ཞི་ཅིན་ཕིན་གྱི་པེ་ཏེ་ཧིའི་དུས་སྐབས།

རྩོམ་པ་པོ། ཨིན་ཏི་ལི།
བོད་སྒྱུར་བ། བྱམས་པ་ཚེ་རིང་།
འགྱུར་རྩོམ་ཁུངས། བོད་ཀྱི་དུས་བབ།

གཟའ་ལྷག་པའི་ཉིན་ཧོང་ཀོང་གི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཕྱི་ཟླ་བདུན་པའི་ཟླ་མཇུག་ཏུ་རྒྱ་ནག་ཆབ་སྲིད་ལྷན་ཁང་གི་ཚོགས་འདུ་འཚོགས་རྗེས། འགྲོ་ལུགས་ལྟར་ཕྱི་ཟླ་བརྒྱད་པའི་ཟླ་མགོར་རྒྱ་ནག་གཞུང་གི་མགོ་ཁྲིད་ཚོ་བདུན་ཕྲག་གཉིས་རིང་པེ་ཏེ་ཧི་རུ་ངལ་གསོའི་རྣམ་པའི་ལས་དོན་བསྒྲུབ་རྒྱུ་ཡིན་པ་རེད།

པེ་ཏི་ཧི་འདི་མའོ་ཙེ་ཏུང་གི་དུས་སྐབས་ལྟར་དེ་འདྲའི་གསང་བ་ཞིག་མིན། ཀྲུང་ནན་ཧེ་གོང་མའི་ཕོ་བྲང་དང་། པེ་ཏི་ཧེ་དབྱར་ཁའི་ཕོ་བྲང་སྟེ། མཐོ་རིམ་དཔོན་རིགས་ཚོས་པེ་ཏེ་ཧི་རུ་དབྱར་ཁའི་སྤྲོ་གསེང་གཏོང་བའམ།  ཧ་ཅང་གལ་གནད་ཆེ་བའི་ལམ་ལུགས་འཐབ་རྩོད་རྣམས་ཐག་གཅོད་བྱེད་པའི་གསང་བའི་ཚོགས་འདུ་རེད།

ཚོགས་འདུ་ཡོངས་གྲགས་བྱས་མེད་ཀྱང་། པེ་ཏི་ཧེ་ནི་རྒྱ་ནག་དམར་ཤོག་གཞུང་གི་དབང་ཆའི་མཚོན་རྟགས་གལ་ཆེན་ཞིག་ཡིན། རྒྱ་ནག་དམར་ཤོག་ཚོགས་པའི་ཆབ་སྲིད་ལ་རྒྱུས་མངའ་ཡོད་མཁན་ཚང་མས་ཚོགས་འདུ་ཆུང་ཆུང་ནི་ཚོགས་འདུ་ཆེན་པོ་ལས་གལ་ཆེ་བ་ཤེས་ཀྱི་ཡོད་པ་རེད། ཧུའུ་ཡའོ་པང་གི་སྤྱི་ཁྱབ་དྲུང་ཆེའི་ལས་གནས་དེ་བློ་མཐུན་རྒན་པ་ཁག་གིས་དམར་ཤོག་ནང་ཁུལ་གྱི་འཚོ་བའི་ལྷན་ཚོགས་ཟེར་བའི་ཐོག་ནས་ཐག་གཅོད་བྱས་པ་ཞིག་རེད། དེ་བཞིན་ཀྲའོ་ཙི་ཡང་གི་དབང་ཆ་ཤོར་བ་དེའང་ཏིན་ཞའོ་ཕིན་གྱི་ཁྱིམ་ནས་འཆར་འགོད་བྱས་པ་ཞིག་རེད།

པེ་ཏི་ཧིའི་ཚོགས་འདུ་མེད་པ་དེས་ཀྲུང་ནན་ཧའེ་རུ་ལྷིང་འཇགས་ཡིན་པའི་ནང་དོན་མ་རེད།

ནམ་རྒྱུན་འགྲིམ་འགྲུལ་དོ་དམ་དང་མཁའ་དབྱིངས་དོ་དམ་ཚོད་འཛིན་མངོན་གསལ་ཡིན་པ་ལས་གཞན་མི་ཆེན་སུ་གང་ཁུལ་དེར་མཐོང་རྒྱུ་མེད། ཁོ་ཚོ་ཕྱིར་མངོན་དུས་ནི་གུང་སེང་རྫོགས་སྐབས་ཡིན་ལ། དེ་དུས་ཚན་རྩལ་མི་སྣ་སོགས་ལ་ཐུག་འཕྲད་བྱེད་ཀྱི་ཡོད་པ་དེས་མགོ་འཁྲིད་རྣམས་ཕྱིར་ཀྲུང་ནན་ཧེ་ལ་ལོག་གི་ཡོད་པའི་དོན་དག་རེད།

པེ་ཏེ་ཧི་ནི་ཧ་ཅང་གི་གསང་བ་ཞིག་ཡིན་ལ། རྒྱ་ནག་གཞུང་གི་མི་སྣ་ཨང་དང་པོ་ཞིས་ཅིན་ཕིན་གྱི་འགུལ་སྐྱོད་ཀྱང་ཧ་ཅང་གསང་བ་ཡིན། ཉེ་ལམ་བྷི་ར་ཛིལ་གྱི་ཕྱི་སྲིད་བློན་ཆེན་གྱིས་འཛམ་གླིང་གི་རྒྱལ་ཁབ་བཅུའི་ཚོགས་ཆེན་སྟེང་དུ་ཆེད་བསྟོད་ཐོབ་པའི་རྒྱ་ནག་གི་མགོ་འཁྲིད་ཞི་ཅིན་ཕིན་གྱིས་རྒྱལ་སྤྱིའི་ཐོག་ཤུགས་རྐྱེན་སྤྲོད་པར་ཁེ་ཕན་ཡོད་པར་ངོས་འཛིན་པའི་རྒྱལ་ཁབ་བཅུའི་ལྷན་ཚོགས་ཐོག་མཉམ་ཞུགས་བྱེད་པའི་སྒྲིག་ལམ་གཏོར་བ་འདིས། སྔར་ལས་ཞི་ཅིན་ཕིན་གྱི་གསང་བའི་སེམས་ཚོར་ཇེ་ཟབ་ཏུ་གྱུར།

ད་དུང་ཞི་ཅིན་ཕིན་མཉམ་ཞུགས་ཐུབ་ཀྱི་མེད་པར་བརྟེན་རྒྱ་ནག་དང་ཡུ་རོབ་མཐུན་ཚོགས་ཀྱི་ཚོགས་འདུ་གལ་ཆེན་དེའི་ཚོགས་ཡུལ་སྦིལ་ཛིལ་ནས་པེ་ཅིན་དུ་བརྗེ་བོ་བརྒྱབ་པ་དང་། རེས་གཟའ་ཕུར་བུའི་ཉིན་ཞི་ཅིན་ཕིན་གྱིས་ཡུ་རོབ་མཐུན་ཚོགས་ཀྱི་མགོ་ཁྲིད་རྣམ་དང་ཐུག་འཕྲད་བྱ་རྒྱུ་བྱས།

ཞི་ཅིན་ཕིན་ཕྱི་རྒྱལ་ཁག་ཏུ་སྐྱོད་པ་མངོན་གསལ་དོད་པོས་ཉུང་དུ་ཕྱིན་ཡོད། འདི་ལོའི་དབྱར་ཁར་ཁོའི་སྐོར་ལ་དབྱེ་ཞིབ་དང་ཚོད་དཔག་མང་པོ་བྱུང་ཡོད། ཁག་ཅིག་གིས་ཞི་ཡི་གཟུགས་པོའི་འཕྲོད་བསྟེན་གྱི་དཀའ་ངལ་དང་། ཡང་ཁོའི་དབང་ཆ་འཕོ་འགྱུར་བྱུང་བ་སོགས་བརྗོད་ཡོད་པ་རེད།

ཕྱི་ཟླ་ ༦ པའི་ཟླ་མཇུག་ཏུ་རྒྱ་ནག་ཆབ་སྲིད་ལྷན་ཁང་གི་རྒྱ་ནག་དབུས་ལས་དོན་ཐག་གཅོད་གྱི་མཐུན་སྦྱོར་རྩ་འཛུགས་སྲོལ་ཡིག་བསྐྱར་ཞིབ་ཚོགས་འདུའི་སྤྱི་བསྒྲགས་ཀྱིས་སླར་ཡང་ཚོད་དཔག་འདྲ་མིན་སྣ་ཚོགས་བསླངས་ཡོད་པ་རེད། ཚོགས་འདུའི་སྤྱི་བསྒྲགས་ཀྱིས་གོམ་གང་མདུན་སྤོས་ཀྱིས་དབུས་དམར་ཤོག་གཞུང་གི་ལས་དོན་ཐག་གཅོད་ཀྱི་རྩ་འཛུགས་འཛུགས་སྐྲུན་དང་ལས་འགན། བྱ་བ་བཅས་ཀྱི་སྤུས་ཚད་ཇེ་ལེགས་སུ་གཏོང་རྒྱུར་དམིགས་པ་ཡིན་སྐོར་བརྗོད་ཡོད་པ་རེད།

འདིས་ཞི་ཅིན་ཕིན་གྱི་དབང་ཆ་ཉམས་དམས་སུ་གཏོང་གི་ཡོད་པ་མཚོན་གྱི་ཡོད་པ་མ་རེད་དམ། ཕྱི་ཟླ་ ༧ ཚེས་ ༢༡ ཉིན་བྷི་བྷི་སི་གསར་ཁང་གི་རྒྱ་ནག་ཆབ་སྲིད་ལྷན་ཁང་གི་སྤྱི་བསྒྲགས་གིས་དོ་སྣང་སློང་བ་ཞེས་པའི་ཞི་ཅིན་ཕིན་གྱིས་སྲིད་དབང་རྒྱུན་སྐྱོང་བྱེད་པར་གྲ་སྒྲིག་བྱེད་བཞིན་ཡོད་སྐོར་གྱི་གནས་ཚུལ་ནང་དུ།  ཆེད་མཁས་པས་བསམ་ཚུལ་ཆེན་པོ་གཉིས་ལུང་འདྲེན་བྱས་པ་དང་པོ་ནི། ཐག་གཅོད་གསར་པས་ཞི་ཅིན་ཕིན་གྱི་དབང་ཆ་སྲ་བརྟན་ལ་རོགས་འདེགས་བྱས་ཏེ། གྲོས་གཞིའི་རིམ་པ་སྔར་ལས་ནུས་ལྡན་དུ་འགྱུར་བར་དམིགས་ཡོད་སྐོར་དང་། གཉིས་པ་ནི་ཐག་གཅོད་དེ་ནི་སྒྲིག་འཛུགས་ཅན་གྱི་ལམ་ལུགས་ནང་ཞི་ཡི་དབང་ཆ་གཅོག་ཐབས་དང་། དབང་ཆ་གཅིག་སྡུད་ཚད་བརྒལ་གྱིས་བཟོས་པའི་ཕྱིའི་ཤུགས་རྐྱེན་ཉུང་དུ་གཏོང་བར་དམིགས་ཡོད་སྐོར་བརྗོད་ཀྱི་ཡོད་པ་རེད།

རྒྱ་ནག་གི་ཆབ་སྲིད་གནས་སྟངས་ལ་རྒྱུས་མངའ་ཡོད་མཁན་ཚོས་ཞི་ཅིན་ཕིན་གྱི་སྲིད་དབང་ཉམས་རྒུད་དུ་འགྲོ་བར་ཡིད་ཆེས་བྱེད་དཀའ་བ་རེད། རྒྱ་ནག་དམར་ཤོག་ཚོགས་ཆེན་ཐེངས་ ༡༨ ནས་ ༢༠ བར་ཁོས་དབང་ཆ་ཡོད་ཚད་གཅིག་བསྡུས་བྱས་ཏེ་ཚེ་གང་བོར་ཆབ་སྲིད་འཛིན་པའི་ལམ་ཞིག་བསྐྲུན་ཡོད།

དཔལ་འབྱོར་རིག་པ་བས་དབྱེ་ཞིབ་བྱས་པ་ལྟར་ན། ཞི་ཅིན་ཕིན་སྔར་ལས་གསང་བ་ཅན་གྱུར་ཡོད། ཡིན་ནའང་།  ཁོ་དཀའ་རྙོག་གི་གནས་སུ་ལྷུང་བའི་གནས་ཚུལ་དེ་དག་ཚད་ལས་བརྒལ་ཡོད། ཞི་ཡིས་རང་ཉིད་ལ་ཡིད་ཆེས་བྱེད་མཁན་ཚོ་རྒྱུན་ལས་ལྷན་ཚོགས་གལ་ཆེན་ཁག་གི་དོ་དམ་པར་བསྐོ་བཞག་བྱེད་ཀྱི་ཡོད་པ་རེད། ཡིན་ནའང་། ད་དུང་དབང་ཆ་རྣམས་སོ་སོའི་ལག་ཏུ་བརྟན་པོར་བཟུང་ཡོད་པས། བྱེད་སྟངས་དེ་སྔ་མོར་མའོ་ཙེ་ཏུང་དང་ཏིན་ཞོ་ཕིན་གྱི་བྱེད་སྟངས་དང་འདྲ་བོ་ཡོད་སྐོར་བརྗོད་ཀྱི་ཡོད་པ་རེད།

ཨ་རིའི་(WSJ)གསར་ཁང་གིིས་དབྱེ་ཞིབ་བྱས་པ་ལྟར་ན། ཉེ་བའི་ལོ་ཤས་ནང་ཞི་ཅིན་ཕིང་ཕྱི་རྒྱལ་དུ་འགྲོ་རྒྱུ་ཉུང་དུ་བཏང་ཡོད་པ་དང་། ཐ་ན་ལྷན་ཚོགས་གལ་ཆེན་དེ་འདྲ་ལའང་མཉམ་ཞུགས་བྱེད་ཀྱི་མེད་པར་ཤར་གྱི་མགྲོན་བདག་གི་ཕྱི་འབྲེལ་ཐབས་ལམ་ལ་ཤུགས་སྣོན་རྒྱག་བཞིན་པ་དེ་ནི། ཞི་ཡི་ལོ་ཚད་དང་བསྟུན་ནུས་ཤུགས་སྲུང་སྐྱོབ་དང་། རྒྱལ་ཁབ་ནང་ཁུལ་གྱི་གནད་དོན་ཐག་གཅོད་བྱེད་པར་འབྲེལ་བ་ཡོད་སྲིད་པ་ཞིག་རེད།

ལོ་ ༧༡ དང་ ༧༢ ནི་ལོ་དེ་ཙམ་ཆེན་པོ་བརྩི་ཡི་མེད།  འཛམ་གླིང་གི་དབུ་ཁྲིད་མང་པོས་ལོ་ཚད་དེར་བསླེབས་དུས་ད་དུང་ཡང་ཧུར་པོ་ཡོད་པ་རེད། འདིས་མི་རྣམས་ལ་ཞི་ཅིན་ཕིན་གྱི་འཕྲོད་བསྟེན་གྱི་གནད་དོན་དྲན་པར་བྱེད་ཡོད། འདི་ལོའི་ཕྱི་ཟླ་ ༣ པ་ནས་རྒྱ་ནག་གི་གནད་དོན་དབྱེ་ཞིབ་པའི་ཁྲོད་ཞི་ཅིན་ཕིན་གྱི་འཕྲོད་བསྟེན་གནད་དོན་སྐོར་གྱི་དཀྲོག་གཏམ་ཁྱབ་ཡོད་པ་རེད།

ཡིན་ནའང་། ཕྱི་ཟླ་ ༩ ཚེས་ ༣ ཉིན་པེ་ཅིན་གྱི་དམག་སྦྱོང་ཆེན་མོའི་འཆར་གཞི་རྩིས་མེད་བཏང་མེད་པ་དེས། ཞི་ཡི་འཕྲོད་བསྟེན་གྱི་གནས་སྟངས་གོ་གནས་ནས་མར་འབབ་དགོས་པའི་གནས་བབ་ལས་རིང་དུ་གནས་ཡོད་པ་བསྟན་ཡོད།

ཞི་ཅིན་ཕིན་གྱི་དབང་ཆ་སྔར་བཞིན་ཧ་ཅང་གཅིག་སྡུད་དང་རྒྱ་ཆེན་པོ་རེད།  འཛམ་གླིང་ཐོག་ཁོ་ལྟར་མི་གཅིག་གིས་དབང་ཆ་ཆེན་པོ་འཛིན་མཁན་གྱི་མགོ་ཁྲིད་ཧ་ཅང་ཉུང་ཉུང་རེད། ཚོགས་ཆུང་སྣ་ཚོགས་ཀྱི་ངོ་བོའི་ཐོག་ནས་ཞི་ཅིན་ཕིན་གྱི་བསམ་བློ་དང་། དེའི་ཐོག་རྒྱ་གཞུང་གིས་གཏན་འབེབ་བྱས་པའི་སྲུང་སྐྱོབ་གཉིས་དང་གཏན་འཁེལ་གཉིས་ཁ་སྣོན་བྱས་ཏེ། ཁོས་དབང་སྒྱུར་བའི་དམར་ཤོག་ཚོགས་པས་ཚོགས་མི་ས་ཡ་ ༡༠༠ ཡི་ཤ་ཞེན་ལ་འགན་ལེན་བྱེད་པར་བསམ་བློ་གཏོང་ཕྱོགས་ཀྱི་སྒྲོམ་གཞི་བཟོས་ཡོད།

འོན་ཀྱང་། འདི་འདྲའི་སྟོབས་ཆེན་གྱི་སྲིད་དབང་ཞིག་ཉམས་རྒུད་དུ་འགྲོ་སྲིད་དམ། ཉེ་ཆར་ཨ་རིའི་ཧུ་ཌི་སོན་ལྟེ་གནས་ཁང་གིས་དམར་ཤོག་ཚོགས་པའི་རྗེས་ཀྱི་རྒྱ་ནག  དམར་ཤོག་ཚོགས་པའི་མགོ་ཁྲིད་མེད་པའི་རྒྱ་ནག་ཅིག་ལ་གྲ་སྒྲིག་བྱེད་བཞིན་ཡོད་ཅེས་པའི་ཞིབ་འཇུག་སྙན་ཐོ་རིང་པོ་ཞིག་བཏོན་སྟེ། གནས་ཚུལ་འདི་བྱུང་ཚེ་གདོང་ལེན་བྱེད་ཐབས་ཀྱི་གྲོས་གཞི་ཞིག་བཏོན་ཡོད།

ཕྱི་ལོ་ ༢༠༢༥ ལོའི་རྒྱ་ནག་དམངས་གཙོའི་དུས་དེབ་ཀྱི་དུས་ཚིགས་གསུམ་པའི་ནང་སི་ཊན་ཧྥོར་སློབ་ཆེན་གྱི་རྒྱ་ནག་དཔལ་འབྱོར་དང་སྒྲིག་འཛུགས་ཞིབ་འཇུག་ལྟེ་གནས་ཀྱི་ཞིབ་འཇུག་པ་རྒན་པ་ཝུ་གོ་ཀོང་(Wu Guoguang) ལགས་ལ་བཅར་འདྲི་བྱེད་སྐབས། ཁོང་གིས་ཞི་ཅིན་ཕིན་གྱིས་ལོ་བཅུ་གྲངས་སྲིད་དབང་བཟུང་རྗེས་ཀྱི་དེ་རིང་། དམར་ཤོག་རིང་ལུགས་ཀྱི་བཟང་ངན་གཉིས་ཀའི་ཕྱོགས་མཐོང་རྗེས། རྒྱ་ནག་མ་འོངས་པར་རེ་བ་ཅན་ཞིག་ཏུ་ཁ་ཕྱོགས་པར་དམར་ཤོག་ལམ་ལུགས་ལས་ཐར་བར་བྱེད་དགོས་ལ། དེ་ནི་དམར་ཤོག་ཚོགས་པའི་རྗེས་ཀྱི་རྒྱ་ནག་དེ་ཡིན། སྲིད་དོན་ཆེད་མཁས་པ་འདིའི་དགོངས་ཚུལ་ལྟར་ན། དམར་ཤོག་ཚོགས་པའི་རྗེས་ཀྱི་རྒྱ་ནག་གི་ཕྱོགས་སུ་སྐྱོད་པའི་སྙིང་དོན་ནི་དབང་ཤུགས་ལ་བཀག་སྡོམ་དང་། ཐོབ་ཐང་ལ་འགན་ལེན་བྱེད་པའི་ལམ་ལུགས་ཤིག་འཛུགས་སྐྲུན་བྱེད་པའི་ཆེད་དུ་རེད། འདི་ལྟར་བྱས་ན་དཔལ་འབྱོར་མུ་མཐུད་ནས་འཕེལ་རྒྱས་འགྲོ་ཐུབ་པ་དང་། འཕེལ་རྒྱས་ཀྱི་འབྲས་བུ་མི་མང་ལ་ཕན་ཐོགས་པ། སྤྱི་ཚོགས་སྒྲིག་ལམ་རྒྱུན་གནས་ལྷིང་འཇགས་ཡོང་ཐུབ། སང་ཉིན་གློ་བུར་དུ་མགོ་ཁྲིད་གསར་པ་སུ་ཞིག་གིས་སྲིད་ཇུས་གསར་པ་གང་ཞིག་བཟོས་ཡོང་ཚེ་ཡོད་ཚད་འགྱུར་བ་གཏོང་སྲིད་པའི་སེམས་ཁྲལ་བྱ་མི་དགོས།

རྒྱལ་ཁབ་གཅིག་དང་། དམར་ཤོག་ཚོགས་པ་གཅིག མགོ་འཁྲིད་གཅིག དམར་ཤོག་ཚོགས་པ་དང་རྒྱལ་ཁབ་ངོ་བོ་གཅིག་ཡིན་པའི་རྒྱལ་ཡོངས་རང་ལུགས་ནི་སྟོབས་ཤུགས་འགྲན་ཟླ་བྲལ་བ་ཞིག་ཡིན་ཡང་། ཞི་ཅིན་ཕིན་རང་ངོས་ནས་ཧ་ཅང་སེམས་ཁྲལ་ཆེན་པོ་བྱེད་བཞིན་ཡོད་པ་འདྲ། ཁོས་སྔར་ནས་རྒྱལ་ཁབ་སྲུང་སྐྱོབ་བྱེད་དགོས་སྐོར་གླེང་ཡོད་ལ། ཁོས་དེ་སྔོན་ལྐོག་ཟ་རུལ་སུངས་ལ་ངོ་རྒོལ་མ་བྱས་ན་དམར་ཤོག་ཚོགས་པ་དང་རྒྱལ་ཁབ་མེད་པ་ཆགས་རྒྱུ་ཡིན་པ་ཡང་ཡང་བརྗོད་ཡོད། ཞི་ཡི་ཁ་གཏད་པ་ཚོས་དེ་ནི་དབང་ཆ་གཅིག་ཏུ་བསྡུ་བར་ཁ་གཡར་ས་བཙལ་བར་ངོས་འཛིན་བྱེད་ཀྱི་ཡོད་པ་རེད།

ཞི་ཡིས་སྲིད་སྲིད་དབང་བདེ་འཇགས་དང་ཆབ་སྲིད་ཀྱི་བདེ་འཇགས་སྐོར་བཤད་ཀྱི་ཡོད་ཀྱང། གནད་དོན་དབྱེ་ཞིབ་པ་ཁག་ཅིག་གིས་རྒྱ་ནག་གི་དབང་ཤུགས་ཆེ་བའི་མགོ་ཁྲིད་འདི་ལ་བདེ་འཇགས་མེད་པའི་ཚོར་སྣང་ཤུགས་ཆེན་པོ་ཡོང་གི་ཡོད་སྐོར་བརྗོད་ཡོད་པ་རེད།

ཞི་ཡིས་དམར་ཤོག་ཚོགས་པ་ནང་ཁུལ་གྱི་ལྐོག་ཟ་རུལ་སུངས་ལ་ངོ་རྒོལ་མུ་མཐུད་ནས་བྱས་ཡོད་ལ། ཐ་ན་ཚོགས་ཆེན་ ༢༠ པའི་རྗེས་སུ་ཡང་གོ་གནས་གལ་ཆེན་ཚང་མ་རང་ཉིད་ཀྱིས་ཡིད་ཆེས་བྱེད་ས་རྐྱང་རྐྱང་གིས་བཟུང་ཡོད་པའི་ཁོངས་སུའང་ལྐོག་ཟ་རུལ་སུངས་ལ་ངོ་རྒོལ་བྱས་ཡོད་པ་དང་། ལྷག་པར་དུ་དམག་སྡེའི་ནང་གཙང་བཟོ་བྱས་ཏེ་རབ་དང་རིམ་པ་བྱས་ནས་ཁོ་རང་གིས་དངོས་སུ་གོ་གནས་མཐོ་སྤར་བའི་མགོ་འཁྲིད་ཀྱང་གཙང་བཟོ་བྱས་ཡོད་པ་རེད།

ལས་ཀ་འདི་དག་ཚང་མ་ནི་རྒྱལ་ཁབ་སྲུང་སྐྱོབ་དང་རང་ཉིད་ཀྱི་སྲིད་དབང་སྲུང་སྐྱོབ་བྱ་རྒྱུར་དམིགས་པ་ཞིག་རེད། མི་ཁ་ཤས་ཀྱིས་རྒྱལ་ཁབ་འདི་གཏན་དུ་གནས་རྒྱུ་ཡིན་ཡང་རྒྱལ་ཁབ་ཇི་ལྟར་སྟངས་འཛིན་བྱེད་མིན་དང་། རྒྱལ་ཁབ་སྐྱོང་མིན་གྱི་གནད་དོན་རེད། སུས་སྟངས་འཛིན་དང་འཛིན་སྐྱོང་སུས་ཚགས་ཚུད་བྱེད་པར་བལྟ་དགོས། ཞིའི་རྒྱལ་ཁབ་ནི་འདིར་དམར་ཤོག་ཚོགས་པའི་སྲིད་དབང་ཁོ་ནར་གོ་དགོས། འདི་ནི་སྲིད་དབང་གཅིག་སྡུད་ཁོ་ནར་ཡོད་པའི་གནད་དོན་ཞིག་རེད་ལ། ཞི་ཡིས་བཤད་པའི་དམར་ཤོག་ཚོགས་པ་ཆེན་མོ་ཁོ་ནར་ཡོད་པའི་དཀའ་གནད་དེའང་ཡིན་ངེས།

ཞི་ཅིན་ཕིན་གྱིས་གནད་དོན་འདི་དག་ལ་བསམ་བློ་བཏང་དུས་ཕྱི་ཕྱོགས་ནས་རང་བཞིན་གྱིས་གནད་དོན་འདི་དག་མཐོང་གི་ཡོད། གནད་དོན་དབྱེ་ཞིབ་པ་མི་ཉུང་བ་ཞིག་གིས་དོན་དག་འདིའི་ཐོག་ནས་བཤད་ན་ཞི་ཡི་རྗེས་ཀྱི་རྒྱ་ནག་དེ་དོན་སྙིང་མེད་པ་ཞིག་མིན་པའི་འཆར་སྣང་ཡོང་གི་ཡོད་པ་རེད།

མ་རྩོམ་གྱི་འབྲེལ་ཐག https://www.rfi.fr/cn/%E4%B8%AD%E5%9B%BD/20250723-%E4%B9%A0%E8%BF%91%E5%B9%B3%E7%9A%84%E5%8C%97%E6%88%B4%E6%B2%B3%E6%97%B6%E5%88%BB