དེ་རིང་ནས་བཟུང་རྒྱ་ནག་ཏུ་ཡོད་པའི་རྒྱ་གར་གཞུང་ཚབ་ཁང་གིས་ལོ་ལྔའི་རྗེས་སུ་རྒྱ་ནག་གི་མི་སེར་རྣམས་ལ་ཡུལ་སྐོར་སྤྲོ་འཆམ་གྱི་ཐོངས་མཆན་སྤྲོད་པའི་མགོ་བཙུགས་འདུག
ཁ་སང་ཕྱི་ཚེས་ ༢༣ ཉིན་རྒྱ་ནག་ནང་ཡོད་པའི་རྒྱ་གར་གཞུང་ཚབ་ཁང་གིས་ཡོངས་གསལ་བསྒྲགས་ཤིག་སྤེལ་ཏེ། རྒྱ་ནག་གི་མི་སེར་ཚོས་དྲ་ཐོག་ནས་ཡུལ་སྐོར་སྤྲོ་འཆམ་གྱི་ཐོངས་མཆན་ཐོ་འགོད་བྱས་ཟིན་རྗེས། དོ་བདག་སོ་སོའི་ཆེད་དུ་རྒྱ་ནག་པེ་ཅིན་དང་། ཧྲང་ཧའེ། ཀོང་ཀྲོའུ་ (Guangzhou) གྲོང་ཁྱེར་བཅས་སུ་ཡོད་པའི་རྒྱ་གར་གྱི་ཐོངས་མཆན་ལྟེ་གནས་ཁང་ (Indian Visa Application Centre) ཁག་ཏུ་ཕྱིན་ཏེ། ཕྱིར་སྐྱོད་ལག་ཁྱེར་དང་། དགོས་ངེས་ཡིག་ཆ་གཞན་རྣམས་སྤྲོད་དགོས་ཀྱི་ཡོད་པ་རེད། ཅེས་དང་། པེ་ཅིན་དུ་ཡོད་པའི་རྒྱ་གར་གྱི་ཐོངས་མཆན་ལྟེ་གནས་སུ་ཕྱི་སྐྱོད་ལག་ཁྱེར་ཕྱིར་འཐེན་བྱེད་པར་རྒྱབ་གཉེར་ཡི་གེ་ངེས་པར་དུ་མཉམ་འཁྱེར་དགོས་སྐོར་གསལ་འདུག
དེ་འབྲེལ་རྒྱ་ནག་ཕྱི་སྲིད་བློན་ཆེན་ལས་ཁུངས་ཀྱི་མགྲིན་ཚབ་པ་ཀོའོ་ཇཱ་ཀུན་ (Guo Jiakun) ཟེར་བས། རྒྱ་ནག་གིས་ཡུལ་སྐོར་གྱི་ཐོངས་མཆན་སླར་གསོ་བྱས་པར་དགའ་བསུ་དང་། ཐག་གཅོད་དེ་ནི་དགེ་མཚན་ལྡན་པའི་བྱ་སྤྱོད་ཅིག་ཡིན་ཚུལ་བརྗོད་འདུག་ལ། ས་མཚམས་བར་གྱི་འགྲུལ་བཞུད་ལྷོད་དུ་གཏོང་བ་བརྒྱུད་རྒྱལ་ཁབ་གཉིས་ཀར་ཁེ་ཕན་ཆེན་པོ་ཡོད་སྐོར་དང་། རྒྱ་དཀར་ནག་གི་འབྲེལ་ལམ་ཡར་རྒྱས་གཏོང་སླད་གྲོས་མོལ་མུ་མཐུད་དུ་བྱེད་དེ་རྒྱལ་ཁབ་གཉིས་ཀྱི་འགྲོ་འོང་སྔར་ལས་སྟབས་བདེ་བཟོ་རྒྱུ་ཡིན་ཚུལ་སོགས་བསྒྲགས་འདུག
གོ་ལའི་ཧན་ལི་ཕྱི་སྐྱོད་ཀྱི་ཐོ་འགོད་རེའུ་མིག་ (Global Henley Passport Index) ནང་། རྒྱ་གར་གྱི་ཕྱི་སྐྱོད་ལག་ཁྱེར་ཡོད་མཁན་ཚོས་མ་ལེ་ཤི་ཡ་དང་ ཨིན་ཌོ་ནེ་ཤི་ཡ། མལ་ཌིབ་སི། ཐའེ་ལན་ཌི། འབྲུག ཀེན་ནི་ཡ་ (Kenya) སོགས་རྒྱལ་ཁབ་དང་ས་གནས་ཁག་ ༥༩ ལ་ཐོངས་མཆན་རིན་མེད་ཐོག་འགྲོ་སྐྱོད་བྱེད་ཆོག་གི་ཡོད་སྐོར་གསལ་འདུག
ཕྱི་ལོ་ ༢༠༢༠ ལོའི་ཏོག་དབྱིབས་གཉན་རིམས་ཀྱི་ཐེམ་སྤང་བཀའ་རྒྱའི་སྐབས་དང་བསྟུན་ནས། ང་ཚོས་རྒྱ་ནག་གིས་མཐའ་མཚམས་སུ་རྙོག་དྲ་སློང་མགོ་ཚུགས་པ་དང་། ལོ་དེའི་ཕྱི་ཟླ་ ༦ ཚེས་ ༡༥ ཉིན་བོད་དང་རྒྱ་གར་གྱི་ས་མཚམས་སུ་ཁེལ་བའི་གྷལ་ཝན་ལུང་གཞོངས་སུ་རྒྱ་དཀར་ནག་གཉིས་ཀྱི་དམག་མིའི་བར་དྲག་པོའི་འཁྲུག་འཛིང་ཤོར་ཏེ། རྒྱ་གར་གྱི་མཐའ་སྲུང་དམག་མི་ ༢༠ དང་ཉུང་མཐར་རྒྱ་ནག་གི་མཐའ་སྲུང་དམག་མི་ ༤ ཡི་ཚེ་སྲོག་ཤོར་ཡོད་པའི་གནས་ཚུལ་ཐོན་ཡོད་པ་རེད། སྐབས་ཐོག་དེར་རྒྱ་ནག་ཕྱོགས་ནས་ཤི་རྨས་ཀྱི་གྲངས་འབོར་གསང་བ་བྱས་ཡོད་ཀྱང་ཕྱིས་སུ་རྒྱ་དམག་ཀྱང་གང་ཙམ་ཤི་རྨས་བྱུང་ཡོད་པའི་གནས་ཚུལ་ཐོན་ཡོད་ལ། ཕྱོགས་གཉིས་བར་ཐེངས་མང་པོར་གྲོས་མོལ་བྱས་ཡོད་ཀྱང་དོན་འབྲས་དེ་ཙམ་ཐོན་མེད་པར་བརྟེན། དམར་འཛིང་དེ་བྱུང་བ་ནས་བཟུང་བསྐྱར་དུ་རྒྱ་དཀར་ནག་གཉིས་བར་འཁོན་འཛིང་ཆེ་རུ་ཕྱིན་ཡོད་པ་མ་ཟད། ཕྱོགས་གཉིས་ནས་མཐའ་མཚམས་བརྟན་སྲུང་ཆེད་གཞུང་ལམ་དང་དམག་དོན་ལྟེ་གནས་སྔར་ལས་མང་པོ་འཛུགས་སྐྲུན་བྱས་ཏེ་དམག་དོན་ནུས་པ་གོང་སྤེལ་དུ་གཏོང་བཞིན་ཡོད་པ་རེད།
བསྟན་འཛིན་ཉི་སྒྲོན་དང་། གསར་འགོད་པ་བསྟན་འཛིན་ཕུར་བུ།
རྩོམ་སྒྲིག་བྱེད་མཁན། པདྨ་མཚོ།
