ཀྱི་འཐབ་རྩོད་ལ་གཞོལ་མུས་ཡིན་སྐོར་སོགས་བརྗོད་འདུག

ཨ་རིའི་གྲོས་ཚོགས་སུ་༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་བསུ་བའི་མཛད་སྒོ་དེའི་ཐོག གྲོས་ཚོགས་འཐུས་མི་སྐུ་ཞབས་ཀྲོཌ་ཡོང་ (Todd Young) མཆོག་དང་ཇེ་ཀི་རོ་སེན་ (Jacky Rosen) མཆོག གྲོས་ཚོགས་འཐུས་མིའི་འབྲེལ་ཡོད་ལས་བྱེད།  སྐུ་ཚབ་དོན་གཅོད་འབུམ་རམས་པ་རྣམ་རྒྱལ་ཆོས་གྲུབ་ལགས།  སྤྱི་འཐུས་བསྟན་འཛིན་འཇིགས་མེད་ལགས།  རྒྱལ་སའི་མངའ་ཁུལ་གྱི་བོད་རིགས་སྤྱི་མཐུན་ཚོགས་པའི་རྒྱུན་ལས།  དོན་གཅོད་ལས་ཁུངས་དང་རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད།  ས་གནས་ ༢༥ ནས་བོད་དོན་ཞུ་གཏུག་གནང་བར་ཕེབས་མཁན་རྣམ་པ་བཅས་ཁྱོན་བསྡོམས་མི་གྲངས་ ༢༠༠ ལྷག་ཙམ་མཉམ་ཞུགས་གནང་ཡོད་ཅིང་། གློག་བརྙན་འཁྲབ་སྟོན་པ་གྲགས་ཅན་རི་ཆ་ཌི་གྷིར་ (Richard Gere) ལགས་དང་།  གྲོས་ཚོགས་འཐུས་མི་ཇོ་ལྦིལ་སོན་ (Joe Wilson) སོགས་ཀྱིས་དྲ་ལམ་ནས་མཛད་སྒོར་མཉམ་ཞུགས་གནང་ཡོད་འདུག

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།