རྒྱ་ནག་གི་བཙན་འོག་ཏུ་ཡོད་པའི་རྒྱལ་ཁབ་ཁག་གི་གནད་དོན་ཐད་ཉན་ཞིབ་གནང་།

རྒྱ་ནག་གི་བཙན་འོག་ཏུ་གདུག་རྩུབ་མྱོང་བཞིན་པའི་ཤར་ཊུར་ཀི་སི་ཐན་དང་ལྷོ་སོག བོད་མིའི་སྐུ་ཚབ་སོགས་མཉམ་ཞུགས་གནང་སྟེ། ཕྱི་ལོ་ ༢༠༢༥ ལོའི་བཙན་འོག་རྒྱལ་ཁབ་ཀྱི་བདུན་ཕྲག་ཅེས་པ་སྲུང་གཙི་ཞུས་ཏེ་ཉན་ཞིབ་གནང་འདུག

ལོ་འཆར་ཅན་དུ་ཕྱི་ཟླ་ ༧ པའི་ནང་ཨ་རིར་བཙན་འོག་རྒྱལ་ཁབ་ཀྱི་བདུན་ཕྲག་ཅེས་པ་སྲུང་གཙི་ཞུ་ཡི་ཡོད་པ་ལྟར། ཟླ་འདིའི་ཕྱི་ཚེས་ ༢༡ ནས་བཟུང་བདུན་ཕྲག་གཅིག་རིང་ཨ་རིའི་རྒྱལ་ས་ཝ་ཤིང་ཊོན་ཌི་སི་ (Washington DC) རུ་ཡོད་པའི་རཱེ་བྷར་ནི་ (Rayburn) གྲོས་ཚོགས་ཚོགས་ཁང་དུ། ༢༠༢༥ ལོའི་བཙན་འོག་རྒྱལ་ཁབ་ཀྱི་བདུན་ཕྲག་ཅེས་པ་ (Captive Nations Week 2025) སྲུང་གཙི་ཞུས་ཡོད་ཅིང་། སྐབས་དེར་བཙན་འོག་ཏུ་ཡོད་པའི་ཤར་ཊུར་ཀི་སི་ཐན་དང་། བོད། ལྷོ་སོག་བཅས་ཀྱི་སྐུ་ཚབ། དེ་བཞིན་ཨ་རིའི་རྒྱལ་ཡོངས་བདེ་འཇགས་ཆེད་མཁས་པ་དང་། གྲོས་ཚོགས་ལས་བྱེད་རྣམས་ལྷན་འཛོམས་གནང་སྟེ། རྒྱལ་ཁབ་དེ་དག་གིས་མུ་མཐུད་དུ་དྲག་གནོན་དང་། བཙན་འཛུལ། མི་རིགས་རྩ་མེད་གཏོང་བའི་གདུག་རྩུབ་མྱོང་བཞིན་པར་གདོང་ལེན་གནང་ཕྱོགས་ཐད་ཉན་ཞིབ་ཀྱི་ལས་རིམ་ཞིག་འཚོགས་འདུག

དེ་འབྲེལ་ཤར་ཊུར་ཀི་སི་ཐན་དང་། བོད། ལྷོ་སོག བཙན་འོག་ཏུ་ཚུད་པའི་རྒྱལ་ཁབ་གཞན་གྱི་སྐུ་ཚབ་རྣམས་ཀྱིས་མཉམ་འབྲེལ་གྱིས་ཡོངས་ཁྱབ་གསལ་བསྒྲགས་ཤིག་སྤེལ་བའི་ནང་། བཙོན་འོག་ཏུ་བཅུག་པའི་རྒྱལ་ཁབ་ཁག་གི་མི་མང་རྣམས་ལ་རང་དབང་སླར་གསོ་དགོས་པ་དང་། རང་དབང་གཙང་མའི་རྒྱལ་ཁབ་ཀྱི་བདག་དབང་ལོངས་སུ་སྤྱོད་པའི་ཐོབ་ཐང་ཆ་ཚང་ངེས་པར་དུ་དགོས་པ་ལས་གྲོས་མོལ་དང་འགྲིག་འཇགས་ཡོང་ཐབས་མེད། བཙན་འོག་ཏུ་ཡོད་པའི་རྒྱལ་ཁབ་ཁག་ལ་རང་བཙན་སླར་གསོ་དང་། རང་དབང་གཙང་མ། དེ་བཞིན་དྲང་བདེན་གྱི་ཐག་གཅོད་མ་ཐོབ་བར་དུ་ལས་དོན་མཚམས་འཇོག་བྱ་རྒྱུ་མིན། ཞེས་གསལ་འདུག

ཉན་ཞིབ་དེའི་ཐོག་བོད་དོན་འཐབ་རྩོད་པ་བསྟན་འཛིན་དབང་འདུས་ལགས་ཀྱིས། བོད་ཀྱི་ཐུན་མོང་མ་ཡིན་པའི་ངོ་བོ་གཙོར་བཟུང་གིས་བོད་ནི་ཁྲིམས་ཐོག་ནས་རྒྱ་ནག་གི་ཆ་ཤས་ཤིག་མིན་ལ། ལོ་ངོ་སྟོང་ཕྲག་ལྷག་རིང་རང་གི་གཞུང་དང་། རིག་གཞུང་། ཐུན་མོང་མ་ཡིན་པའི་ངོ་བོ་ཞིག་ཡོད། ཕྱི་ལོ་ ༡༩༥༡ ལོར་རྒྱ་ནག་གི་བཙན་འཛུལ་དེ་བཅིངས་གྲོལ་མིན་པར་བཙན་འཛུལ་བྱས་པ་རེད། ཅེས་དང་། སྐད་ཆ་སྟོང་པ་བཤད་པའི་དུས་ཚོད་རྫོགས་ཟིན་ལ། ད་ལྟའི་ཆར་དོན་དངོས་སུ་ལག་བསྟར་བྱ་དགོས། རང་བཙན་ཁོ་ནས་བོད་མི་རྣམས་ཀྱི་འཚོ་གནས་འགན་ལེན་བྱེད་ཐུབ་ཀྱི་ཡོད་པ་ནན་བརྗོད་གནང་ཡོད་འདུག

ཉན་ཞིབ་ཐོག་ཤར་ཊུར་ཀི་སི་ཐན་གྱི་བཙན་བྱོལ་གཞུང་གི་ཕྱི་འབྲེལ་དང་བདེ་འཇགས་བློན་ཆེན་ས་ལཱི་ཧུ་དྷ་ཡར་ (Salih Hudayar) ལགས་ཀྱིས། ཕྱི་ལོ་ ༡༩༥༩ ལོར་བཙན་འོག་ཏུ་ཚུད་པའི་རྒྱལ་ཁབ་ཀྱི་གྲོས་ཆོད་ནང་ཤར་ཊུར་ཀི་སི་ཐན་གྱི་མིང་གསལ་པོར་འཁོད་ཡོད་ལ། དེ་ནི་རྒྱ་ནག་གི་ཆ་ཤས་མིན་པར་བཙན་རྒྱལ་རིང་ལུགས་ཀྱིས་བཙན་འཛུལ་བྱས་པའི་རྒྱལ་ཁབ་ཅིག་ཏུ་ངོས་འཛིན་བྱས་ཡོད། ཅེས་དང་། ཡུལ་དེའི་མང་ཚོགས་ས་ཡ་མང་པོ་ངལ་རྩོལ་བྱེད་དུ་བཅུག་པ་དང་། བཙོན་འཇུག་བྱས་ཏེ་སྡུག་སྦྱོང་མནར་གཅོད་ཚད་མེད་གཏོང་བའི་ཐོག ལོ་ལྟར་ཡུ་གུར་བ་དང་ཊུར་ཀིའི་གཞོན་སྐྱེས་ ༢༥,༠༠༠ ནས་ ༥༠,༠༠༠ བར་བསད་པ་དང་། ཁོང་ཚོའི་དབང་པོ་ཚོང་འགྲེམས་བྱེད་མུས་ཡིན་པ་རེད། ཅེས་དང་། ཤར་ཊུར་ཀི་སི་ཐན་ནི་བཙན་འཛུལ་བྱས་པའི་རྒྱལ་ཁབ་ཅིག་ལ་ངོས་འཛིན་དགོས་པ་དང་། རང་བཙན་འཐབ་རྩོད་དང་འབྲེལ་བའི་ཉན་ཞིབ་བྱ་དགོས་སྐོར་དང་། རྒྱ་ནག་གིས་ཡུལ་དེའི་ནང་སྲིད་གནད་དོན་ལ་ཐེ་ཇུས་བྱེད་མུས་ཡིན་པར་ཞིབ་འཇུག་དགོས་ལ། རྒྱ་ནག་གིས་ཡུལ་དེར་སིམ་འཛུལ་དང་རྒྱལ་མཚམས་ལས་བརྒལ་བའི་དྲག་གནོན་བྱེད་མཚམས་འཇོག་དགོས་པའི་འབོད་སྐུལ་གནང་འདུག

དེ་བཞིན་ཉན་ཞིབ་ཐོག་ཀོ་རི་ཡ་དང་ཨ་རིའི་གསར་འགོད་པ་ཀིམ་སེ་ཧུན་ (Se Hoon Kim) ལགས་ཀྱིས། རིམ་པས་སོག་པོའི་ངོ་བོ་དང་རིག་གཞུང་ཉམས་རྒུད་དུ་འགྲོ་མུས་ཡིན་པའི་ཐད་སེམས་འཚབ་བསྟན་པ་དང་། ད་ལྟའི་ཆར་ཡུལ་དེའི་ནང་དྲག་གནོན་བྱུང་བ་ཙམ་མིན་པར། སྐད་ཡིག་དང་རིག་གཞུང་། ངོ་བོ། འཚོ་གནས། ཤུལ་བཞག་བཅས་ཤུལ་མེད་བཟོ་ཐབས་བྱས་པར་སྐྱོན་བརྗོད་གནང་འདུག་ལ། ཨ་རིའི་གཞུང་གིས་ལྷོ་སོག་དང་གཞན་བཙན་གནོན་འོག་ཏུ་ཚུད་པའི་མི་རིགས་རྣམས་ཀྱི་དཀའ་སྡུག་ལ་གདོང་ལེན་དང་། དེ་འབྲེལ་ཐག་གཅོད་དགོས་པའི་འབོད་སྐུལ་ཞུས་འདུག

གཞན་ཡང་། གཏམ་བཤད་པ་དེ་སྔོན་པེ་ཅིན་དུ་ཨ་རིའི་དམག་སྤྱི་ཟུར་པ་གནང་མྱོང་མཁན་བྷེན་ (Ben Lowsen) ལགས་ཀྱིས། རྒྱ་ནག་དམར་ཤོག་སྲིད་གཞུང་གིས་འཇིགས་སྐུལ་དེ་རྒྱ་ནག་ཙམ་མིན་པར་འཛམ་གླིང་ཡོངས་ལ་ཤུགས་རྐྱེན་ཐེབས་ཀྱི་ཡོད་པ་གསལ་སྟོན་དང་། ཨ་རིས་ཆབ་སྲིད་དམག་འཁྲུག་ལ་རྒྱབ་སྐྱོར་བྱེད་པའི་ཐོག ཤར་ཊུར་ཀི་སི་ཐན་གྱི་ཕྱི་འབྲེལ་ལས་ཁུངས་བཙུགས་ཏེ་གུང་ཁྲན་ཏང་ལ་གདོང་ལེན་བྱེད་དགོས་པའི་འབོད་སྐུལ་ཞུས་འདུག

ཕྱི་ལོ་ ༡༩༥༩ ལོར་གཏན་འབེབས་བྱས་པའི་བཙན་འོག་ཏུ་ཚུད་པའི་རྒྱལ་ཁབ་ཀྱི་གྲོས་ཆོད་དེས་དམར་ཤོག་རྒྱལ་ཁབ་ཀྱི་དབང་འོག་ཏུ་ཚུད་པའི་རྒྱལ་ཁབ་ཁག་ངོས་འཛིན་བྱས་ཏེ། ཨ་རིའི་གཞུང་གི་ངོས་ནས་རྒྱལ་ཁབ་དེའི་རང་དབང་དང་རང་བཙན་སླར་གསོ་བྱེད་པར་རྒྱབ་སྐྱོར་དགོས་པའི་འབོད་སྐུལ་ཞུ་ཡི་ཡོད་པ་རེད། དེ་བཞིན་བོད་དང་ཊུར་ཀི་སི་ཐན་སོགས་བཙན་འོག་ཏུ་ཚུད་པའི་རྒྱལ་ཁབ་ཁག་ལ་རང་ཐག་རང་གཅོད་ཀྱི་ཐོབ་ཐང་དགོས་པའི་འབོད་སྐུལ་ཞུ་ཡི་ཡོད་འདུག ད་དུང་བཙན་འོག་རྒྱལ་ཁབ་ཀྱི་བདུན་ཕྲག་ཅེས་པ་སྲུང་གཙི་ཞུ་བ་བརྒྱུད། བཙན་འོག་ཏུ་ཡོད་པའི་འཛམ་གླིང་རྒྱལ་ཁབ་ཁག་གི་མི་རིགས་དེ་དག་ལ་མུ་མཐུད་དུ་དྲག་གནོན་བྱས་དང་བྱེད་མུས་ཡིན་པར་འགོག་རྒོལ་དང་། རང་དབང་དང་རང་བཙན་ཐོབ་ཐབས་ཀྱི་འཐབ་རྩོད་ལ་རྒྱབ་སྐྱོར་གནང་དགོས་པར་དམིགས་འདུག

བསྟན་འཛིན་ཉི་སྒྲོན་དང་། གསར་འགོད་པ་བསྟན་འཛིན་ཕུར་བུ།

རྩོམ་སྒྲིག་བྱེད་མཁན། པདྨ་མཚོ།