རྒྱ་ནག་གཞུང་གིས་ཕྱི་ཕྱོགས་སུ་སྒོར་མོ་བསྐུར་ཟེར་བར་ཁ་གཡར་ནས་གཙང་དགོན་པའི་གྲྭ་མཛེས་དགའ་རྒྱ་མཚོ་ལགས་འཛིན་བཟུང་བྱས་ཏེ་ཟླ་གཉིས་ཟིན་ལ་ཉེ་ཞིང་། ད་ལྟའི་ཆར་ཁོང་གང་དུ་ཡོད་མེད་དང་བདེ་འཇགས་ཡིན་མིན་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།
འདི་གའི་གསར་ཁང་ལ་ཁུངས་ལྡན་གནས་ཚུལ་འབྱོར་གསལ་ལྟར་ན། དུས་རབས་ཉེར་གཅིག་པའི་བླ་ན་མེད་པའི་སྟོན་པ་ཆེན་པོ་༸གོང་ས་རྒྱལ་བ་རིན་པོ་ཆེ་མཆོག་གི་སྐུའི་གོ་སྟོན་གྱི་འཁྲུངས་སྐར་སྲུང་གཙི་ཞུ་བཞིན་པའི་སྐབས་ཏེ། ཕྱི་ཟླ་ ༧ ཚེས་ ༢ ཡས་མས་ཙམ་ལ་མདོ་སྨད་རྨ་ལྷོ་སོག་རྫོང་ནས་ཡིན་པའི་གཙང་དགོན་པའི་དགེ་འདུན་པ་མཛེས་དགའ་རྒྱ་མཚོ་ལགས། རྒྱ་གཞུང་ཉེན་རྟོག་པས་མཚོ་སྔོན་གྱི་ཟི་ལིང་གྲོང་ཁྱེར་ནས་འཛིན་བཟུང་བཀག་ཉར་བྱས་འདུག་ཅིང་། ད་ལྟའི་བར་དུ་གཉེན་ཉེ་སོགས་འབྲེལ་ཡོད་མི་གཅིག་ལའང་ཐུག་འཕྲད་བྱེད་དུ་བཅུག་མེད་པའི་ཁར། ད་ལྟ་རྒྱ་ནག་གིས་ཁོང་གང་དུ་འཛིན་བཟུང་བཀག་ཉར་བྱས་ཡོད་མེད་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།
འདི་གར་འབྱོར་བའི་ཁུངས་ལྡན་གནས་ཚུལ་ལྟར་ན། རྒྱ་གཞུང་ཉེན་རྟོག་པས། གྲྭ་མཛེས་དགའ་རྒྱ་མཚོ་ལགས་འཛིན་བཟུང་བྱེད་དོན་རྒྱ་གར་དུ་སྒོར་མོ་བསྐུར་བའི་ནག་ཉེས་བཀལ་ཡོད་ཀྱང་འདི་ཕྱོགས་ཀྱི་སྤུན་མཆེད་ནས་དེ་ལྟར་བྱུང་མེད་ཅེས་གླེང་བཞིན་པ་དང་། འབྲེལ་ཡོད་ཚོས་གནས་ཚུལ་གཞན་ཞིག་གིས་བཟུང་བར་དོགས་པ་བྱེད་ཀྱིན་ཡོད་འདུག
ཕྱི་ཟླ་ ༧ པའི་ཚེས་མགོར་ཁོང་གཟུགས་གཞི་བདེ་མིན་གྱི་རྐྱེན་གྱིས་གྲོང་ཁྱེར་ཟི་ལིང་དུ་སྨན་པར་བསྟེན་གཏུག་བྱེད་པར་ཕྱིན་སྐབས། རྒྱ་གཞུང་ཉེན་རྟོག་པས་ཟི་ལིང་ནས་འཛིན་བཟུང་བཀག་ཉར་བྱས་ཏེ་ད་བར་ཟླ་གཉིས་ཙམ་ཟིན་ཉེའི་རིང་གཉེན་ཉེ་ཚོར་ངོ་ཐུག་བྱེད་བཅུག་མེད་པར་མ་ཟད། ད་བར་གང་དུ་ཡོད་མེད་རྩད་གཅོད་བྱེད་ཐབས་ཀྱང་དཀའ་བའི་གནས་སུ་གྱུར་འདུག
ཕྱི་ལོ་ ༢༠༠༨ ལོར་ཁོང་གི་མ་སྤུན་བུ་མཁས་གྲུབ་རྒྱ་མཚོ་ལགས་འཛིན་བཟུང་བྱས་པ་ནས་བཟུང་གྲྭ་མཛེས་དགའ་རྒྱ་མཚོ་ལགས་གཙོ་བོར་གྱུར་བའི་གཉེན་ཉེ་དང་འབྲེལ་ཡོད་མང་པོ་ཞིག་ལ་རྒྱ་གཞུང་གིས་ལྟ་རྟོག་དང་དོགས་ཟོན་བྱ་སའི་ཁོངས་སུ་བཅུག་སྟེ་ཕྱི་ཕྱོགས་སུ་འབྲེལ་ལམ་ཡོད་སྐོར་བརྗོད་ནས་སྐད་ཆ་འདྲི་བ་དང་ཉེན་བརྡ་གཏོང་བ། དུས་ཚོད་ངེས་མེད་ཉེན་རྟོག་ཁང་དུ་སྐད་གཏོང་བ་སོགས་སུན་གཙེར་ཐེངས་མང་པོ་བཟོས་མྱོང་ཡོད་འདུག
དགེ་འདུན་པ་མཛེས་དགའ་རྒྱ་མཚོ་ནི། ཕྱི་ལོ་ ༢༠༠༢ ལོར་རྒྱ་གར་དུ་ཕེབས་ཏེ། སེར་བྱེས་གྲྭ་ཚང་དུ་ལོ་གཅིག་ཙམ་རིང་སློབ་གཉེར་བྱས་རྗེས། ཕྱི་ལོ་ ༢༠༠༣ ལོར་ཕྱིར་ཕ་ཡུལ་དུ་ལོག་སྟེ་རྭ་རྒྱའི་སློབ་གྲྭ་རུ་སློབ་སྦྱོང་བྱས། སློབ་མཐར་ཕྱིན་རྗེས་གཙང་དགོན་པའི་སློབ་གྲྭ་ལྔ་རིག་ལེགས་བཤད་གླིང་གི་དགེ་རྒན་བྱས། ད་ལྟའང་སློབ་གྲྭ་དེའི་བོད་ཡིག་དགེ་རྒན་གནང་མུས་ཡིན་འདུག ཁོང་ད་ལྟ་དགུང་གྲངས་ ༤༨ ཡིན་པ་དང་། ཕ་བསོད་དབང་དང་མ་བཀྲ་ཤིས་གཉིས་ལ་བུ་གསུམ་དང་བུ་མོ་གསུམ་བཅས་ཁྱོན་བུ་རྒྱུད་དྲུག་ཡོད་པའི་ནང་གི་ཆེ་བ་དེ་ཡིན་འདུག
གསར་འགོད་པ། སྐལ་བཟང་སྦྱིན་པ།
