བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་༧སྐུའི་གོ་སྟོན་དང་བསྟུན་༧གོང་ས་མཆོག་གི་མཛད་པ་དང་མ་འོངས་བའི་དགོངས་པ་བཞེས་སྟངས་འཛམ་གླིང་ནང་རྒྱ་ཁྱབ་ཏུ་འགྲོ་བའི་གོ་སྐབས་ཡག་ཤོས་ཤིག་ཆགས་ཡོད་སྐོར་གསུངས་སོང་།
ཁ་སང་ཕྱི་ཚེས་ ༡༤ ཉིན་ཨོ་གླིང་ཁུན་སི་ལེན་ཌི་བོད་རིགས་མཐུན་ཚོགས་ཀྱི་ཚོགས་ཁང་དུ། སྲིད་སྐྱོང་སྤེན་པ་ཚེ་རིང་མཆོག་གིས་ས་གནས་བོད་རིགས་མི་མང་ལ་གསུང་བཤད་གནང་ཡོད་ཅིང་། སྐབས་དེར་སྲིད་སྐྱོང་མཆོག་གིས། དྷ་རམ་ས་ལར་༧སྐུའི་གོ་སྟོན་གྱི་ལས་རེིམ་གྱི་གསར་འགོད་གསལ་བསྒྲགས་ཐོག ཕྱི་ཟླ་ ༧ ཚེས་ ༢ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་དྲ་ལམ་བརྒྱུད་བཀའ་སློབ་ཅིག་ཕེབས་རྒྱུ་ཡིན་པ་གསལ་བསྒྲགས་བྱས་ཡོད། གསལ་བསྒྲགས་དེ་བྱེད་དོན་ནི་ཕྱི་ལོ་ ༢༠༡༡ ལོའི་ཟླ་ ༩ པའི་ནང་༧སྐུའི་ཡང་སྲིད་དང་འབྲེལ་བའི་ཐོག་ཚིག་དེ་བོད་སྐད་ནང་༧རྗེ་དགེ་འདུན་གྲུབ་པའི་དགུང་ལོར་ཕེབས་པའི་སྐབས་དང་། དབྱིན་ཡིག་ནང་༧གོོང་ས་མཆོག་དགུང་ལོ་ ༩༠ ཕེབས་པའི་སྐབས་གྲོས་བསྡུར་བྱས་ཏེ་བཀའ་ཞིག་ཕེབས་ཀྱི་རེད་ཅེས་གསུངས་ཡོད། དེའི་ཐོག་ཏུ་འཛམ་གླིང་ནང་༧གོང་ས་མཆོག་དགུང་ལོ་ ༩༠ ཕེབས་སྐབས་བཀའ་ཅི་ཞིག་གནང་རྒྱུ་ཡིན་པར་དོ་སྣང་བྱེད་བཞིན་འདུག དེེའི་སྔོན་ལ་དབྱིན་ཡུལ་དང་འཇར་མན་དུ་ཕྱིན་ཏེ་༧གོང་ས་མཆོག་གི་ཡང་སྲིད་དང་བོད་ནང་གི་ཆོས་དད་རང་མོས་ཐོག་ཡུ་རོབ་ཀྱི་རྒྱལ་ཁབ་ཁག་གི་ནང་གཞུང་གི་སྲིད་ཇུས་ལངས་ཕྱོགས་ཤིག་གཏན་ལ་ཕབ་དགོས་ཞུས་ཡོད། ༧སྐུའི་འཁྲུངས་སྐར་གྱི་རྗེས་སུ་ཡུ་རོབ་རྒྱལ་ཁབ་བདུན་གྱིས་ཐུན་མོང་ཐོག་༧གོང་ས་མཆོག་གི་ཡང་སྲིད་དང་འབྲེལ་བའི་བསྒྲགས་གཏམ་ཞིག་སྤེལ་ཡོད་ལ། ༧སྐུའི་ཡང་སྲིད་ཀྱི་གསལ་བསྒྲགས་དང་བསྟུན་ནས་ཕྱི་དྲིལ་ལས་ཁུངས་སུ་གསར་འགོད་པ་ ༢༠༠ ལྷག་གིས་ཐོ་བརྒྱབ་འདུག ༧གོང་ས་མཆོག་གི་ནོ་སྦེལ་ཞི་བདེའི་གཟེངས་རྟགས་བཞེས་པའི་སྐབས་སུ་འཛམ་གླིང་ནང་ཧ་ཅང་དོ་སྣང་ཆེན་པོ་བྱུང་ཡོད། དེའི་རྗེས་སུ་ད་ལན་གྱི་གསར་འགོད་གསལ་བསྒྲགས་ལ་གསར་འགོད་པ་མང་པོ་བསླེབས་འདུག ང་ཚོའི་དམིགས་ཡུལ་གཙོ་བོ་གསར་ལམ་འདི་དག་བརྒྱུད་ནས་༧གོང་ས་མཆོག་དགུང་ལོ་ ༩༠ ཕེབས་པ་དང་བསྟུན། ༧གོང་ས་མཆོག་གི་མཛད་པ་བསྐྱངས་པ་དང་། མ་འོངས་བའི་དགོངས་པ་བཞེས་སྟངས་འཛམ་གླིང་ནང་རྒྱ་ཁྱབ་ཏུ་འགྲོ་བའི་གོ་སྐབས་ཡག་ཤོས་ཤིག་ཆགས་ཡོད། ཅེས་གསུངས་སོང་།
ཡང་སྲིད་སྐྱོང་མཆོག་གིས། བོད་མིའི་སྒྲིག་འཛུགས་ཀྱིས་བསམ་བློ་གཏོང་ཕྱོགས་ནི་༧རྒྱལ་དབང་སྐུ་ཕྲེང་བཅུ་བཞི་བ་ཞལ་བཞུགས་པའི་སྐབས་སུ་རྒྱ་ནག་གཞུང་གིས་༧སྐུའི་ཡང་སྲིད་དང་འབྲེལ་བའི་གནད་དོན་ལ་གང་ཡང་བྱེད་ཐུབ་ཀྱི་མེད་པའི་ངོས་འཛིན་གྱི་ཐོག་ནས། ཕྱི་ལོ་ ༡༩༦༩ ལོ་ནས་བཟུང་༧གོང་ས་༧རྒྱལ་བ་རིན་པོ་ཆེ་མཆོག་ནས་མ་འོངས་བར་༧རྒྱལ་དབང་སྐུ་ཕྲེང་བཅོ་ལྔ་བ་ཕེབས་དགོས་མིན་བོད་མི་རྣམས་ཀྱིས་ཐག་གཅོད་གནང་གི་ཡིན་པ་བཀའ་ཕེབས་ཡོད་པ་ལྟར། ད་ལྟ་བར་དུ་འགྱུར་བ་གང་ཡང་མེད་པར་མུ་མཐུད་དེ་ཉེ་ཆར་གནང་བའི་བཀའ་སློབ་ནང་དུ་གསལ་བསྡད་ཡོད། ཕྱི་ལོ་ ༢༠༡༡ ལོར་༧གོང་ས་མཆོག་གིས་བཀའ་སློབ་གནང་བའི་རྗེས་སུ་ཆོས་ཚོགས་ཚོགས་ཆེན་ཁག་གི་ནང་༧སྐུའི་ཡང་སྲིད་ཀྱི་གྲོས་ཆོད་ཐོག་བསྟན་བདག་བླ་ཆེན་རྣམ་པ་དང་དགོན་སྡེ་ཁག་གི་སྐུ་ཚབ་ཚང་མ་ཕེབས་ཡོད། ༧རྒྱལ་བའི་ཡང་སྲིད་ཐད་ཀར་འབྲེལ་བ་ཡོད་པ་བོད་མི་མང་ཆགས་ཡོད། བོད་ནང་ཡོད་པའི་བོད་མི་རྣམས་ལ་རང་དབང་ཐོག་སྐད་ཆ་བཤད་པའི་གོ་སྐབས་མེད། བཙན་བྱོལ་ནང་ཡོད་པའི་བོད་མིའི་སྤྱི་ཚོགས་ཀྱི་འདོད་པ་གང་ཡོད་པ་དེ་རེད། ད་ལྟ་བར་དུ་༧གོང་ས་རྒྱལ་བ་རིན་པོ་ཆེ་མཆོག་གིས་དགའ་ལྡན་ཕོ་བྲང་གི་སྒྲིག་འཛུགས་མུ་མཐུད་གནས་རྒྱུར་ཞལ་བཞེས་གནང་ཡོད་པ་མ་རེད། ཟླ་འདིའི་ཕྱི་ཚེས་ ༢ ཉིན་གཞི་ནས་དགའ་ལྡན་ཕོ་བྲང་མུ་མཐུད་དུ་གནས་རྒྱུ་ཡིན་པ་ཞལ་བཞེས་གནང་འདུག དེ་དང་མཉམ་དུ་༧སྐུའི་ཡང་སྲིད་ཕེབས་དགོས་པ་དོན་དག་གཉིས་ཀྱི་ཐོག་བོད་མིའི་སྤྱི་ཚོགས་ནང་མཐོ་དམན་བར་གསུམ་གྱིས་བསམ་ཚུལ་སྤུངས་ཏེ་ཕྱོགས་སྒྲིག་བྱས་ཡོད། དེ་ལས་རྒྱ་ཆེ་བ་རྒྱ་གར་དང་།བལ་ཡུལ།འབྲུག་བཅས་ཀྱི་ཧི་མ་ལ་ཡ་དང་། སོག་པོའི་རྒྱུད་ཀྱི་བོད་བརྒྱུད་ནང་བསྟན། རྒྱ་གར་གྱི་ནང་པ། ཉི་ཧོང་གི་ནང་པ་སོགས་ཀྱིས་གྲོས་ཆོད་ཕྱོགས་སྒྲིག་བྱས་ཡོད། དེའི་ཐོག་ཡུ་རོབ་ཀྱིི་རྒྱལ་ཁབ་ཁག་གི་ལེགས་སྦྱར་དང་པ་ལི་ནང་བསྟན་མཐུན་ཚོགས་ཀྱིས་༧གོང་ས་མཆོག་གི་ཡང་སྲིད་དང་འབྲེལ་བའི་བསྒྲགས་གཏམ་སྤེལ་ཡོད་ལ། དེ་བཞིན་ཡུ་རོབ་གྱི་རྒྱལ་ཁབ་བདུན་གྱིས་༧སྐུའི་ཡང་སྲིད་དང་འབྲེལ་བའི་ཐོག་བསྒྲགས་གཏམ་སྤེལ་ཡོད། ཅེས་དང་། མ་འོངས་བར་ཨོ་གླིང་གཞུང་གི་ངོས་ནས་དེ་འདྲའི་ལངས་ཕྱོགས་གསལ་བོ་ཞིག་སྐོར་གསུངས་སོང་།
ཟླ་འདིའི་ཕྱི་ཚེས་ ༩ ནས་ ༡༨ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་རྒྱལ་ས་ལྡི་ལི་དང་། ཨོ་གླིང་གི་སིཌ་ཎི།(Sydney) ནཱོ་ར།(Nowra) སིན་ཌི་རལ་ཁོ་སི་ཌི།(Central Coast) གནས་མཁར་གསར།(Newcastle) བྷི་རས་བྷེན(།Brisbane) ཁན་བྷི་ར།(Canberra) མེལ་བྷོན་(Melbourne)བཅས་སུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར་། ཟླ་འདིའི་ཕྱི་ཚེས་ ༡༣ ཉིན་ཨོ་གླིང་ནེའུ་སོ་ཐི་ཝལ་ (New Southwales) མངའ་སྡེའི་གནས་མཁར་གསར་ས་གནས་བོད་མི་རྣམས་ལ་གསུང་བཤད་གནང་། དེ་བཞིན་ཕྱི་ཚེས་ ༡༢ ཉིན་ཨོ་གླིང་དང་བླངས་བོད་དོན་ཞུ་གཏུགས་པ་དང་སིཌ་ཎི་རིག་གནས་སྐྱེད་ཚལ་ཁང་གི་སློབ་མ་ཐུག་འཕྲད་གནང་། སོ་ཐི་ཁོ་སི་ཌི་(South Coast)ས་གནས་བོད་རིགས་མི་མང་བཅས་ལ་གསུང་བཤད་གནང་ཡོད་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
