༸གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་སྲིད་བློན་མུ་དྷི་མཆོག་གི་འཁྲུངས་སྐར་ལ་འཚམས་འདྲི་མཛད་པ་དང་སྦྲགས། རྒྱ་གར་གྱིས་འཛམ་གླིང་ནང་འཆམ་མཐུན་དང་བརྟན་བརླིང་གི་མིག་དཔེ་མཚོན་གྱི་ཡོད་གསུངས།
ཕྱི་ཚེས་ ༡༧ ཉིན་རྒྱ་གར་གྱི་སྲིད་བློན་མུ་དྷི་མཆོག་གི་འཁྲུངས་སྐར་ཉིན་མོ་ཡིན་པ་དང་བསྟུན། དེ་རིང་༸གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་སྲིད་བློན་མུ་དྷི་མཆོག་གི་མཚན་ཐོག་ཏུ་གསུང་འཕྲིན་ཞིག་སྩལ་ཏེ། སྲིད་བློན་མཆོག་གི་འཁྲུངས་སྐར་ཉིན་མོར་འཚམས་འདྲི་དང་། མུ་མཐུད་སྐུ་གཟུགས་ཀྱི་འཕྲོད་བསྟེན་བདེ་ཐང་ཡོང་བའི་ཐུགས་སྨོན་མཛད་འདུག
༸གོང་ས་མཆོག་ནས་སྩལ་བའི་འཚམས་འཕྲིན་ནང་། ངོས་རང་རྒྱ་གར་གྱི་མགྲོན་པོ་ཡུན་རིང་ཤོས་ཤིག་ཡིན་པའི་ཆ་ནས། ངོས་ཀྱིས་འདས་པའི་ལོ་མང་རིང་འཕེལ་རྒྱས་དང་དཔལ་ཡོན་གྱི་འགྱུར་བ་དངོས་སུ་མཐོང་མྱོང་ཡོད། ཉེ་བའི་དུས་སྐབས་འདིར་ཁྱེད་ཀྱི་གདེང་སྤོབས་དང་སྟོབས་ཤུགས་རྒྱས་བཞིན་པར་དགའ་བསུ་ཞུ་རྒྱུ་ཡིན། རྒྱ་གར་འཕེལ་རྒྱས་ཀྱི་གྲུབ་འབྲས་ཀྱིས་གོ་ལ་ཧྲིལ་པོའི་ཡར་རྒྱས་ལ་ཕན་ཐོགས་ཡོད་པ་རེད།
ངོས་ནས་ངོས་རང་ནི་རྒྱ་གར་གྱི་སྤོབས་པ་ཆེ་བའི་ཕོ་ཉ་ཞིག་ལ་ངོས་འཛིན་བྱེད་ཀྱི་ཡོད་པ་མ་ཟད། རྒྱུན་དུ་རྒྱ་གར་ལ་ཡིད་སྨོན་སྐྱེ་ཡི་ཡོད་པ་རྗོད་ཀྱིན་ཡོད་ལ། དེ་བཞིན་འཛམ་གླིང་ནང་གི་མི་འབོར་ཆེ་ཤོས་དང་དམངས་གཙོའི་རྒྱལ་ཁབ་ཆེ་ཤོས། ད་དུང་ཆོས་ལུགས་སྣ་མང་གི་རྩ་བ་གཏིང་ཟབ་ཡོད་པས། རྒྱ་གར་ནི་འཛམ་གླིང་ནང་འཆམ་མཐུན་དང་བརྟན་བརླིང་གི་དཔེ་མཚོན་ཞིག་ཏུ་གྱུར་ཡོད།
གསུང་འཕྲིན་གྱི་མཇུག་ཏུ་༸མགོན་པོ་གང་ཉིད་ཀྱིས། ང་ཚོ་བོད་པ་ཚོར་མཚོན་ན། རྒྱ་གར་ནི་ང་ཚོའི་ཆོས་ལུགས་ཀྱི་ཤུལ་བཞག་རིག་གནས་ཀྱི་འབྱུང་ཁངས་ཙམ་མ་ཡིན་པར་ལོ་ངོ་ ༦༦ ལྷག་གི་རིང་ལ་ང་ཚོའི་ཁྱིམ་གཞིས་ཀྱང་ཡིན། ངོས་ནས་སླར་ཡང་རྒྱ་གར་གཞུང་མང་གཉིས་ཀྱིས་སྤྲོ་སེམས་དང་ལྷག་བསམ་རྣམ་དག་གི་ཐོག་ནས་མགྲོན་འབོད་དང་ཕྱག་རོགས་གནང་བར་སྙིང་དབུས་ནས་བཀའ་དྲིན་ཆེ་ཞུ་རྒྱུ་ཡིན། ཞེས་གསུངས།
སྲིད་བློན་ནཱ་རན་ཌ་ར་མུ་དྷི་མཆོག་ནི། ཕྱི་ལོ་ ༡༩༥༠ ལོའི་ཟླ་ ༩ ཚེས་ ༡༧ ཉིན་གྷོ་ཇི་རཱ་ཊིའི་ཟས་རིགས་འཚོང་མཁན་གྱི་ཁྱིམ་ཚང་དཀྱུས་མ་ཞིག་ཏུ་སྐྱེས་ཤིང་། ཁོང་ཆུང་དུས་མེ་འཁོར་དང་སྤྱི་སྤྱོད་རླངས་འཁོར་ས་ཚིགས་སོགས་སུ་ཇ་འཚོང་ཞོར་དུ་སློབ་ཆུང་མཐར་ཕྱིན་ཡོད་པ་དང་། དགུང་ལོ་ ༡༨ སྟེང་ཆང་ས་བརྒྱབ་ཡོད་འདུག ཕྱི་ལོ་༡༩༧༠ ལོར་གྷོ་ཇི་རཱ་ཊིའི་མེ་འཁོར་གྱི་ཐབ་ཚང་ཞིག་ཏུ་ལས་ཀ་བྱས། ཕྱིས་སུ་ཡིག་འབྲེལ་ལམ་ནས་ལྡི་ལི་མཐོ་སློབ་ནས་སྲིད་དོན་ཚན་རིག་གི་རིག་གནས་རབ་འབྱམས་པའི་ལག་འཁྱེར་དང་གྷོ་ཇི་རཱ་ཊིའི་གཙུག་ལག་སློབ་ཆེན་ནས་སྲིད་དོན་ཚན་རིག་གི་གཙུག་ལག་རབ་འབྱམས་པའི་ལག་འཁྱེར་བླངས་ཡོད་འདུག ཕྱི་ལོ་ ༡༩༩༥ ལོར་བྷི་ཇི་པི་སྲིད་དོན་ཚོགས་པའི་དྲུང་ཆེར་བདམས་ཐོན་བྱུང་སྟེ། ཧི་མ་ཅལ་དང་ཧར་ཡ་ན་མངའ་སྡེའི་ནང་སྲིད་དོན་གྱི་ཕྱག་ལས་གནང་ཡོད་པ་དང་། ཕྱི་ལོ་ ༡༩༩༨ ལོར་གྷོ་ཇི་རཱ་ཊིའི་གྲོས་ཚོགས་ནང་བདམས། ཕྱི་ལོ་ ༢༠༠༡ ལོ་ནས་བཟུང་གྷོ་ཇི་རཱ་ཊི་མངའ་སྡེའི་སྤྱི་ཁྱབ་བློན་ཆེན་གྱི་ཕྱག་ལས་གནང་ཡོད་པ་དང་། ཕྱི་ལོ་ ༢༠༡༤ ལོ་ནས་རྒྱ་གར་གྱི་སྐབས་ ༡༦ པའི་སྲིད་བློན་གྱི་ཕྱག་ལས་གནང་ཡོད་ལ། འདས་ལོའི་ཕྱི་ཟླ་ ༤ ཚེས་ ༡༩ ནས་ཟླ་ ༦ ཚེས་ ༡ བར་ཉིན་གྲངས་ ༤༤ རིང་རྒྱ་གར་གྱི་འོས་བསྡུ་ཆེན་མོ་གནང་ཡོད་པ་ལྟར། སྲིད་བློན་མུ་དྷི་མཆོག་ལ་སླར་ཡང་འོས་བསྡུའི་རྒྱལ་ཁ་འཐོབ་སྟེ། སྲིད་བློན་གྱི་ཕྱག་ལས་གནང་མུས་ཡིན་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
