༸གོང་ས་རྒྱལ་བ་རིན་པོ་ཆེ་མཆོག་གི་ལ་དྭགས་ཁུལ་གྱི་ཟླ་གཅིག་དང་ཉིན་ ༢༠ རིང་གི་མཛད་འཕྲིན་ཁག་ལེགས་པར་གྲུབ་སྟེ། དེ་རིང་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་བཞུགས་སྒར་དུ་ཞབས་སོར་བདེ་བར་འཁོད་སོང་།
དེ་རིང་ཕྱི་ཟླ་ ༩ ཚེས་ ༢ ཉིན་ནི་བོད་ཀྱི་མང་གཙོ་དབུ་བརྙེས་ནས་ལོ་ངོ་ ༦༥ འཁོར་བའི་ཉིན་མོ་ཡིན་པ་དང་བསྟུན། ཉིན་རྒྱབ་ཀྱི་ཆུ་ཚོད་ ༢ ཙམ་ལ་༸གོང་ས་རྒྱལ་བ་རིན་པོ་ཆེ་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་བཞུགས་སྒར་དུ་ཞབས་སོར་བདེ་བར་འཁོད་སོང་བ་དང་། བོད་མིའི་མང་གཙོ་དུས་དྲན་ཐེངས་ ༦༥ པའི་སྟེང་དུ་འཛམ་གླིང་ཡུལ་གྲུ་གང་སར་ནས་ཕེབས་པའི་སྐུ་མགྲོན་རྣམ་པ་གཙོ་བྱས་པའི་ཕྱོགས་མཐའ་ཁག་དང་བཞུགས་སྒར་ཁུལ་གྱི་མི་མང་བཅས་ནས་དགའ་དད་སྤྲོ་གསུམ་གྱི་ངང་ནས་༸མགོན་པོ་གང་ཉིད་མཆོག་ལ་ཕེབས་བསུ་ཞུས་སོང་།
དེ་རིང་བཞུགས་སྒར་དྷ་རམ་ས་ལར་ཆར་ཞོད་ཆེ་ནའང་། ༸མགོན་པོ་གང་ཉིད་མཆོག་ལ་ཕེབས་བསུའི་ཆེད་དུ་དད་སེར་སྐྱ་བརྒྱ་ཕྲག་བརྒལ་བས་མེག་གྷན་གྱི་རླངས་འཁོར་འབབ་ཚིགས་ནས་ཁྲོམ་གཞུང་ཡོངས་དང་ཕོ་བྲང་གི་སྒོ་འགྲམ་བར་དུ་སེར་ཕྲེང་བསྒྲིགས་ཏེ་ལག་ཏུ་མཇལ་དར་དང་མེ་ཏོག་སོགས་བཟུང་ནས་ཕེབས་བསུའི་སྣེ་ལེན་ཟབ་རྒྱས་ཞུས་སོང་།
སྤྱིར་ཕྱི་ཟླ་ ༧ ཚེས་ ༡༢ ཉིན་༸གོང་ས་རྒྱལ་བ་རིན་པོ་ཆེ་མཆོག་བཞུགས་སྒར་དྷ་ས་ནས་ལ་དྭགས་སུ་ཆིབས་བསྒྱུར་བསྐྱངས། ཟླ་དེའི་ཕྱི་ཚེས་ ༢༡ ནས་ ༢༥ བར་ལ་དྭགས་ཟངས་དཀར་དུ་ཆིབས་བསྒྱུར་མཛད་དེ་ཆོས་ཕྱོགས་ཀྱི་མཛད་འཕྲིན་བསྐྱངས། ཕྱི་ཚེས་ ༢༦ ཉིན་ལ་དྭགས་ཀྱི་རྒྱལ་ས་གླེ་རུ་ཆིབས་བསྒྱུར་གྱིས་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཕེ་ཌར་པཱ་ཝལ་ལགས་སུ་མཇལ་འཕྲད་དང་། ལ་དྭགས་ནང་ཚོགས་དང་དགོན་ཚོགས་ཀྱི་གཙོས་བསོད་ནམ་གླིང་བོད་མིའི་གཞིས་ཆགས་ཀྱི་བོད་མི་རྣམས་དང་ལ་དྭགས་ཀྱི་ཡུལ་མི་རྣམས་ལ་ཆོས་འབྲེལ་བཀའ་དྲིན་བསྐྱངས་རྗེས། ཕྱི་ཟླ་ ༨ ཚེས་ ༢༨ ཉིན་༸གོང་ས་མཆོག་གི་ལ་དྭགས་ཀྱི་མཛད་འཆར་ཁག་ལེགས་པར་གྲུབ་སྟེ་རྒྱ་གར་གྱི་རྒྱལ་ས་ལྡི་ལི་རུ་ཆིབས་བསྒྱུར་བསྐྱངས་ཡོད།
དགའ་ལྡན་ཕོ་བྲང་གི་དྲ་རྒྱའི་སྟེང་གི་མཛད་འཆར་ལྟར་ན། ཟླ་འདིའི་ཕྱི་ཚེས་ ༡༠ ཉིན་ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་རྒྱལ་བ་རིན་པོ་ཆེ་མཆོག་ལ་ལྷོ་ཁའི་སྐྱིད་སྡུག་ཚོགས་པ་དང་ཨི་ཐ་ཁའི་རྣམ་རྒྱལ་གྲྭ་ཚང་གི་ནང་ཆོས་སློབ་གཉེར་ཁང་། རྒྱལ་སྤྱིའི་བོད་ཀྱི་གཞོན་སྐྱེས་བཅས་ནས་བརྟན་བཞུགས་བསྟར་འབུལ་ཞུ་རྒྱུ། ཕྱི་ཟླ་ ༩ ཚེས་ ༢༠ ཉིན་ཐེག་ཆེན་ཆོས་གླིང་གཙུག་ལག་ཁང་དུ་༸གོང་ས་མཆོག་ལ་ལྷོ་ཤར་ཨེ་ཤི་ཡའི་ནང་པའི་རྒྱལ་ཁབ་ཁག་དང་ཀོ་རི་ཡའི་ནང་པ་རྣམས་ནས་བརྟན་བཞུགས་བསྟར་འབུལ་ཞུ་རྒྱུ། ཕྱི་ཟླ་ ༡༠ ཚེས་ ༣ ཉིན་༸གོང་ས་རྒྱལ་བ་རིན་པོ་ཆེ་མཆོག་གིས་ཐའེ་ཝན་གྱི་དད་ལྡན་མང་པོས་ཇི་ལྟར་གསོལ་བ་བཏབ་པ་ལྟར་ཐེག་ཆེན་ཆོས་གླིང་གཙུག་ལག་ཁང་དུ་ཆོས་འབྲེལ་བཀའ་དྲིན་སྩལ་རྒྱུ་ཡིན་འདུག
གསར་འགོད་པ། སྐལ་བཟང་སྦྱིན་པ།
