བོད་མིའི་སྒྲིག་འཛུགས་ཀྱི་སྲིད་ཚབ་ལྕང་ར་ཐར་ལམ་སྒྲོལ་མ་མཆོག་གིས་བོད་ཕྱི་ནང་གཉིས་ཀྱི་བོད་མི་ཡོངས་ཀྱི་ཚབ་བྱས་ནས་རྒྱ་གར་རང་བཙན་ཉིན་མོར་འཚམས་འདྲི་དང་སྦྲགས་རྒྱ་གར་གཞུང་མང་གཉིས་ལ་བཀའ་དྲིན་ཆེ་ཞུས་སོང་།
དེ་རིང་དྷ་རམ་ས་ལར་སྨུག་པ་ལང་ལོང་འཐིམ་ཞིང་སྔ་དྲོའི་ཆུ་ཚོད་ ༩།༣༠ ཙམ་གྱི་སྟེང་དུ་བོད་མིའི་སྒྲིག་འཛུགས་ཀྱིས་གངས་སྐྱིད་ཀྱི་སྲི་ཟློག་མཆོད་རྟེན་མདུན་ཐང་དུ་དབྱིན་ཇིའི་དབང་སྒྱུར་འོག་ནས་རྒྱ་གར་ལ་རང་བཙན་ཐོབ་ནས་ལོ་ངོ་ ༧༩ འཁོར་བའི་དུས་དྲན་སྲུང་གཙི་ཞུས་སོང་བ་དང་། སྐབས་དེར་བོད་མིའི་སྒྲིག་འཛུགས་ཀྱི་སྲིད་ཚབ་ལྕང་ར་ཐར་ལམ་སྒྲོལ་མ་མཆོག་དང་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག བོད་མི་མང་སྤྱི་འཐུས་ཚེ་རིང་དབྱངས་ཅན་མཆོག ལྷན་ཁང་ཁག་གི་དྲུང་ཆེ་རྣམ་པ་ནས་ལས་དྲུང་བར་གྱི་ལས་བྱེད་བཅས་འཛོམས་འདུག
སྐབས་དེར་བོད་མིའི་སྒྲིག་འཛུགས་ཀྱི་སྲིད་ཚབ་ལྕང་ར་ཐར་ལམ་སྒྲོལ་མ་མཆོག་གིས། དེ་རིང་རྒྱ་གར་རང་བཙན་ཐོབ་ནས་ལོ་ངོ་ ༧༩ འཁོར་བའི་དུས་དྲན་སྲུང་གཙིའི་ཉིན་མོ་འདིར། བོད་ཕྱི་ནང་གཉིས་ཀྱི་ཚབ་ཞུས་ཏེ་རྒྱ་གར་གཞུང་དང་མི་མང་ཚང་མར་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། འཛམ་གླིང་ནང་མང་གཙོའི་རྒྱལ་ཁབ་སྟོབས་ཆེ་ཤོས་ཤིག་རྒྱ་གར་ཆགས་ཀྱི་ཡོད། དེ་བཞིན། མི་འབོར་གྱི་ཆ་ནས་རྒྱ་གར་ཨང་དང་པོ་རེད། དཔལ་འབྱོར་དང་འཕྲུལ་ཆས་ཀྱི་ཆ་ནས་འདས་པའི་ལོ་ ༧༨ ནང་ལ་རྒྱ་གར་འཛམ་གླིང་གིས་ངོས་འཛིན་ཞུ་དགོས་པའི་སྟོབས་ཆེན་རྒྱལ་ཁབ་ཅིག་ཆགས་ཡོད།
ང་ཚོ་བོད་པ་ཚོ་རྒྱ་གར་དུ་སྐྱབས་བཅོལ་ནས་གནས་བསྡད་ཡོད་སྟབས། ག་དུས་ཡིན་ཡང་ང་ཚོས་རྒྱ་གར་ནི་རྩ་ཆེན་པོ་དང་བཀའ་དྲིན་ཆེན་པོ་ཡིན་པ་དྲན་དང་དྲན་བཞིན་ཡོད། རྒྱ་གར་རང་བཙན་ཐོབ་ནས་ལོ་ངོ་ ༡༢ ཙམ་ལ་རྒྱ་ནག་གིས་བོད་འཕྲོག་སྟེ་ང་ཚོ་རྒྱ་གར་དུ་སྐྱབས་བཅོལ་ལ་ཡོང་དགོས་པའི་གནས་སྟངས་ཆགས་སྐབས། རྒྱ་གར་ལ་རང་བཙན་ཐོབ་ནས་ལོ་ངོ་བཅུ་གཉིས་ལས་ཕྱིན་མེད་པ་དང་དཔལ་འབྱོར་སོགས་ཕྱོགས་གང་ཅིའི་ཐད་ནས་དཀའ་ངལ་མང་པོ་ཡོད་ནའང་། བོད་པ་ལ་དགའ་པོའི་ངང་ནས་རྒྱ་གར་དུ་སྡོད་ཆོག་པ་དང་བོད་པའི་ཆོས་དང་རིག་གཞུང་སོགས་གང་ཅིའི་ཐད་ནས་སྲུང་སྐྱོབ་ཐུབ་པ་དང་ཉམས་པ་སླར་གསོ་ཐུབ་ཡོད་པ་ནི་རྒྱ་གར་གཞུང་གི་བཀའ་དྲིན་རེད། དེར་བརྟེན། བོད་མིའི་སྒྲིག་འཛུགས་དང་བོད་ཕྱི་ནང་གཉིས་ཀྱི་ཚབ་ཞུས་ཏེ་རྒྱ་གར་ལ་བཀའ་དྲིན་ཆེ་ཞུ་རྒྱུ་ཡིན། ཞེས་གསུངས་སོང་།
ཕྱི་ལོ་ ༡༩༤༧ ཟླ་ ༨ ཚེས་ ༡༥ ཉིན་རྒྱ་གར་ལ་དབྱིན་ཇིའི་དབང་སྒྱུར་འོག་ནས་རང་བཙན་ཐོབ་པའི་ཉིན་མོ་ཡིན་པ་ལྟར། ལོ་རེའི་ཕྱི་ཟླ་ ༨ ཚེས་ ༡༥ ཉིན་རྒྱ་གར་གཞུང་དང་མི་མང་ཡོངས་ནས་རང་བཙན་ཐོབ་པའི་ཉིན་མོ་འདི་སྤྲོ་སེམས་འཁོལ་བའི་ངང་ནས་སྲུང་གཙི་གནང་གི་ཡོད་ལ། བོད་མིའི་སྒྲིག་འཛུགས་དང་བཙན་བྱོལ་དུ་གནས་པའི་བོད་མི་ཚོས་ཀྱང་ལོ་རྟག་པར་རྒྱ་གར་རང་བཙན་ཉིན་མོར་རྒྱ་གར་གཞུང་མང་གཉིས་ལ་འཚམས་འདྲི་དང་བཀའ་དྲིན་ཞུ་སླད་ཉིན་མོ་འདི་སྲུང་གཙི་གནང་མུས་ཡིན་པ་རེད།
གསར་འགོད་པ། སྐལ་བཟང་སྦྱིན་པ།
