རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༣ པའི་ཐོག་རྒྱ་ནག་གཞུང་གིས་བོད་ཕྲུག་ས་ཡ་གཅིག་ཙམ་རྒྱ་ནག་གི་བཅའ་སྡོད་སློབ་གྲྭ་ཁག་ཏུ་བཙན་གྱིས་མངག་གཏོང་བྱེད་མུས་ཡིན་པའི་གནད་དོན་ཐད་གླེང་སློང་དགོས་པའི་རེ་སྐུལ་གནང་།
ཟླ་འདིའི་ཕྱི་ཚེས་ ༡༩ ནས་ཕྱི་ཟླ་ ༧ ཚེས་ ༡༤ བར་སུད་སི་ཇི་ནི་ཝར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཆེན་ཐེངས་ ༥༣ པ་འཚོག་བཞིན་ཡོད་པ་ལྟར། ཟླ་འདིའི་ཕྱི་ཚེས ༡༩ ཉིན་སུད་སི་དང་ལིག་ཏེན་སི་ཌ་ཡ་ནའི་བོད་རིགས་ཚོགས་པའི་གོ་སྒྲིག་འོག ས་གནས་བོད་རིགས་མི་མང་དང་སུད་སི་མཛའ་འབྲེལ་ཚོགས་པའི་མི་སྣ་མཉམ་འཛོམས་ཀྱིས་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་བོད་ནང་གི་འགྲོ་བ་མིའི་ཐོབ་ཐང་ཐད་ཞི་བའི་སྐད་འབོད་གནང་སྟེ། བོད་ནང་གི་བོད་མིའི་གནས་སྟངས་གཙོས་རྒྱ་ནག་གཞུང་གིས་བོད་ཕྲུག་ས་ཡ་གཅིག་ཙམ་རྒྱ་ནག་གཞུང་གི་བཅའ་སྡོད་སློབ་གྲྭ་ཁག་ཏུ་བཙན་གྱིས་མངག་གཏོང་བྱེད་ཀྱི་ཡོད་པའི་ཐད་གླེང་སློང་དགོས་པའི་རེ་སྐུལ་གནང་འདུག
སྐབས་དེར་སུད་སི་དང་ལིག་ཏེན་སི་ཌ་ཡ་ནའི་བོད་རིགས་ཚོགས་པའི་ཚོགས་གཙོ་ཀརྨ་ཆོས་སྐྱིད་ལགས་ཀྱིས། ལོ་རྟག་པར་བོད་རིགས་མི་མང་གིས་རྒྱལ་ཚོགས་ལ་ཞུ་ཡིག་ཕུལ་བཞིན་ཡོད་པ་ལྟར། ད་ལོ་བདུན་ཕྲག་གཅིག་སྔོན་ནས་རྒྱལ་ཚོགས་སུ་ཕུལ་ཟིན་པ་མ་ཟད། ཡིག་ངག་གཉིས་ཀྱི་ཐོག་བོད་ནང་གི་གནས་སྟངས་སྐོར་ཞིབ་ཕྲ་སྙན་གསེང་ཞུ་བའི་གོ་སྐབས་བྱུང་། རྒྱ་གཞུང་གིས་བོད་ཀྱི་བདེ་འཇགས་སྲུང་སྐྱོབ་ལ་ཁ་གཡར་ནས་བོད་ནང་གི་འགྲོ་བ་མིའི་ཐོབ་ཐང་དང་། སྨྲ་བརྗོད་རང་དབང་རྩིས་མེད་རྡོག་རོལ་གཏོང་བཞིན་ཡོད་པ་མ་ཟད། འདས་བའི་ལོ་གཉིས་ལྷག་གི་རིང་བྱིས་པ་ལོ་དྲུག་ནས་བཟུང་ཕ་མ་དང་ཁ་བྲལ་དུ་བཏང་ནས་རྒྱ་ནག་གི་གཏན་འཇགས་སློབ་གྲྭར་བཙན་འཇུག་བྱེད་ཀྱི་ཡོད་པས། བོད་མི་རིགས་ཀྱི་སྐད་ཡིག་དང་། རིག་གཞུང་། ཡུལ་སྲོལ་གོམས་གཤིས་སོགས་རྩ་གཏོར་དུ་གཏོང་མུས་ཡིན། ཞེས་བརྗོད་སོང་།
ཡང་ཁོང་མོས། ཉེ་སྔོན་རྒན་རྒྱལ་ལོ་ལགས་ཀྱི་གཏམ་བཤད་སྐབས་བོད་ནང་གི་ཕ་མ་བུ་ཕྲུག་ཁ་བྲལ་བཏང་ནས་རྒྱ་ནག་གི་གཏན་འཇགས་སློབ་གྲྭ་འགྲོ་བཞིན་པའི་བྱིས་པ་རྣམས་ཕྱིར་ཕ་ཡུལ་དུ་ལོག་དུས། བྱིས་པ་རྣམས་ཕ་མ་གཉེན་མི་སོགས་ལ་བརྩེ་བ་མེད་པ་དང་། བོད་པའི་ཚོར་བ་མེད་པའི་མི་ཞིག་ཏུ་ཆགས་ཀྱི་འདུག་པས། མ་འོངས་བར་བོད་ནང་གི་མི་རབས་གསར་པ་རྣམས་བོད་ཀྱི་རིག་གཞུང་ལ་དགའ་ཞེན་མེད་པའི་གནས་སྟངས་ཤིག་ཏུ་འགྱུར་བའི་ཉེན་ཁ་ཡོད་པས། རང་དབང་ལུང་པའི་ནང་དུ་ཡོད་པའི་བོད་མི་རྣམས་ཀྱིས་བོད་ནང་གི་ཉག་ཕྲ་བའི་གནས་སྟངས་ལ་ངོས་འཛིན་ཡོད་པའི་ཐོག་ནས་བོད་དོན་སྐད་འབོད་ཞུ་རྒྱུ་གལ་ཆེན་ཡིན་སྐོར་བརྗོད་སོང་།
དེ་བཞིན་སུད་སི་བུད་མེད་ཚོགས་པའི་ཚོགས་གཙོ་ཚེ་རིང་དབྱངས་འཛོམས་ལགས་ཀྱིས། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཉིན་རེ་བཞིན་ཛ་དྲག་ཆེ་རུ་འགྱུར་བཞིན་ཡོད་པ་མ་ཟད། རྒྱ་གཞུང་གིས་བོད་ནང་དུ་མཚམས་མ་ཆད་པར་རྒྱ་མི་འབོར་འདྲེན་བྱེད་པའི་ལས་གཞི་རྒྱ་ཆེ་རུ་གཏོང་གིན་ཡོད་པ་དང་། ལོ་བཞི་ནས་དྲུག་བར་བྱིས་པ་ས་ཡ་གཅིག་ཙམ་མི་སེར་སྤེལ་ལུགས་ཀྱི་གཏན་འཇགས་སློབ་གྲྭར་བཙན་འཁྲིད་བྱས་ཏེ། བོད་མི་རིགས་ཀྱི་ངོ་བོ་མཚོན་བྱེད་ཀྱི་སྐད་ཡིག་རིག་གཞུང་བཅས་རྩ་བརླག་ཏུ་གཏོང་མུས་ཡིན་སྐོར་བརྗོད་འདུག
སུད་སི་དང་ལིག་ཏེན་སི་ཌ་ཡ་ནའི་བོད་རིགས་ཚོགས་པའི་ཚོགས་གཞོན་བསྟན་འཛིན་དབང་འདུས་ལགས་ཀྱིས། བོད་མི་སུ་ཞིག་ཡིན་རུང་སྐབས་སུ་བབས་པའི་བོད་དོན་འཐབ་རྩོད་ཀྱི་ཐོག་ནུས་ཤུགས་གཅིག་ཏུ་སྤུངས་རྒྱུ་གལ་ཆེན་ཡིན་པ་མ་ཟད། རྒྱ་གཞུང་གི་དྲང་བདེན་མིན་པའི་ཆབ་སྲིད་ཀྱིས་བོད་མི་མང་གི་ཐོག་མནར་གཅོད་དྲག་པོ་གཏོང་བཞིན་ཡོད་པས། བོད་མི་རྣམས་ཀྱིས་ཀྱང་མཐུན་སྒྲིལ་གྱི་ལངས་ཕྱོགས་བརྟན་པོ་ཡོད་པའི་ཐོག བོད་མི་རིགས་ཀྱི་སྐད་ཡིག་རིག་གཞུང་བཅས་སྲུང་སྐྱོབ་བྱེད་རྒྱུ་གལ་ཆེན་ཡིན་སྐོར་བརྗོད་འདུག
གསར་འགོད་པ། བྱམས་པ་ཚེ་རིང་།
