ཆུ་ཚོད་ཉེར་བཞིའི་རིང་ཟས་བཅད་ངོ་རྒོལ་གྱི་ལས་འགུལ་སྤེལ་བཞིན་འདུག  

ནེའུ་ཡོག་བོད་རང་བཙན་སློབ་ཕྲུག་ཚོགས་པས་ད་ལྟ་ཞི་ཅིན་ཕིན་བོད་ཀྱི་རྒྱལ་ས་ལྷ་སར་ཡོང་ནས་བོད་ནང་གི་འཛུགས་སྐྲུན་དྲིལ་བསྒྲགས་བྱེད་མུས་ཡིན་ཡང་དཔའ་མཛངས་ལྡན་པའི་མགོན་པོ་སྐྱིད་ལགས་ཀྱིས་བོད་ཀྱི་རྒྱལ་ས་ལྷ་ས་ནས་བོད་ནང་གི་དངོས་ཡོད་ཀྱི་གནས་སྟངས་གསལ་སྟོན་བྱས་ཡོད་སྐོར་བརྗོད་འདུག

ཟླ་འདིའི་ཕྱི་ཚེས་ ༡༨ ཉིན་ཆབ་སྲིད་བཙོན་པ་ཚོང་དཔོན་རྡོ་རྗེ་བཀྲ་ཤིས་ལགས་ཀྱིས་གཅེན་མོ་མགོན་པོ་སྐྱིད་ལགས་ཀྱིས་བོད་ཀྱི་རྒྱལ་ས་ལྷ་སར་རང་སྲོག་གཅོད་གྲབས་ཀྱིས་རྒྱ་ནག་གཞུང་ལ་ངོ་རྒོལ་ལས་འགུལ་སྤེལ་ཡོད་པ་ལྟར། དེ་རིང་ཨ་རིའི་ནེའུ་ཡོག་གི་བོད་རང་བཙན་སློབ་ཕྲུག་ཚོགས་པའི་ཚོགས་མི་ཁག་ཅིག་དང་བོད་རིགས་གཞོན་སྐྱེས་ཁག་ཅིག་གིས། ནེའུ་ཡོག་རྒྱ་ནག་གཞུང་ཚབ་ཁང་གི་ཕྱི་རོལ་དུ་བོད་ཀྱི་ཕྱུག་བདག་ཆེན་མོ་རྡོ་རྗེ་བཀྲ་ཤིས་ལགས་གང་མགྱོགས་ཀློད་གྲོལ་དང་། གཅེན་གཅུང་གཉིས་གང་མགྱོགས་ཐུག་འཕྲད་བྱ་འཇུག་དགོས་པའི་དགོས་འདུན་འོག་ཆུ་ཚོད་ཉེར་བཞིའི་རིང་ཟས་བཅད་ངོ་རྒོལ་གྱི་ལས་འགུལ་ཞིག་སྤེལ་མུས་ཡིན་འདུག 

ཟས་བཅད་ངོ་རྒོལ་གྱི་ལས་འགུལ་མགོ་འཛུགས་བྱེད་སྐབས་ཨ་རིའི་བོད་རང་བཙན་སློབ་ཕྲུག་ཚོགས་པའི་ལས་འགུལ་འགན་འཛིན་བསྟན་འཛིན་སྨིན་ལེགས་ལགས་ཀྱིས་ངོ་དེབ་ཐད་གཏོང་བརྒྱུད། དེ་རིང་ཞོགས་པ་ང་ཚོ་གཉིད་ལས་སད་དུས། མགོན་པོ་སྐྱིད་ལགས་ཀྱི་བརྙན་ཐུང་ཞིག་མཐོང་བའི་ནང་། ཁོང་མོས་དགོས་འདུན་གཙོ་བོ་དེ། ཁོང་མོའི་སྤུན་མཆེད་རྡོ་རྗེ་བཀྲ་ཤིས་ལགས་མི་ལོ་བཅུ་བཞི་བཅོ་ལྔ་ཙམ་རྒྱ་ནག་གཞུང་གིས་བཙོན་འཇུག་བྱས་ཏེ། ཕན་ཚུན་མཐོང་ཡ་རག་མེད་པ་རེད། དེ་བཞིན་རྒྱ་ནག་གཞུང་གིས་ཁོང་མོར་ཉེས་རྡུང་དང་མཐོང་ཆུང་བྱེད་ཀྱིན་འདུག་པས། ང་ཚོ་ནེའུ་ཡོག་གི་གཞོན་སྐྱེས་ཚོས་གཅིག་མ་བྱས་ན་མི་འགྲིག་པའི་ཚོར་བ་ཞིག་བྱུང་། ད་ལྟ་ང་ཚོ་རྒྱ་ནག་གཞུང་ཚབ་ཁང་གི་ཕྱི་རོལ་དུ་ཡོད། ང་ཚོས་ཆུ་ཚོད་ཉེར་བཞིའི་རིང་ཁ་ལག་མ་ཟ་ནས་བསྡད་དེ། ང་ཚོ་བོད་མི་ཚང་མ་མགོན་པོ་སྐྱིད་དང་། རྡོ་རྗེ་བཀྲ་ཤིས་མཉམ་དུ་ཡོད། ཅེས་བརྗོད་འདུག 

ཡང་ཁོང་མོས། ད་ལྟ་རྒྱ་ནག་གཞུང་གི་མགོ་ཁྲིད་ཞི་ཅིན་ཕིན་ཡང་བོད་ཀྱི་རྒྱལ་ས་ལྷ་སར་ཡོང་སྟེ། རྒྱ་ནག་གཞུང་གིས་འདས་པའི་མི་ལོ་དྲུག་ཅུའི་རིང་བོད་རང་སྐྱོང་ལྗོངས་ཟེར་བའི་ནང་འཛུགས་སྐྲུན་དང་འཚོ་བ་ཡར་སྐྱེད་བཏང་ཡོད་ལུགས་ཀྱི་དམར་པོའི་དྲིལ་བསྒྲགས་ཤིག་བྱེད་མུས་ཡིན་ཡང་། དཔའ་མཛངས་ལྡན་པའི་མགོན་པོ་སྐྱིད་ཀྱིས་བོད་ཀྱི་རྒྱལ་ས་ལྷ་ས་ནས་བོད་ནང་གི་དངོས་ཡོད་ཀྱི་གནས་སྟངས་དང་། རྒྱ་ནག་གཞུང་གིས་བོད་ནང་ཇི་ལྟར་དྲག་གནོན་བྱེད་མུས་ཡིན་པའི་ཐད་གསལ་སྟོན་བྱེད་མུས་ཡིན་སྟབས། ཨ་རིའི་ནེའུ་ཡོག་གི་བོད་རང་བཙན་སློབ་ཕྲུག་ཚོགས་པའི་ཚོགས་མི་ཁག་ཅིག་གིས། བོད་ཀྱི་ཕྱུག་བདག་ཆེན་མོ་རྡོ་རྗེ་བཀྲ་ཤིས་ལགས་དང་། མགོན་པོ་སྐྱིད་ལགས། དེ་བཞིན་རྒྱ་ནག་གཞུང་གི་བཙན་གནོན་འོག་ཡོད་པའི་བོད་མི་རྣམས་ཀྱི་ཆེད་དུ་ཟས་བཅད་ངོ་རྒོལ་བྱེད་ཀྱི་ཡོད་སྐོར་བརྗོད་འདུག

ཡང་ཨ་རིའི་བོད་རང་བཙན་སློབ་ཕྲུག་ཚོགས་པའི་འགན་འཛིན་པདྨ་སྒྲོལ་མ་ལགས་ཀྱིས་ཐད་གཏོང་བརྒྱུད། ད་ལན་ནེའུ་ཡོག་བོད་རང་བཙན་སློབ་ཕྲུག་ཚོགས་པའི་ཟས་བཅད་ངོ་རྒོལ་གྱི་ལས་འགུལ་སྤེལ་དགོས་པའི་ཐག་གཅོད་བྱུང་རྗེས། ས་གནས་བོད་རིགས་ན་གཞོན་མང་པོ་ཞིག་གིས་མགྲིན་གཅིག་གིས་རྒྱབ་སྐྱོར་དང་ལས་འགུལ་ཁྲོད་མཉམ་ཞུགས་ཀྱིས། ད་བར་ཆུ་ཚོད་བཅུ་བཞིིའི་རིང་ནེའུ་ཡོག་རྒྱ་ནག་གཞུང་ཚབ་ཁང་གི་ཕྱི་རོལ་དུ་ཟས་བཅད་ངོ་རྒོལ་གནང་བར་བསྔགས་བརྗོད་ཞུ་འོས་པ་ཞིག་ཡིན་པའི་ཁར། ལས་འགུལ་ཁྲོད་མཉམ་ཞུགས་བྱེད་མཁན་ཁག་ཅིག་ནི་རང་ལོ་བཅོ་བརྒྱད་བཅུ་དགུ་ཙམ་ཡིན་ཡང་། ཆེད་དུ་སེམས་ཤུགས་སྐྱེད་ནས་ལས་འགུལ་ཁྲོད་མཉམ་ཞུགས་བྱས་ཡོད་སྟབས། བོད་ནང་གི་བོད་མི་རྣམས་ལའང་སེམས་ཤུགས་རྟག་ཏུ་ཆག་མི་ཉན་པའི་རེ་སྐུལ་ཞུས་སོང་། 

བོད་ཀྱི་ཕྱུག་བདག་ཆེན་མོ་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་ལགས་ཀྱིས་བོད་རང་སྐྱོང་ལྗོངས་འབྲིང་རིམ་མི་མང་ཁྲིམས་ཁང་ཟེར་བ་དེས་རྡོ་རྗེ་བཀྲ་ཤིས་ལགས་ལ་དྲང་བདེན་མིན་པའི་ཁྲིམས་ཐག་བཅད་པར་བསྐྱར་དུ་ཁྲིམས་ཞིབ་དགོས་པའི་ཞི་བའི་འབོད་སྐུལ་ལས་འགུལ་ཐེངས་མང་སྤེལ་ཏེ། རྒྱ་གཞུང་ཉེན་རྟོག་པས་ཁོང་མོར་གཅར་རྡུང་བཀག་ཉར་དང་བཙན་གྱིས་ཕ་ཡུལ་བསྐྱལ་བ་སོགས་བྱས་ཏེ་ཉེན་བརྡ་ཐེངས་མང་བཏང་ཡོད་ཀྱང་། མགོན་པོ་སྐྱིད་ལགས་ཀྱིས་དཔའ་ངར་ཞུམ་མེད་ཀྱིས་ཞུ་འབོད་ལས་འགུལ་སྤེལ་ཡོད་པར་བརྟེན། ཟླ་འདིའི་ཕྱི་ཚེས་ ༡༩ ཉིན་རྒྱ་གཞུང་ཉེན་རྟོག་པས་ཁོང་མོ་བཙན་གྱིས་གཡག་མགྲོན་ཁང་གི་ནང་དུ་བཅུག་སྟེ་ཕྱིར་འགྲོ་མ་བཅུག་པའི་རྐྱེན་གྱིས།  ཕྱི་ཚེས་ ༢༠ ཉིན་ཁོང་མོ་མགྲོན་ཁང་དེའི་ཉིས་ཐོག་ནས་མཆོངས་ཏེ་རྐེད་པ་དང་རྐང་ལག་སོགས་ལ་སྐྱོན་བྱུང་ཡོད་པ་རེད།

འབྲེལ་ཡོད་གནས་ཚུལ། https://tibettimes.net/2025/08/20/245200/

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།