ད་ལོར་བོད་ནས་ཤར་ཏུར་ཀི་སི་ཐན་བར་གྱི་མེ་འཁོར་ལྕགས་ལམ་གསར་རྒྱག་གི་ལས་གཞི་མགོ་འཛུགས་རྒྱུ་ཡིན་འདུག  

འདི་ལོ་ནས་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་ས་ནས་ཤར་ཏུ་ཀི་སི་ཐན་གྱི་ཧོ་ཏན་བར་མེ་འཁོར་ལྕགས་ལམ་གསར་རྒྱག་གི་ལས་གཞི་མགོ་བཙུགས་ཏེ་ཕྱི་ལོ་ ༢༠༣༥ ནང་ཚུད་ཡོངས་སུ་འགྲུབ་རྒྱུའི་ཚོད་དཔག་བྱེད་ཀྱིན་འདུག

འདས་པའི་ལོ་ཤས་གོང་འཕགས་བོད་མཐའ་མཚམས་སུ་རྒྱ་དཀར་ནག་གཉིས་ཀྱི་དམག་མིའི་བར་གདོང་ཐུག་བྱུང་རྗེས་མཐའ་མཚམས་ཁུལ་དུ་ཕྱོགས་གཉིས་ཀས་གཞུང་ལམ་དང་དམག་སྒར་སོགས་འཛུགས་སྐྲུན་གྱི་ལས་གཞི་ཤུགས་ཆེན་པོ་སྤེལ་མུས་ཡིན་པ་ལྟར། འདི་ལོ་ནས་རྒྱ་ནག་གཞུང་གིས་ཨ་སྒོར་ཐེར་འབུམ་ ༡༣.༢ ཡི་འགྲོ་གྲོན་བཏང་སྟེ། བོད་ཀྱི་རྒྱལ་ས་ལྷ་ས་ནས་ཤར་ཏུར་ཀི་སི་ཐན་བར་སྤྱི་ལེ་ ༥༠༠༠ ལྷག་ཡོད་པའི་མེ་འཁོར་ལྕགས་ལམ་གསར་རྒྱག་གི་ལས་གཞི་དེ་དངོས་སུ་མགོ་འཛུགས་རྒྱུ་ཡིན་འདུག

རྒྱ་ནག་ཧུའུ་པའེ་རུ་རྟེན་གཞི་བྱས་པའི་ཧྭ་ཡན་དངུལ་རྩ་ཚད་ཡོད་ཚོང་གཉེར་ཁང་(Huayuan Securities Co., Ltd.) གིས་སྤེལ་བའི་གནས་ཚུལ་ནང་། ཤར་ཏུར་ཀི་སི་ཐན་དང་བོད་ཀྱི་ལྕགས་ལམ་ལས་བཟོ་ཁང་(XTRC) ཟེར་བ་དངོས་སུ་ཐོ་འགོད་བྱས་ཏེ། ལས་གཞི་འདི་ཕྱི་ལོ་ ༢༠༣༤ ནང་ཚུད་ཡོངས་སུ་འགྲུབ་པ་བྱས་ཏེ། ས་གནས་མི་མང་དང་ཡུལ་སྐོར་བའི་འགྲོ་འོང་སྟབས་བདེ་རུ་གཏོང་རྒྱུ་ཡིན་སྐོར་བརྗོད་འདུག

ད་ལྟ་རྒྱ་ནག་གཞུང་གིས་གསར་རྒྱག་བྱ་འཆར་ཡོད་པའི་ལྕགས་ལམ་བཞི་ལྡན་གྱི་མེ་འཁོར་ལྕགས་ལམ་དེ་ནི། བོད་ཀྱི་རྒྱལ་ས་ལྷ་ས་ནས་གཞིས་ཀ་རྩེ་བར་གྱི་མེ་འཁོར་ལྕགས་ལམ་དང་། ཤར་ཏུར་ཀི་སི་ཐན་གྱི་ཧོ་ཏན་(Hotan) ནས་གཞིས་ཀ་རྩེ་བར་གསར་རྒྱག་བྱ་འཆར་ཡོད་པའི་ལྕགས་ལམ་གཉིས་མཐུད་འཆར་ཡོད་ཅིང་། ལྕགས་ལམ་དེ་བོད་ཀྱི་ལྷུན་རྩེ་རྫོང་ནས་མངའ་རིས། འཕགས་བོད་མཐའ་མཚམས་ཀྱི་རུ་ཐོག་རྫོང་སོགས་བརྒྱུད་ནས་ཤར་ཏུར་ཀི་སི་ཐན་གྱི་ལྷོ་ནུབ་ཀྱི་ཧོ་ཏན་གྲོང་ཁྱེར་བར་གཏུག་རྒྱུ་ཡིན་འདུག རྒྱ་ནག་གཞུང་གིས་ཕྱི་ལོ་ ༢༠༠༨ ཙམ་ནས་འཆར་གཞི་དེ་བསྒྲིགས་ཡོད་ཅིང་། ཕྱི་ལོ་ ༢༠༢༢ ལོར་ལྕགས་ལམ་གསར་རྒྱག་གི་ཞིབ་འཇུག་དང་འཆར་འགོད་དངོས་སུ་མགོ་བརྩམས་ཡོད་འདུག

འདི་ལོའི་ཕྱི་ཟླ་ ༧ ཚེས་ ༢༣ ཉིན་རྒྱ་གར་གྱི་རྒྱལ་ས་ལྡི་ལི་རུ། རྒྱ་གར་གྱི་ཤར་ཨེ་ཤ་ཡའི་ཟུང་དྲུང་སྐུ་ཞབས་གྷ་རན་གྷ་ལལ་དྷ་སི་(Gourangalal Das) ལགས་ཀྱིས་སྣེ་འཁྲིད་པའི་རྒྱ་གར་གྱི་སྐུ་ཚབ་ཚོགས་ཆུང་ཞིག་གིས། རྒྱ་ནག་མཐའ་མཚམས་དང་མཚོ་ཁུལ་གྱི་གནད་དོན་ལས་ཁུངས་ (Boundary and Oceanic Affairs Department)ཟེར་བའི་འགན་འཛིན་ཧོང་ཉིང་(Hong Liang)གིས་སྣེ་འཁྲིད་པའི་རྒྱ་ནག་གི་སྐུ་ཚབ་ཚོགས་ཆུང་ཞིག་ལ་ཐུག་འཕྲད་བྱས་ཏེ། རྒྱ་ནག་དཀར་ནག་གཉིས་ཀྱིས་འཕགས་བོད་མཐའ་མཚམས་ཁུལ་དུ་འཛུགས་སྐྲུན་དང་མཉམ་ལས་བྱེད་ཕྱོགས་ཀྱི་སྐོར་ལ་གྲོས་མོལ་བྱས་ཡོད་ཀྱང་། ཉེ་ལམ་རྒྱ་ནག་གཞུང་གིས་བོད་ཀྱི་ཡར་ཀླུང་གཙང་པོར་འཛམ་གླིང་གི་ཆུ་རགས་ཆེ་ཤོས་གསར་རྒྱག་དང་། ད་ལྟ་རྒྱ་དཀར་ནག་གཉིས་ཀྱི་ས་མཚམས་ས་ཐིག་ (LAC) ཁུལ་དུ་འཛུགས་སྐྲུན་རྒྱ་ཆེན་པོ་བྱས་པ་དེས་རྒྱ་གར་སོགས་ལ་བློ་འཚབ་ཆེན་པོ་བཟོ་ཡི་ཡོད་པ་རེད།

ཕྱི་ལོ་ ༢༠༢༣ ཟླ་ ༢ ཚེས་ ༨ ཉིན་བོད་རང་སྐྱོང་ལྗོངས་འཕེལ་རྒྱས་ཨུ་ཡོན་ལྷན་ཁང་ཟེར་བས་ལོ་ལྔ་ཚན་གྱི་འཆར་འགོད་བཅུ་བཞི་པ་དང་དུས་ཡུན་རིང་འབྲིང་གི་ལྕགས་ལམ་དྲ་བའི་འཆར་འགོད་ཟེར་བ་ཞིག་ཡོངས་བསྒྲགས་བྱས་པའི་ནང་། ཕྱི་ལོ་ ༢༠༣༥ ལོ་བར་དུ་བོད་ལྗོངས་ཀྱི་ལྕགས་ལམ་དྲ་བའི་གཞི་ཁྱོན་སྤྱི་ལེ་སྟོང་ ༥ ཡན་ཟིན་རྒྱུ་དང་། ལྷ་ས་གཙོ་བོར་བཟུང་བའི་བོད་ལྗོངས་ནང་ཁུལ་གྱི་ས་གནས་རིམ་པའི་སྲིད་འཛིན་ཁུལ་ཚང་མར་ཁྱབ་དགོས་པ་མ་ཟད། ཤར་ཏུར་ཀི་སི་ཐན་དང་མཚོ་སྔོན། སི་ཁྲོན། ཡུན་ནན་སོགས་སྦྲེལ་རྒྱུ་དང་། འགག་སྒོ་ཁག་ལའང་འབྲེལ་བ་མཐུད་རྒྱུ་ཡིན་པའི་ཁར།  བོད་གཞིས་རྩེ་ནས་ལྷ་ས་དང་ལྷོ་ཁ། ཉིང་ཁྲི། ཆབ་མདོ། ཁྲེན་ཏུའུ་བར་དང་། མངའ་རིས་ནས་ནག་ཆུ་དང་ཆབ་མདོ་བར་དང་། ཧོ་ཏན་ནས་མངའ་རིས་དང་གཞིས་རྩེ། ལྷ་ས། ལྷོ་ཁ། ཉིང་ཁྲི། སེམས་ཀྱི་ཉི་ཟླ། ལི་ཅང་བར། ཟི་ལིང་ནས་གོར་མོ་དང་ནག་ཆུ། ལྷ་ས་བར། ཟི་ལིང་ནས་སྐྱེ་རྒུ་དང་ཆབ་མདོ་བར་བཅས་ལ་ལྕགས་ལམ་མཐུད་རྒྱུ་ཡིན་ལུགས་བསྒྲགས་ཡོད་པ་རེད།

འདས་པའི་ལོ་ཤས་རིང་རྒྱ་ནག་གཞུང་གིས་མཚོ་བོད་ལྕགས་ལམ་དང་། ཁྲོན་བོད་ལྕགས་ལམ་ཟེར་བ་སོགས་འཛུགས་སྐྲུན་བྱས་ཏེ་བོད་ཁུལ་གང་སར་ལྕགས་ལམ་གྱིས་མཐུད་བཞིན་ཡོད་ལ། རྒྱ་ནག་གཞུང་གིས་བཅད་བགོས་བྱས་པའི་བོད་ནང་གི་ཞིང་ཆེན་ཟེར་བ་དང་། རྫོང་རིམ་པ་བཅས་མཐུད་ནས་བོད་ནང་འབྱོར་འབྲིང་སྤྱི་ཚོགས་དང་དེང་རབས་ཕྱུག་འགྱུར་ཅན་གྱི་ལམ་དུ་སྐྱོད་བཞིན་ཡོད་ལུགས་དྲིལ་བསྒྲགས་ཤུགས་ཆེན་བྱེད་ཀྱིན་ཡོད་ཀྱང་། རྒྱ་ནག་གཞུང་གིས་འགྲུམ་འགྲིལ་སྟབས་བདེ་རུ་བཏང་བའི་རྐྱེན་གྱིས་བོད་མཐོ་སྒང་དུ་གཞིས་སྤོར་བ་སྔར་ལས་ཇེ་མང་དུ་འགྲོ་བཞིན་ཡོད་པ་མ་ཟད། གནད་དོན་དབྱེ་ཞིབ་པ་མང་པོས་བོད་ཀྱི་ས་གནས་གང་ཞིག་ལ་ས་བྱི་ཞི་རྒོལ་ཆེན་མོ་ལྟ་བུའི་ཛ་དྲག་གནས་ཚུལ་བྱུང་ཚེ་དེ་མ་ཐག་ཏུ་དྲག་ཆས་དམག་དཔུང་གཏོང་ཆོག་ཆོག་གི་གྲ་སྒྲིག་ཨང་གསར་བྱེད་བཞིན་ཡོད་སྐོར་རྗོད་ཀྱི་ཡོད་པ་རེད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།