རྒྱ་ནག་གཞུང་གིས་བོད་ཁམས་གོ་འཇོ་པ་ལ་ཆུས་ཟེར་བའི་ཁོངས་སུ་འབོ་སྟོད་གྲོང་དང་སྒར་འདབ་གྲོང་། ཉག་ལེ་གྲོང་། གཞུང་སྐོར་གྲོང་བཅས་ཀྱི་ཆོས་རྒྱལ་དགོན་པའི་དགོན་བདག་ཡོངས་གྲགས་ཆོས་རྒྱལ་སྤྲུལ་སྐུའམ་མཚན་དངོས་ལ་དཔལ་ལྡན་དབང་རྒྱལ་ཞུ་བའི་བླ་མ་ཞིག་བཙོན་ཁང་དུ་སྐུ་དཀྲོངས་ཡོད་འདུག
བོད་མིའི་སྒྲིག་འཛུགས་ཀྱིས་དྲ་རྒྱར་སྤེལ་བའི་གནས་ཚུལ་ལྟར་ན། ཆོས་རྒྱལ་སྤྲུལ་སྐུ་ལགས་ཀྱིས་ཁམས་གོ་འཇོ་ཕྱོགས་སུ་རིག་གནས་སྲུང་སྐྱོབ་སོགས་ཀྱི་ཕྱག་ལས་གནང་ཡོད་པར་བརྟེན། ས་གནས་མི་མང་གིས་རིན་པོ་ཆེ་ལགས་སུ་བརྩི་བཀུར་ཆེན་པོ་ཡོད་ཅིང་། རྒྱ་ནག་གཞུང་གིས་སྤྲུལ་སྐུའི་གནང་ཕྱོགས་དེ་དག་ལ་ཁ་གཡར་ནས་འཛིན་བཟུང་བཙན་ཁྲིད་བྱས་ཏེ་ལོ་ངོ་བདུན་བརྒྱད་ཙམ་ཕྱིན་ཡོད་པ་དང་། ཐོག་མར་གོ་འཇོ་རྫོང་བཙོན་ཁང་དུ་བཙོན་འཇུག་བྱས། དེ་ནས་ཆབ་མདོ་དང་ལྷ་སའི་ཕྱོགས་སུ་བཙན་ཁྲིད་བྱས་ཏེ། རིམ་བཞིན་བཙོན་ཁང་བཙན་པོའི་ནང་བཙོན་འཇུག་གིས་མནར་གཅོད་ཚད་མེད་བཏང་བ་དང་། འབྲེལ་ཡོད་ནས་གོ་རིམ་ལ་ཞུ་གཏུག་གིས་བཙོན་གྲོལ་ཡོང་ཐབས་བྱས་ཀྱང་རྒྱ་ནག་གཞུང་ནས་ངོས་ལེན་བྱས་མེད་པ་མ་ཟད། ཐུག་འཕྲད་ཀྱང་བྱ་མི་ཆོག་པའི་བཙན་བཀའ་བཏང་ཡོད་འདུག
འདི་ལོར་ཀན་སུ་ཞིང་ཆེན་གྱི་བཙོན་ཁང་ཞིག་ཏུ་བཅུག་སྟེ་མནར་གཅོད་ཚད་མེད་བཏང་རྐྱེན། ཕྱི་ཟླ་ ༧ ཚེས་ ༡༩ ཉིན་བཙོན་ཁང་དུ་སྐུ་བཀྲོངས་པའི་གནས་ཚུལ་བྱུང་ཡོད་སྟབས། འབྲེལ་ཡོད་དགོན་སྡེ་ཚང་མར་ཧ་ཅང་སེམས་ངལ་ཆེན་པོ་བཟོས་ཡོད་འདུག
སྤྲུལ་སྐུ་ཁོང་ད་ལོ་དགུང་གྲངས་ ༥༣ ཡིན་ཞིང་། མི་རིགས་ཀྱི་ལར་ཞེན་དགོསཁམས་གོ་འཇོ་ཕྱོགས་སུ་རིག་གནས་སྲུང་སྐྱོབ་དང་། མི་རིགས་ཀྱི་ལར་ཞེན་དགོས་སྐོར་མི་མང་ལ་སྐུལ་མ་གནང་མཁན་ཞིག་ཡིན་ཁར། རྒྱུན་དུ་བོད་མི་རིགས་ལ་ཕན་ཐོགས་པའི་བྱ་བ་བསྒྲུབ་དགོས་པ་དང་བོད་རིགས་ནང་ཁུལ་འཆམ་མཐུན་གྱིས་འཁྲུག་འཛིང་བྱེད་མི་ཉན་པ་སོགས་ཀྱི་བསླབ་བྱ་གནང་མཁན་ཞིག་ཀྱང་ཡིན་པ་རེད། གོ་འཇོ་ཆོས་རྒྱལ་དགོན་ནི་རྙིང་མའི་དགོན་པ་ཞིག་ཡིན་འདུག
