རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ནང་རྒྱལ་ཁབ་བཅུ་གྲངས་ཤིག་གི་འཐུས་མིས་བོད་དོན་གླེང་སློང་གནང་། 

རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྐོར་གྱི་ལྷན་ཚོགས་ཐེངས་ ༦༠ པའི་སྟེང་རྒྱལ་ཁབ་བཅུ་གྲངས་ཤིག་གི་འཐུས་མིས་བོད་དོན་གླེང་སློང་གནང་བ་དང་སྦྲགས་རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ལ་སྲུང་སྐྱོབ་བྱ་དགོས་པའི་འབོད་སྐུལ་གནང་འདུག

ཟླ་འདིའི་ཕྱི་ཚེས་ ༨ ནས་ཕྱི་ཟླ་ ༡༠ པའི་ཚེས་ ༨ བར་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྐོར་གྱི་ལྷན་ཚོགས་ཐེངས་ ༦༠ པ་དེ་སུད་སིར་འཚོག་མུས་ཡིན་པ་དང་། ཟླ་འདིའི་ཕྱི་ཚེས་ ༢༣ ཉིན་སུད་སི་སྐུ་ཚབ་དོན་གཅོད་ལས་ཁུངས་ཀྱི་བོད་དོན་ཞུ་གཏུག་ལས་བྱེད་ཕུན་ཚོགས་སྟོབས་རྒྱལ་ལགས་ཀྱིས། རྒྱལ་ཚོགས་སུ་བོད་ནང་གི་འགྲོ་བ་མིའི་ཐོབ་ཐང་ཇེ་སྡུག་ཏུ་འགྲོ་མུས་ཡིན་པ་དང་། རྒྱ་ནག་གཞུང་གིས་སྐུ་བཀྲོངས་བའི་སྤྲུལ་སྐུ་དཔལ་ལྡན་དབང་རྒྱལ་ལགས། མཆོག་སྤྲུལ་སྐུ་ཧཱུྃ་ཀར་རྡོ་རྗེ་མཆོག་སོགས་ཀྱི་སྐོར་ལ་གླེང་སློང་གནང་འདུག

སྐབས་དེར་བོད་དོན་ཞུ་གཏུག་ལས་བྱེད་ཕུན་ཚོགས་སྟོབས་རྒྱལ་ལགས་ཀྱིས་རྒྱལ་ཚོགས་ནང་བསྒྲགས་གཏམ་ཞིག་ཀློག་འདོན་གནང་བའི་ཁྲོད། བོད་ཁམས་གོ་འཇོ་ཁུལ་ཆོས་རྒྱལ་དགོན་པའི་དགོན་བདག་སྤྲུལ་སྐུ་དཔལ་ལྡན་དབང་རྒྱལ་ལགས་རྒྱ་ནག་གཞུང་གི་བཙོན་ཁང་དུ་རྡུང་རྡེག་མནར་གཅོད་འོག་སྐུ་བཀྲོངས་པ་དང་། རྒྱ་ནག་གཞུང་གིས་ཁྲིམས་འགལ་གྱིས་ཚེ་བཙོན་གྱི་བཙོན་འཇུག་ཁྲིམས་ཐག་བཅད་པའི་བོད་ཀྱི་ཚོང་དཔོན་རྡོ་རྗེ་བཀྲ་ཤིས་ཀྱི་གཅེན་མོ་མགོན་པོ་སྐྱིད་ལགས་ཀྱིས་ཁོང་ཉིད་ཀློད་གྲོལ་དགོས་པའི་ཞུ་གཏུག དེ་བཞིན་རྒྱ་ནག་གཞུང་གི་དྲག་གནོན་གྱི་འོག་ནས་མཆོག་སྤྲུལ་ཧཱུྃ་ཀར་རྡོ་རྗེ་མཆོག་ཝེ་ཐི་ནམ་དུ་སྐུ་བཀྲོངས་པ་དང་། བོད་ཀྱི་ན་གཞོན་གཞས་པ་ཨ་སངས་ལགས་དང་དཔལ་ཆུང་ལགས་གཉིས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་དང་བསྟུན་བསྟོད་གླུ་བླངས་རྐྱེན་བཙོན་འཇུག་བྱས་པ་དང་། བོད་ནང་རྒྱ་ནག་གིས་ཆུ་རགས་གསར་རྒྱག་སྐབས་ཡེ་ན་དགོན་པའི་གྲྭ་བ་རྒན་པ་ཚུད་པའི་བཙུན་པ་ཁག་ཅིག་འཛིན་བཟུང་བྱས་པའི་གནད་དོན་ཚུད་པའི། རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཇེ་ཞན་ཇེ་སྡུག་ཏུ་གཏོང་མུས་ཡིན་པའི་ཐད་ལ་ཞུ་གཏུག་དང་ཁ་གསལ་བཟོ་དགོས། ཞེས་བརྗོད་འདུག

ཕུན་ཚོགས་སྟོབས་རྒྱལ་ལགས་ཀྱིས་ཁ་པར་བརྒྱུད་འདི་གའི་གསར་འགོད་པར། ཕྱི་ཚེས ༢༣ ཉིན་རྒྱལ་ཚོགས་ཀྱི་བགྲོ་གླེང་སྐབས་བསྒྲགས་གཏམ་སྤེལ་རྒྱུའི་གོ་སྐབས་འབྱུང་སྐབས། ཆོས་རྒྱལ་དགོན་པའི་དགོན་བདག་སྤྲུལ་སྐུ་དཔལ་ལྡན་དབང་རྒྱལ་ལགས་དང་། སྤྲུལ་སྐུ་ཧཱུྃ་ཀར་རྡོ་རྗེ་མཆོག ཡེ་ན་དགོན་པའི་གྲྭ་བ་རྒན་པ་ཚུད་པའི་བཙུན་པ་ཁག་ཅིག་འཛིན་བཟུང་བྱས་པ་སོགས་ཀྱི་གནད་དོན་ཡར་ཞུ་ཐུབ་ཡོད་རེད། དེ་བཞིན་རྒྱལ་ཚོགས་མ་འཚོགས་པའི་སྔོན་དུ། ༧ཀུན་གཟིགས་༧པན་ཆེན་རིན་པོ་ཆེ་མཆོག་དང་བོད་ནང་གི་ཆབ་སྲིད་བཙོན་ཟུར་རྣམས་ཀྱི་གནད་དོན་དང་འབྲེལ་ནས་ཤོག་ངོས་བཞི་ལྔ་ཞིག་ཕུལ་ཡོད། ད་ལན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྐོར་གྱི་ལྷན་ཚོགས་ཐེངས་ ༦༠ པའི་སྐབས། སྤྱིར་བཏང་གི་བགྲོ་གླེང་སྐབས། རྒྱལ་ཁབ་བཅུ་གྲངས་ཤིག་གིས་བོད་ནང་གི་འགྲོ་བ་མིའི་ཐོབ་ཐང་དང་། རྒྱ་ནག་གཞུང་གིས་ཁྲིམས་སྒྲིག་དང་མཐུན་པའི་ཐོག་ནས་བོད་ནང་གི་བོད་མིའི་ཐོབ་ཐང་སྲུང་སྐྱོབ་དགོས་རྒྱུ་གལ་ཆེན་ཡིན་པའི་སྐོར་དང་། དབྱིན་ཡུལ་དང་ཨོ་གླིང་རྒྱལ་ཁབ་གཉིས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་ཀྱི་ཐད་ན་སུས་ཀྱང་ཐེ་ཇུས་བྱ་མི་ཆོག་སྐོར་གླེང་སློང་གནང་སོང་། ཞེས་བརྗོད་བྱུང་།

འདི་ལོའི་ཕྱི་ཟླ ༦ ཚེས་ ༡༧ ཉིན་མཉམ་འབྲེལ་རྒྱལ་ཚོགས་ཀྱི་ཕྱི་ལོ་ ༢༠༢༥ ལོའི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༥༩ པའི་སྟེང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་སྐུ་ཞབས་ཝལ་ཀིར་ཊག་(Volker Türk) ལགས་ཀྱིས། རྒྱ་ནག་གཞུང་གིས་བོད་ནང་ཁྲིམས་སྒྲིག་དང་འགལ་ནས་རིག་གཞུང་དང་གཞི་རྩའི་ཐོབ་ཐང་ཁག་ལ་དྲག་གནོན་བྱེད་མུས་ཡིན་པས། ངས་རྒྱ་ནག་གཞུང་གིས་རྒྱལ་སྤྱིའི་ཁྲིམས་སྒྲིག་གི་དགོངས་དོན་གཞིར་བཞག་གིས། མི་སྒེར་གྱི་གཞི་རྩའི་རང་དབང་གི་སླད་དུ་འབོད་སྒྲ་བསྒྲགས་ནས་འཛིན་བཟུང་བྱས་པ་རྣམས་ཀློད་གྲོལ་དགོས་པའི་རེ་སྐུལ་ཞུ་ཡི་ཡོད། ཅེས་གསུངས་ཡོད་པ་དང་སྦྲགས། རྒྱ་ནག་གཞུང་གིས་བོད་ནང་གི་དངོས་ཡོད་ཀྱི་གནས་ཚུལ་གསལ་འདོན་དང་། བོད་མི་རྣམས་ལ་གཞི་རྩའི་འགྲོ་བ་མིའི་ཐོབ་ཐང་དགོས་སྐོར་སོགས་གསུངས་འདུག  ཕྱི་ལོ་ ༢༠༢༤ ཟླ་ ༨ པར་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ཚན་པས་རྒྱ་ནག་རྒྱལ་ཁབ་བདེ་འཇགས་ཀྱི་གམ་གཞིར་བསྐྱར་ཞིབ་དང་རྟོག་ཞིབ་བྱ་དགོས་པ་དང་འབྲེལ་བའི་འབོད་སྐུལ་ཡིག་ཆ་ཞིག་སྤེལ་ཡོད་ཅིང་། རྒྱ་ནག་གཞུང་གིས་བོད་དང་ཤར་ཊུ་ཀི་སི་ཐན་གྲངས་ཉུང་མི་རིགས་ཀྱི་ཐོབ་ཐང་དང་ཆོས་ལུགས་རང་དབང་སོགས་ལ་གནོད་སྐྱོན་བཟོ་ཐབས་ཀྱི་སྲིད་ཇུས།  དྲག་སྤྱོད་རིང་ལུགས་བཀག་སྡོམ་གྱི་ཁྲིམས་དང་སྲིད་ཇུས་ཟེར་བ། ཉེས་ཁྲིམས། དེ་བཞིན་ཧོང་ཀོང་ནང་འདྲ་མཉམ་ཡོང་བ་དང་དབྱེ་འབྱེད་མེད་པ། རྒྱལ་ཁབ་བདེ་འཇགས་ཀྱི་ཁྲིམས་དང་། སེམས་འཚབ་ཆེ་བའི་འགྲོ་བ་མིའི་ཐོབ་ཐང་གི་གནས་སྟངས་སོགས་ཀྱི་སྐོར་ལ་གླེང་སློང་ཤུགས་ཆེན་གནང་ཡོད།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།