༧གོང་ས་རྒྱལ་བ་རིན་པོ་ཆེ་མཆོག་ནས་ཅི་ཙམ་གྱིས་ངོས་ལ་བརྩེ་བ་ཡོད་པ་དེའི་ཚོད་ཀྱིས་བདག་ལས་གཞན་གཅེས་པའི་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་ག་ཚོད་ཐུབ་ཐུབ་ཀྱིས་ཉམས་ལེན་གནང་རོགས་ཞེས་བླང་དོར་བཀའ་སློབ་བསྩལ།
ཁ་སང་ཕྱི་ཚེས་ ༦ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་འཁྲུངས་སྐར་གཞུང་འབྲེལ་ཐོག་སྲུང་གཙི་ཟབ་རྒྱས་ཞུས་སོང་བ་དང་། མཛད་སྒོའི་ཐོག་༧གོང་ས་རྒྱལ་བ་རིན་པོ་ཆེ་མཆོག་གི་དབུས་བོད་ཀྱི་བསྟན་བདག་བླ་ཆེན་རྣམ་པ་དང་། སྐུ་མགྲོན་གཙོ་བོ་རྒྱ་གར་དབུས་གཞུང་གི་གྲོས་ཚོགས་ལས་དོན་གྱི་བློན་ཆེན་ཀི་རེན་རི་ཇི་ཇུ་ (Kiren Rijiju) མཆོག་དང་། རྒྱ་གར་དབུས་གཞུང་གི་གྲོང་སྡེ་ལྷན་ཚོགས་ཀྱི་བློན་ཆེན་རཱ་ཇི་ཝི་རཱན་ཇཱན་སིང་ཧ་(Rajiv Ranjan Singh) མཆོག དམིགས་བསལ་སྐུ་མགྲོན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་རི་ཆར་ཌི་གྷར་(Richard Gere )མཆོག་དང་། ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་བཀྲ་ཤིས་རྒྱལ་མཚན་མཆོག འབྲས་ལྗོངས་མངའ་སྡེའི་ཆོས་རིག་བློན་ཆེན་བསོད་ནམས་བླ་མ་མཆོག དེ་བཞིན་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་གཙོ་བྱས་པའི་སྲི་ཞུའི་ལས་བྱེད་རྣམས་དང་། ཕྱོགས་མཐའ་ཁག་ནས་ཡོང་བའི་སེར་སྐྱ་མི་མང་སྟོང་ཕྲག་མང་པོ་འཛོམས་འདུག
མཛད་སྒོའི་ཐོག་༧གོང་ས་རྒྱལ་བ་རིན་པོ་ཆེ་མཆོག་ནས། ཆོས་གྲོགས་དང་གྲོགས་པོ་ལྷན་རྒྱས་ཚང་མར་ཞུ་རྒྱུར། ངོས་རང་དེ་རིང་ལོ་དགུ་བཅུར་སླེབས་པའི་འཁྲུངས་སྐར་གྱི་མཛད་སྒོའི་ཐོག་ཁྱོད་ཚོ་དགའ་ཚོར་ཤུགས་ཆེན་པོའི་ཐོག་ནས་དགའ་བཞིན་སྤྲོ་བཞིན་དུ་འཛོམས་འདུག ཐུགས་རྗེ་ཆེ་ཞུ་རྒྱུ་ཡིན། གང་ལྟར་ངོས་ལ་ཆ་བཞག་ན་གཅིག་ནས་མི་ལུས་ཤིག་ཐོབ་ཡོད་པ་དང་། མི་ལུས་ཤིག་ཡིན་པའི་ངོས་ནས་མི་ཕན་ཚུན་ལ་བརྩེ་བ་དང་རོགས་རམ་བྱེད་པ་ནི་ཆོས་ཉིད་རེད། ཡང་སྒོས་ང་ཚོ་ཆོས་དར་སའི་ལུང་པ་ཞིག་ནས་ཡོང་བ་ཡིན་པས་ཆོས་ཕྱོགས་ཀྱི་ཐོག་ནས་སྤུན་ཟླ་མི་རིགས་ཀྱི་བསམ་བློ་ཡང་ཤུགས་ཆེན་པོ་ཡོད་པ་རེད། ཉམས་ལེན་གྱི་གཙོ་བོ་ནི་སྤྱོད་འཇུག་ནས་གསུངས་པ་བཞིན་གཞན་ཕན་གྱི་བློ་དེ་གལ་ཆེ་ཤོས་ཆགས་ཡོད་པས། ངོས་ནས་སྤྱོད་འཇུག་གི་བསམ་བློ་ཤུགས་ཆེན་པོ་གཏོང་གི་ཡོད། འགྲོ་བ་སེམས་ཅན་ཐམས་ཅད་རང་གི་གཉེན་དུ་བལྟས་ནས་སྒོ་གསུམ་གྱི་ནུས་པ་ཅི་ཡོད་པ་དེ་གཞན་དོན་ལ་ཕན་པར་ཤོག་ཅེས་ངོས་ནས་སྨོན་ལམ་རྒྱག་བཞིན་ཡོད། དེ་རིང་འདིར་ངོས་ཀྱི་སྐྱེས་སྐར་གྱི་དུས་ཆེན་ལ་ཁྱོད་ཚོ་མང་པོ་ཞིག་དགའ་བོ་བྱས་ཏེ་ཕེབས་པ་རེད། ཐུགས་རྗེ་ཆེ་ཞུ་རྒྱུ་ཡིན། མི་མང་འདུ་འཛོམས་དང་དགའ་ཚོར་ཆེན་པོའི་རྣམ་འགྱུར་བསྟན་ཡོང་དུས་ངོས་རང་གི་ཀུན་སློང་ལ་སྐུལ་མ་ཡོང་གི་འདུག ངོས་ཀྱིས་གཞན་ཕན་བྱང་ཆུབ་ཀྱི་སེམས་ཉམས་ལེན་བྱེད་བཞིན་ཡོད་པ་རེད། དེའི་འབྲས་བུར་མི་མང་པོས་དགའ་བོ་བྱེད་ཀྱི་ཡོད། རང་གཅེས་འཛིན་གྱི་བསམ་བློ་བཏང་ནས་ང་ལ་དགའ་བོ་བྱེད་མཁན་བྱུང་ན་བསམ་པའི་བསམ་བློ་བཏང་ཚེ། དེའི་ཐབས་ཤེས་ནི་བདག་ལས་གཞན་གཅེས་པའི་བྱང་ཆུབ་ཀྱི་སེམས་ལ་སྙིང་ཁོང་རུས་པའི་གཏིང་ནས་བསམ་བློ་རྩེ་གཅིག་ཏུ་བཏང་བ་ཡིན་ན་གཞན་གྱིས་དགའ་བོ་བྱས་ཏེ་རང་བཞིན་གྱིས་འདུས་ཡོང་བ་ཞིག་ཆགས་ཀྱི་འདུག ཅེས་གསུངས་སོང་།
ཡང་༧མགོན་པོ་གང་ཉིད་མཆོག་ནས། ངོས་རང་ལ་ཆ་བཞག་ན། བྱང་ཆུབ་ཀྱི་སེམས་ཉམས་ལེན་གྱི་གཙོ་བོ་བྱས་ཏེ་བསམ་བློ་གཏོང་བཞིན་ཡོད། ནུས་པ་ཧ་ཅང་ཆེན་པོ་རེད། བྱང་ཆུབ་ཀྱི་སེམས་ཀྱི་གྲོགས་ལ་སྟོང་ཉིད་ཀྱི་ལྟ་བ་རེད། སེམས་བསྐྱེད་དང་སྟོང་ཉིད་ཀྱི་ལྟ་བ་ཟུང་དུ་སྦྲེལ་བའི་ཐོག་ནས་ཉིན་ཞག་ཕྲུགས་གཅིག་གི་དུས་ཚོད་བསྐྱལ་དུས་རྣམ་མཁྱེན་རྒྱལ་བའི་གོ་འཕང་ཐོབ་པའི་རྒྱུ་ཚོགས་ཀྱི་རྨང་གཞི་བཏིང་ནས་འགྲོ་བཞིན་ཡོད། ལྷ་སའི་ཇོ་བོ་ཐུགས་རྗེ་ཆེན་པོ་རྟེན་གྱི་གཙོ་བོ་བྱས་ཏེ། སྟག་བྲག་རིན་པོ་ཆེ་དང་གླིང་རིན་པོ་ཆེ། ཁྲི་བྱང་རིན་པོ་ཆེ་བཅས་ཀྱི་སྐུ་མདུན་ནས་ངོས་རང་གིས་བསྙེན་རྫོགས་བསྒྲུབས་པ་རེད། དེ་ནས་དུས་ད་ལྟའི་བར་དུ་ངོས་ཀྱིས་དགེ་སློང་གི་འདུ་ཤེས་བརྟན་པོ་བཟུང་ནས་བསྡད་ཡོད། གང་ལྟར་མི་སུ་ལ་ཐུག་པ་ཡིན་ནའང་། གཞན་ཕན་གྱི་བློ་རྩེ་གཅིག་པས་ཟིན་པ་བྱས་ཏེ་ཐུག་གི་ཡོད། དེར་བརྟེན། མི་ལུས་ཐོབ་པ་དོན་དང་ལྡན་པ་ཞིག་དང་། དེ་ལྟ་བུའི་ཉམས་ལེན་ཡག་པོ་བྱེད་ཡོང་དུས་ངོས་རང་འཆི་ཁར་འགྱོད་པ་མེད་པར་སེམས་གདེང་འཁེལ་བའི་ངང་ནས་གྲོངས་འགྲོ་རྒྱུ་རེད། ད་ལྟ་ལོ་དགུ་བཅུར་སླེབས་ཡོད། དེའི་རིང་ལ་ངོས་ཀྱིས་ཉམས་ལེན་གང་ལ་གང་འཚམ་བྱས་ཡོད། དེའི་ལག་རྗེས་སུ་སེམས་འདུལ་བ་དང་ཞི་བ། ཞི་གནས་དང་ལྷག་མཐོང་གི་སྐོར་ལའང་གང་འཚམ་གྱིས་བསམ་བློ་གཏོང་གི་ཡོད། ངོས་རང་གིས་བསམ་བློ་བཏང་ན་ངོས་ཀྱི་མི་ཚེ་སྟོང་ཟད་དུ་འགྲོ་ཡི་མེད་པ་ཞིག་མཐོང་གི་འདུག ཏཱ་ལའི་བླ་མ་རེད་ཅེས་ཧ་ཅང་བསྟོད་པ་བྱས་ཀྱང་ང་རྒྱལ་སྐྱེས་ཀྱི་མི་འདུག ངོས་རང་གི་གནས་སྟངས་ག་འདྲ་ཡིན་པ་ལ་བསམ་བློ་ག་དུས་ཡིན་ཡང་འཁོར་བསྡད་ཀྱི་འདུག ཅེས་གསུངས་སོང་།
གཞན་ཡང་། ༧གོང་ས་མཆོག་ནས། བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་གི་ངོས་ནས་མི་མང་ལ་ཞབས་འདེགས་སྒྲུབ་པ་དང་། བསྟན་པ་ལ་ཞབས་འདེགས་སྒྲུབ་པ། ག་ཚོད་ཐུབ་ཐུབ་ཀྱིས་ཞབས་འདེགས་སྒྲུབ་རྒྱུ་ནི་ངོས་ཀྱི་ལག་ལེན་གཙོ་བོ་རེད། གཞན་ཕན་བྱང་ཆུབ་ཀྱི་སེམས་སམ་བྱང་ཆུབ་ཀྱི་སེམས་བཅོས་མ་མ་ཡིན་པ་ག་ལེར་སླེབས་རྒྱུ་མ་གཏོགས་ཁག་པོ་རེད། གཞན་ཕན་གྱི་བློས་ཟིན་པའི་ཐོག་ནས་ངོས་ཀྱིས་མི་ཚེ་སྐྱེལ་བཞིན་ཡོད། ངོས་ཀྱིས་གཞན་ཕན་གྱི་ཀུན་སློང་འཁྱེར་ནས་ཕན་ཐོགས་བྱས་པའི་ཚོད་ཀྱིས་མིས་ཚུར་དགའ་བོ་བྱེད་པ་ཡང་ཤུགས་ཆེན་པོ་འདུག ཁྱོད་ཚོ་ཚང་མར་ཐུགས་རྗེ་ཆེ་ཞུ་རྒྱུ་ཡིན། དེ་རིང་འདིར་ངོས་རང་ལོ་དགུ་བཅུར་སླེབས་པའི་འཁྲུངས་སྐར་གྱི་མཛད་སྒོར་མི་མང་པོ་ཞིག་འཛོམས་ཡོད། ཁྲལ་བཞག་ནས་སླེབས་པ་མ་རེད། སེམས་གཏིང་ནས་ཞེན་ཁོག་དང་དགའ་ཚོར་བྱས་ཏེ་ཡོང་བ་རེད། ངོས་ཀྱིས་དམིགས་བསལ་གྱིས་ཐུགས་རྗེ་ཆེ་ཞུ་རྒྱུ་ཡིན། ཁྱོད་ཚོ་ཅི་ཙམ་གྱིས་ངོས་ལ་བརྩེ་བ་ཡོད་པ་དེའི་ཚོད་ཀྱིས་ཁྱོད་ཚོས་བདག་ལས་གཞན་གཅེས་པའི་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་ག་ཚོད་ཐུབ་ཐུབ་ཀྱིས་ཉམས་ལེན་གནང་རོགས་ཞུ་རྒྱུ་ཡིན། བཀྲ་ཤིས་བདེ་ལེགས། ཐུགས་རྗེ་ཆེ། ཞེས་གསུངས་སོང་།
འཁྲུངས་སྐར་གྱི་མཛད་སྒོའི་ཐོག་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གསུང་བཤད་སྒྲོག་སྦྱངས་གནང་བའི་ནང་། ཕྱི་ལོ་ ༢༠༢༥ ཟླ་ ༧ ཚེས་ ༢ ཉིན། བོད་མི་དང་དད་ལྡན་རྗེས་འཇུག་པ་རྣམས་ཀྱི་མངོན་འདོད་བཞིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་༸སྐུ་ཕྲེང་རིམ་བྱོན་མུ་མཐུད་ཕེབས་རྒྱུའི་དབུགས་དབྱུངས་བཀའ་དྲིན་བསྐྱངས་པ་ནི། བོད་དང་བོད་མིའི་ཚེ་སྲོག་གི་རྒྱུན་ཐག་མུ་མཐུད་གནས་ངེས་ཡིན་པའི་གཡར་དམ་དང་གཉིས་སུ་མ་མཆིས་པས། གཞིས་བྱེས་ལྷ་མི་ཡོངས་དང་། བོད་ཀྱི་གྲོགས་པོ་ཡོངས་ཀྱི་ཚབ་ཞུས་ཏེ། ༸མགོན་པོ་མཆོག་ལ་ཐུགས་རྗེ་བཀའ་དྲིན་བླ་མེད་དུ་ཆེ་ཞུ་རྒྱུ་དང་། བོད་མིའི་ཆོས་ཚོགས་ཐེངས་བཅོ་ལྔ་པའི་ཐོག་བསྟན་བདག་བླ་ཆེན་དང་སྐུ་ཚབ་སྤྱི་མགྲིན་ནས་༸མགོན་པོ་མཆོག་ལ་ཐུགས་རྗེ་ཆེ་ཞུའི་དམིགས་བསལ་གྲོས་ཆོད་དུ་རྒྱ་གཞུང་གི་སྐུའི་ཡང་སྲིད་ཐད་ཇུས་ངན་གཤོམ་སྒྲོགས་ལ་དགག་པ་དང་། ངོས་ལེན་བྱེད་ཐབས་མེད་པའི་སྤྱི་མོས་གྲོས་ཆོད་བསྣོལ་འཇོག་ལའང་ཐུགས་རྗེ་ཆེ་ཞུ་བ་དང་ཆབས་ཅིག་ཏུ། བོད་མི་རིགས་ནམ་གནས་ཀྱི་བར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་གསང་གསུམ་གྱི་མཛད་འཕྲིན་རྒྱ་ཆེར་སྐྱོང་གནང་ཡོང་བའི་སྨོན་འདུན་དང་། སྐལ་ལྡན་གདུལ་བྱ་རྣམས་ཚེ་རབས་ཀུན་ཏུ་འབྲལ་མེད་རྗེས་འཛིན་ཡོང་བའི་གསོལ་འདེབས་ཞུ་བཞིན་ཡོད།ཅེས་གསུངས་སོང་།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་སྤྱི་འཐུས་ཀྱི་གསུང་བཤད་སྒྲོགས་སྦྱང་གནང་བའི་ནང་། བོད་མི་མང་སྤྱི་འཐུས་ལྷན་ཚོགས་ནས་ཕྱི་ལོ་ ༢༠༢༥ ཟླ་ ༦ ཚེས་ ༣ ནས་ ༤ བར་ཉི་འོང་རྒྱལ་ས་ཊོཀ་ཡོ་རུ་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐེངས་ ༩ པ་བསྐོང་ཚོགས་ཞུས་ཤིང། སྐབས་དེར་རྒྱལ་ཁབ་ ༢༩ ནས་གྲོས་ཚོགས་འཐུས་མི་དངོས་སུ་ངོ་བཅར་དང་། དྲྭ་ཐོག་བརྒྱུད་མཉམ་བཞུགས་ཀྱིས་ཚོགས་འདུ་གྲུབ་འབྲས་ལྡན་པ་བྱུང་ཡོད་ལ། ཚོགས་ཆེན་ཐོག་ཊོཀ་ཡོ་བསྒྲགས་གཏམ་དང་། ལག་བསྟར་འཆར་གཞི། ༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་དགུང་གྲངས་ ༩༠ ལ་ཕེབས་ཀྱི་ཡོད་པར་འཚམས་འདྲི་ཞུ་རྒྱུ་དང་། ༸མགོན་པོ་མཆོག་གིས་འགྲོ་བ་མིའི་གཅིག་གྱུར་གྱི་འདུ་ཤེས་དང་། འཚེ་མེད་ཞི་བདེ། འགྲོ་བ་མིའི་ཐོབ་ཐང་། ཆོས་ལུགས་མཐུན་སྒྲིལ། ཁོར་ཡུག་སྲུང་སྐྱོབས། མང་གཙོ་གོང་འཕེལ་བཅས་ཀྱི་ཐོག་ཞབས་འདེགས་ཞུས་པའི་རླབས་ཆེན་གྱི་མཛད་བཟང་དག་ལ་ཡི་རངས་ཆེ་བསྟོད་བཅས་ཀྱི་དམིགས་བསལ་གྲོས་ཆོད་དོན་ཚན་ ༦ ཅན་ཞིག་སྤྱི་མོས་ཀྱིས་གཏན་འབེབས་བྱུང་ཡོད་པས་རྒྱལ་སྤྱིའི་ནང་གོ་སྟོན་དང་འབྲེལ་བའི་༸གོང་ས་མཆོག་གི་མཛད་འཕྲིན་ལ་ཆེ་བསྟོད་དང་། རླབས་ཆེན་མཛད་འཕྲིན་རྣམས་མུ་མཐུད་རྒྱུན་གནས་ཡོང་བའི་ལེ་ཚན་གསར་པ་ཞིག་ཏུ་གྱུར་ཐུབ་ཡོད།ཅེས་གསུངས་སོང་།
རྒྱ་གར་དབུས་གཞུང་གི་གྲོང་སྡེ་ལྷན་ཚོགས་ཀྱི་བློན་ཆེན་རཱ་ཇི་ཝི་རཱན་ཇཱན་སིང་ཧ་མཆོག་གིས། དེ་རིང་འཛམ་གླིང་ཡུལ་གྲུ་ཀུན་གྱི་མི་མང་དང་མཉམ་དུ་༧རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་གྲངས་དགུ་བཅུར་ཕེབས་པའི་༸སྐུའི་འཁྲུངས་སྐར་དུས་ཆེན་གྱི་ཡུལ་དངོས་སུ་མཉམ་ཞུགས་གནང་རྒྱུའི་གོ་སྐབས་བཟང་བོ་ཐོབ་པར་དགའ་ཚོར་ཆེན་པོ་བྱུང་། ༸གོང་ས་རྒྱལ་བ་རིན་པོ་ཆེ་མཆོག་ནི་འཚེ་མེད་ཞི་བ་དང་སྙིང་རྗེའི་རང་གཟུགས་ཡིན་པར་མ་ཟད། འཛམ་གླིང་ནང་བྱམས་བརྩེའི་ནུས་པ་གོང་སྤེལ་གཏོང་མཁན་ཞིག་ཡིན་པས། ༸མགོན་པོ་གང་ཉིད་མཆོག་གི་༸སྐུ་ཚེ་ལོ་རྒྱུས་དང་མཛད་འཕྲིན་ལས་ང་ཚོར་བློ་བསྐྱེད་དང་སེམས་འགུལ་ཐེབས་ཡོད། ཅེས་དང་། ༸གོང་ས་མཆོག་གི་བཀའ་སློབ་ནི་སངས་རྒྱས་བཅོམ་ལྡན་འདས་ཀྱི་བཀའ་དང་། ནཱ་ལེནྡྲའི་རིག་གཞུང་ལ་གཞི་བཅོལ་ཡོད། རྡོ་རྗེ་གདན་དུ་འཛུགས་སྐྲུན་བྱེད་བཞིན་པའི་༸གོང་ས་ཏཱ་ལའི་བླ་མ་བོད་དང་རྒྱ་གར་གནའ་བོའི་རིག་གཞུང་ལྟེ་གནས་ཁང་གིས་བོད་དང་རྒྱ་གར་བར་གནའ་བོའི་རིག་གཞུང་གི་འབྲེལ་ལམ་གཏིང་ཟབ་ཡོད་པ་མཚོན་ཐུབ་པ་མ་ཟད། བོད་དོན་འཐབ་རྩོད་ནི་འཚེ་མེད་ཞི་བའི་ལམ་ཁོ་ནར་བརྟེན་ཡོད་སྐོར་གསུངས་སོང་།
རྒྱ་གར་དབུས་གཞུང་གི་གྲོས་ཚོགས་ལས་དོན་གྱི་བློན་ཆེན་ཀི་རེན་རི་ཇི་ཇུ་མཆོག་གིས། གོང་ས་མཆོག་ནི་ཆོས་ཕྱོགས་ཀྱི་དབུ་ཁྲིད་ཅིག་ལས་ལྷག་པ་ཡིན། ༸གོང་ས་མཆོག་ནི་གནའ་བོའི་ཤེས་རབ་དང་དེང་དུས་ཀྱི་འཛམ་གླིང་བར་གྱི་ཟམ་པ་ལྟ་བུ་ཆགས་ཡོད། ༸གོང་ས་མཆོག་རྒྱ་གར་དུ་བཞུགས་ཡོད་པ་དེ་ནི་རྒྱ་གར་གྱི་གཞུང་མང་གཉིས་ཀའི་གཟི་བརྗིད་ཅིག་ལ་ངོས་འཛིན་བྱེད་ཀྱི་ཡོད། ཅེས་དང་། ༸གོང་ས་མཆོག་གིས་དུས་རྟག་ཏུ་རྒྱ་གར་གྱི་གནའ་བོའི་ཤེས་རབ་དང་དེང་དུས་ཀྱི་ཤེས་ཡོན་གཉིས་ཤན་སྦྱར་གྱིས་འཛམ་གླིང་ཞི་བདེ་བསྐྲུན་ཐུབ་པ་དགོངས་པ་དང་། རྒྱ་གར་གྱི་གནའ་བོའི་ཤེས་ཡོན་སླར་གསོའི་ཆེད་བཀའ་སློབ་ཡང་ཡང་སྩལ་བཞིན་ཡོད། ང་རང་དད་ལྡན་པ་ཞིག་ཡིན་པའི་ཆ་ནས་འཛམ་གླིང་ཡོངས་ཀྱི་ཚབ་ཞུས་ཏེ་༸མགོན་པོ་གང་ཉིད་མཆོག་གིས་ཐུགས་ཐག་གང་བཅད་ཡོད་པ་དེར་བརྩི་བཀུར་ཞུ་ཡི་ཡོད་ལ། ༸དགའ་ལྡན་ཕོ་བྲང་ནས་བཀའ་སློབ་ལམ་སྟོན་གང་གནང་བ་ལྟར་རྗེས་སུ་འཇུག་རྒྱུ་ཡིན། ཞེས་གསུངས་སོང་།
དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་རི་ཆར་ཌི་གྷར་མཆོག་གིས། ྋགོང་ས་རྒྱལ་བ་རིན་པོ་ཆེ་མཆོག་ནས་༧སྐུའི་འཁྲུངས་སྐར་དུས་ཆེན་ལ་དེ་ཙམ་དོ་སྣང་བྱེད་ཀྱི་མེད་པ་ང་ཚོས་ཤེས་གསལ་རེད། འོན་ཀྱང་ང་ཚོས་༧སྐུའི་འཁྲུངས་སྐར་ལ་དོ་སྣང་བྱེད་ཀྱི་ཡོད། ལྷག་པར་དུ་གོ་སྟོན་གྱི་༧སྐུའི་འཁྲུངས་སྐར་ལ་དོ་སྣང་ཆེན་པོ་བྱེད་ཀྱི་ཡོད། ྋགོང་ས་མཆོག་གི་ཐུགས་སུ་སྐད་ཅིག་མའི་དུས་ཚོད་ཡོད་ཚད་འཁྲུངས་སྐར་ཡིན་ལ། དབུགས་ལེན་ཐེངས་རེ་དང་སྙིང་གི་འཕར་ལྡིང་རེ་རེའི་སྐབས་སུ་འཁྲུངས་སྐར་ཡིན། ༧གོང་ས་མཆོག་ནས་སེམས་ཅན་ཐམས་ཅད་ཀྱི་དོན་དུ་བྱམས་བརྩེ་དང་སྙིང་རྗེ་སྒོམ་དགོས་པའི་བཀའ་སློབ་སྩལ་གྱི་ཡོད། ནུབ་ཕྱོགས་རྒྱལ་ཁབ་དང་ཡི་ཤུའི་ཆོས་ལུགས་ནང་འཚར་ལོངས་བྱུང་བའི་རང་ཉིད་ཀྱིས་༧གོང་ས་མཆོག་གི་བྱམས་བརྩེ་དང་ཤེས་རབ་ཟུང་དུ་འབྲེལ་བའི་བཀའ་སློབ་ལ་ཡི་རངས་བྱེད་བཞིན་ཡོད། ༧གོང་ས་མཆོག་ནི་བོད་ཙམ་མ་ཟད་འཛམ་གླིང་གི་དབུ་ཁྲིད་ཅིག་ཆགས་ཡོད། ཅེས་གསུངས་སོང་། དེ་བཞིན་ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་བཀྲ་ཤིས་རྒྱལ་མཚན་མཆོག་དང་འབྲས་ལྗོངས་མངའ་སྡེའི་ཆོས་རིག་བློན་ཆེན་བསོད་ནམས་བླ་མ་མཆོག ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་བཅས་ཀྱང་སྔ་གཞུག་ཏུ་༧མགོན་པོ་གང་ཉིད་ཀྱི་རླབས་ཆེན་གྱི་མཛད་འཕྲིན་ལ་བཀའ་དྲིན་རྗེས་དྲན་ཞུ་བཞིན་ཡོད་སྐོར་སོགས་གསུངས་སོང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
