རྒྱ་གར་གྱི་སྲིད་བློན་མུ་དྷི་མཆོག་མི་ལོ་བདུན་གྱི་རྗེས་སུ་རྒྱ་ནག་ཏུ་ཕེབས་ནས་རྒྱ་དཀར་ནག་བར་གྱི་མཉམ་འབྲེལ་ལས་དོན་ཡར་རྒྱས་དང་ཧིན་བོད་མཐའ་མཚམས་ཁུལ་གྱི་རྙོག་གླེང་ཞི་འགྲིག་སོགས་ཀྱི་ཐད་ལ་གླེང་སློང་གནང་འདུག
Shanghai Cooperation Organization (SCO) Summit in Tianjin on August 31, 2025. (Photo by Alexander KAZAKOV / POOL / AFP)
རྒྱ་གར་གྱི་སྲིད་བློན་མུ་དྷི་མཆོག་ཉིན་གྲངས་གསུམ་རིང་རྒྱ་ནག་ཏུ་གཞུང་འབྲེལ་ཕྱོགས་ཕེབས་གནང་གི་ཡོད་པ་དང་བསྟུན། ཁ་སང་ཕྱི་ཚེས་ ༣༡ ཉིན་རྒྱ་ནག་གི་མགོ་ཁྲིད་ཞི་ཅིན་ཕིན་དང་ཨུ་རུ་སུའི་མགོ་ཁྲིད་པུ་ཊིན་གཉིས་ཀྱིས་ཐུག་འཕྲད་བྱས་ཏེ། མཉམ་ལས་དང་ཚོང་དོན་གྱི་ཐད་ལ་གླེང་སློང་གནང་ཡོད་པ་མ་ཟད། དེ་རིང་ཕྱི་ཚེས་ ༡ ཉིན་མུ་དྷི་མཆོག་ཧྲང་ཧེ་མཉམ་འབྲེལ་ལྷན་ཚོགས་ཀྱི་གླེང་སྟེགས་(Shanghai Cooperation Organisation summit) སུ་མཉམ་ཞུགས་གནང་འདུག་ལ། དེ་ནི་སྲིད་བློན་མུ་དྷི་ལོ་ངོ་བདུན་གྱི་རྗེས་སུ་རྒྱ་ནག་ཏུ་སྐྱོད་ཐེངས་ཐོག་མར་གྱུར།
གནད་དོན་དེ་དང་འབྲེལ་ནས་སྐུ་ཞབས་མུ་དྷི་མཆོག་སྒེར་གྱི་ཨེག་སི་སྤྱི་ཚོགས་དྲ་ལམ་དུ། སྐུ་ཞབས་པུ་ཊིན་དང་ཐུག་འཕྲད་བྱ་རྒྱུ་བྱུང་བ་ནི་རྟག་ཏུ་དགའ་འོས་པ་ཞིག་རེད། ཅེས་དང་། ད་ལན་གྱི་གླེང་སྟེགས་འདིའི་སྟེང་ནས་པུ་ཊིན་དང་ཞི་ཅིན་ཕིན་གཉིས་དང་ལྷན་དུ་བསམ་ཚུལ་ལྷུག་པོ་བརྗེ་རེས་བྱ་རྒྱུ་ཡིན། ཞེས་གསུངས་འདུག
དེ་བཞིན་ལྷན་ཚོགས་དེ་དང་བསྟུན་རྒྱ་དཀར་ནག་གཉིས་ཀྱི་མགོ་ཁྲིད་ཐུག་འཕྲད་སྐབས། ཕྱོགས་གཉིས་ཀྱིས་ཧིན་བོད་མཐའ་མཚམས་ཁུལ་དུ་བདེ་འཇགས་དང་བརྟན་བརླིང་ཡོང་ཐབས་ཀྱི་ཐད་ལ་གླེང་སློང་དང་། ཕྱོགས་གཉིས་ཀྱི་དམག་དོན་གྱི་དཀའ་ངལ་སེལ་ཐབས། གནམ་གྲུ་ཐད་འཕུར་གྱི་ལས་དོན་སོགས་ཀྱི་ཐད་མཉམ་ལས་དང་། རྒྱ་ནག་གཞུང་གིས་འབྱུང་འགྱུར་མི་ལོ་གསུམ་གྱི་ནང་ཚུད་ཧྲང་ཧེ་མཉམ་འབྲེལ་ལྷན་ཚོགས་ཀྱི་གླེང་སྟེགས་ཀྱི་ཚོགས་མི་རྒྱལ་ཁབ་རྣམས་ལ་རྒྱ་སྒོར་ཐེར་འབུམ་གཉིས་རེའི་རོགས་རམ་དང་རྒྱ་སྒོར་ཐེར་འབུམ་ ༡༠ རེའི་མ་འཇོག་བྱ་རྒྱུ་ཡིན་ལུགས་བསྒྲགས་ཡོད་པའི་མུར། རྒྱ་དཀར་ནག་གཉིས་ཏེ་ཁྱིམ་མཚེས་རྒྱལ་ཁབ་གཉིས་ཀྱིས་མཐུན་སྒྲིལ་བྱས་ཏེ། ཕན་ཚུན་གྱི་མཛའ་འབྲེལ་སྲ་བརྟན་དང་མཉམ་ལས་བྱས་པ་ནི་བཟང་ཕྱོགས་ཀྱི་གདམ་ག་ཞིག་རེད། འབྲུག་(རྒྱ་ནག) དང་གླང་ཆེན་(རྒྱ་གར) གཉིས་ཀྱི་ཞབས་བྲོ་མཉམ་དུ་འཁྲབ་དགོས་ལུགས་བཤད་འདུག
སི་ཨན་ཨན་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་གར་གཞུང་གིས་ཨུ་རུ་སུའི་སྣུམ་ཉོ་ཚོང་ཤུགས་ཆེན་བྱེད་ཀྱི་ཡོད་སྟབས། ཟླ་སྔ་མར་ཨ་རིའི་སྲིད་འཛིན་སྐུ་ཞབས་ཊོམ་ཕུ་མཆོག་གིས། རྒྱ་གར་ལ་ཚོང་དོན་གྱི་ཉེས་ཆད་བཅད་ཡོད་པས། ད་ལན་སྐུ་ཞབས་མུ་དྷི་མཆོག་གིས་ཞི་དང་པུ་ཊིན་ལ་ཐུག་འཕྲད་བྱས་པ་དེར་ཨ་རིས་དོ་སྣང་ཆེན་པོས་ལྟ་ཉན་བྱེད་མུས་ཡིན་པའི་ཁར། ཨེ་ཤ་ཡའི་སྟོབས་ཆེན་རྒྱལ་ཁབ་གཉིས་ཀྱི་མཉམ་འབྲེལ་ལས་དོན། ཕྱོགས་གཉིས་ཀྱི་གྲོས་མཐུན་ཁག་སོགས་ཀྱི་ཐད་ལ་ལྟ་ཉན་བྱེད་མུས་ཡིན་སྐོར་གསལ་འདུག་ལ། རྒྱ་དཀར་ནག་དང་ཨུ་རུ་སུ་བཅས་ཀྱི་མགོ་ཁྲིད་མང་དག་ཐུག་འཕྲད་དང་། ཕྱོགས་སོ་སོའི་མཉམ་ལས་དང་། འབྲེལ་ལམ་སོགས་སྲ་བརྟན་ཚུགས་ཐབས་བྱེད་མུས་ཡིན་པ་དེས། ཨ་རི་དང་མཐུན་ཕྱོགས་རྒྱལ་ཁབ་ཁག་གིས་དོ་སྣང་ཆེ་ཤོས་ཀྱི་གནད་དོན་ཞིག་ཏུ་གྱུར་ཡོད་འདུག
དེ་བཞིན་རྒྱ་གར་དང་ཨུ་རུ་སུའི་མགོ་ཁྲིད་གཉིས་སླར་ཡང་ཐུག་འཕྲད་ཀྱིས། ཕྱོགས་གཉིས་ཀྱི་སྣུམ་ཚོང་གི་ལས་དོན་ཡར་སྐྱེད་དང་། ཕྱོགས་གཉིས་ཀྱི་ཚོང་དོན་གྱི་སྒོ་ཁྲལ་ཚུད་པའི་གནད་དོན་ཁག་ཅིག་གི་ཐད་གླེང་སློང་བྱས་ཡོད་ཅིང་། རྒྱ་གར་དང་ཨུ་རུ་སུ་གཉིས་ལ་གྲང་དམག་གི་དུས་ནས་ཕྱོགས་གཉིས་ཀྱི་མཐའ་མཚམས་འགོག་སྲུང་དང་མཉམ་འབྲེལ་ཐབས་ཇུས་ཀྱི་ཐོག་ནས་འབྲེལ་ལམ་ཟབ་མོ་ཡོད་ཅིང་། ཨུ་རུ་སུས་རྒྱ་གར་ལ་དམག་དོན་གྱི་མཚོན་ཆ་ཚོང་འགྲེམས་བྱེད་ཀྱི་ཡོད་ལ། ད་བར་ཕྱོགས་གཉིས་ཀྱི་མཉམ་འབྲེལ་ནུས་པ་ལ་བརྟེན་ནས། འཕྲུལ་རིག་དང་། ཚན་རྩལ་སོགས་ཀྱི་ཐད་ལ་མཉམ་ལས་ཤུགས་ཆེན་བྱེད་མུས་ཡིན་པ་མ་ཟད། ལྷག་པར་དུ་རྒྱ་གར་ནི་འཛམ་གླིང་ཁྲོད་ཨུ་རུ་སུ་ལ་ས་སྣུམ་མཁོ་འདོན་བྱེད་མཁན་གཙོ་བོར་གྱུར་ཡོད།
ད་ལན་རྒྱ་ནག་གིས་གོ་སྒྲིག་བྱས་པའི་གླེང་སྟེགས་དེའི་ཐོག རྒྱ་གར་དང་། ཨུ་རུ་སུ། དེ་བཞིན་ཊུར་ཀི ཨབ་གྷ་ནི་སི་ཐན། ཀར་ཛ་ཀི་སི་ཐན། ཨི་རག པཱ་ཀི་སི་ཐན་སོགས་ཚུད་པའི་ཚོགས་མི་རྒྱལ་ཁབ་ཁག་གི་མགོ་ཁྲིད་དང་སྐུ་ཚབ་ཚོགས་ཆུང་སོགས་འཛོམས་ནས། གོ་ལ་སྤྱི་ཡོངས་ཀྱི་སྲིད་འབྱོར་གྱི་གནད་དོན་དང་། རྒྱལ་ཁབ་ཕན་ཚུན་བར་གྱི་མཉམ་འབྲེལ་ལས་དོན་སོགས་ཀྱི་ཐད་ལ་གྲོས་མོལ་དང་གླེང་སློང་གནང་གི་ཡོད་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
