རྒྱལ་སྤྱིའི་གྷུ་གྷལ་ཚོང་གཉེར་ཁང་གིས་དྲ་ལམ་ནས་གནས་ཚུལ་རྫུན་མ་ཁྱབ་སྤེལ་དང་འཁྱོག་བརྗོད་བྱེད་མཁན་གྱི་རྒྱ་ནག་གཞུང་དང་ཨུ་རུ་སུ་ལ་འབྲེལ་བ་ཡོད་པའི་ཡུ་ཊུབ་ཀྱི་ཁ་བྱང་ ༡༡༠༠༠ ལྷག་ནག་གསུབ་བཏང་ཡོད་འདུག
Vladimir Putin, left, and Xi Jinping in 2019.Source: Pool/Getty Images
རྒྱ་ནག་སྐར་ལྔའི་དྲ་དམག་སོགས་ཀྱིས་རྒྱལ་སྤྱིའི་སྤྱི་ཚོགས་སུ་རྒྱ་ནག་དམར་ཤོག་གཞུང་གི་དྲིལ་བསྒྲགས་སྤེལ་ཐབས་དང་། རྒྱ་ནག་དམར་ཤོག་གཞུང་ལ་ཁ་གཏད་དུ་ལང་མཁན་རྣམས་ལ་དྲ་ལམ་ནས་རུབ་རྡུང་བྱེད་ཀྱི་ཡོད་སྟབས། ཟླ་འདིའི་ཕྱི་ཚེས་ ༢༡ ཉིན་རྒྱལ་སྤྱིའི་གྷུ་གྷལ་ཚོང་གཉེར་ཁང་གིས་འདས་པའི་ཟླ་བ་གསུམ་ལྷག་གི་རིང་། རྒྱ་ནག་དམར་ཤོག་གཞུང་གི་དྲིལ་བསྒྲགས་ཁྱབ་སྤེལ་གཏོང་མཁན་དང་ཨུ་རུ་སུ་དང་འབྲེལ་འདྲིས་ཡོད་པའི་ཡུ་ཊུབ་ཀྱི་ཁ་བྱང་ ༡༡༠༠༠ ལྷག་ནག་གསུབ་བཏང་སྟེ། རྒྱ་ནག་དང་ཨུ་རུ་སུས་དྲ་ལམ་ནས་སྤྱི་ཚོགས་ཀྱི་བདེ་འཇགས་ལ་གནོད་འཚེ་གཏོང་བའི་བྱ་སྤྱོད་ཐེར་འདོན་གནང་འདུག
གྷུ་གྷལ་ཚོང་གཉེར་ཁང་གིས་དེ་འབྲེལ་གསལ་བསྒྲགས་ལྟར་ན། གྷུ་གྷལ་ཚོང་གཉེར་ཁང་གིས་ནག་གསུབ་བཏང་བའི་ཁ་བྱང་གི་ཁྲོད། ཡུ་ཊུབ་བཀོལ་སྤྱོད་མཁན་མི་གྲངས་ ༧༧༠༠༠ ལྷག་རྒྱ་ནག་དམར་ཤོག་གཞུང་ལ་འབྲེལ་འདྲིས་ཆེན་པོ་ཡོད་ཅིང་། དྲ་ལམ་སོགས་སུ་དབྱིན་ཡིག་དང་རྒྱ་ཡིག་གཉིས་ཀའི་ནང་རྒྱ་ནག་དམར་ཤོག་གཞུང་གི་དྲིལ་བསྒྲགས་རིགས་བརྒྱུད་སྐུར་དང་ཁྱབ་སྤེལ་བྱས་ཡོད་པ་མ་ཟད། རྒྱ་ནག་གི་མགོ་ཁྲིད་ཞི་ཅིན་ཕིན་ལ་བསྟོད་བསྔགས་ཀྱི་ཞབས་མཆན་བྲིས་པ་དང་། ཨ་རིའི་ཕྱི་སྲིད་བློན་ཆེན་ལས་ཁུངས་ཀྱི་ལས་དོན་སོགས་ལ་སྐྱོན་བརྗོད་དང་ནག་ཉེས་འཛུགས་ཀྱི་ཡོད་པ་མ་ཟད། ཡུ་ཊུབ་བཀོལ་སྤྱོད་མཁན་མི་གྲངས་ ༢༠༠༠ ལྷག་གིས་སྐད་ཡིག་སྣ་མང་ཐོག་ནས་ཨུ་རུ་སུར་རྒྱབ་སྐྱོར་ཡོད་ལུགས་ཀྱི་བརྗོད་བྱ་གཙོ་བོར་བྱས་པའི་བརྙན་ཐུང་རིགས་ཕབ་སྐྲུན་དང་བརྒྱུད་སྐུར་བྱས་ཡོད་པ་མ་ཟད། ཡུ་ཁེ་རིན་དང་། འཛམ་གླིང་ནུབ་ཆིངས་དམག་དོན་སྒྲིག་འཛུགས། དེ་བཞིན་ཨ་རི་གཙོས་ནུབ་ཕྱོགས་རྒྱལ་ཁབ་ཁག་ལ་སྐྱོན་བརྗོད་དང་ཟུར་ཟ་བྱེད་ཀྱི་ཡོད་འདུག
དེ་བཞིན་གྷུ་གལ་ཚོང་གཉེར་ཁང་གིས་རྒྱལ་ཁབ་དང་མི་རིགས། ཆོས་ལུགས་སོ་སོ་གཙིགས་སུ་བཟུང་སྟེ། དྲ་ལམ་སོགས་སུ་མི་རིགས་དང་ཆོས་ལུགས་སོགས་ཀྱི་ཐད་ནས་འགྲེལ་བཤད་ལོག་པ་རྒྱག་མཁན་གྱི་མི་གྲངས་༤༥༧ ལྷག་ནག་གསུབ་བཏང་བའི་ཁྲོད། ཕལ་ཆེ་བ་ནི་ཨི་རན་དང་། ཊུར་ཀི ཨི་ཛི་རལ། གྷ་ན་སོགས་ལ་འབྲེལ་བ་ཡོད་ཅིང་། དེ་དག་ཕལ་མོ་ཆེས་མི་རིགས་དང་ཆོས་ལུགས་ཁ་ལ་འཁྱེར་ནས་སྤྱི་ཚོགས་ཀྱི་བརྟན་བརླིང་ལ་གནོད་འཚེ་གཏོང་གིན་ཡོད་པ་གསལ་འདོན་གནང་འདུག་ལ། ཟླ་འདིའི་ཕྱི་ཚེས་ ༡༤ ཉིན་རྒྱལ་སྤྱིའི་མེལ་ཊ་(Melta) ཚོང་གཉེར་ཁང་གིས་ཀྱང་གནས་ཚུལ་རྫུན་མ་ཁྱབ་སྤེལ་བྱས་པ་སོགས་ཀྱི་དབང་གིས། འདི་ལོའི་ལོ་ཕྱེད་རིང་ངོ་དེབ་ཀྱི་ཁ་བྱང་ས་ཡ་ ༡༠ ལྷག་ནག་གསུབ་བཏང་སྟེ། དྲ་ལམ་བདེ་འཇགས་དང་མི་སྒེར་གྱི་ཁེ་ཕན་སྲུང་སྐྱོབ་བྱེད་ཐབས་ལས་དོན་ལ་གཞོལ་འདུག
ཕྱི་ལོ་ ༢༠༢༢ ཟླ་ ༢ པའི་ནང་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མགོ་བཙུགས་པ་ནས་བཟུང་། ཡུ་ཊུབ་ཀྱིས་ཨུ་རུ་སུའི་བརྙན་འཕྲིན་ཁང་ (Russia 24) དང་། ཨེན་ཊི་ཝི་ (NTV) སོགས་བཀག་སྡོམ་བྱས་པ་མ་ཟད། རིམ་པས་ཨུ་རུ་སུའི་གཞུང་འབྲེལ་གསར་འགྱུར་བརྒྱུད་ལམ་དང་བརྙན་འཕྲིན་ཁང་མང་པོ་ཞིག་བཀག་སྡོམ་བྱས་པར་བརྟེན། ཕྱི་ལོ་ ༢༠༢༢ ལོའི་ཟླ་ ༢ པའི་ནང་ཨུ་རུ་སུའི་སྤྱི་མཐུན་ཞབས་ཕྱི་ཁང་(Federal Antimonopoly Service) གིས། གྷུ་གྷལ་ཚོང་ལས་ཁང་གིས་དབང་ཆ་བཀོལ་སྤྱོད་བྱས་ཏེ། འགྲན་རྩོད་ཀྱི་ཁེ་དབང་སྲུང་སྐྱོབ་ཀྱིས་ཁྲིམས་ལུགས་ལ་རྡོག་རོལ་བཏང་བའི་སྐྱོན་བརྗོད་བྱས་ཡོད་པ་དང་སྦྲགས། གྷུ་གྷལ་ཚོང་ལས་ཁང་ལ་ཐོག་མར་ཨུ་སྒོར་ཐེར་འབུམ་ ༢ དང་ཕྱིས་སུ་ཉེས་ཆད་དུས་ཐོག་ཏུ་སྤྲད་མེད་པའི་རྐྱེན་གྱིས་ཨུ་སྒོར་ཐེར་འབུམ་ ༤ བར་སྤར་བ་ཡོད་པ་མ་ཟད། ཕྱིས་སུ་དངུལ་ཆད་དེ་ལས་མང་བ་དགོས་ལུགས་བཤད་ཡོད་འདུག
དེ་བཞིན་ཕྱི་ལོ་ ༢༠༢༣ ལོའི་ལོ་མཇུག་ཏུ་རྒྱལ་སྤྱིའི་མེལ་ཊ་ཚོང་གཉེར་ཁང་གིས་རྒྱ་ནག་ནས་བཀོལ་སྤྱོད་བྱེད་མཁན་གྱི་ངོ་དེབ་ཁ་བྱང་ ༤༧༠༠ ལྷག་གིས་ཨ་རིའི་མི་སེར་ཡིན་ཁུལ་གྱིས། ཨ་རིའི་ཆབ་སྲིད་ཀྱི་གནད་དོན་དང་། འདས་ལོའི་ཨ་རིའི་སྲིད་འཛིན་གྱི་འོས་བསྡུ། ཨ་རྒྱའི་འབྲེལ་ལམ་སོགས་ཀྱི་སྐོར་ལ་འཁྱོག་བརྗོད་དང་ལོག་འགྲེལ་བྱེད་བཞིན་ཡོད་སྟབས། ཁ་བྱང་དེ་དག་ནག་གསུབ་བཏང་ཡོད་ཅིང་། འདས་པའི་ལོ་ཤས་རིང་ངོ་ཐག་མ་ཆོད་པའི་ཁ་བྱང་དེ་དག་གིས་འཛམ་གླིང་ཁྱོན་ཡོངས་ཀྱི་ཆབ་སྲིད་ཀྱི་འགྱུར་འགྲོས་དང་ཁེ་ཕན་སོགས་ལ་དམིགས་ནས་གནས་ཚུལ་མང་པོ་ཞིག་རྫུན་སྤེལ་བྱས་ཏེ། ངོ་དེབ། ཊི་ཝེ་ཊར། ཡུ་ཊུབ་ (YouTube)། ཊིག་ཊོག་སོགས་སུ་སྤེལ་ཡོད་པ་མ་ཟད། གཞུང་སྒེར་མང་པོ་ཞིག་གི་སྤྱི་ཚོགས་དྲ་ལམ་ཁག་ཚུད་པའི་དྲ་རྒྱ་མང་པོ་ཞིག་ལ་འཇབ་རྒོལ་བྱས་པའི་གནས་ཚུལ་ཐོན་ཡོད་ཅིང་། ཕྱི་ལོ་ ༢༠༡༦ ཙམ་ནས་ངོ་དེབ་ལས་ཁུངས་ཀྱིས་རྒྱ་ནག་གཞུང་གི་དྲ་ལམ་འཇབ་རྒོལ་བའམ་སྐར་ལྔའི་དྲ་དམག་གི་ཁ་བྱང་རྣམས་སྒོ་བརྒྱབ་ཡོད་ཀྱང་། ཉེ་བའི་ལོ་ཤས་ནང་རྒྱ་ནག་གིས་ངོ་དེབ་དང་། ཨིན་སི་ཊི་ར་གྷི་རམ་ཚུད་པའི་རྒྱ་ནག་ནང་བཀག་སྡོམ་བྱས་པའི་སྤྱི་ཚོགས་དྲ་ལམ་ཁག་བེད་སྤྱོད་བྱེད་མཁན་ཇེ་མང་དུ་ཕྱིན་པ་དང་། དེ་དག་གིས་རྒྱ་ནག་དམར་ཤོག་སྲིད་གཞུང་གི་ལྟ་བ་དང་ལངས་ཕྱོགས་སོགས་དྲ་ལམ་དུ་སྤེལ་གྱི་ཡོད་པའི་གནས་ཚུལ་འཐོན་མུས་ཡིན་པ་རེད།
ཕྱི་ལོ་ ༢༠༢༥ ཟླ་ ༣ ནང་མེལ་ཊ་སྤྱི་ཚོགས་དྲ་ལམ་ཚོང་གཉེར་ཁང་གིས་ཕྱི་ལོ་ ༢༠༢༤ ལོའི་དྲ་ལམ་འཇབ་རྒོལ་དང་དང་འབྲེལ་བའི་ཤོག་ངོས་བཅུ་བཞི་ཅན་གྱི་སྙན་ཐོ་ཞིག་བཏོན་པའི་ནང་། རྒྱ་ནག་གཞུང་དང་རྒྱ་ནག་གཞུང་གིས་ཆེད་དུ་དྲ་ལམ་དུ་མངགས་པའི་སྐར་ལྔའི་དྲ་དམག་སོགས་ཀྱིས་ངོ་དེབ་ཁ་བྱང་རྫུན་མ་བཟོས་ཏེ། ༧གོང་ས་རྒྱལ་བ་རིན་པོ་ཆེ་མཆོག་དང་འབྲེལ་བའི་གནས་ཚུལ་རྫུན་བཟོ་དང་འཁྱོག་བརྗོད། དེ་བཞིན་བཙན་བྱོལ་བོད་མིའི་སྤྱི་ཚོགས་སོགས་དམིགས་འབེན་གཙོ་བོར་བཟུང་ནས་དཀྲོག་གཏམ་དང་རྫུན་གཏམ་ཡང་ཡང་སྤེལ་གྱིན་ཡོད་པའི་གནད་དོན་ཐེར་འདོན་གནང་ཡོད་ལ། རྒྱ་ནག་ནས་བཀོལ་སྤྱོད་བྱས་པའི་ཁ་བྱང་དེ་དག་གིས་རྒྱ་བལ་འབྲུག་གསུམ་དུ་གཞིས་ཆགས་པའི་བཙན་བྱོལ་བོད་མི་གཙོས་འཛམ་གླིང་ས་ཕྱོགས་གང་སར་ཡོད་པའི་བོད་མི་རྣམས་དམིགས་འབེན་དུ་བཟུང་ནས་གནས་ཚུལ་འཁྱོག་བརྗོད་དང་རྫུན་གཏམ་སྤེལ་གྱིན་ཡོད་པ་མ་ཟད། རྒྱུན་དུ་བོད་ཡིག་དང་དབྱིན་ཡིག་འབྲི་མཁན་ཁག་ཅིག་གིས་ཆེད་དུ་༧གོང་ས་རྒྱལ་བ་རིན་པོ་ཆེ་མཆོག་ལ་མཚན་དམོད་དང་། ༧མགོན་པོ་གང་གི་སྐུ་གཟུགས་ཀྱི་གནས་བབ། གཞུང་འབྲེལ་ཆིབས་བསྒྱུར་སོགས་དང་འབྲེལ་བའི་ཐད་ལ་ཁུངས་ལུང་མེད་པའི་གནས་ཚུལ་རྫུན་མ་སྤེལ་གྱིན་ཡོད་པ་ཤེས་རྟོགས་བྱུང་ཡོད་པ་རེད།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
