རྒྱ་རིགས་སྒྱུ་རྩལ་བ་ཚའེ་གོ་ཆང་ཟེར་བ་དང་ཁེ་ན་ཌའི་གྱོན་ཆས་བཟོ་ཚོང་ཁང་གཉིས་ཀྱིས་རྒྱལ་རྩེ་རྫོང་ར་ལུང་ཡུལ་ཚོའི་ཧི་མ་ལ་ཡའི་རི་འདབས་སུ་ཤོག་སྦག་གི་སྒྱུ་རྩལ་འགྲེམས་སྟོན་བྱས་ནས་བོད་ཀྱི་ཁོར་ཡུག་གཏོར་སྐྱོན་བཏང་བར་ངོ་རྒོལ་བསྒྲགས་གཏམ་སྤེལ།
དེ་རིང་ཕྱི་ཚེས་ ༢༤ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཉེ་འགྲམ་གྱི་བོད་ཀྱི་དཔའ་བོ་དཔའ་མོའི་རྗེས་དྲན་རྡོ་རིང་མདུན་དུ། དྷ་ས་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག ཉེ་ལམ་བོད་གཞིས་ཀ་རྩེ་གྲོང་ཁྱེར་རྒྱལ་རྩེ་རྫོང་ར་ལུང་ཡུལ་ཚོའི་ཧི་མ་ལ་ཡའི་རི་འདབས་སུ། རྒྱ་ནག་གི་སྒྱུ་རྩལ་བ་ཚའེ་གོ་ཆང་ཟེར་བ་དང་ཁེ་ན་ཌའི་གྱོན་ཆས་བཟོ་ཚོང་ཁང་ (Arc’teryx)གཉིས་ཀྱིས་མཉམ་འབྲེལ་ཐོག འབྲུག་དབྱིབས་མཚོན་མདངས་ཅན་གྱི་ཤོག་སྦག་མང་པོ་སྤར་སྟེ་བོད་ཀྱི་ཁོར་ཡུག་གཏོར་སྐྱོན་བཏང་བར་ངོ་རྒོལ་གྱི་བསྒྲགས་གཏམ་ཞིག་སྤེལ་ཏེ། རྒྱ་ནག་གིས་བོད་ནང་གི་རང་བྱུང་ཁོར་ཡུག་ལ་གཏོར་བརླག་གཏོང་བར། རྒྱལ་སྤྱིའི་ནང་ཐེར་འདོན་བྱ་རྒྱུ་གལ་ཆེན་ཡིན་སྐོར་སོགས་བརྗོད་སོང་།
གནད་དོན་དེ་དང་འབྲེལ་ནས་དྷ་ས་ས་གནས་གཞོན་ནུ་ལྷན་ཚོགས་ཀྱི་དྲུང་ཆེ་ལྷོ་བྲག་མཐར་ཕྱིན་ལགས་ཀྱིས་འདི་གའི་གསར་འགོད་པར། བོད་ནང་གི་བོད་མི་རྣམས་དང་དམིགས་བསལ་རྒྱ་རིགས་ཁོར་ཡུག་ཐོག་དོ་སྣང་བྱེད་མཁན་མང་པོས་བོད་ཀྱི་ཁོར་ཡུག་གཏོར་སྐྱོན་བཏང་བར་སྐྱོན་བརྗོད་བྱས་ཡོད་པ་རེད། ཡིན་ནའང་བཙན་བྱོལ་དུ་ཡོད་པའི་བོད་མི་རྣམས་ཀྱིས་བོད་ནང་དུ་དཀའ་ངལ་འཕྲད་བཞིན་པའི་གནད་དོན་ཐོག་འགན་འཁུར་རྒྱུ་གལ་ཆེན་པོ་ཆགས་ཡོད། དེའི་ཆེད་དུ་ལས་འགུལ་སྤེལ་དགོས་རྒྱུ་གལ་ཆེན་པོ་རེད། ད་ལན་གྱི་གསར་འགོད་བསྒྲགས་གཏམ་ནང་ཞུས་པ་བཞིན་ཚའེ་གོ་ཆང་གིས་ཤོག་སྦག་སྤར་བ་དེ་ཁོར་ཡུག་གནད་དོན་ཁྲོད་ཀྱི་དཔེ་མཚོན་གཅིག་ཆགས་པ་རེད། ད་ལན་གྱི་གནད་དོན་འདིས་ག་རེ་སྟོན་གྱི་ཡོད་རེད་ཟེར་ན། རྒྱ་ནག་གཞུང་གི་ས་གནས་དབང་འཛིན་པ་ཚོས་དབང་ཆ་བེད་སྤྱོད་བཏང་ནས་ཁོར་ཡུག་ལ་གནོད་སྐྱོན་བཟོས་པར་བསམ་བློ་གཏོང་གི་མེད་པ་གསལ་པོ་རེད། བོད་ནང་དུ་རྒྱ་ནག་གི་དབང་འཛིན་པ་མང་དུ་ཕྱིན་པ་དང་། ཁོ་ཚོ་བརྒྱུད་ནས་བོད་ཀྱི་ཁོར་ཡུག་གཏོར་སྐྱོན་གྱི་གནད་དོན་ཡོང་བཞིན་པ་རེད། གནད་དོན་འདིའི་རིགས་ཀྱི་ཐོག་ཕྱི་རྒྱལ་དུ་ཡོད་པའི་བོད་མི་རྣམས་ཀྱིས་ངོ་རྒོལ་ལས་འགུལ་སྤེལ་དགོས། རྒྱལ་སྤྱིའི་སྡིངས་ཆའི་སྟེང་བོད་ནང་གི་གནད་དོན་ཐོག་གསལ་སྟོན་བྱ་རྒྱུ་གལ་ཆེན་པོ་རེད། ཐེངས་འདིའི་ཁོར་ཡུག་གི་གནད་དོན་ཐོག་རྒྱ་ནག་ནང་གླེང་སློང་ཤུགས་ཆེན་པོ་བྱས་སོང་། རྒྱ་རིགས་རྣམས་ཀྱིས་བོད་ཀྱི་ཁོར་ཡུག་ཐོག་དོ་སྣང་བྱས་པར་ཐུགས་རྗེ་ཆེ་ཞུ་རྒྱུ་ཡིན། འོན་ཀྱང་། གནད་དོན་འདི་ནི་ཁོར་ཡུག་གི་གནད་དོན་གཅིག་པུ་མ་རེད། དེ་ནི་བོད་དེ་རྒྱ་ནག་གིས་བཙན་ཤེད་དང་ཧམ་བཤད་བྱས་པའི་གནད་དོན་ལས་བྱུང་བ་ཞིག་རེད། ང་ཚོས་རྒྱ་རིགས་རྣམས་ལ་གནད་དོན་གཙོ་བོ་གང་ནས་འབྱུང་གི་ཡོད་པ་བཤད་རྒྱུ་གལ་ཆེན་པོ་རེད། ཅེས་འགྲེལ་བརྗོད་གནང་བྱུང་།
དྷ་ས་ས་གནས་གཞོན་ལྷན་གྱི་བསྒྲགས་གཏམ་ནང་དུ། རྒྱ་མི་སྒྱུ་རྩལ་བ་ཚའེ་གོ་ཆང་གིས་ཁེ་ན་ཌའི་གྱོན་ཆས་བཟོ་ཚོང་ཁང་དང་མཉམ་འབྲེལ་ཐོག འབྲུག་གནམ་ལ་འཕུར་བ་ཞེས་པའི་སྒྱུ་རྩལ་འགྲེམས་སྟོན་གྱི་མིང་ཐོག་ནས་ཤོག་སྦག་བརྒྱ་ཕྲག་མང་པོ་སྤར་ཆེད་ས་གནས་བོད་མི་འཚོ་སྡོད་བྱ་སའི་ཁོར་ཡུག་དང་བདེ་ཐང་སོགས་ལ་གནོད་སྐྱོན་ཇི་ཡོད་ལ་བསམ་ཤེས་མེད་པ་མ་ཟད། ས་གནས་རྒྱ་གཞུང་གི་དབང་འཛིན་མི་སྣ་གོ་གནས་བེད་སྤྱོད་ཀྱིས་བོད་མིའི་སྒོ་ཕྱུགས་སེམས་ཅན་ས་ཆ་གཞན་དུ་བཙན་གྱིས་སྤོ་རུ་བཅུག་པ་སོགས་ཀྱི་བྱ་སྤྱོད་ལ་ང་ཚོས་མཐའ་གཅིག་ཏུ་ངོ་རྒོལ་སྐྱོན་བརྗོད་བྱ་རྒྱུ་ཡིན། གནས་ཚུལ་འདི་ཐོན་རྗེས་འཛམ་གླིང་ས་ཕྱོགས་གང་ས་ནས་ཚོགས་སྡེ་དང་གང་ཟག་སྒེར་པ་ཧ་ཅང་མང་པོའི་སྐྱོན་བརྗོད་དང་གནོན་ཤུགས་ལ་བརྟེན་ནས་སྒྱུ་རྩལ་བ་ཡིན་ཟེར་མཁན་ཁོ་པ་དང་གྱོན་ཆས་བཟོ་ཚོང་ཁང་གཉིས་ཀས་དགོངས་སེལ་དང་ས་གནས་རྒྱ་གཞུང་གིས་དོན་རྐྱེན་འདིར་ཞིབ་བཤེར་ནན་པོ་བྱ་རྒྱུ་ཡིན། འོན་ཀྱང་དེ་རིང་གི་སྡིངས་ཆ་འདི་བརྒྱུད་དེ་ང་ཚོས་རྒྱལ་སྤྱིའི་ཚོགས་སྡེ་ཁག་དང་རང་དབང་ལ་དགའ་བའི་གང་ཟག་ཡོངས་ལ་ཞུ་རྒྱུར། སྒྱུ་རྩལ་བའི་མིང་འཁུར་མཁན་ཚའི་གོ་ཆང་དང་འབྲེལ་བའི་ད་རེས་ཀྱི་དོན་རྐྱེན་འདི་ནི་རྒྱ་ནག་གི་བཙན་བཟུང་འོག་ཏུ་གནས་པའི་བོད་ས་ཡོངས་སུ་གནས་ཚུལ་འདི་རིགས་བྱུང་དང་འབྱུང་བཞིན་པའི་ནང་གི་དཔེ་ཚོན་ཕྲ་མོ་ཙམ་ཞིག་ཡིན། རྒྱ་གཞུང་གི་དཔོན་རིགས་ཚོས་ཁྲིམས་སྒྲིག་གཞི་སྣ་ཚོགས་པར་མིང་བཏགས་ཏེ་ས་གནས་བོད་མི་ཚོ་ཐ་ན་རང་ཉིད་ལ་ཕ་མེས་ཡང་མེས་དུས་ནས་དབང་བའི་ས་ཆའི་སྟེང་དུ་ཁང་པ་ཞིག་བརྒྱག་རྒྱུར་ཡང་བཀའ་ཁྲོལ་མི་རག་པ་སོགས་ཀྱི་དཀའ་ངལ་ཁོ་ནའི་འོག་ཏུ་གནས་དགོས་པ་དང་། དཔོན་རིགས་དེ་ཚོ་དང་འབྲེལ་བ་ཡོད་པའི་རྒྱ་མི་རིགས་ལ་ཁྲིམས་སྒྲིག་གཞི་གང་ཡང་མེད་པར་ས་ཁང་ཚོང་གཉེར་དང་རང་བྱུང་གཏེར་ཁ་གང་བྱུང་སྔོག་འདོན་སོགས་ཀྱི་ཆོག་མཆན་ལས་སླ་པོར་རག་ཐུབ་པ་སོགས། མདོར་ན་གནས་ཚུལ་འདི་དག་གི་འབྱུང་རྩ་གཙོ་བོ་ནི་བོད་ལ་བཙན་དབང་གིས་དབང་སྒྱུར་བྱེད་མཁན་རྒྱ་གཞུང་གི་དཔོན་རིགས་ཚོས་ལྐོག་ཟ་རུལ་སུངས་དང་མི་རིགས་དབྱེ་འབྱེད། དབང་ཤེད་བཙན་གནོན་གྱི་སྲིད་ཇུས་ཁག་ལ་བརྟེན་ནས་འབྱུང་གི་ཡོད་པར་ནན་བརྗོད་ཞུ་རྒྱུ་ཡིན། ཞེས་འཁོད་འདུག
གནད་དོན་དེ་དང་འབྲེལ་ནས་རྒྱ་ནག་གི་ནགས་ཚལ་སློབ་ཚོགས་རང་བྱུང་སློབ་གསོའི་དགེ་རྒན་དབྱང་ཤུས་ཀྱིས། ས་གནས་དེ་གའི་རྩི་ཤིང་སྐྱེ་འཚར་གྱི་དུས་ཡུན་ཧ་ཅང་རིང་བ་དང་ས་མཐོར་གྲང་ངར་ཆེ་བའི་རྩྭ་ཐང་གི་རྩི་ཤིང་ལོ་ལྟར་སྐྱེ་ཡུན་ཧ་ཅང་ཐུང་བས། ཤོག་སྦག་འབར་གས་ཀྱིས་ཐད་ཀར་རྩི་ཤིང་གི་རྩ་བར་གཏོར་སྐྱོན་ཕོག་ནས་འབྲས་བུ་ཐོགས་ཐབས་བྲལ་བའི་གནོད་འཚེ་ཕོག་སྲིད་པའི་ལྡོག་ཐབས་མེད་པའི་ཤུགས་རྐྱེན་འབྱུང་སྲིད། ཅེས་བརྗོད་འདུག
དེ་བཞིན་རྩི་ཤིང་རིག་པ་མཁས་ཅན་ཀུའུ་ཡིའུ་རུང་གིས། ས་བཅུད་དང་རང་བྱུང་ཁམས་ལ་གནོད་འཚེ་ཕོགས་ཚེ། སྤང་ཤུན་སླར་གསོ་ཡོང་བར་དུས་ཡུན་ལོ་བཅུ་ནས་བརྒྱ་བར་དགོས་པ་མ་ཟད། ཤོག་སྦག་འབར་གས་བྱུང་བའི་གཡོ་འགུལ་ལས་སྤང་རིམ་འཁྱོམས་ནས་རི་ཉིལ་ལམ་ཡང་ན་འདམ་རྡོའི་ཆུ་རུད་ཆུང་ངུའང་ཐོན་སྲིད་སྐོར་བརྗོད་འདུག
གསར་འགོད་པ། བྱམས་པ་ཚེ་རིང་།
