༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས།

༧གོང་ས་རྒྱལ་བ་རིན་པོ་ཆེ་མཆོག་ནས་ངོས་ཀྱིས་དངོས་ཡོད་གནས་ཚུལ་རན་པར་དཀར་ཕྱོགས་སྐྱོང་བའི་བོད་གངས་ཅན་གྱི་ལྷ་སྲུང་ཚོར་ལྷག་བསམ་རྣམ་དག་གིས་འཕྲིན་ལས་གཉེར་གཏད་བྱས་པར་ཧུར་ཐག་བྱས་སོང་ཞེས་བཀའ་སློབ་སྩལ།

དེ་རིང་ཕྱི་ཚེས་ ༡༧ ཉིན་ལ་དྭགས་གླེ་ཞི་བའི་ཚལ་དུས་དབང་གསུང་ཆོས་ར་བར། ལ་དྭགས་ནང་ཚོགས་དང་དགོན་ཚོགས་ཐུན་མོང་ནས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་དང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། ཆོས་གྲོགས་རྣམ་པ་ལྷན་རྒྱས་ཞུ་རྒྱུར། དེ་རིང་འདིར་ས་གནས་ཀྱི་མི་མང་སྤྱི་དང་། བྱེ་བྲག་ཕྱོགས་མཐའ་ཁག་ནས་འདུས་པའི་སེར་སྐྱ་མི་མང་དད་པ་དང་དམ་ཚིག་གཡོ་བ་མེད་པའི་བརྟན་བཞུགས་གནང་བ་ཞིག་རེད་ལ། ངོས་རང་ལ་བོད་གངས་ཅན་ལྗོངས་ཀྱི་གདུལ་བྱ་སྐྱེ་འགྲོ་ཡོངས་དང་། དེ་བཞིན་ཧི་མ་ཡ་ལའི་རི་རྒྱུད་དུ་ཡོད་པའི་གངས་ཅན་ལྗོངས་ཀྱི་ཆོས་བརྒྱུད་ལམ་ལུགས་གཅིག་པ་ཡིན་པ་ཡོངས་ཀྱིས་དེ་རིང་འདིར་ཆེད་དུ་འདུས་ཏེ་ཐུན་མོང་བརྟན་བཞུགས་གནང་བ་རེད། ངོས་རང་ལ་ཆ་བཞག་ན། མདོ་སྨད་ནས་སྐྱེས་ཏེ་དབུས་གཙང་དུ་བསླེབས་པ་དང་། དེ་ནས་གངས་ལྗོངས་ཀྱི་ལྷ་མི་ཀུན་གྱིས་གཅིག་ཏུ་ངོས་རང་ལ་ཡིད་ཆེས་དང་དད་པ་བྱས་ཡོད། ལོ་འདི་དག་རིང་ལ་ངོས་ཀྱིས་བོད་ཀྱི་ལྷ་མི་ཡོངས་རྫོགས་ལ་རེ་འདོད་བསྒྲུབ་པའི་ལས་འགན་འཁུར་བ་རེད། ད་ལྟ་བར་དུ་ཕྱིའི་རྐྱེན་ངན་ག་འདྲ་བྱུང་ཡང་རྐྱེན་ངན་ངོས་འཛིན་པའི་ཐོག་ནས་ངོས་ཀྱི་མི་ཚེ་འདི་ལྟར་བསྐྱལ་བ་རེད། གང་ལྟར་གངས་ལྗོངས་ཀྱི་གནས་ཆུང་ཆོས་རྒྱལ་མཚོན་པའི་དམ་ཚིག་ཅན་གྱི་སྲུང་མ་ཚོ་ལྷ་དངོས་སུ་ཞུགས་ཏེ། བོད་གངས་ཅན་གྱི་དོན་དག་བསྒྲུབ་པར་ལྷ་མི་ཟུང་འབྲེལ་བྱུང་ཡོད།  ལོ་མང་པོའི་རིང་ངོས་རང་གཙོ་བོ་ནི་ལྷ་ས་དང་། རྩེ་ཕོ་བྲང་། ནོར་བུ་གླིང་ག་བཅས་སུ་བསྡད་ནས་བོད་གངས་ཅན་གྱི་དོན་དག་བསྒྲུབ་པར་ངོས་ཀྱིས་འཁུར་གཙོ་བོ་བླངས་ཏེ་ཕྱིན་པ་རེད། ད་ལྟ་བར་དུ་ངོས་ཀྱིས་བོད་བསྟན་སྲིད་ཀྱི་དོན་དུ་ལྷག་བསམ་རྣམ་དག་བྱས་པ་ཡིན། འཇིག་རྟེན་པའི་ལྷ་དང་། འཇིག་རྟེན་པའི་དྲེགས་པ་ཚོ་བསྐུལ་མ་བྱས་ཡོད། ངོས་ཀྱིས་དངོས་ཡོད་གནས་ཚུལ་རན་པར་དཀར་ཕྱོགས་སྐྱོང་བའི་བོད་གངས་ཅན་གྱི་ལྷ་རྣམས་ལ་ལྷག་བསམ་རྣམ་དག་གིས་འཕྲིན་ལས་གཉེར་འདེགས་བྱས་པར་ཧུར་ཐག་བྱས་སོང་། ཞེས་གསུངས་སོང་།

ཡང་༧མགོན་པོ་གང་ཉིད་མཆོག་ནས། ངོས་རང་ལ་ཆ་བཞག་ནའང་ཆུང་དུས་ཡོངས་འཛིན་རྣམ་པའི་ཐུགས་རྗེ་བཀའ་དྲིན་ལ་བརྟེན་ནས་བསྡུས་གྲྭ་དང་། དབུ་མ། ཚད་མའི་གཞུང་བཅས་སྦྱངས་བ་རེད། མཛོད་ལ་དེ་འདྲ་རང་དོ་སྣང་མ་བྱས། མཛོད་ནང་རི་རབ་གླིང་ཕྲན་དང་གླིང་བཞི་སོགས་བཤད་ཡོད་པ་དེ་ངོས་རང་ཐེ་ཚོམ་ཡོད་པ་རེད། མཛོད་ཀྱི་ཐོག་ལ་ངོས་ཀྱིས་ཧ་ཅང་དོ་སྣང་ཆེན་པོ་བྱས་མེད། གང་ལྟར་དབུ་ཚད་ཀྱི་གཞུང་དེ་དག་ཧ་ཅང་ཡག་པོ་རེད། ང་ཚོའི་ནང་བསྟན་རིག་པའི་ཐོག་ནས་སེམས་ཁམས་རིག་པའི་སྐོར་ལ་གསུངས་ཡོད་པ་དེ་དག དེང་སང་ཚན་རིག་པ་ཚོས་དེའི་ཐོག་ནས་ལེགས་བྱ་མང་པོ་བླངས་ཏེ་ཧ་ཅང་ཕན་ཐོགས་ཡོད་བསྡད་པ་ཞིག་རེད། བོད་ནང་ལོ་ཡུན་དེ་དག་དུ་བསྡད་པ་རེད། རྐྱེན་ངན་མང་པོ་ཞིག་ཤར་སྟེ་ངོས་རང་མའོ་ཙེ་ཏུང་ལ་ཐེངས་མང་པོ་ཐུག་པ་རེད། ངེད་གཉིས་འཆམ་པོ་ཡོད། ཡིན་ནའང་ལྟ་གྲུབ་མི་འདྲ་བ་ཆགས་ཡོད་པའི་ཐོག བོད་ལའང་རྐྱེན་ངན་ཞིག་བྱུང་སྟེ། མཐར་ཐུག་ངོས་རང་བོད་ནས་ཐོན་དགོས་པ་ཞིག་བྱུང་བ་རེད། གང་ལྟར་བློ་མི་བདེ་བའི་ངང་སྣ་ཐོད་ལ་བརྒྱུད་ནས་རྒྱ་གར་ལ་འབྱོར་བ་རེད། ལོ་འདི་དག་གི་རིང་བསྟན་པའི་ཞབས་འདེགས་བསྒྲུབ་པ་དང་། ཧི་མ་ལ་ཡའི་མི་མང་ཙམ་མ་ཡིན་པར་འཛམ་གླིང་གི་གང་སར་ནས་ཆོས་དད་ཡོད་མེད་དངསྐྱེ་བ་སྔ་ཕྱིའི་སྐད་ཆ་མེད་པར་ཏཱ་ལའི་བླ་མ་ཞེས་པ་འཛམ་གླིང་གི་བླ་ན་མེད་པའི་དབུ་ཁྲིད་ཅིག་ལ་ངོས་འཛིན་བྱེད་ཀྱི་ཡོད། ནུབ་ཕྱོགས་རྒྱལ་ཁབ་ནང་མཚོན་ནའང་ངོས་རང་ལ་དགའ་མོས་ཧ་ཅང་མང་པོ་རེད། གང་ལྟར་ངོས་རང་ལ་མོས་པ་བྱེད་བསྡད་མཁན་རྣམས་ལ་དངོས་ཤུགས་བརྒྱུད་གསུམ་ནས་ཕན་ཐོགས་ཡོང་བའི་སྨོན་ལམ་ཞུ་རྒྱུ། ཞེས་བཀའ་སློབ་བསྩལ་སོང་།

གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།