རྒྱ་ནག་གི་ཕྱི་སྲིད་བློན་ཆེན་ཝང་ཡེས་ལ་ངོ་རྒོལ་བྱས་ཏེ་བཙན་བྱོལ་བོད་མིས་གཞིས་ལུས་བོད་མི་རྣམས་བརྗེད་མེད་པ་དང་བོད་དོན་འཐབ་རྩོད་བརྟན་པོ་ཡོད་པའི་བརྡ་ལན་གསལ་བོ་ཞིག་སྤྲད་ཡོད་སྐོར་བརྗོད།
རྒྱ་ནག་གི་ཕྱི་སྲིད་བློན་ཆེན་ཝང་ཡེས་རྒྱ་གར་གྱི་རྒྱལ་ས་ལྡི་ལིར་གཞུང་འབྲེལ་ཕྱོགས་བསྐྱོད་དུ་འབྱོར་བ་དང་བསྟུན། ལྡི་ལིའི་གནམ་ཐང་གི་ལམ་ཁར་བོད་རང་བཙན་སློབ་ཕྲུག་ཚོགས་པས་འཕྲེད་དར་ཐོག་ཝང་ཡེས་རྒྱ་གར་ནང་ཡོང་བར་ངོ་རྒོལ་ལས་འགུལ་སྤེལ་ཡོད་པ་དང་། རྒྱ་ནག་གཞུང་ཚབ་ཁང་གི་མདུན་དུ་བོད་ཀྱི་གཞོན་ནུ་ལྷན་ཚོགས་ཀྱིས་ངོ་རྒོལ་ལས་འགུལ་སྤེལ་ཡོད་ཅིང་། ཁ་སང་ལྡི་ལིའི་ཧེ་ཌར་བྷཌ་ (Hyderabad House)སྡོད་ཁང་དུ། ཝང་ཡེས་དང་རྒྱ་གར་བདེ་སྲུང་ལྷན་ཁང་གི་སློབ་སྟོན་པ་ཨ་ཇི་ཏི་ཌོ་ཝལ་(Ajit Do val) མཆོག་གཉིས་ས་མཚམས་རྩོད་རྙོག་གི་གནད་དོན་གྲོས་མོལ་བྱེད་སྐབས། བོད་ཀྱི་གཞོན་ནུ་ལྷན་ཚོགས་ཀྱི་ལས་འགུལ་བ་ ༣༠ ལྷག་གིས་རྒྱ་ནག་གཅིག་ཟེར་བའི་སྲིད་ཇུས་ཕྱིར་བསྡུ་དགོས་པའི་འབོད་ཚིག་བསྒྲགས་ནས་ངོ་རྒོལ་བྱས་ཏེ་འཛིན་བཟུང་བྱས་ཡོད་ཀྱང་། ཁ་སང་སྔ་དྲོ་ནས་ལྡི་ལིའི་རོ་ཧི་ནི་བོད་ཁྱིམ་སྡོད་ཁང་དུ་རྒྱ་གར་ཉེན་རྟོག་པས་དམ་དྲག་བྱས་ཏེ་དེར་ཡོད་མཐོ་རིམ་སློབ་གཉེར་བ་མང་པོ་ཞིག་ལས་འགུལ་ནང་མཉམ་ཞུགས་བྱས་ཐུབ་མེད་པ་རེེད།
ཐེངས་འདིའི་ངོ་རྒོལ་གྱི་སྐོར་ལ་རྒྱ་གར་ནང་གི་བོད་རང་བཙན་སློབ་ཕྲུག་ཚོགས་པའི་འགན་འཛིན་བསྟན་འཛིན་པ་སངས་ལགས་ཀྱིས་འདི་གའི་གསར་འགོད་པར། རྒྱ་ནག་གི་ཕྱི་སྲིད་བློན་ཆེན་ཝང་ཡེས་རྒྱ་གར་ནང་ས་མཚམས་དཀའ་རྙོག་དང་ཚོང་འབྲེལ་ཆེད་གྲོས་མོལ་བྱེད་དུ་ཡོང་ཡོད་པ་རེད། ཡིན་ནའང་ས་མཚམས་དེ་བོད་དང་རྒྱ་གར་བར་གྱི་ས་མཚམས་ཆགས་ཡོད་པ་དང་། བོད་བཙན་བཟུང་བྱེད་མཁན་གྱི་རྒྱ་ནག་དམར་པོའི་གཞུང་གི་དཔོན་པོ་ཞིག་རྒྱ་གར་དུ་བསླེབས་དུས། དམིགས་བསལ་བཙན་བྱོལ་གྱི་བོད་པ་རྣམས་ཀྱིས་རྣམ་འགྱུར་སྟོན་རྒྱུ་ཧ་ཅང་གལ་ཆེན་པོ་མཐོང་གི་འདུག ཝང་ཡེས་རྒྱ་གར་གྱི་གནམ་ཐང་དུ་འབྱོར་འཕྲལ་བོད་རང་བཙན་སློབ་ཕྲུག་ཚོགས་པས་ལམ་ཁའི་ཟམ་ཁར་ཝང་ཡེས་བོད་རང་བཙན་ཞེས་འཕྲད་དར་ཐོག་བརྡ་ལན་གསལ་བོ་འཁོད་པའི་ངོ་རྒོལ་བྱས་ཡོད། ངོ་རྒོལ་བྱེད་དགོས་པའི་རྒྱུ་མཚན་གཙོ་བོ་ནི་རྒྱ་ནག་གཞུང་གིས་བོད་ས་བཙན་བཟུང་བྱས་པ་ཙམ་མ་ཟད། བོད་ཀྱི་མི་རིགས་ཀྱི་ངོ་བོ་མཚོན་བྱེད་སྐད་ཡིག་རིག་གཞུང་བཅས་པ་རྩ་མེད་གཏོང་ཐབས་ཀྱི་སྲིད་ཇུས་ངན་པ་སྤེལ་བཞིན་ཡོད་པ་རེད། བཙན་བྱོལ་བོད་མི་རྣམས་ཀྱིས་བོད་ཀྱི་རྒྱལ་ཁབ་དང་བོད་ནང་གི་བོད་མི་རྣམས་བརྗེད་མེད་པ་དང་། བོད་དོན་འཐབ་རྩོད་བརྟན་པོ་ཡོད་པའི་བརྡ་ལན་གསལ་བོ་ཞིག་ཀྱང་ཆགས་ཀྱི་ཡོད། ཐེངས་འདིའི་ས་མཚམས་ཀྱི་གྲོས་མོལ་ནི་རྒྱ་གར་དང་བོད་ཀྱི་ས་མཚམས་ཡིན་པས་རྒྱ་ནག་གཞུང་གིས་འཕགས་བོད་གཉིས་ཀྱི་ས་མཚམས་ཐོག་འབྲེལ་བ་མེད་པའི་བརྡ་ལན་སྤྲད་ཡོད། རྒྱ་གར་གཞུང་ལ་དྲན་གསོ་ཞུ་རྒྱུ་ཞིག་ལ་རྒྱ་ནག་གཞུང་གིས་བོད་བཙན་བཟུང་བྱས་རྗེས་ཕྱི་ལོ་ ༡༩༦༢ ལོར་ས་མཚམས་སུ་དམག་འཁྲུག་བྱུང་ཡོད། དེ་བཞིན་འབྲོག་ལམ་དང་གྷལ་ཝན་སོགས་ཀྱི་ས་མཚམས་ཀྱི་དམག་འཁྲུག་མུ་མཐུད་བྱུང་ཡོད་པས་རྒྱ་ནག་གཞུང་ལ་ཡིད་ཆེས་བྱེད་ཀྱི་མེད་པ་གསལ་བོ་བསྟན་ཡོད་ལ། བོད་རང་བཙན་མ་འཐོབ་བར་དུ་རྒྱ་གར་གྱི་ས་མཚམས་སུ་བདེ་འཇགས་ཡོང་ཐུབ་ཀྱི་མེད་པའི་འབོད་སྐུལ་ཞུས་ཡོད། ཅེས་འགྲེལ་བརྗོད་གནང་བྱུང་།
དེ་བཞིན་བོད་ཀྱི་གཞོན་ལྷན་ཚོགས་ཀྱི་ཚོགས་གཞོན་བཀྲ་ཤིས་དར་རྒྱས་ལགས་ཀྱིས། རྒྱ་གར་གྱི་རྒྱལ་ས་ལྡི་ལི་རུ་བོད་ཀྱི་གཞོན་ནུ་ལྷན་ཚོགས་ཀྱིས་དགྲ་བོ་རྒྱ་ནག་གཞུང་གི་མགོ་དཔོན་ཝང་ཡེས་རྒྱ་གར་རང་དབང་ལུང་པའི་ནང་བསླེབས་པར་མཐའ་གཅིག་ཏུ་ཉིན་གྲངས་གཉིས་རིང་ངོ་རྒོལ་ལས་འགུལ་སྤེལ་ཡོད། ལས་འགུལ་སྤེལ་དགོས་དོན་གཙོ་བོ་བོད་ནང་རྒྱ་ནག་གཞུང་གིས་ཛ་དྲག་གི་སྲིད་ཇུས་ལག་བསྟར་བྱེད་བཞིན་པར་འགྱུར་བ་མ་བཏང་བ་དང་། བོད་ཀྱི་བདེན་མཐའ་མ་སེལ་བར་དུ་བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་གཞུང་གི་མགོ་དཔོན་སུ་འདྲ་ཞིག་བསླེབས་ཀྱང་ངོ་རྒོལ་བྱེད་རྒྱུ་གསལ་བོ་ཆགས་ཡོད། ཐེངས་འདིར་རྒྱ་གར་དང་རྒྱ་ནག་གཉིས་ཀྱི་ས་མཚམས་རྩོད་རྙོག་དང་ཚོང་འབྲེལ་གྱི་གྲོས་མོལ་བྱེད་ཀྱི་ཡོད་པ་དེར། བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་གར་ལ་རྒྱ་ནག་ནི་ཡིད་ཆེས་བྱ་རྒྱུ་མེད་པའི་རྒྱལ་ཁབ་ཅིག་ཡིན་པ་གསལ་སྟོན་བྱས་ཡོད། ཟླ་འདིའི་ཕྱི་ཚེས་ ༡༨ ཉིན་རྒྱ་ནག་ཕྱི་སྲིད་བློན་ཆེན་རྒྱ་གར་དུ་འབྱོར་མ་ཐག་ལྡི་ལི་གཞུང་ཚབ་ཁང་གི་མདུན་དུ་ངོ་རྒོལ་ལས་འགུལ་སྤེལ་ཡོད་ལ། དེ་བཞིན་ཁ་སང་རྒྱ་གར་གྱི་མགྲིན་ཚབ་པ་དང་ཐུག་འཕྲད་བྱེད་སྐབས་བོད་ཀྱི་གཞོན་ནུ་ལྷན་ཚོགས་ཀྱི་དབུས་ས་གཉིས་ཀྱིས་ངོ་རྒོལ་བྱས་ཡོད། ཅེས་འགྲེལ་བརྗོད་གནང་བྱུང་།
ཡང་ཁོང་གིས། ད་ལན་གྱི་ངོ་རྒོལ་ཁྲོད་གཞོན་སྐྱེས་རྣམས་ཀྱི་ཚོར་བ་དྲག་པོའི་ཐོག་འཕགས་བོད་གཉིས་ཀྱི་ས་མཚམས་ཡིན་པ་དང་། རྒྱ་ནག་ནི་ཡིད་ཆེས་བྱེད་སའི་རྒྱལ་ཁབ་ཅིག་མིན་པ། དེ་བཞིན་ཕྱི་ལོ་ ༡༩༦༢ ལོའི་རྒྱ་དཀར་ནག་གཉིས་ཀྱི་གནད་དོན་གསལ་འདོན་གྱིས་ངོ་རྒོལ་བྱས་ཡོད། ཐེངས་འདིའི་ངོ་རྒོལ་ཁྲོད་གསར་ལམ་ཁག་ ༦༠ ནང་གསར་འགྱུར་འདོན་ཐུབ་པ་བྱུང་། རྒྱ་གར་གཞུང་གིས་ཀྱང་རྒྱལ་ཁབ་གཉིས་བར་གྱི་འབྲེལ་ལམ་ཆེད་ལས་འགུལ་མི་སྤེལ་བའི་ཐོག་དམ་དྲག་བྱས་ཡོད་ཀྱང་། བོད་ནང་གི་བོད་མིའི་མགྲིན་པ་ཞིག་ཡིན་པའི་ཆ་ནས་ལས་འགན་འཁུར་ཡོད་པ་དང། མ་འོངས་བའང་དགྲ་བོ་རྒྱ་ནག་གཞུང་གིས་མགོ་དཔོན་སུ་འདྲ་ཞིག་བསླེབས་ཀྱང་། བོད་ནང་གི་གནས་སྟངས་ཐོག་གསལ་ཁ་མ་ཆགས་བར་དུ་མུ་མཐུད་ངོ་རྒོལ་ལས་འགུལ་སྤེལ་རྒྱུའི་གདེང་སྤོབས་ཆེན་པོ་ཡོད་འདུག ཅེས་འགྲེལ་བརྗོད་གནང་བྱུང་།
ཟླ་འདིའི་ཕྱི་ཚེས་ ༡༨ ཉིན་གྱི་ཕྱི་དྲོར་ཝང་ཡེས་རྒྱ་གར་གྱི་རྒྱལ་ས་ལྡི་ལིར་འབྱོར་བ་དང་བསྟུན། ངོ་རྒོལ་བྱས་ཏེ་འཛིན་བཟུང་བྱས་པའི་བོད་ཀྱི་གཞོན་ནུ་ལྷན་ཚོགས་ཀྱི་ལས་འགུལ་བ་ ༧ དང་། དེ་བཞིན་ཁ་སང་འཛིན་བཟུང་བྱས་པའི་ལས་འགུལ་བ་ ༣༠ བཅས་ཀློད་གྲོལ་བཏང་ཟིན་ཡོད་འདུག
གསར་འགོད་པ། བྱམས་པ་ཚེ་རེིང་། རྩོམ་སྒྲིག་བྱེད་མཁན། པདྨ་མཚོ།
