གསང་བའི་ལྷ་ཁང་ཞིག་གི་གསང་བ་བརྟོལ་བ།

…….(གནས་མཆོག་གཡུ་ལོའི་ལྷ་ཁང་སླར་ཡང་མཇལ་བ།)

རྩོམ་པ་པོ། བེ་རི་རིག་པའི་རྡོ་རྗེ།
རྩོམ་ཁུངས། བོད་ཀྱི་དུས་བབ།

དེ་རིང་ནི་བོད་རྒྱལ་ལོ་ ༢༡༥༢ སྣྲོན་ཟླའི་དམར་ཕྱོགས་བཟང་པོ་དང་པོ་སྟེ། ཕྱི་ལོ་ ༢༠༢༥ ཟླ་ ༧ ཚེས་ ༡༣ ཡིན། སྤྱིར་བཏང་དེང་སྐབས་དྷ་རམ་ས་ལའི་ཆར་དུས་ཡིན་པས། ཉིན་མཚན་མེད་པར་ཆར་བ་འབབ་མཚམས་མི་འཇོག་པ་མ་ཟད། སྨུག་སྤྲིན་གྱིས་རི་ལུང་ཡོངས་སུ་བཏུམ་ནས་ཡོད་མོད། དེ་རིང་རྒྱུན་ལྡན་དང་ཡེ་ནས་མི་འདྲ་བར་ནམ་མཁའ་སྔོ་ལ་དྭངས་ཤིང་། ཞོ་གསར་སྤུངས་འདྲའི་སྨུག་སྤྲིན་མཐུག་པོ་ཞིག་རི་བོ་དྷོ་ལྷ་དྷར་གྱི་རི་རྩེ་ནས་མར་དལ་གྱིས་བབས། ཚ་དྲོད་འབར་བའི་ཉི་འོད་ནོར་བུ་གླིང་གའི་གྲོང་སྡེར་འཕྲོས་པ་དང་། བསིལ་རླུང་འཇམ་པོ་ཞིག་ཀྱང་ལྷོད་ཀྱིས་ལྡིང་།

ཁ་སང་ནས་དུས་ཚོད་བཀོད་བསྒྲིགས་བྱས་པ་བཞིན། ཞོགས་པའི་དུས་ཚོད་ ༩ ཐོག་གླ་གཏོང་རླངས་འཁོར་བསླེབས་མ་ཐག་ལམ་ལ་བུད། དེ་རིང་ང་ཡུལ་སྐོར་ལ་འགྲོ་ས་ནི་རྒྱ་གར་གྱི་གནའ་ཤུལ་གྲགས་ཅན་ཞིག་ཡིན། གནའ་ཤུལ་དེར་འགྲོ་དོན་ནི། ངས་བརྩེ་བའི་ཆོས་ཀྱི་གྲོགས་པོ་རྣམ་པར་ནང་བའི་གནས་ཁྱད་པར་བ་ཞིག་ངོ་སྤྲོད་བྱེད་ཆེད་ཡིན།

སྤྱིར་བཏང་གནས་འདི་མི་ལོ་ ༡༠ ཡར་སྔོན་ཞིག་ཏུ་ང་རང་དྷ་རམ་ས་ལར་ཡོང་སྐབས་ཤིག་ལ་རྙེད་པའམ་ངོས་བཟུང་བ་ཡིན། དེ་དུས་དེའི་སྐོར་ཁ་གསལ་ཙམ་བྲིས་ནས་ངོ་དེབ་ཐོག་སྤེལ་ཡོད། འོན་ཀྱང་དེ་རིང་སླར་ཡང་གནས་ཆེན་དེར་ཕྱིན་ནས། སྔར་ལས་ཀྱང་ཞིབ་མཇལ་ཡིད་ཚིམ་པ་ཞིག་དང་། དོགས་པ་ཕྲན་བུ་རེ་ཡོད་པ་དེ་ལ་བསྐྱར་ཞིབ་ཅིག་བྱས། སྔར་བྲིས་པའི་ཟིན་ཐོར་སྣོན་འཕྲི་ཅུང་བྱས་ནས་ཆོས་གྲོགས་ཕོ་མོ་ཚོར་དྲན་སྐུལ་ཞིག་གི་ཚུལ་དུ་སླར་ཡང་རགས་ཟིན་ཞིག་སྤེལ་འདོད་བྱུང་།

ད་ལྟ་ངས་ངོ་སྤྲོད་བྱེད་བཞིན་པའི་ལྷ་ཁང་འདི་སྦས་ཡུལ་ལམ། གསང་བའི་གནས་མཆོག་ཁྱད་པར་བ་ཞིག་རེད། རྒྱ་གར་གྱིས་གནས་འདིའི་མིང་ལ་བྲག་གཏུབ་ལྷ་ཁང་(Masroor Rock-cute Temple)ཞེས་བཏགས་འདུག ཧི་མ་ཅལ་མངའ་སྡེ་(Himachal Pradesh)མ་སི་རོར་(Masroor)རྫོང་ཁོངས་ལྷ་ཧལ་པུར་(Lahalpur)གྱི་ཁོངས་སུ་ཡོད།

མཚམས་འདི་ནས་ཐོག་མར་སྔོན་གླེང་གི་ཚུལ་དུ་མི་ལོ་བཅུའི་གོང་གི་བྱུང་བ་ཞིག་བཤད། གོང་བཤད་ལྟར་ཕྱི་ལོ་ ༢༠༡༥ ཟླ་ ༡༠ ཚེས་ ༡༣ ཉིན། ངའི་སྤུན་ཆུང་བེ་རི་ཤེས་རབ་འོད་ཟེར་དང་། མཐུན་གྲོགས་ཕོ་མོ་སྐོར་ཞིག་བཅས་ཕོང་མཚོ་(Pong lake)ཟེར་བ་རྒྱ་གར་གྱི་རླན་ས་ཆེན་པོ་ཉེར་ལྔའི་ནང་གི་གཅིག་ཏུ་བགྲང་བ། ཆུ་སྐྱིལ་རྫིང་བུ་(Pong Reservoir)ཞེས་གྲགས་པའི་མཚོ་མཐར་སྤྲོ་བསང་ལ་བསྐྱོད་སྐབས། ལམ་བར་དུ་གྲོགས་པོ་ཚངས་དབྱངས་རྒྱ་མཚོ་ལགས་ཀྱིས། འདིར་ཧིན་དུའི་ལྷ་ཁང་རྙིང་བ་ཞིག་ཡོད་པས་དེར་ལྟ་སྐོར་དུ་འགྲོ་ཞེས་གསུངས་པ་ལྟར་དེར་ཕྱིན།

དེ་དུས་ངས་ལྷ་ཁང་འདི་ཞིབ་མཇལ་བྱས་རྗེས། དངོས་ཡོད་ཀྱི་རྟགས་དང་རྒྱུ་མཚན་མང་པོ་ཞིག་གཞི་རྩར་བཞག་ནས་སྒྲོལ་མའི་ལྷ་ཁང་ལ་ངོས་འཛིན་བྱས། ལམ་གྲོགས་ཚོར་ཡང་དེ་ལྟར་འགྲེལ་བཤད་བརྒྱབས། “གནས་མཆོག་གཡུ་ལོའི་ལྷ་ཁང་”ཞེས་མིང་བཏགས་ཏེ། ཟིན་བྲིས་ཤིག་ཀྱང་བཏབ་ནས་ངོ་དེབ་ཐོག་ཏུ་སྤེལ་མྱོང་། དེར་བརྟེན་དེ་རིང་སླར་ཡང་དུས་ཚོད་སྟོང་བ་འདི་དམ་འཛིན་བྱས་ནས་ལྷ་ཁང་དེར་མཇལ་སྐོར་ལ་ཕྱིན་པ་ཡིན།

བྲག་སྐོས་ལྷ་ཁང་འདི་མ་སི་རོར་རྫོང་ལྷ་ཧལ་པུར་གྱི་ཁོངས་ཏེ། དྷ་རམ་ས་ལའི་ལྷོ་ནུབ་ཕྱོགས་སུ་ལྷུང་ལྷུང་དུ་བཞུར་བའི་བེ་སི་ཆུ་བོ་ལུང་གཤོང་(Beas River Valley)ཞེས་པའི་རི་གྲོང་ཡིད་དུ་འོང་བ་ཞིག་ཏུ་ཡོད་ལ། བྲག་སྣ་རིང་བོ་ཞིག་གི་མགོ་མཇུག་གཉིས་མ་གཏོགས་རྐེད་པ་ཧྲིལ་པོ་ལྷ་ཁང་གི་དབྱིབས་སུ་བཟོས་འདུག ལྷ་ཁང་གཙོ་བོའི་མདུན་སྒོ་བྱང་ཤར་ཕྱོགས་དེ་རི་བོ་དྷོ་ལྷ་དྷར་(Dhauladhar)ལ་ཐད་ཀར་གཏད་འདུག དྷ་རམ་ས་ལ་ནོར་གླིང་ནས་སྤྱི་ལེ་ ༤༢ ཙམ་གྱི་མཚམས་དང་། གླ་གཏོང་རླངས་འཁོར་ནང་ཕྱིན་ན་དུས་ཚོད་གཅིག་དང་སྐར་མ་བཅོ་ལྔ་ཙམ་འགོར། གླ་གཏོང་རླངས་འཁོར་འཚོལ་སྐབས་བྲག་གཏུབ་ལྷ་ཁང་(Masroor Rock-cute Temple)ཞེས་བཤད་ན་ལམ་སང་གོ་བརྡ་འཕྲོད་ཐུབ།

ནང་འཛུལ་བྱང་བུར་རྒྱ་གར་སྒོར་མོ་ ༢༠ ཡིན་ལ། དེ་ཡང་ Google Pay ཐོག་ནས་སྤྲོད་དགོས་འདུག ང་ལ་ Google Pay མེད་པས་ལྷ་ཁང་སྐོར་སྲུང་བ་དེས་ཁྱེད་གྲྭ་བ་རེད། དེ་རིང་འཛིན་བྱང་རིན་པ་སྤྲོད་མི་དགོས་གསུངས་ནས་རིན་མེད་ཐོག་ནང་དུ་བཏང་སོང་།

ལྷ་ཁང་འདིའི་སྤྱིར་བཏང་གི་ལོ་རྒྱུས་མདོར་བསྡུས་དྲྭ་ཐོག་ནས་གཟིགས་ན་གོང་གི་དབྱིན་མིང་ཐོག་བཙལ་ན་རྙེད། སྒེར་གྱི་རླངས་འཁོར་ནང་འགྲོ་ན། ཁ་བྱང་འདི་ཡིན། 34FP+4W2 Masroor, Lahalpur, Himachal Pradesh 176026

བྲག་སྐོས་ལྷ་ཁང་འདི་མཇལ་བ་ཙམ་གྱིས་འདིའི་འཆར་འགོད་པའི་གཞི་རྒྱ་ཆེ་ཞིང་བཀོད་ལེགས་པའི་ཇུས་འགོད་དང་། བཟོ་སྐྲུན་པ་དག་གི་རྡོ་སྐོས་ཀྱི་སྒྱུ་རྩལ། ད་དུང་སྐབས་དེའི་རྒྱ་གར་བའི་བཟོ་རིག་ལག་ཤེས་ཀྱི་སྣང་བརྙན་ཡང་གསོན་པོར་མཐོང་ཐུབ།

འོན་ཀྱང་ཡིད་སྐྱོ་བ་ཞིག་ལ། ངོ་མཚར་ཆེ་བའི་ལྷ་ཁང་དེའི་བརྒྱ་ཆའི་སུམ་ཅུ་ཙམ་ཆག་རལ་ཏུ་ཕྱིན་འདུག་པ་མ་ཟད། ལྷ་ཁང་རྣམས་ཀྱི་ཕྱི་ངོས་ཀྱི་སྐུ་བརྙན་དང་བརྐོས་རིས་མང་ཆེ་བ་བསམ་བཞིན་དུ་གཏོར་བཤིག་བཏང་བ་འདྲ་ལ། མང་པོ་ཞིག་བོར་བརླག་ཏུ་སོང་བ་ཡང་ཤེས་ནུས། བཤད་ཚོད་ལྟར་ན། གནོད་སྐྱོན་བྱུང་རྐྱེན་ཕལ་ཆེར་ས་ཡོམ་ཡིན་ཞིང་། ལྷག་པར་དུ་ཕྱི་ལོ་ ༡༩༠༥ ལོར་ཀང་རར་(Kangra)བྱུང་བའི་ས་ཡོམ་དེའི་ཁྲོད་ཆག་སྐྱོན་ཆེན་པོ་བྱུང་ཚུལ་བཤད་འདུག་མོད། ས་ཡོམ་སྐབས་ཞིག་རལ་ཏུ་ཕྱིན་པའམ། ཡང་ན་བསམ་བཞིན་གཏོར་བཤིག་བཏང་བ་གང་ཡིན་བཤད་དཀའ།

དྲྭ་ལམ་དུ་འདིའི་ལོ་རྒྱུས་འཁོད་པ་ལྟར་ན། ལྷ་ཁང་འདི་དུས་རབས་བདུན་པའམ་བརྒྱད་པའི་ནང་བཟོ་བསྐྲུན་བྱས་ཤིང་། བྲག་རི་ཧྲིལ་བོ་གཅིག་ལྷ་ཁང་གི་དབྱིབས་སུ་བཟོས་ནས། མདུན་དུ་འཁྱིལ་ཆུ་ཡིད་དུ་འོང་བ་ཞིག་ཀྱང་བསྐྱིལ་འདུག ལྷ་ཁང་འདི་ནི་རྒྱ་གར་གྱི་བྲག་སྐོས་ལྷ་ཁང་བཅུ་དགུའི་ནང་གི་གཅིག་ཡིན་ཞིང་། ད་ལྟ་རེ་གཉིས་ལས་ལྷག་མེད། བཟོ་སྐྲུན་གྱི་རྣམ་པར་མཚོན་ན་རྒྱ་གར་བྱང་ཕྱོགས་ན་ག་རའི་(Nagara Style)ལུགས་སུ་བཞེངས་བསྐྲུན་བྱས་ཡོད་ཟེར།

ལྷ་ཁང་འདིར་གཙོ་བོ་གཙང་ཁང་དང་། ཚོགས་ཁང་། སྒོམ་ཁང་སོགས་ཀྱིས་གྲུབ་ཡོད་ལ། བྱང་ཤར་དང་། ཤར་ལྷོ། ལྷོ་ནུབ། ནུབ་བྱང་བཅས་ལ་འཛུལ་སྒོ་བཞི་ཡོད་པ་འདྲ་མོད། ད་ལྟ་གཅིག་མ་གཏོགས་ལྷག་མི་འདུག་ཅིང་། ལྷ་ཁང་འདི་བཞེངས་འཕྲོར་ལུས་པ་ཞིག་ཀྱང་ཡིན་ཚུལ་བཤད་འདུག

ལྷ་ཁང་འདི་དཀྱིལ་དང་འཁོར་གྱི་ཚུལ་དུ་བཞེངས་བསྐྲུན་བྱས་འདུག་པས། བོད་ཀྱིས་དཀྱིལ་འཁོར་ཟེར་བ་དེ་འདི་འདྲ་ཞིག་ཡིན་ཆོག་ལ། ཡང་གཅིག་བཤད་ན་ལྷ་ཁང་དབུས་མའི་མཐར་ལྷ་ཁང་ཆེ་ཆུང་མང་པོས་བསྐོར་ཡོད་པས། མཎྜལ་གྱི་ཚོམ་བུ་འགོད་སྟངས་དང་ཡང་ཤིན་ཏུ་མཚུངས། ལྷ་ཁང་གཙོ་བོ་དེ་ལ་དེང་སང་མན་རྡ་པ་(Mandapa)ཞེས་ཟེར་ཞིང་། ནང་དུ་ཞལ་འབག་དང་ན་བཟས་བཀླུབས་པའི་སྐུ་བརྙན་གསུམ་བཞུགས་མོད། གསར་བ་ལོས་ཡིན་སྙམ་པ་ལས་འདུ་ཤེས་གཞན་བཙུར་ན་ཡང་སྐྱེ་དཀའ།

དཀོན་གཉེར་བས་བཤད་པ་ལྟར་ན། དེ་དག་ནི་ཁྱབ་འཇུག་ཞི་བ་(shiva)དང་། ཧིན་དུའི་ལུགས་ཀྱི་ཡི་དམ་གཙོ་གྲས་ཨ་ཤི་བ་ར་(Vishnu)དང་། དེ་ཝིས་(Devi)བཅས་ཡིན་ཟེར། འོན་ཀྱང་རྒྱ་གར་དང་བལ་བོར་ཡོད་པའི་ནང་བའི་གནས་དང་ལྷ་ཁང་མང་པོ་ཧིན་དུ་བས་བདག་བཟུང་བྱས་ནས་དེ་དག་ཏུ་དབང་ཕྱུག་གི་རྟེན་བཙུགས་ཤིང་། སྐུ་བརྙན་ཕལ་མོ་ཆེའི་མཚན་བསྒྱུར། ཞལ་འབག་བཀབ། ན་བཟས་གཡོགས་ཏེ་ནང་བའི་ལག་ནས་གཡོ་འཕྲོག་བྱེད་བཞིན་ཡོད་པས་ཡིད་ཆེས་དཀའ།

དུས་རབས་བདུན་པའམ་བརྒྱད་པར་མཚོན་ན། རྒྱ་གར་དུ་ནང་བསྟན་དར་རྒྱས་ཀྱི་རྩེ་མོར་ཕྱིན་པའི་སྐབས་ཡིན་ལ། ལྷག་པར་དུ་ཧི་མ་ལ་ཡའི་རི་རྒྱུད་དང་། མང་ཡུལ་ལ་དྭགས། ཟངས་དཀར། ཁུ་ནུ་རི་རྒྱུད་སོགས་མདོར་ན་མངའ་རིས་སྐོར་གསུམ་དུ་ནང་བསྟན་ཆེས་ཆེར་དར་བའི་དུས་སྐབས་ཤིག་ཡིན།

གང་ལྟར་ལྷ་ཁང་དེ་དག་ཕྱི་ལོ་ ༡༩༡༣ ལོར་གནའ་ཤུལ་བརྟག་དཔྱད་པ་ཚོས་དོ་སྣང་བྱེད་མགོ་ཚུགས་ཤིང་། ཕྱི་ལོ་ ༡༩༡༥ ལོར་རྒྱ་གར་གྱི་གནའ་ཤུལ་བརྟག་དཔྱད་ལས་ཁུངས་ནས་ཞིབ་བཤེར་བྱས། ལྷ་ཁང་དེའི་མིང་ལ་མ་སི་རོར་བྲག་སྐོས་ལྷ་ཁང་(Masroor Rock-cute Temple)ཞེས་མིང་གསར་དུ་བཏགས་ནས་རྒྱ་གར་གྱི་གནའ་ཤུལ་རྩ་ཆེན་དང་། སྦས་ཡུལ་ལམ་གསང་བའི་ནོར་བུ་ལྟ་བུའི་གསང་གནས་གལ་ཆེན་ཞིག་ཏུ་ངོས་འཛིན་བྱས་འདུག

གོང་དུ་བཤད་པ་ལྟར། ལྷ་ཁང་དེ་དག་གི་ཕྱི་ནང་ཁོར་ཡུག་དང་བཅས་པ་བྲག་རི་གཅིག་གིས་གྲུབ་ཅིང་། ད་ལྟ་ཞིག་རལ་ཏུ་སོང་ནས་བརྒྱ་ཆ་སུམ་ཅུ་ཙམ་ལས་ལྷག་མི་འདུག་མོད། རྡོ་བཟོའི་ལག་རྩལ་དང་། བཞེངས་སྐྲུན་ཇུས་འགོད་སོགས་འགྲན་ཟླ་བྲལ་བ། དབྱིབས་བཀོད་སོགས་ཕལ་ཆེ་བ་རྡོ་རྗེ་གདན་གྱི་མཆོད་རྟེན་དང་ཧ་ཅང་འདྲ།

ལྷ་ཁང་དེའི་མདུན་དུ་རྫིང་བུ་ཆེན་པོ་ཞིག་ལྷོད་ཀྱིས་བསྐྱིལ་ཞིང་། གཡས་གཡོན་གྱི་ནགས་ཚལ་དང་། རི་ཚོགས། སྤངས་ལྗོངས་རྣམས་ནི་སྔོ་ལྗང་གཡུ་ཡི་མེ་ལོང་ལྟར་ཀུན་ནས་མཛེས་པས་གཡུ་ལོ་བཀོད་པའི་ཞིང་གི་དཔལ་ཡོན་དང་གཉིས་སུ་མེད་པ་ནི། ཇི་སྐད་དུ། གཡུ་ལོ་བཀོད་པའི་ཞིང་གི་སྨོན་ལམ་1ལས།

“ཕུན་ཚོགས་ལེགས་བྱས་ཐ་གྲུ་རབ་ཡངས་ཤིང༌།།

ངོ་མཚར་གཡུ་ལྗོན་འདོད་དགུ་འབྱུང་བའི་གཏེར།།

ཀུན་བྱང་གནས་རིས་ཇི་བཞིན་སྣང་བའི་ཞིང༌།།

གཡུ་ལོ་བཀོད་མཆོག་ཞིང་དེར་སྐྱེ་བར་ཤོག།

འཕགས་མའི་གཞལ་ཡས་ཁང་བཟང་ནམ་མཁའི་མཐའ།།

རྒྱ་ཆད་ཕྱོགས་སུ་མ་ལྷུང་དབང་རིམ་བཞིན།།

མཚར་སྡུག་བཀོད་ཆ་ལེགས་རྫོགས་གཞལ་མེད་ཁང༌།།

གཡུ་ལོ་བཀོད་མཆོག་ཞིང་དེར་སྐྱེ་བར་ཤོག།

ཕོ་བྲང་མཆོག་གི་གཞི་ཁྱོན་ཡངས་པ་ལ།།

པདྨོའི་ཟེའུ་འབྲུར་ཟླ་གཞོན་གསར་བའི་སྟེང༌།།

འཕགས་མའི་ཡེ་ཤེས་སྐུ་བཟང་ལྗང་འོད་འབར།།

གཡུ་ལོ་བཀོད་མཆོག་ཞིང་དེར་སྐྱེ་བར་ཤོག།”  ཅེས་གསུངས་པ་ཇི་ལྟ་བ་བཞིན་འདུག་ཅེས་བཤད་ཀྱང་མི་ཆོག་པ་མེད་སྙམ།

ད་དུང་རི་བོ་རྡོ་ལྷ་དྷར་(Dhauladhar)ཤེལ་གྱི་མཆོད་རྟེན་བཞེངས་པ་ལྟར་དཀར་སེང་ངེར་ལྷ་ཁང་དེའི་མདུན་ཕྱོགས་སུ་མངོན་པ་ནི་ཇི་འདྲའི་མཛེས་སྡུག་ལྡན་པ་ཞིག་རེད་ཨང་། དེ་བས་ཀྱང་ཡ་མཚན་པ་ཞིག་ལ། ལྷ་ཁང་དེ་དག་གི་ཕྱི་ངོས་རྣམས་སུ་འབུར་གཟུགས་ཀྱིས་བཞེངས་པའི་སྐུ་བརྙན་ཕལ་མོ་ཆེ་ནང་བའི་ལྷ་སྐུའི་གཟུགས་སུ་ཡོད་ཅིང་། ལྷག་པར་དུ་གྲུབ་ཆེན་ཉི་མ་སྦས་པའི་ལུགས་སམ། ཇོ་ནང་ལུགས་ཀྱི་སྒྲོལ་མ་ཉེར་གཅིག་གི་ནང་གི་ལྷ་གྲངས་མང་པོ་ཡོད་པ་མཇལ་བ་ཙམ་གྱིས་ངོས་འཛིན་གསལ་བོར་བྱེད་ཐུབ་པས། གོང་དུ་བཤད་པ་ལྟར། ཕྱི་ལོ་ ༢༠༡༥ ལོར་ངས་བྲག་སྐོས་ལྷ་ཁང་འདི་དག་ལ་“གནས་མཆོག་གཡུ་ལོའི་ལྷ་ཁང་”ཞེས་མཚན་བཏགས་ཏེ། སྒྲོལ་མའི་ལྷ་ཁང་ངམ་གནས་ཆེན་དུ་ངོས་འཛིན་བྱས་ཡོད་ལ། དེ་རིང་སླར་ཡང་འདིར་ཡོང་ནས་དཔྱད་ཞིབ་ཡིད་ཚིམ་པ་ཞིག་བྱས་ཏེ། སྦས་ཡུལ་ལམ་གསང་བའི་གནས་རྩ་ཆེན་འདིའི་གསང་བ་དངོས་སུ་བརྟོལ་བ་ཡིན།

དེ་ལ་རྒྱུ་མཚན་དང་ཁོངས་ལུང་ཅི་ཡོད་སྙམ་ན། དེ་ཡང་རྗེ་བཙུན་ཏཱ་ར་ནཱ་ཐའི་སྒྲུབ་ཐབས་རིན་འབྱུང་དུ་གསུང་བའི་སྒྲོལ་མ་ཉེར་གཅིག་གི་སྒྲུབ་ཐབས་2ལས།  “བརྒྱད་པ་དབང་མཆོག་སྟེར་བའི་སྒྲོལ་མ་ནི། པདྨ་དམར་པོ་དང་ཟླ་བ་དང་ཆུ་སྲིན་རྣམས་བརྩེགས་པའི་གདན་ལ། དེ་ལས་སྒྲོལ་མ་སེར་མོ་ཞལ་གཅིག་ཕྱག་བཞི་མ། ཕྱག་དང་པོ་གཉིས་མྱ་ངན་མེད་པའི་ཤིང་གི་ཡལ་ག་དང་པདྨ། འོག་མ་གཉིས་ནོར་བུ་དང་བཅས་པའི་མཆོག་སྦྱིན་དང་བུམ་པ་བསྣམས་པ། ཞབས་སྐྱིལ་ཀྲུང་ཕྱེད་པའི་རོལ་སྟབས་ཀྱིས་བཞུགས་པའོ།། རིགས་བདག་ནི་དོན་གྲུབ་བོ།།”  ཞེས་གསུངས་པ་ལྟར། ཞབས་གཉིས་སྐྱིལ་ཀྲུང་ཕྱེད་པའི་སྟབས་ཀྱིས་ཆུ་སྲིན་ཐོག་བཞུགས་པ་ཤིན་ཏུ་གསལ་མོད། ཆག་སྐྱོན་གྱི་དབང་གིས་ཕྱག་མཚན་སོགས་གསལ་བོར་མི་མཐོང་།

ཡང་དེ་ཉིད་3ལས། “བཅོ་བརྒྱད་པ་རབ་ཏུ་རྒྱས་པའི་སྒྲོལ་མ་ནི། པདྨ་དཀར་པོ་ཟླ་བ་དང་ངང་པའི་གདན་ལ་ཀི་ཡིག་ལས་སྒྲོལ་མ་དཀར་མོ་ཕྱག་བཞི་པ། དང་པོ་གཉིས་སྤྱི་བོར་བསྣོལ་བས་ལྕགས་ཀྱུ་འཛིན་པ། ལྷག་མ་གཉིས་མཆོག་སྦྱིན་དང་གླེགས་བམ་གྱིས་མཚན་པའི་ཨུཏྤལ་བསྣམས་པ། སེམས་དཔའི་སྐྱིལ་ཀྲུང་ཅན། རིགས་བདག་ནི་སྣང་བ་མཐའ་ཡས་སོ།།”  ཞེས་གསུངས་པ་ལྟར། འདིར་ཡང་ངང་བའི་གདན་ལ་ཕྱེད་སྐྱིལ་གྱིས་བཞུགས་ཤིང་། ཕྱག་བཞི་ཡོད་པ་ཡང་ཤིན་ཏུ་གསལ་མོད། ཕྱག་མཚན་སོགས་ཆག་སྐྱོན་ཤོར་བས་མི་མཐོང་།

ཡང་དེ་ཉིད་4ལས། “ཉེར་གཅིག་པ་ཡོངས་རྫོགས་བྱེད་པའི་སྒྲོལ་མ་ནི། ཧ་ཡིག་ལས་བྱུང་བའི་ཁྱུ་མཆོག་གླང་དཀར་པོའི་སྟེང་ན་པདྨ་དང་ཟླ་བའི་སྟེང་དུ་ཕེ་ཡིག་ལས་སྒྲོལ་མ་དཀར་མོ་ཅུང་ཟད་ཁྲོ་ཞིང་སྤྱན་གསུམ་མ། ཕྱག་གཡས་མདུང་རྩེ་གསུམ་དང༌། གཡོན་མུ་ཏིག་གི་འཕྲེང་བ་འཛིན་པ། སྐྱིལ་ཀྲུང་ཕྱེད་པས་བཞུགས་ཤིང་སྟག་ལྤགས་ཀྱི་ཤམ་ཐབས་ཅན་ནོ།། རིགས་བདག་ནི་རིན་ཆེན་འབྱུང་ལྡན་ནོ།།” ཞེས་གསུངས་པ་ལྟར། ཞབས་ཕྱེད་སྐྱིལ་གྱིས་ཁྱུ་མཆོག་གླང་དཀར་པོའི་སྟེང་ན་བཞུགས་ཤིང་། ཕྱག་གཡས་ཀྱིས་མདུང་རྩེ་གསུམ་འཛིན་པ་ཡང་ཤིན་ཏུ་གསལ།

ད་དུང་ཕྲིན་ལས་ཐམས་ཅད་འབྱུང་བའི་སྒྲོལ་མ་འདུས་པ་དོན་དམ་པ་ཞེས་བྱ་བ་རྣལ་འབྱོར་མའི་རྒྱུད་ཀྱི་རྒྱལ་པོ་5ལས། “སྒྲོལ་མ་འོད་ཟེར་ཅན་མ་དང་།།  

ཕག་མོའི་གཟུགས་ལ་མངོན་མཆོད་ན།།

གང་གང་འདོད་པའི་ལས་ཐམས་ཅད།།  

ཐོགས་པ་མེད་པར་འགྲུབ་པར་འགྱུར།།” ཞེས་གསུངས་པ་ལྟར། སྒྲོལ་མ་ལྷ་མོ་འོད་ཟེར་ཅན་མ་གསེར་གྱི་ཤིང་རྟར་བཞུགས་པ་རྟ་མཆོག་བདུན་གྱིས་དྲངས་པ་ཡང་ཤིན་ཏུ་གསལ་བོར་བཞུགས།

དེ་ལྟར་ཡི་དམ་རྒྱ་མཚོའི་སྒྲུབ་ཐབས་རིན་ཆེན་འབྱུང་གནས་ནས་སུ་གསལ་བའི་སྒྲོལ་མ་ཉེར་གཅིག་གི་གྲས་དབང་མཆོག་སྟེར་བའི་སྒྲོལ་མ་དང་། རབ་ཏུ་རྒྱས་པའི་སྒྲོལ་མ། ཡོངས་རྫོགས་བྱེད་པའི་སྒྲོལ་མ་རྣམས་ཀྱི་སྐུ་བརྙན་དངོས་སུ་བཞུགས་པ་མ་ཟད། ཡང་སྒྲོལ་མའི་རྒྱུད་དེ་ཉིད་6ལས།

“ལྕགས་ཀྱུ་ལ་སོགས་སྒོ་རུ་དགོད།།

སྟོབས་ཆེན་ཕ་རོལ་གནོན་པ་ཡི།།

ཁྲོ་བོ་རྣམས་ཀྱང་གྲྭར་དགོད་དོ།།

ལས་རྣམས་བྱེད་པའི་ལྷ་མོའི་ཚོགས།།

ཕྱི་རོལ་དག་ཏུ་བྲི་བར་བྱ།།” ཞེས་གསུངས་པ་བཞིན། ལྕགས་ཀྱུ་དང་རྔ་ཡབ་ཐོག་པའི་སྒོ་སྲུང་གི་ཁྲོ་བོ་དང་། ལས་བྱེད་པའི་ལྷ་དང་ལྷ་མོའི་གཟུགས་བརྙན་སོགས་ཀྱང་ཤིན་ཏུ་མང་ངོ་།།

དེ་བས་ཀྱང་ལྷ་ཁང་འདིའི་ཁོར་ཡུག་གི་རང་བྱུང་ཁམས་ཀྱི་མཛེས་སྡུག་དང་། ཕྱི་ནང་གི་བཟོ་བཀོད། སེམས་ཁམས་ཀྱི་འཆར་སྒོ་སོགས་གང་ལ་བལྟས་ཀྱང་། བོད་ཀྱི་གཏམ་དཔེར།

“མི་ངོ་དང་ལྷ་ངོ་འཕྲོད།།

ལྷ་ངོར་ཉི་མ་ཤར།།”  ཟེར་བའི་དཔེ་ལྟར། རྗེ་བཙུན་སྒྲོལ་མའི་གནས་སམ་སྒྲོལ་མའི་ལྷ་ཁང་དུ་ངེས་ཤེས་དང་ཡིད་ཆེས་ཇེ་བརྟན་དུ་གྱུར་ཏེ། དགའ་དད་སྤྲོ་གསུམ་གྱི་སྒོ་ནས་དུས་ཚོད་གཉིས་ལྷག་རིང་གནས་འདིར་ཞིབ་མཇལ་བྱས། ལྷ་ཁང་དབུས་མའི་ནང་དུ་སོས་དལ་བག་ཕེབས་ཀྱིས་བསྡད་དེ། སྣོད་ཐམས་ཅད་གཡུ་ལོ་བཀོད་པའི་དག་ཞིང་གི་ཁྱད་ཆོས་ཡོངས་སུ་རྫོགས་ཤིང་། བཅུད་ཀྱི་སེམས་ཅན་མ་ལུས་པ་འཕགས་མའི་སྐུའི་རྣམ་རོལ་དུ་མོས་འདུན་རྩེ་གཅིག་པའི་ངང་ནས། འཕགས་ཡུལ་མཁས་གྲུབ་རྒྱ་མཚོའི་ཐུགས་བཅུད། གངས་ཅན་བོད་ཀྱི་བླ་ན་མེད་པའི་ཁྱད་ནོར། རྣལ་འབྱོར་རྒྱུད་ཀྱི་ཡང་རྩེ། ཕྲིན་ལས་ཐམས་ཅད་འབྱུང་བའི་སྒྲོལ་མ་འདུས་པ་དོན་དམ་པ་7ཞེས་བྱ་བ། གྲུབ་ཆེན་ཞི་བ་སྦས་པའི་དངོས་སློབ། རྒྱ་གར་ལྷོ་ཕྱོགས་སུ་སྐུ་འཁྲུངས་པ་གྲུབ་ཆེན་བུདྡྷ་གུཔྟ་ནཱ་ཐའི་ཞལ་སྔ་ནས། རྗེ་བཙུན་ཏཱ་ར་ནཱ་ཐས་དངོས་སུ་མནོས་ཤིང་། བོད་ཡིག་ཏུ་ལེགས་པར་བསྒྱུར་ཏེ་གཏན་ལ་ཕབ་པ། ཡོངས་གྲགས་སུ་སྒྲོལ་མ་རྣལ་འབྱོར་མའི་རྒྱུད་དང་། ཁོང་གིས་མཛད་པའི་དེའི་བསྡུས་དོན་གསལ་བའི་སྒྲོན་མེ་8གཉིས་ཚིག་དོན་རྗེས་དྲན་གྱི་སྒོ་ནས་དལ་བུར་བཏོན། རྒྱུད་དེའི་རྣལ་འབྱོར་ཆེན་པོའི་ལེའུ་9ལས།

“སེམས་ནི་ནམ་མཁར་གྱུར་པ་ལ།།

ཟླ་བ་ཉི་མ་ནུབ་པ་དང་།།

མུན་པའི་ཡེ་ཤེས་ཐིམ་པ་ན།།

རྡོ་རྗེའི་ལྷ་ནི་འགྲུབ་པར་འགྱུར།།”  ཞེས་པའི་མཚམས་ལ་བསླེབས་སྐབས། གློ་བུར་དུ་འབྲུག་སྐད་དྲག་པོ་གྲགས་ཤིང་། གློག་དམར་འཁྱུགས། དྲག་ཆར་ཞིག་བབ་སྟེ། ཡིད་ཙམ་རིང་མུན་རུབ་པ་ལྟ་བུ་བྱུང་ཡང་། མུ་མཐུད་དུ་སྒྲོལ་མའི་རྒྱུད་ཚང་བར་བཏོན། ཅུང་ཙམ་ནས་ཆར་བ་འབབ་མཚམས་བཞག་པ་དང་། སྒྲོལ་མའི་རྒྱུད་ཀློག་འདོན་གྲུབ་པ། ནམ་མཁའ་སྔོ་བསངས་སུ་གྱུར་བ། ཉི་འོད་འཇམ་པོ་ཞིག་དལ་གྱིས་འཕྲོས་ཏེ། ཁོར་ཡུག་གི་རི་ཀླུང་ཀུན་ལ་ཁྱབ་པ་བཅས་དུས་མཉམ་བྱུང་།

མཇུག་ཏུ་སྒྲོལ་མ་ཉེར་གཅིག་གི་བསྟོད་པ་ཚར་གཅིག་ཕན་ཡོན་དང་བཅས་པ་བཏོན་རྗེས། དགེ་རྩ་རྫོགས་བྱང་དུ་བསྔོས། སླར་ཡང་ལྷ་ཁང་གི་བཀོད་དབྱིབས་དང་། ཕྱི་ནང་ཡོངས་རྫོགས་ལ་ཞིབ་མཇལ་འདོད་བློ་ཚིམ་པ་ཞིག་བྱས་ནས་དུས་ཚོད་ ༡:༣༠ ཙམ་གྱི་ཐོག་ལམ་ལ་བུད། ལམ་བར་དུ་རྒྱ་གར་ཟ་ཁང་ཞིག་ཏུ་འབྲས་དང་རྡ་ལི་བརྒྱག་ཚད་ཅིག་བཟས། དགོང་མོའི་དུས་ཚོད་ ༣ ཙམ་ལ་སྡོད་གནས་སུ་འབྱོར།

ངས་གསལ་བོར་ཤེས་ཀྱིན་ཡོད། དེང་དུས་མི་དང་མིའི་བར་གྱི་འབྲེལ་བ་དང་ཡིད་ཆེས། དེ་བས་ཀྱང་ཤེས་དམན་བདག་ལྟ་བུའི་ཟིན་བྲིས་དང་སྐད་ཆར་ཆ་འཇོག་བྱེད་མཁན་སུ་ཡང་མེད་མོད། གང་ཟག་ལ་མི་རྟོན་ཆོས་ལ་རྟོན་གསུངས་པ་ལྟར། བོད་མི་གནས་སྐོར་བ་རྣམས་དང་། ལྷག་པར་དུ་ཕྲིན་ལས་ཀྱི་ལྷ་རྗེ་བཙུན་སྒྲོལ་མར་དམིགས་བསལ་དད་གུས་དང་། རྒྱུན་དུ་སྒྲོལ་མ་ཁ་འདོན་བྱེད་མཁན་རྣམས་ཀྱིས། ངས་བཤད་པ་འདི་དག་སྣང་མེད་དུ་བཞག་ནས་གཡུག་རྐྱང་མི་བྱེད་པར་གནས་དེར་ལན་གཅིག་ཕེབས་ནས་ཚོད་ལྟ་ཞིག་བྱོས་དང་། གཅིག་བྱས་ན་ཁྱེད་ལ་ངེས་ཤེས་གསར་བ་ཞིག་སྐྱེ་སྲིད་ལ། སྔར་མེད་ཀྱི་བློ་བསྐྱེད་ཅིག་ཀྱང་འབྱུང་སྲིད་པ་མ་ཟད། རྗེ་བཙུན་སྒྲོལ་མའི་བྱིན་རླབས་ཀྱི་ཉི་འོད་ཅིག་ཀྱང་ཁྱེད་ཀྱི་ལུས་ལ་ཕོག་མི་སྲིད་པ་མིན།

ཕྱི་ལོ་ ༢༠༢༥ ཟླ་ ༧ ཚེས་ ༡༢ ཉིན།

དཔྱད་གཞིའི་ཡིག་ཆ།

1. ངག་དབང་བློ་གྲོས་གྲགས་པའི་གསུང་འབུམ། པོད། ང ཛཾ་ཐང་པར་མ། དབྱིན་ཨང་། 2-310.4
2. རྗེ་བཙུན་ཏཱ་ར་ནཱ་ཐའི་གསུང་འབུམ། རྟག་བརྟན་པར་མ། གླེགས་བམ། 15 དབྱིན་ཨང་། 4-537.6
3. རྗེ་བཙུན་ཏཱ་ར་ནཱ་ཐའི་གསུང་འབུམ། རྟག་བརྟན་པར་མ། གླེགས་བམ། 15 དབྱིན་ཨང་། 2-540.3
4. རྗེ་བཙུན་ཏཱ་ར་ནཱ་ཐའི་གསུང་འབུམ། རྟག་བརྟན་པར་མ། གླེགས་བམ། 15 དབྱིན་ཨང་། 5-540.7
5. ཕྲིན་ལས་ཐམས་ཅད་འབྱུང་བའི་སྒྲོལ་མ་འདུས་པ་དོན་དམ་པ་ཞེས་བྱ་བ་རྣལ་འབྱོར་མའི་རྒྱུད་ཀྱི་རྒྱལ་པོ། བཀའ་འགྱུར་དཔེ་བསྡུར་མ། རྒྱུད་འབུམ། ༼ཅ༽ དབྱིན་ཨང་། 989
6. སྒྲོལ་མའི་རྒྱུད། བཀའ་འགྱུར་དཔེ་བསྡུར་མ། རྒྱུད་འབུམ། ༼ཅ༽ དབྱིན་ཨང་། 986
7. སྒྲོལ་མའི་རྒྱུད། བཀའ་འགྱུར་དཔེ་བསྡུར་མ། རྒྱུད་འབུམ། ༼ཅ༽ དབྱིན་ཨང་། 975-994
8. རྗེ་བཙུན་ཏཱ་ར་ན་ཐའི་གསུང་། དབུ་ཅན་ལག་བྲིས་མ།
9. བཀའ་འགྱུར་དཔེ་བསྡུར་མ། རྒྱུད་འབུམ། ༼ཅ༽ དབྱིན་ཨང་།དབྱིན་ཨང་། 17-978.18