༸གོང་མཆོག་ནས་ཆབ་སྲིད་ཀྱི་ཐོག་ནས་འགྱུར་བ་མང་པོ་ཞིག་བྱུང་ཡོད་ཀྱང་ངོས་ཀྱི་རྩ་བའི་དམ་བཅའ་སྡེ་སྣོད་གསུམ་ཉར་ཚགས་བྱ་རྒྱུ་གལ་ཆེན་དོན་ཆེན་ཞིག་ལ་བརྩིས་ཡོད། ཅེས་བཀའ་སློབ་བསྩལ་སོང་།
དེ་རིང་ཕྱི་ཟླ་ ༩ ཚེས་ ༢༠ ཉིན་གྱི་སྔ་དྲོར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ལྷོ་ཤར་ཨེ་ཤ་ཡའི་ནང་པའི་རྒྱལ་ཁབ་ཁག་དང་ཀོ་རི་ཡའི་ནང་པ་རྣམས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་སོང་། སྐབས་དེར་༧གོང་ས་མཆོག་དབུ་བཞུགས་ཐོག་ལྷོ་ཤར་ཨེ་ཤ་ཡའི་ནང་པའི་རྒྱལ་ཁབ་ཁག་ནས་སོ་སོའི་རྒྱལ་ཁབ་ཀྱི་རིག་གཞུང་འཁྲབ་སྟོན་གཟུགས་འབུལ་ཞུས་སོང་། དེ་རིང་གི་བརྟན་བཞུགས་དེའི་སྟེང་ཨེ་ཤ་ཡའི་རྒྱལ་ཁབ་ཁག་གི་དད་ལྡན་མང་ཚོགས་གཙོས་དྷ་ས་ཁུལ་གྱི་སེར་སྐྱ་མི་མང་བཅས་འཛོམས་འདུག
༸གོང་ས་རྒྱལ་བ་རིན་པོ་ཆེ་མཆོག་ནས། ངོས་རང་མདོ་སྨད་ཀྱི་ས་ཁུལ་དུ་སྐྱེས་ཏེ་དེ་ནས་ལྷ་ས་བསླེབ། ཆུང་དུས་དགེ་རྒན་རྣམ་པའི་ཐུགས་རྗེ་བཀའ་དྲིན་གྱིས་དཔེ་ཆ་ལ་བལྟས་ཡོད། ཁ་དོག་དཀར་དམར་ནས་ཚད་མ་དང་དབུ་མ། འདུལ་བའི་གཞུང་ལ་བལྟས་པ་རེད། མཛོད་ལ་དོ་སྣང་ཞེ་དྲགས་བྱེད་རྒྱུ་མ་བྱུང་། དེའི་ནང་རི་རབ་གླིང་བཞི་གླིང་ཕྲན་བཤད་ཡོང་དུས། དེ་ཙམ་དགོས་པ་ཆེ་བ་ཡང་མཐོང་མ་བྱུང་། གཞན་དབུ་ཕར་གྱི་གཞུང་དེ་དག་ལ་བལྟས་པ་རེད། ལྷག་དོན་ཤེས་པའི་རྣམ་བཞག་ལ་བལྟས་ཡོང་དུས་སེམས་ཁམས་རིག་པའི་སྐོར་དང་། ལུས་དེ་ཡུལ་ལ་འཇུག་ཚུལ་གྱི་སྐོར་ཧ་ཅང་གསལ་བོ་དང་ནུས་པ་ཆེན་པོ་ཡོད་བསྡད་པ་ཞིག་རེད། ངོས་ཀྱིས་གཞུང་དེ་དག་གལ་ཆེན་པོ་བརྩིས་ནས་ཧུར་ཐག་འབད་ཐག་བལྟས་པ་ཡིན། ཞོགས་པ་ཡར་ལངས་པ་དང་རྗེ་བཙུན་འཇམ་དཔལ་དབྱངས་ལ་གསོལ་བ་བཏབ་ཡིན། སྐབས་དེ་དུས་མཚན་ཞབས་ཚོས་ཀྱང་རོགས་རམ་བཀའ་དྲིན་བསྐྱངས་ཏེ་དཔེ་ཆ་མང་པོ་བལྟས་པ་རེད། གདན་ས་ཁག་ཏུ་གྲྭ་སྐོར་བྱས་པ་དང་། ལྷ་སའི་གཙུག་ལག་ཁང་ནས་དམ་བཅའ་བཞག་པ་སོགས་ཧ་ཅང་སྐལ་བ་བཟང་པོ་བྱུང་། ངོས་རང་གང་ཡང་མི་ཤེས་པའི་གྲོང་གསེབ་ཀྱི་ཕྲུ་གུ་ཞིག་རེད། ལྷ་སར་བསླེབ་ནས་གཞུང་དེ་དག་བལྟས་ཏེ་གང་འཚམ་རྣམ་དཔྱོད་འཕེལ་བ་ཧ་ཅང་སྐལ་བ་བཟང་བོ་བྱུང་། མཚན་ཞབས་ཚོའང་ཧ་ཅང་བཀའ་དྲིན་ཆེན་པོ་རེད། མཚན་ཞབས་ཀྱི་ནང་ནས་དཔེ་ཆ་ཡག་པོའི་གྲས་སུ་རྩོད་པ་བརྩད་པ་དང་། གཞུང་གོང་འོག་བསྒྲིགས་ཏེ་བསམ་བློ་བཏང་། མཚན་ཞབས་ནང་ནས་བདེ་ཡངས་མཚན་ཞབས་ལ་རིག་པ་ཧ་ཅང་གསལ་བོ་ཡོད་པ་མ་རེད། ངོས་ཀྱིས་བདེ་ཡངས་མཚན་ཞབས་ལ་ཐུབ་མདོག་མདོག་བཤད་ཀྱི་ཡོད། བདེ་ཡངས་མཚན་ཞབས་ལ་སྐད་ཆ་བཤད་དུས་ངོས་རང་གྲུང་པོ་ཡོད་པ་རེད། དེ་འདྲ་བྱས་ཏེ་ངོས་ཀྱི་མི་ཚེ་བསྐྱལ་བ་རེད། དེ་ནས་གྲྭ་སྐོར་བཞག་པ་དང་ལྷ་སའི་གཙུག་ལག་ཁང་དུ་དགེ་བཤེས་ཀྱི་དམ་བཅའ་བཞག་པ་ཧ་ཅང་སྐལ་བ་བཟང་བོ་ཡིན། ཞེས་གསུངས་སོང་།
༸མགོན་པོ་གང་ཉིད་མཆོག་ནས། ཆབ་སྲིད་ཀྱི་འགྱུར་བ་མང་པོ་བྱུང་བ་རེད། ཡིན་ནའང་ངོས་ཀྱི་རྩ་བའི་དམ་བཅའ་སྡེ་སྣོད་གསུམ་ཉར་ཚགས་བྱ་རྒྱུ་དེ་གལ་ཆེན་དོན་ཆེན་ཞིག་ལ་བརྩིས་ཡོད། མཐའ་མར་ནོར་བུ་གླིང་ཁ་ནས་ཡོང་དུས། དེར་ཡོད་པའི་མགོན་པའི་སྣང་བརྙན་ཞིག་ཡོད་པ་དེར་གསོལ་བ་བཏབ་པ་ཡིན། ནོར་བུ་གླིང་ཁ་ནས་གྲུ་བསྡད་དེ་ལྷ་སའི་གཙང་པོ་བརྒལ་ཡོང་དུས། ཕྱིར་བལྟས་བྱེད་སྐབས་སེམས་སུ་དགའ་སྐྱོ་ཟུང་འབྲེལ་བྱུང་། ཕྱོགས་གཅིག་ནས་ལྷ་ས་ཁ་བྲལ་སྟེ་སེམས་སྐྱོ་བོ་ཡོང་བ་ཞིག་དང་། ཡང་ཕྱོགས་གཅིག་ནས་རང་དབང་གི་སར་བསླེབས་ཀྱི་ཡོད་པའི་ཆ་ནས་སྤྲོ་བ་བྱུང་། དེ་ནས་རིམ་བཞིན་མོན་ནས་རྒྱ་གར་ཏུ་བསླེབ་པ་རེད། རྒྱ་གར་གྱི་སྲིད་བློན་ནེ་ཧ་རུ་སོགས་ཀྱིས་དངོས་གནས་ཤ་ཚ་རྣམ་དག་གི་ཐོག་ནས་རོགས་རམ་དང་མཐུན་རྐྱེན་སྒྲུབ་པར་ཧ་ཅང་བཀའ་དྲིན་ཆེན་པོ་ཡིན། རྒྱ་གར་ནང་དངོས་གནས་བདེ་སྐྱིད་ལྡན་པའི་ཐོག་ནས་འབྱོར་བ་རེད། རྒྱ་གར་འབྱོར་རྗེས་འཛམ་གླིང་གང་ས་ནས་ཡོང་བའི་ནང་ཆོས་ཐོག་དོ་སྣང་ཡོད་མཁན་རྣམས་ལ་འགྲེལ་བཤད་བརྒྱབ་པའི་སྐལ་བ་བཟང་པོ་ཡིན། འཛམ་གླིང་འདིར་ཆོས་ལུགས་འདྲ་མིན་མང་པོ་ཡོད་ཀྱང་། སངས་རྒྱས་ཀྱི་ཆོས་དེ་སེམས་ཁམས་རིག་པ་འབྲེལ་བ་ཡོད་པ་དང་། ཕྱི་དངོས་པའི་གནས་ཚུལ་ཕྲ་རགས་ཀྱི་ཐོག་ནས་བཤད་རྒྱུ་ཧ་ཅང་བཟང་པོ་རེད། ངོས་རང་གཉིད་སད་མ་ཐག་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་སྐོར་ལ་བསམ་བློ་བཏང་སྟེ་མི་ཚེ་བསྐྱལ་བ་རེད། དེ་རིང་རྒྱ་གར་འཕགས་པའི་ཡུལ་གྱི་ནུབ་ཕྱོགས་ཀྱི་ས་ཁུལ་འདིར་ངོས་ཀྱི་སྐྱེས་སྐར་རམ་ཁྱེད་ཚོའི་དད་པའི་ཀུན་ནས་བླངས་ཏེ་ཚོགས་འདུ་འཚོག་པ་རེད། དེ་རིང་འདིར་ནང་པའི་ཡུལ་གྲུ་ཁག་ནས་དགེ་སློང་རྣམ་པ་ཕེབས་པར་ཐུགས་རྗེ་ཆེ་ཞུ་རྒྱུ་ཡིན། འཛམ་གླིང་གི་ཡུལ་གྲུ་གང་ས་ནས་བསླེབ་པ་ཚང་མ་རྒྱུ་དངོས་པོ་བལྟས་ཡོང་བ་མ་རེད། དངོས་གནས་དྲང་གནས་ཆོས་ཕྱོགས་ཀྱི་སེམས་ཤུགས་བསྐྱེད་དེ་འཛོམས་པ་རེད། ངོས་རང་ལ་ཆ་བཞག་ནའང་ལོ་འདི་དག་རིང་དཔེ་ཆ་བལྟས་ཏེ། ཉིན་རེ་བཞིན་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསྒོམ་ནས་མི་ཚེ་བསྐྱལ་བཞིན་ཡོད། དེ་རིང་འདིར་ཆོས་གྲོགས་མང་པོ་མཉམ་དུ་འཛོམས་པ་ཧ་ཅང་དགའ་བོ་བྱུང་། ཐུགས་རྗེ་ཆེ་ཞུ་ཡིན། ཞེས་གསུངས་སོང་།
༸གོང་ས་མཆོག་ནས། ངོས་རང་གིས་སངས་རྒྱས་ཆོས་ཀྱི་ཉམས་ལེན་ཧུར་ཐག་འབད་ཐག་བྱེད་བཞིན་ཡོད། གཙོ་བོ་འདུལ་བའི་དོགས་པའི་ཐོག་ནས་ཕར་ཕྱིན་དང་། དབུ་མའི་རིག་པ་དེ་ལ་སྦྱར་གྱི་ཡོད། ངོས་ཀྱི་བསམ་བློ་བཏང་ན་རང་ཉིད་ཆོས་པ་ཡག་པོ་ཞིག་ཆགས་བསྡད་ཡོད། ཉིན་རེ་བཞིན་དུ་བྱང་ཆུབ་ཀྱི་སེམས་དང་སྟོང་ཉིད་བསྒོམ་ནས་མི་ཚེ་བསྐྱལ་བཞིན་ཡོད། སྔོན་མ་རྒྱ་ནག་ཏུ་ཕྱིན་པའི་སྐབས་སུ་དེ་ག་རང་བྱས་ཏེ་ཕྱིན་པ་ཡིན། ངོས་ཀྱིས་མའོ་ཙེ་ཏུང་ལ་ཐེངས་མང་པོ་ཐུག་པ་རེད། ཁོས་ངོས་རང་ལ་ཧ་ཅང་དགའ་བོ་བྱེད་ཀྱི་རེད། མའོ་ཙེ་ཏུང་གིས་ངོས་རང་ལ་ཆོས་ཟེར་བ་དུག་རེད་ཅེས་བཤད་བྱུང་། ངོས་རང་སེམས་མ་བདེ་བ་ཏོག་ཙམ་བྱུང་ཡང་། མའོ་ཙེ་ཏུང་སྙིང་རྗེ་བསམ་པ་ཞིག་སེམས་སུ་འཁོར་བྱུང་། དེ་ནས་ཕྱི་ལོ་ ༡༩༥༩ ལོའི་དོན་རྐྱེན་བྱུང་སྟེ་རྒྱ་གར་དུ་བསླེབ་པ་རེད། རྒྱ་གར་རང་དབང་ལུང་པའི་ནང་དུ་སོ་སོའི་ཆོས་བྱེད་པ་དང་མི་གཞན་ལ་ཆོས་བཤད་པ། དངོས་ཡོད་གནས་ཚུལ་འཛམ་གླིང་དུ་བཤད་པ་རེད། འཛམ་གླིང་དུ་ནང་པའི་ཆོས་བྱེད་མཁན་ཇེ་མང་དུ་འགྲོ་བཞིན་འདུག ངོས་རང་ལ་རྒྱལ་བ་རིན་པོ་ཆེ་ཞེས་ཆོས་ཕྱོགས་ཀྱི་མགོ་ཁྲིད་ཞིག་ལ་ངོས་འཛིན་བྱས་ཏེ། འཛམ་གླིང་གང་ས་ནས་ནང་པའི་ཆོས་ཀྱི་ཐོག་བགྲོ་གླེང་བྱེད་པར་ཡོང་བསྡད་ཀྱི་འདུག ངོས་རང་གིས་ཧུར་ཐག་འབད་ཐག་བྱས་པ་ཡིན། དེ་རིང་འདིར་ནང་པའི་དུས་ཚིགས་ཤིག་དང་བསྟུན་ནས་འདིར་ཚོགས་འདུ་འཚོག་པ་རེད། དགེ་སློང་རྣམ་པ་ཕེབས་པར་ཐུགས་རྗེ་ཆེ་ཞུ་རྒྱུ་ཡིན། དེ་མིན་ལུང་པ་འདྲ་མིན་གྱི་སེར་སྐྱ་མང་པོ་ཡོད་པ་རེད། དངོས་གནས་ཚང་མ་ལྷག་བསམ་གཅིག་ཏུ་དཀར་པ་རེད། བསྟན་པའི་བྱ་བ་བསྒྲུབ་བསམ་པའི་དད་པ་དང་དམ་ཚིག་གི་བློ་ཕྱུག་པོའི་ཐོག་ནས་དེ་རིང་འཛོམས་པ་རེད། ངོས་རང་ཕ་ཡུལ་ནས་ལྷ་སར་ཡོང་ནས་དཔེ་ཆ་བལྟས་ཏེ་མཐའ་མར་གཙུག་ལག་ཁང་དུ་གྲྭ་སྐོར་དམ་བཅའ་བཞག་པ་ཡིན། བསྟན་པ་བཀའ་དྲིན་གྱི་རྗེས་འཇུག་ཧུར་ཐག་འབད་ཐག་བྱས་པ་དེ་འདྲ་ཡིན། ངོས་ལ་བསྟན་པ་འཛིན་མཁན་རྒྱལ་བ་རིན་པོ་ཆེ་ཞེས་དགའ་མོས་བྱེད་མཁན་མང་པོ་ཞིག་ཡོང་བསྡད་ཀྱི་འདུག ཚང་མའི་རྒྱུད་དུ་དགེ་བའི་ས་བོན་གང་འཚམ་འདེབས་ཐུབ་ཀྱི་ཡོད་པ་རེད། དུས་ཚིགས་འདི་དང་བསྟུན་ནས་ཆོས་པ་མང་པོ་ཞིག་འཛོམས་འདུག ཚང་མར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་སོང་།
དགའ་ལྡན་ཕོ་བྲང་གི་དྲ་རྒྱའི་སྟེང་གི་མཛད་འཆར་ལྟར་ན། ཕྱི་ཟླ་ ༡༠ ཚེས་ ༣ ཉིན་ཐེག་ཆེན་ཆོས་གླིང་གཙུག་ལག་ཁང་དུ། ཐའེ་ཝན་གྱི་དད་ལྡན་མང་པོས་ཇི་ལྟར་གསོལ་བ་བཏབ་པ་ལྟར། ༸གོང་ས་རྒྱལ་བ་རིན་པོ་ཆེ་མཆོག་ནས་ཆོས་འབྲེལ་བཀའ་དྲིན་སྩལ་རྒྱུ། ཕྱི་ཟླ་ ༡༠ ཚེས་ ༨ ཉིན་ཐེག་ཆེན་ཆོས་གླིང་གཙུག་ལག་ཁང་དུ། ཨོ་སི་ཊི་ལི་ཡ་རྒྱལ་ཡོངས་བོད་རིགས་སྤྱི་མཐུན་ཚོགས་པ་དང་། ཡུ་རོབ་བོད་རིགས་ཚོགས་པ། བོད་ཀྱི་གཞོན་ནུ་ལྷན་ཚོགས་བཅས་ཀྱིས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ། དེ་བཞིན་ཕྱི་ཟླ་བ་ ༡༡ ཚེས་ ༡༧ ཉིན་༸གོང་ས་རྒྱལ་བ་རིན་པོ་ཆེ་མཆོག་ཐེག་ཆེན་ཆོས་གླིང་གཙུག་ལག་ཁང་དུ། དབུས་བོད་སློབ་འཛིན་སྐྱོང་ཚོགས་པའི་ཁྱབ་ཁོངས་གྱི་གཏན་སློབ་(CST)ཁག་བདུན་གྱི་སློབ་མ་ཟུར་པ་དང་། བོད་ཕྲུག་ཁྱིམ་སྡེ། མ་སུ་རིའི་བོད་ཁྱིམ། རྒྱ་གར་དང་བལ་ཡུལ་གྱི་ཉིན་སློབ་ཁག་བཅས་ནས་འཚོག་གཏན་འཁེལ་བའི་བཀའ་དྲིན་རྗེས་དྲན་གྱི་མཛད་སྒོར་ཆིབས་བསྒྱུར་བསྐྱང་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
